1. Iehova be ena ura hagugurua totona, dahaka ia karaia diba?

IEHOVA be gau ta ai sibona ia halaoa diba ena ura hagugurua totona. Hegeregere, Iehova be Hadibaia Tauna, Goada Henia Tauna, bona Evanelia Tauna, eiava sivarai namona gwauraia hedinarai tauna ai ia lao diba. (Isa. 48:17; 2 Kor. 7:6; Gal. 3:8) To, nega momo ia ese taunimanima ia gaukaralaia iena ura idia karaia totona. (Mat. 24:14; 28:19, 20; 2 Kor. 1:3, 4) Iehova ese ita dekenai aonega bona goada ia henia diba, unai amo dala idauidau ai iena ura ita hagugurua totona. Unai ibounai ese Iehova ladana ena anina ia hahedinaraia, bona diba bada taudia haida ese unai bamona idia gwauraia.

2. (a) Dahaka dainai nega haida ita laloa Iehova ese ita ia gaukaralaia lasi? (b) Inai atikol ai dahaka do ita herevalaia?

² Ita ibounai be Iehova ese ia gaukaralaia diba, to ma haida idia laloa Iehova ese idia ia gaukaralaia lasi. Dahaka dainai? Badina idia laloa edia mauri lagani be ia bada, edia mauri dalana be ia auka, eiava edia diba bona aonega be bada lasi. To, ma haida idia laloa idia karaia noho gaukara be hegeregere bona idia ura lasi gaukara ma haida idia karaia. Inai atikol ai, Iehova ese ena ura hagugurua totona ita ta ta ia gaukaralaia diba daladia do ita herevalaia. Bena, Baibel sivarai haida amo Iehova ese ena hesiai taudia​—tatau bona hahine​—ia hagoadaia dalana,  bona mai ura ida Iehova ita hesiai henia dalana do ita herevalaia.

3. Filipi 2:13 ena hereva bamona, edena dala ai Iehova ese ita dekenai gau ta ita karaia ena ura ia henia diba?

³ Filipi 2:13 duahia. * Iehova ese ita dekenai gau ta ita karaia ena ura ia henia diba. Edena dala ai? Reana oi diba kongrigeisen ai ta be heduru ia abia be namo. Eiava elda taudia be brens ena revareva ta amo ita idia hadibaia gabu ma ta be heduru idia ura. Unai negai, reana do ita laloa, ‘Edena dala ai heduru lau henia diba?’ Eiava ita dekenai asainmen badana ta idia ura henia, to reana do ita laloa unai asainmen ita karaia namonamo diba eiava lasi. Eiava Baibel siri haida ita duahia murinai, reana do ita laloa, ‘Edena dala ai inai siri lau badinaia diba ma haida lau durua totona?’ Iehova be ita do ia doria lasi gau ta ita karaia totona. To, bema Iehova ia itaia ita be mai ura ida ita karaia diba gauna ita laloa noho, ia ese unai gauna ita karaia ena ura do ia henia.

4. Edena dala ai Iehova ese ita dekenai gau ta ita karaia totona goada ia henia diba?

⁴ Danu, Iehova ese ita dekenai gau ta ita karaia totona goada ia henia diba. (Isa. 40:29) Ia ese lauma helaga amo diba bona aonega ia henia diba. (Eso. 35:30-35) Iehova be ena orea amo gaukara idauidau ita karaia dalana ia hadibaia. Bema oi be asainmen ta karaia dalana oi diba namonamo lasi, namona be heduru oi tahua. Danu, nega idauidau ai iseda guba Tamana oi noia diba “taunimanima edia siahu ia hereaia gauna” ia henia totona. (2 Kor. 4:7; Luka 11:13) Baibel sivarai momo ese idia hahedinaraia, Iehova ese tatau bona hahine haida dekenai gau ta idia karaia ena ura bona goada ia henia. Unai sivarai haida ita herevalaia neganai, Iehova ese unai dala idauidau ai oi ia gaukaralaia dalana oi laloa.

5. Iehova ese Mose ia gaukaralaia Iena taunimanima ia hamauria dalana bona negana amo dahaka ita dibaia?

⁵ Iehova ese Mose ia gaukaralaia Israela taudia edia hamauria tauna ai ia lao totona. To, Iehova ese edena negai Mose ia gaukaralaia? Mose ese “Aigupito taudia edia aonega ibounai” ia dibaia bona ia laloa ia hegeregere negana ai, a? (Kara 7:22-25) Lasi, to Iehova ese Mose ia durua manau tauna ai ia lao murinai, Mose ia gaukaralaia. (Kara 7:30, 34-36) Iehova ese Mose dekenai goada ia henia Aigupito ena lohia tauna badana ia hereva henia totona. (Eso. 9:13-19) Iehova ese Mose ia gaukaralaia dalana bona negana amo dahaka ita dibaia? Iehova ese ena kara idia tohotohoa bona goada totona ia dekenai idia tabekau taudia ia gaukaralaia.​—⁠Fili. 4:13.

