1-2. (a) Nega ta politikol oreadia be edena hadibaia hereva do idia gwauraia? (b) Edena henanadai do ita haerelaidia?

MANI OI LALOA politikol oreadia be hari “maino bona noho namo” ena hadibaia hereva idia gwauraia. Idia be reana mai hekokoroku ida do idia gwau, tanobada dekenai maino ia vara vadaeni. Danu, politikol oreadia do idia ura ita laloa tanobada ai idia vara hekwakwanai ibounai idia hamaoromaoroa diba. To, gabeai do ia vara gauna idia koua diba lasi! Dahaka dainai? Baibel ena peroveta herevana bamona, “karaharaga dika bada herea be idia latanai do ia ginidae, . . . bona do idia heau mauri diba lasi.”​—1 Tes. 5:3.

² Mai anina bada henanadai haida edia haere ita tahua be namo: “Hisihisi badana” lalonai dahaka do ia vara? Unai negai Iehova ia ura dahaka do ita karaia? Bona edena dala ai mai abidadama ida hisihisi badana ita haheaukalaia diba?​—Mat. 24:21.

3. Apokalupo 17:5, 15-18 ena hereva bamona, edena dala ai Dirava ese “Babulonia Badana” do ia hadikaia ore?

³ Apokalupo 17:5, 15-18 duahia. “Babulonia Badana” be do idia hadikaia ore! Matamanai ita herevalaia bamona, unai negai, politikol oreadia be do ia vara gauna idia koua diba lasi.  Dahaka dainai? Badina “Dirava ese iena palani be edia kudouna dekenai ia atoa, iena ura idia hagugurua totona.” Unai ura be dahaka? Tomadiho koikoi oreadia ibounai, Kerisendom * danu do idia hadikaia ore. Dirava ese ena ura be “dagedage animal kakakakana” ena “doana 10” edia kudouna dekenai do ia atoa. Unai doana 10 be gavamani ibounai ia laulaulaia, bona idia ese “dagedage animal”​—United Nations idia durua. (Apok. 17:3, 11-13; 18:8) Unai politikol oreadia ese tomadiho koikoi idia tuari henia neganai, hisihisi badana do ia matamaia. Unai be kara haraga tanobada ibounai dekenai do ia vara.

4. (a) Politikol oreadia ese tomadiho koikoi idia tuari henia ena badina be edena bamona do idia herevalaia? (b) Tomadiho koikoi edia memba taudia be dahaka do idia karaia?

⁴ Ita diba lasi politikol oreadia ese Babulonia Badana idia tuari henia ena badina be edena bamona do idia herevalaia. Reana do idia gwau tanobada ena tomadiho oreadia be maino idia havaraia lasi bona nega momo politikol karadia idauidau lalonai idia vareai. Eiava do idia gwau, tomadiho oreadia be moni bona kohu momo idia haboua noho. (Apok. 18:3, 7) Ia hahedinaraia, politikol oreadia ese tomadiho koikoi idia tuari henia neganai, reana unai tomadiho edia memba taudia ibounai do ia haorea lasi. To, tomadiho oreadia sibona do idia hadikaia. Unai orea ibounai idia hadikaia ore murinai, edia memba taudia do idia itaia edia tomadiho gunalaia taudia ese idia durudia lasi, unai dainai edia tomadiho do idia dadaraia.

5. Iehova be hisihisi badana totona, dahaka gwauhamata ia henia, bona dahaka dainai?

⁵ Baibel ese Babulonia Badana idia hadikaia ore ena daudau ia herevalaia lasi, to ita diba unai be do ia vara haraga. (Apok. 18:10, 21) Iehova ia gwauhamata unai nega “do ia hakwadogia” unai amo tomadiho momokani bona “ia abia hidi taudia” be hisihisi badana amo do idia roho mauri. (Mar. 13:19, 20) To, hisihisi badana ia matamaia bona Aramagedono tuarina ia vara neganai Iehova ia ura dahaka do ita karaia?

6. Dahaka dainai tomadiho koikoi amo ita raka siri sibona be hegeregere lasi?

⁶ Atikol ginigunana ai ita herevalaia bamona, Iehova ia ura ia idia tomadiho henia taudia be Babulonia Badana amo idia raka siri. To, tomadiho koikoi amo ita raka siri sibona be hegeregere lasi. Namona be iseda lalona ita hadaia tomadiho momokani ita badinaia totona, unai be Iehova ena tomadiho goevana. Mani unai do ita karaia daladia rua ita laloa.

