1. Dahaka dainai Iehova sibona ita tomadiho henia be namo?

IEHOVA sibona ita tomadiho henia be namo, badina ia be iseda Havaraia Tauna bona Mauri Henia Tauna. (Apok. 4:11) To, hekwakwanai ta ia noho. Ena be Iehova ita lalokau henia bona ita matauraia, to bema ita naria namonamo lasi Iehova sibona ita tomadiho henia karana do ita laloa bada lasi. Unai do ia vara diba dalana ita lalopararalaia be namo. To, Iehova sibona ita tomadiho henia karana ena anina mani ita herevalaia guna.

2. Esodo 34:14 ena hereva bamona, Iehova sibona ita tomadiho henia totona, dahaka do ita karaia be namo?

² Baibel ese ia hahedinaraia, Dirava sibona ita tomadiho henia karana ena anina be ia ita lalokau henia. Iehova sibona ita tomadiho henia be namo. Bona taunimanima eiava gau ta ese unai do ia haidaua diba lasi.​—⁠Esodo 34:14 duahia.

3. Dahaka dainai Iehova ita tomadiho henia kava lasi?

³ Ita ese Iehova ita tomadiho henia kava lasi. Dahaka dainai? Badina ia ita diba namonamo bona iena kara namodia ita moalelaia. Ia ese ia inai henia gaudia bona ia ura henia gaudia ita diba, bona ita badinaia. Danu, iena ura taunimanima totona, ita lalopararalaia bona ita abia dae. Ita moale badina iena turana ai ita lao diba. (Sal. 25:14) Iseda Havaraia Tauna amo ita dibaia gaudia ibounai ese ita ia durua ia kahirakahira ita lao totona.​—Iam. 4:8.

4. (a) Diabolo be dahaka ia gaukaralaia unai amo Iehova sibona ita lalokau henia lasi? (b) Inai atikol ai dahaka do ita herevalaia?

 ⁴ Diabolo ese inai tanobada ia biagua bona taunimanima edia lalona ia veria edia ura gaudia do idia atoa guna, unai amo do ia auka ura dikadia idia dadaraia totona. (Efe. 2:1-3; 1 Ioa. 5:19) Diabolo ia ura gau ma haida ita ura henia danu, unai amo Iehova sibona do ita lalokau henia lasi. Ia gaukaralaia daladia rua mani ita herevalaia. Ginigunana, iseda lalona ia veria taga maurina ita ura henia totona, bona iharuana, ia ura moale karadia dikadia ita abia hidi.

5. Dahaka dainai moni ura henia karana dekenai ita naria namonamo?

⁵ Ita ibounai ita ura aniani namodia ita ania, dabua namodia ita karaia, bona ruma namona ta ai ita noho. To, namona be moni ura henia karana dekenai ita naria namonamo. Satani ena tanobada idia ura henia taudia momo be “moni” bona idia hoia diba gaudia idia ura henia bada. (2 Tim. 3:2) Iesu ia diba iena murinai idia raka taudia be unai gaudia do idia ura henia. Unai dainai Iesu ia gwau: “Tau ta be biaguna rua edia igui hesiai gaukara ia karaia diba lasi, badina ia ese ta do ia inai henia bona ta do ia lalokau henia, eiava ta do ia durua bona ta do ia dadaraia. Dirava bona Taga edia hesiai gaukara umui karaia diba lasi.” (Mat. 6:24) Bema ta be Iehova ia lalokau henia, bona ena nega bona goada ia henia taga tauna ai ia lao totona, ia be biaguna rua edia hesiai gaukara ia karaia noho. Ia be Iehova sibona do ia tomadiho henia lasi.