6. Iehova ese Barasilai ia gaukaralaia King Davida ia durua karana amo dahaka ita dibaia?

⁶ Lagani handred momo murinai, Iehova ese Barasilai ia gaukaralaia King Davida ia durua totona. Davida bona ena taunimanima be iena natuna, Abesaloma amo idia heau neganai idia hesiku bada, “idia hitolo, bona idia ranu mase.” Herevana Barasilai be ia buruka, to iena mauri ia laloa lasi bona Davida mai ena taunimanima ia durua. Barasilai ia laloa lasi ia be buruka dainai, Iehova ese do ia gaukaralaia lasi. To, Barasilai be ia dekenai idia noho gaudia hegeregerena Dirava ena hesiai taudia ia durua. (2 Sam. 17:27-29) Unai sivarai amo dahaka ita dibaia? Herevana iseda mauri lagani be bada eiava maragi, to Iehova ese ita ia gaukaralaia diba, iseda tano eiava tano ma haida dekenai idia noho tadikaka taihu ita durua totona. (Aon. 3:27, 28; 19:17) Ena be heduru henia totona idia dekenai ita lao diba lasi, to  tanobada hegegemadai gaukara durua moni ita henia, unai amo idia dabu tadikaka taihu ita durua diba.​—2 Kor. 8:14, 15; 9:11.

7. Iehova ese Simeona be edena bamona ia gaukaralaia, bona unai ese edena dala ai ita ia hagoadaia?

⁷ Iehova ese Simeona, Ierusalema ai ia noho tau badana ta dekenai ia gwauhamata, ia be do ia mase lasi ela bona Mesia ia itaia guna. Unai gwauhamata ese Simeona ia hagoadaia bada, badina ia be lagani momo lalonai Mesia ena mai ia naria noho. Iehova ese Simeona ena abidadama bona haheauka karana dainai ia hanamoa. Dina ta Simeona be “lauma helaga ena hakaua henunai” dubu helaga lalonai ia vareai. Unuseniai ia ese Iesu ia itaia, bona Iehova ese Simeona ia gaukaralaia unai natu maragina be Keriso ai do ia lao ena peroveta herevana ia gwauraia totona. (Luka 2:25-35) Ena be Simeona ese Iesu ena hesiai gaukara tanobada dekenai ia itaia lasi, to ia abia hahenamo dainai ia moale bada, bona vaira negai hahenamo momo do ia moalelaia! Tanobada matamatana ai, unai abidadama tauna be Iesu ena lohia dalana ese tanobada besedia ibounai ia hanamoa dalana do ia itaia. (Gen. 22:18) Ita danu be Iehova ena hesiai gaukara lalonai ia henia hahenamo idauidau ita moalelaia diba.

8. Iehova ese edena dala ai oi ia gaukaralaia diba, Banaba ia gaukaralaia hegeregerena?

⁸ Aposetolo taudia edia negai, harihari bada tauna ta ladana Iosepa, be mai ura ida Iehova ese ia gaukaralaia. (Kara 4:36, 37) Reana Iosepa be ma haida hagoadaia karana ia laloa bada dainai, aposetolo taudia ese ena ladana idia gwauraia, Banaba, anina be “Goada Henia Tauna.” Hegeregere, Saulo be Keristani tauna ai ia lao murinai, tadikaka taihu momo ese ia idia gari henia badina guna Keristani taudia ia dagedage henia. To, Banaba ese Saulo ia durua bona ia hagoadaia, bona Saulo ese ena kara namona ia moalelaia. (Kara 9:21, 26-28) Gabeai, Ierusalema ai idia noho elda taudia idia itaia, Suria ena siti Antioka dekenai idia noho tadikaka taihu ese heduru idia abia be namo. Daika idia siaia? Banaba! Idia be abia hidi namona idia karaia. Baibel ia hahedinaraia Banaba ese “idia ibounai ia hagoadaia, mai lalogoada ida Lohiabada do idia abidadama henia noho.” (Kara 11:22-24) Unai hegeregerena, hari Iehova ese ita ia gaukaralaia diba, iseda tadikaka taihu ita hagoadaia totona. Hegeregere, ita ia gaukaralaia diba, edia lalokau taudia idia mase dainai idia lalohisihisi taudia ita hagoadaia totona. Eiava ita ia gaukaralaia diba, ia gorere eiava lalohekwarahi tauna ta ita vadivadi henia eiava fon amo ita rini henia, bona hagoadaia hereva haida amo ita durua. Iehova ese oi ia gaukaralaia diba, Banaba ia gaukaralaia hegeregerena, a?​—1 Tes. 5:14.