7. (a) Edena dala ai Iehova ena kara maoromaoro taravatudia ita badinaia diba? (b) Heberu 10:24, 25 ese iseda hebou karana be edena bamona ia herevalaia, bona dahaka dainai hari unai be mai anina bada?

⁷ Ginigunana be, mai iseda goada ibounai ida Iehova ena kara maoromaoro taravatudia ita badinaia noho. Tanobada ena matabodaga karadia ita badinaia lasi. Hegeregere, matabodaga karadia idauidau, tatau bona tatau eiava hahine bona hahine idia headava karana ita dadaraia. (Mat. 19:4, 5; Roma 1:26, 27) Iharuana be, hanaihanai iseda tadikaka taihu ida Iehova ita tomadiho henia. Dala idauidau ai unai ita karaia diba, Kingdom Hall dekenai eiava iseda tadikaka taihu edia ruma dekenai, o hunia dalanai Iehova ita tomadiho henia diba. Herevana dahaka do ia vara, to iseda tadikaka taihu ida hebou karana ita rakatania lasi be namo. Momokani, namona be iseda hebou karana “ita habadaia noho, badina [ita] itaia unai dina be ia kahirakahira noho.”​—Heberu 10:24, 25 duahia.

8. Vaira negai, ita harorolaia sivaraina be edena dala ai do ia idau sisina?

⁸ Hisihisi badana ia vara neganai, ita harorolaia sivaraina be do ia idau sisina. Hari, ita be Basileia ena sivarai namona ita harorolaia bona ita gaukara goada hahediba taudia halaoa gaukarana ita karaia totona. To, unai negai, ita be mai momokani ida sivarai metauna ta do ita gwauraia. (Apok. 16:21) Ita ese Satani ena tanobada do idia hadikaia ore ena sivarai do ita harorolaia. Gabeai, unai sivarai ena anina korikori bona do ita harorolaia dalana do ita dibaia. Iseda haroro gaukara ita hagugurua totona lagani 100 lalonai ita karaia noho haroro dalana sibona do ita badinaia, a? Eiava haroro daladia ma haida do ita gaukaralaia? Unai ita diba lasi. Herevana edena haroro dalana ita badinaia, to ita diba mai gari lasi ida Iehova ena hahemaoro sivaraina do ita harorolaia!​—Ese. 2:3-5.

9. Ita harorolaia sivaraina dainai politikol orea be dahaka do idia karaia, to dahaka ita abia dae momokani?

⁹ Momokani ita harorolaia sivaraina ese politikol oreadia do ia habadua, bona do idia ura iseda gaukara idia koua. Hari Iehova ena heduru amo haroro gaukara ita karaia hegeregerena, unai nega ai danu heduru totona ia dekenai do ita tabekau. Ita abia dae momokani iseda Dirava be siahu do ia henia iena ura ita hagugurua totona.​—⁠Mika 3:8.

10. Luka 21:25-28 ena hereva bamona, hisihisi badana lalonai idia vara noho gaudia dainai, taunimanima be dahaka do idia karaia?

¹⁰ Luka 21:25-28 duahia. Hisihisi badana lalonai idia vara noho gaudia dainai, taunimanima be do idia hoa badina idia laloa gau ibounai do idia namo, to unai ia vara lasi. Idia be do idia ‘lalohisihisi’ bada bona edia mauri dainai do idia gari. (Sep. 1:14, 15) Unai negai, Iehova ena taunimanima edia mauri be do ia auka. Badina ita be inai tanobada ena lasi, bona hekwakwanai idauidau ita davaria diba. Danu reana iseda mauri durua gaudia do ita abia lasi.

11. (a) Dahaka dainai Iehova ena Witnes taudia do idia badu henia? (b) Dahaka dainai hisihisi badana lalonai do ita gari lasi?