6. Iesu ese Laodikea kongrigeisen taudia ia sisiba henia karana amo dahaka ita dibaia?

⁶ Aposetolo taudia edia negai, Laodikea siti ena kongrigeisen taudia be mai hekokoroku ida idia gwau: “Lau be lau taga bona kohu  momo lau abia vadaeni bona gau ta dekenai lau dabu lasi.” To, Iehova bona Iesu edia vairanai idia be “dika momokani, hebogahisi gauna, ogogami, matakepulu bona kopina kavakava.” Iesu be edia taga maurina dainai idia ia sisiba henia lasi, to moni ura henia bada karana ese edia hetura karana Iehova ida ia hadikaia dainai idia ia sisiba henia. (Apok. 3:14-17) Bema iseda kudouna ai taga ura henia karana ia matamaia noho, kara haraga iseda laloa dalana ita hamaoromaoroa be namo. (1 Tim. 6:7, 8) Bema lasi, gau ma haida do ita ura henia bada bona Iehova ese iseda tomadiho karana do ia abia dae lasi. Ia “ura lasi momokani” gau ta ese ita ia koua Ia ita tomadiho henia totona. (Deu. 4:24) Edena dala ai iseda mauri lalonai moni ita atoa guna?

7-9. Elda ta ladana, David, ena ekspiriens amo dahaka oi dibaia?

⁷ United States dekenai ia noho elda goadana ta ladana, David, ena haheitalai mani ita laloa. Ia be ena moni gaukara ia laloa bada. Iena kampani ese dagi badana ta idia henia bona ena pei idia habadaia, bona ena tano dekenai momo idia gwau ia be ena gaukara ia karaia namonamo tauna. David ia gwau: “Unai negai, lau laloa lau abia gaudia be Iehova amo idia mai hahenamo.” To, unai be momokani, a?

⁸ David be gabeai ia laloparara iena moni gaukara ese metairametaira ena hetura karana Iehova ida ia hadikaia noho. Ia gwau: “Kongrigeisen heboudia ai bona haroro gaukara ai danu, nega momo moni gaukara ena hekwakwanai idauidau lau laloa. Ena be moni momo lau abia, to lau lalohekwarahi momo, bona egu headava lalonai hekwakwanai momo idia vara.”

⁹ David ia laloparara namona be iena mauri ai ia atoa guna gaudia ia laloa namonamo. Ia gwau: “Egu lalona lau hadaia egu mauri ai gau  haida lau hamaoromaoroa totona.” David ia ura ena moni gaukara ena sediual ia haidaua dainai ena bosi ia hereva henia. Dahaka ia vara? David be ena moni gaukara amo idia hadokoa! Ia be dahaka ia karaia? Ia gwau: “Murina dinana ai lau be heduru painia totona aplikeisen lau atoa.” David bona ena adavana be sibona idia durua totona, bildin badadia dekenai gabu hagoevaia gaukara idia karaia. Gabeai, David be regula painia gaukara ia hamatamaia, bona daudau lasi ena hahine be ia ida painia gaukara idia karaia. Unai headava tau bona hahine be momo ese idia laloa bada lasi moni gaukara idia karaia, to unai idia laloa lasi. Herevana idia abia moni be ia maragi guna idia abia moni amo, to hua ta ta ai idia gaukaralaia gaudia edia davana idia henia diba. Idia ura edia mauri ai Iehova idia atoa guna, bona idia diba ia ese Basileia idia atoa guna taudia ia laloa bada.​—⁠Mat. 6:31-33.

10. Edena dala ai iseda kudouna ita gimaia diba?

¹⁰ Herevana iseda moni be bada eiava maragi, to namona be iseda kudouna ita gimaia. Edena dala ai? Taga ita ura henia lasi. Bona namo lasi emu moni gaukara ese Iehova tomadiho henia karana ia hadikaia. Edena bamona do oi diba oi dekenai unai ia vara noho? Sibona oi nanadaia: ‘Lau be nega momo hebou bona haroro gaukara ai lau noho neganai, moni gaukara lau laloa momo, a? Nega momo lau lalohekwarahi vaira negai egu moni do ia hegeregere, a? Moni bona kohu ese egu headava lalonai hekwakwanai idia havaraia noho, a? Mai ura ida momo ese idia laloa bada lasi moni gaukara lau karaia diba, bema unai ese Iehova hesiai henia karana ia koua lasi, a?’ (1 Tim. 6:9-12) Unai henanadai ita lalodia neganai, namona be ita laloatao, Iehova ese ita ia lalokau henia bona ia sibona idia tomadiho henia taudia dekenai ia gwauhamata: “Lau ese umui do lau negea lasi, bona umui do lau rakatania lasi momokani.” Unai dainai aposetolo Paulo ia gwau: “Namona be emui mauri dalana amo umui hahedinaraia, moni umui ura henia dikadika lasi.”​—⁠Heb. 13:5, 6.