9. Iehova ese tadikaka ta ladana Vasily ia durua elda goadana ai ia lao karana amo dahaka ita dibaia?

⁹ Iehova ese tadikaka ta ladana Vasily ia durua elda tauna goadana ai ia lao totona. Vasily ena mauri lagani be 26 neganai, ia be elda tauna ai ia lao, to ia gari badina ia laloa ia be hegeregere lasi Baibel amo kongrigeisen dekenai hekwakwanai idia davaria taudia ia durua totona. To, ia be ekspiriens elda taudia bona Basileia Hesiai Gaukara Sikuli amo treinini namona ia abia. Vasily ia gaukara goada ia dibaia gaudia ia badinaia totona. Hegeregere, ia be do ia karaia gaudia ena lista ta ia torea. Unai gaudia ta ta ia hagugurua neganai, metairametaira ena gari karana ia hanaia. Vasily ia gwau: “Guna lau gari henia gaudia be hari lau moalelaia. Iehova ena heduru dainai kongrigeisen dekenai siri maorona ta amo tadikaka eiava taihu ta lau durua neganai, lau moale bada.” Tadikaka e, bema Vasily bamona Iehova ese oi ia gaukaralaia, oi ia durua diba kongrigeisen dekenai maduna ma haida oi abia totona.

10. Abigaila be dahaka ia karaia, bona iena haheitalai amo dahaka oi dibaia?

¹⁰ Davida bona ena abidadama tatau be idia heau badina King Saulo ese idia ia tahua, unai dainai heduru idia abia be namo. Davida ena abidadama tatau be aniani totona Israela ena taga tauna ta ladana Nabala idia noia. Idia laloa Nabala idia noia be kerere lasi, badina tano gagaena ai Nabala ena mamoe idia naria. To, mataganigani tauna Nabala ia ura lasi idia ia durua. Davida ia badu dikadika bona ia ura Nabala bona ena ruma dekenai idia noho tatau ibounai ia alaia mase. (1 Sam. 25:3-13, 22) To, Nabala ena adavana Abigaila be aonega hahinena. Ia be mai gari lasi ida Davida ena aena badina ia tui diho, bona ia hadibaia dika ena davana ia henia neganai, rara dekenai ia kerere diba. Abigaila be mai aonega ida Davida ia noia, Iehova dekenai ia tabekau unai hekwakwanai ia hamaoromaoroa totona. Abigaila ena hereva namodia bona aonega karana ese Davida ena kudouna ia hamarerea. Davida ia laloparara Abigaila be Iehova ese ia siaia. (1 Sam. 25:23-28, 32-34) Abigaila be ena kara namodia dainai Iehova ese ia gaukaralaia. Unai hegeregerena, aonega bona laloparara karana idia hahedinaraia Keristani taihu be Iehova ese ia gaukaralaia diba, edia ruma bese bona kongrigeisen dekenai ma haida idia hagoadaia totona.​—⁠Aon. 24:3; Tito 2:3-5.

11. Salumu ena natuna hahine be dahaka idia karaia, bona hari daidia ese idia tohotohoa noho?

¹¹ Lagani handred momo murinai, Iehova ese Salumu ena natuna hahine ia gaukaralaidia Ierusalema ena magu idia hanamoa totona. (Neh. 2:20; 3:12) Herevana edia tamana be lohia tauna, to Salumu ena natuna hahine be mai edia ura ida unai gaukara badana idia karaia. (Neh. 4:15-18) To, Tekoa ena lohia taudia be idia karaia gaukarana ai “idia gaukara goada lasi.” (Neh. 3:5) Salumu ena natuna hahine be dina 52 lalonai idia karaia gaukarana idia haorea neganai idia moale bada! (Neh. 6:15) Iseda negai, taihu haida be mai moale ida spesel hesiai gaukara haida idia karaia, hegeregere, Iehova dekenai idia hahelagaia bildin totona konstraksen bona meintenens gaukara idia karaia. Taihu ese unai gaukara idia hagugurua totona, edia diba, goada, bona abidadama karana be mai anina bada.