 ¹¹ Unai negai, edia tomadiho idia hadikaia taudia be Iehova ena Witnes taudia dekenai do idia badu, badina Witnes taudia edia tomadiho be idia hadikaia lasi. Unai dainai intanet amo edia badu karana do idia halasia. Tanobada besedia bona edia biaguna, Satani, be ita do idia inai henia badina iseda tomadiho sibona be do ia noho. Edia palani be tanobada ai idia noho tomadiho ibounai idia hadikaia, to unai do ia vara lasi. Unai dainai ita do idia inai henia. Unai negai, tanobada besedia be Magoga tauna Goga * ena gaukara do idia karaia. Mai dagedage ida do idia gaukara hebou, Iehova ena taunimanima do idia tuari henia totona. (Ese. 38:2, 14-16) Reana do ita lalohekwarahi badina ita diba lasi edena negai unai do idia karaia. To, gau tamona ita diba: Hisihisi badana lalonai do ita gari lasi. Ita heau mauri totona Iehova ese ita dekenai hadibaia herevadia do ia henia. (Sal. 34:19) Unai negai do ita ‘gini tore bona iseda kwarana ita abia isi,’ badina iseda “hahemauri be kahirakahira.” *

12. Edena dala ai “igui hesiai tauna mai ena kamonai bona mai ena kara maoromaoro” be ita idia durua noho?

¹² “Igui hesiai tauna mai ena kamonai bona mai ena kara maoromaoro” be ita idia durua noho hisihisi badana lalonai, mai abidadama ida ita gini goada totona. (Mat. 24:45) Idia be dala idauidau ai ita idia durua hegeregere: Lagani 2016-2018 ai iseda hebouhebou badadia edia program mani oi laloa. Unai program ese ita idia hagoadaia Iehova ena dina badana ia do gini dae lasi lalonai kara namodia do ita hahedinaraia totona. Mani unai kara ta ta ita herevalaia.

13. Edena dala ai Iehova ita badinaia diba, bona dahaka dainai hari unai ita karaia be namo?

¹³ Badinaia Karana: Lagani 2016 hebouhebou program ena sinado be “Iehova Oi Badinaia Noho!” Unai hebouhebou ai ita dibaia gauna be bema iseda hetura karana Iehova ida ia goada, Ia do ita badinaia diba. Danu, Iehova kahirakahira ita lao diba bema mai momokani ida ita guriguri bona Baibel stadilaia karana ita goadalaia. Unai bamona ita karaia neganai, mai goada ida hekwakwanai badadia ita hanaidia diba. Satani ena tanobada dokona ia kahirakahira noho lalonai, Dirava bona ena Basileia ita badinaia noho karana dekenai hahetoho momo do ita davaria. Taunimanima ese ita do idia kirikirilaia noho. (2 Pet. 3:3, 4) Momokani, unai ia vara badina ita ese Satani ena tanobada ita dadaraia. Hari, badinaia karana ita goadalaia be namo, unai amo hisihisi badana lalonai Dirava do ita badinaia diba.

14. (a) Tanobada ai gunalaia gaukara idia karaia tadikaka dekenai dahaka senisi do ia vara? (b) Dahaka dainai unai negai badinaia karana ita hahedinaraia be namo?

¹⁴ Hisihisi badana lalonai, tanobada ai gunalaia gaukara idia karaia tadikaka dekenai senisi do ia vara. Nega ta, tanobada dekenai idia noho horoa taudia ibounai be guba dekenai do idia haboua Aramagedono tuarina totona. (Mat. 24:31; Apok. 2:26, 27) Unai ena anina be Hakaua Oreana be tanobada dekenai ita ida do idia noho lasi. To, hutuma bada taudia be do idia gaukara noho. Hutuma bada taudia huanai, idia hegeregere tadikaka haida ese gaukara do idia gunalaia. Unai tadikaka ese idia henia hakaua herevadia  ita badinaia karana amo do ita hahedinaraia Iehova ita badinaia noho. Bema ita ura mauri, idia henia hakaua herevadia ita badinaia be namo!