11. Ta ese ia abia hidi moale karana dainai dahaka ia vara diba?

¹¹ Iehova ia ura iseda mauri ita moalelaia, bona moale karadia amo moale ita abia diba. Momokani, Dirava ena Hereva ia gwau, “tau ta ena dala namo herea be inai: Do ia aniani, do ia inuinu, bona iena hekwarahi dekena amo ia abia gaudia do ia moalelaia.” (Had. 2:24) To, inai tanobada ena moale karadia momo ese ita idia hakaua kerere diba.  Hegeregere, taunimanima ese kara maoromaoro dalana do idia badinaia lasi bona Baibel ese ia taravatua gaudia do idia lalokau henia.

12. Korinto Ginigunana 10:21, 22 ena hereva bamona, dahaka dainai iseda moale karadia ita abia hidi namonamo?

¹² Ita ura Iehova sibona ita tomadiho henia, unai dainai “Iehova ena pata” bona “demoni edia pata” ai nega tamona ita aniani diba lasi. (1 Korinto 10:21, 22 duahia.) Ta ida oi aniani hebou karana ese ia hahedinaraia, ia be emu turana namona. Bema ita be dagedage, babalau karadia, matabodaga eiava tauanina ena ura dikadia idia hahedinaraia moale karadia ita abia hidi, ita be Dirava ena inai taudia ida, idia hegaegaelaia aniani ita ania noho. Unai dala amo ita sibona bona iseda hetura karana Iehova ida ita hadikaia.

13-14. Iamesi 1:14, 15 ena hereva bamona, dahaka dainai moale karadia ita abia hidi namonamo? Haheitalai gwauraia.

¹³ Edena dala ai aniani be moale karadia ida ita hahegeregerea diba? Ita aniani neganai, ita ura ania gaudia ita abia hidi diba. To, aniani ita hadonoa neganai, iseda tauanina lalonai ia gaukara dalana ita abia hidi diba lasi. Aniani namodia ese ita idia durua, to aniani dikadia ese ita idia durua diba lasi. Matamanai, ita ania gaudia edia namo bona dika do ita itaia lasi, to gabeai do idia hedinarai.

¹⁴ Unai hegeregerena, moale karadia ita abia hidi neganai, iseda kudouna ai ita ura atoa gaudia ita abia hidi diba. To gabeai, ita abia hidi moale karana ese iseda kudouna ia biagua diba. Moale karana namona ese ita do ia hagoadaia, to moale karana dikana ese ita do ia durua lasi. (Iamesi 1:14, 15 duahia.) Matamanai, ita karaia moale karadia edia dika do ita itaia lasi, to gabeai idia hedinarai diba. Unai dainai Baibel ia gwau: “Umui laloa kerere lasi, Dirava ita koia diba lasi. Tau ta ese ia hadoa gauna, unai gauna sibona do ia abia. Badina tauanina ena ura dikadia hegeregerena ia hadoa tauna be unai ura dikadia dainai dika do ia abia.” (Gal. 6:7, 8) Unai dainai gau badana be Iehova ese ia inai henia moale karadia ibounai ita dadaraia!​—⁠Sal. 97:10.