12. Edena dala ai Iehova ese ita ia gaukaralaia diba, Tabita ia gaukaralaia hegeregerena?

¹² Iehova ese Tabita ia durua dainai “kara namodia momo ia karaia” bona vabu ia hebogahisi henidia. (Kara 9:36) Tabita ena hariharibada bona kara namodia dainai, ia mase neganai momo idia taitai. To, aposetolo Petero ese Tabita ia hatorea isi lou neganai, idia moale bada. (Kara 9:39-41) Tabita ena sivarai amo dahaka ita dibaia? Herevana ita be buruka eiava matamata, tau eiava hahine, ita ibounai ese gaukara namodia ita karaia diba iseda tadikaka taihu ita durua totona.​—Heb. 13:16.

13. Edena dala ai ia hemarai momo taihu ta ladana Ruth, be Iehova ese ia gaukaralaia, bona ia be dahaka ia gwau?

¹³ Ia hemarai momo taihu ta ladana Ruth, be ia ura misinari ta ai do ia lao. Ia maragi neganai, ruma ta ta dekenai pepapepa ia henia sibona. Ia gwau: “Unai gaukara lau moalelaia bada.” To, ia auka iduara dekenai ta ia hereva henia, bona ma haida dekenai Dirava ena Basileia ia herevalaia totona. Herevana Ruth ia hemarai, to ena mauri lagani be 18 neganai regula painia ta ai ia lao. Lagani 1946 ai, ia be Watchtower Bible School of Gilead dekenai ia lao, bona gabeai Hawaii bona Japan dekenai hesiai gaukara ia karaia. Iehova ese ia gaukaralaia unai tano dekenai haroro gaukara ia habadaia totona. Kahirakahira lagani 80 bamona hesiai gaukara ia karaia murinai, Ruth ia  gwau: “Iehova be hanaihanai lau ia hagoadaia. Ia ese lau ia durua egu hemarai karana lau hanaia totona. Lau abia dae momokani Iehova ese taunimanima idauidau ia gaukaralaia diba bema ia idia abidadama henia.”

14. Kolose 1:29 ena hereva bamona, Iehova ese ita ia gaukaralaia totona, dahaka ita karaia be namo?

¹⁴ Histori lalonai, Iehova be dala idauidau ai ena hesiai taudia ia gaukaralaia. Edena dala ai oi ia gaukaralaia diba? Mai ura ida oi gaukara goada karana ese unai do ia hahedinaraia. (Kolose 1:29 duahia.) Bema mai ura ida Iehova ena hesiai gaukara oi karaia, oi do ia durua evanelia tauna goadana, hadibaia tauna namona, hagoadaia tauna namona, gaukara karaia namonamo tauna, tura namona, eiava iena ura hagugurua totona gau idauidau ai oi ia halaoa diba.

15. Timoteo Ginigunana 4:12, 15 ena hereva bamona, hari tadikaka matamatadia ese Iehova idia noia idia ia durua dahaka idia karaia totona?

¹⁵ Umui matamata tadikaka be dahaka umui karaia diba? Mai edia goada tadikaka ese hesiai tauna ena maduna idia huaia be namo. Kongrigeisen momo lalonai elda taudia be momo to hesiai taudia be momo lasi. Umui matamata tadikaka ese kongrigeisen dekenai mai ura ida maduna ma haida umui huaia diba, a? Nega haida tadikaka haida do idia gwau, “Pablisa sibona ai lau lao be hegeregere.” Bema emu hemami be unai bamona, namona be Iehova oi noia oi ia durua hesiai tauna ena maduna oi huaia, bona mai goada ida ia oi hesiai henia totona. (Had. 12:1) Emui heduru be mai anina bada!​—1 Timoteo 4:12, 15 duahia.

16. Iehova amo dahaka ita noia, bona dahaka dainai?

¹⁶ Iehova ese oi ia gaukaralaia diba iena ura oi hagugurua totona. Unai dainai Ia oi noia oi dekenai iena gaukara oi karaia ena ura bona goada ia henia totona. Herevana oi be matamata eiava buruka, namona be hari emu nega, goada, diba bona kohu oi gaukaralaia, Iehova oi hanamoa totona. (Had. 9:10) Bema oi be Iehova ena hesiai gaukara ai hahenamo haida idia henia, namo lasi oi laloa oi be hegeregere lasi dainai unai hahenamo oi dadaraia. Iseda lalokau Tamana ena ladana ita hanamoa totona, ita karaia gaudia be hahenamo badana!