15. Edena dala ai iseda haheauka karana ita hagoadaia, bona dahaka dainai hari unai be mai anina bada?

¹⁵ Haheauka: Lagani 2017 hebouhebou program ena sinado be “Ita Hesiku Lasi!” Unai program ese ita ia durua hahetoho idauidau lalonai ita haheauka totona. Ita dibaia gauna be nega namodia bona nega dikadia ai haheauka karana ita hahedinaraia diba. Iehova dekenai ita tabekau neganai iseda haheauka karana ia goada diba. (Roma 12:12) Namona be Iesu ena gwauhamata ita laloatao, ia gwau: “Ia haheauka ela bona dokona tauna be do ia mauri.” (Mat. 24:13) Unai gwauhamata ese ita ia durua, hahetoho idauidau ita haheaukalaia totona. Bema hari, ita davaria hahetoho idauidau ita haheaukalaia, hisihisi badana ia matamaia neganai iseda abidadama do ia goada.

16. Dahaka ese ita ia durua ita goada totona, bona hari edena dala ai ita goada diba?

¹⁶ Goada: Lagani 2018 hebouhebou program ena sinado be “Oi Goada”! Unai program amo ita diba, sibona dekenai ita tabekau karana amo goada ita abia lasi. Haheauka karana hegeregerena, Iehova dekenai ita tabekau karana amo goada ita abia diba. Edena dala ai Iehova dekenai ita tabekau noho? Dina ta ta ai Baibel ita duahia bona Iehova ese idaunegai ena taunimanima ia hamauria dalana ita laloa dobu. (Sal. 68:20; 2 Pet. 2:9) Politikol oreadia ese hisihisi badana lalonai ita idia tuari henia neganai, namona be do ita goada bona Iehova dekenai ita tabekau momokani. (Sal. 112:7, 8; Heb. 13:6) Bema hari, Iehova dekenai ita tabekau, Goga ena tuari lalonai goada karana do ita hahedinaraia diba. *

17. Dahaka dainai Aramagedono totona ita gari lasi? (Rau 1 ena laulau itaia.)

¹⁷ Atikol ginigunana ai ita herevalaia bamona, ita momo be inai dina gabedia lalonai ita  noho. To danu, ita ura hisihisi badana amo ita roho mauri. Aramagedono tuarina ese inai nega oromana ena dokona do ia haorea. To, namona be ita gari lasi. Dahaka dainai? Badina unai be Dirava ena tuari. (Aon. 1:33; Ese. 38:18-20; Sek. 14:3) Iehova ese hahegani ia henia neganai, Iesu Keriso ese Dirava ena tuari oreana do ia gunalaia. Iesu bona do idia toreisi lou horoa taudia, bona aneru milioni momo be ia ida do idia gaukara hebou. Bena, idia ese Satani mai ena demoni, bona tanobada tuari oreadia do idia tuari henia.​—Dan. 12:1; Apok. 6:2; 17:14.

18. (a) Iehova be dahaka ia gwauhamatalaia? (b) Apokalupo 7:9, 13-17 ese edena dala ai emu helaro vaira nega totona ia hagoadaia?

¹⁸ Iehova ia gwauhamata: “Tuari gauna ta ese oi do ia hadikaia diba lasi.” (Isa. 54:17) Mai abidadama ida Iehova idia tomadiho henia “hutuma bada” taudia be “hisihisi badana” amo do idia roho mauri! Idia ese Iehova do idia hesiai henia noho. (Apokalupo 7:9, 13-17 duahia.) Baibel amo ita diba vaira nega ai do ita roho mauri! Ita diba “[Iehova] ese abidadama taudia ia gimaia noho.” (Sal. 31:23) Iehova idia lalokau henia bona ia idia hanamoa taudia be mai moale ida Iena ladana ia hahelagaia karana do idia itaia.​—Ese. 38:23.

19. Dahaka helaro namo hereana be vaira negai do ita abia?

¹⁹ Oi laloa Timoteo Iharuana 3:2-5 be edena bamona do idia torea, bema ia be tanobada matamatana ai Satani ese ia tohoa lasi taudia ia herevalaia? (Maua ladana  “Taunimanima Edia Kara Vaira Negai” itaia.) Tadikaka George Gangas, * Hakaua Oreana ena memba ta ese inai bamona ia herevalaia: “Tanobada be gabu namo hereana ai do ia lao bema taunimanima ibounai ese Iehova idia tomadiho henia! Kahirakahira oi be tanobada matamatana ai do oi noho. Iehova ia mauri noho hegeregerena, do oi mauri noho. Anina be mauri hanaihanai do ita abia.” Unai be helaro namo hereana ta!