15. Iehova ese dahaka harihari gauna ia henia ita moalelaia totona?

¹⁵ Iehova ena taunimanima momo be intanet dekenai JW Broadcasting^® itaia karana idia moalelaia. Taihu ta ladana, Marilyn ia gwau: “JW Broadcasting ese lau ia durua lau moale totona, bona program ibounai lau itaia diba. Sibona lau noho eiava lau lalomanoka neganai, hagoadaia tok ta eiava Morning Worship program ta lau itaia diba. Bona lau mamia lau be Iehova bona ena orea kahirakahira lau noho. JW Broadcasting program ese egu mauri ia haidaua momokani.” Iehova ese unai harihari gauna ia henia karana amo heduru oi abia, a? JW Broadcasting be mai ena program matamatadia hua ta ta ai, audio bona video program momo bona hagoadaia anedia idia noho, nega idauidau ai oi itaia eiava kamonai totona.

16-17. Dahaka dainai moale karana dekenai iseda nega ita gaukaralaia namonamo, bona edena dala ai unai ita karaia diba?

¹⁶ Namona be moale karadia ita abia hidi sibona lasi, to unai moale karana dekenai do ita gaukaralaia nega ita laloa danu. Bema unai bamona ita karaia lasi, iseda nega bada be moale karadia dekenai do ita haorea, to Iehova hesiai henia karana dekenai lasi. Momo ese moale karadia ai idia gaukaralaia nega idia biagua be auka. Mauri lagani 18 taihu ta ladana Abigail, ia gwau: “Gaukara ta dekenai lau bisi bada bona adorahi ai TV lau itaia karana amo lau laga-ani. To bema lau naria namonamo lasi, hora momo lalonai TV lau itaia diba.” Matamata tadikaka ta ladana Samuel,  ia gwau: “Nega haida lau be intanet dekenai vidio kwadogidia momo lau itaia. Bona lau diba lasi hora toi o foa idia hanaia vadaeni.”

¹⁷ Edena dala ai moale karadia dekenai oi gaukaralaia nega oi biagua diba? Dala ginigunana be oi sekea, moale karana dekenai oi be hora hida oi gaukaralaia noho. Namona be pepa ta dekenai wiki ta lalonai oi gaukaralaia hora oi torea. Bena kalenda ta dekenai, TV bona intanet oi gaukaralaia ena hora, bona mobael fon dekenai game oi gadaralaia ena hora oi torea. Bema oi itaia oi be nega bada oi gaukaralaia noho, namona be sediual ta oi karaia. Nega bada oi atoa mai anina bada gaudia oi karaia totona, gabeai moale karadia oi karaia. Bena, Iehova oi noia oi ia durua emu sediual oi badinaia totona. Unai dala amo oi be mai emu nega bona goada sibona emu stadi bona ruma bese ena tomadiho oi karaia, kongrigeisen heboudia oi lao, bona haroro bona hahediba gaukarana ai Iehova oi hesiai henia totona. Danu, moale karadia totona oi gaukaralaia nega do oi moalelaia, badina oi be Iehova oi atoa guna.

18-19. Edena dala ai ita hahedinaraia ita be Iehova sibona ita tomadiho henia noho?

¹⁸ Aposetolo Petero ese Satani ena tanobada dokona bona do ia mai tanobada matamatana ia herevalaia murinai ia gwau: “Lalokau taudia e, unai gaudia umui naria noho dainai, do umui gaukara goada bona Dirava vairanai do umui miro lasi, umui kerere lasi, bona mai maino ida umui noho.” (2 Pet. 3:14) Bema unai sisiba ita badinaia bona Iehova ia ura henia dalana ai ia ita tomadiho henia bona iseda mauri dalana ia goeva, ita hahedinaraia ita be Iehova sibona ita tomadiho henia noho.

¹⁹ Satani bona ena tanobada be hanaihanai ita do idia tohoa iseda mauri ai anina lasi gaudia ita atoa guna totona. (Luka 4:13) Herevana dahaka hahetoho ita davaria, to namona be taunimanima eiava gau ta ese iseda mauri ai Iehova atoa guna karana ia hadikaia lasi. Namona be iseda lalona ita hadaia Iehova sibona ita tomadiho henia totona!