1. Ena be Iehova be Ataiai Momokani Diravana, to dahaka dainai ma haida ia boiria?

IEHOVA be Ataiai Momokani Diravana, bona gau ibounai ia Havaraia Tauna, iena aonega bona siahu be bada herea. Iobu be unai ia lalopararalaia. Unai dainai Iehova be ia karaia gaudia dainai Iobu ia nanadaia neganai, Iobu ia gwau: “Lau diba oi be gau ibounai oi karaia diba, bona oi ura karaia gaudia, be gau ta ese ia koua diba lasi.” (Iobu 42:2) Ena be Iehova sibona ese ena ura ia hagugurua diba, to matamana negana amo, ia ese ma haida ia boiria ia ida do idia gaukara hebou bona ena ura do idia hagugurua.

2. Iehova ese Iesu dekenai edena mai anina bada gaukarana ia henia?

² Dirava ese ia karaia tauna ginigunana be iena Natuna korikorina. Iehova be iena Natuna ida guba bona tanobada gaudia idia havaraia. (Ioa. 1:1-3, 18) Aposetolo Paulo ese Iesu ia herevalaia neganai, ia gwau: “Ia amo Dirava ese ma gau ibounai guba ai bona tanobada ai ia havaraia, ita itaia diba bona ita itaia diba lasi gaudia, herevana idia be king taudia, lohia taudia, gavamani  taudia, eiava siahu taudia. Ma gau ibounai be ia amo bona ia totona ia havaraia.” (Kol. 1:15-17) Oibe, Iehova ese iena Natuna ida gau ibounai ia havaraia bona ma haida dekenai ena Natuna ena maduna ia herevalaia, unai dala amo iena Natuna ia hanamoa.

3. Iehova ese Adamu dekenai dahaka gaukara ia henia, bona dahaka dainai?

³ Danu, Iehova ese taunimanima ia boiria ia ida idia gaukara hebou totona. Hegeregere, Adamu ia hamaoroa animal edia ladadia do ia hatoa. (Gen. 2:19, 20) Reana Adamu be mai moale ida unai animal ta ta edia kara ia stadilaia namonamo guna, bena idia dekenai ladana ia henia! Iehova ese unai animal ia havaradia dainai, ia sibona ese ladadia ia henia diba. To, unai gaukara be Adamu dekenai ia henia. Danu, Adamu ia hamaoroa Eden ena gabu ibounai be Paradaiso ai do ia halaoa. (Gen. 1:27, 28) To madi, Adamu ese Dirava ia rakatania dainai, ia bona iena bese be dika bada idia davaria.—Gen. 3:17-19, 23.

4. Edena dala ai ma haida be Dirava ida idia gaukara hebou, iena ura idia hagugurua totona?

⁴ Gabeai, Dirava ese taunimanima ma haida ia boiria iena ura idia hagugurua totona. Hegeregere, Noa ese lagatoi ia haginia, unai amo Abata amo ia bona iena ruma bese ia hamauria. Mose ese Israela besena be Aigupito amo ia ruhaia. Iosua ese unai bese be Gwauhamata Tanona dekenai ia hakaua lao. Solomona ese Ierusalema ai dubu helaga ia haginia. Maria ese Iesu ia havaraia. Unai abidadama taudia ibounai bona ma haida be Iehova ida idia gaukara hebou iena ura idia hagugurua totona.

5. Hari ita be edena gaukara ita durua diba? (Laulau ginigunana herevalaia.)

⁵ Hari inai negai, Iehova ese ita ia boiria Mesia Basileiana ita durua totona. Iseda hesiai gaukara be idauidau. Hesiai gaukara haida be Keristani taudia haida sibona ese idia karaia diba, to ita ibounai be Basileia ena sivarai namona harorolaia gaukarana ita durua. Ena be Iehova be guba amo tanobada taudia ia hereva henia diba, to ia ese ita dekenai unai gaukara ia henia. Iesu ia gwau, Iehova ese nadi ia hamaoroa diba Mesia King idia boiboilaia totona. (Luka 19:37-40) To, Iehova ese ita ia abia hidi ia ida ita “gaukara hebou” totona. (1 Kor. 3:9) Aposetolo Paulo ia gwau: “Ai be Dirava ida ai gaukara hebou dainai, umui ai noia danu, Dirava ena hebogahisi hereadaena umui abia dae bona ena badina umui laloaboio lasi.” (2 Kor. 6:1) Oibe, Dirava ida ita gaukara hebou be hahenamo badana bona ita ia hamoalea. Mani badina haida ita herevalaia.

6. Iesu be iena Tamana ida ia gaukara neganai, dahaka ia mamia?

⁶ Matamana negana amo, Iehova ena hesiai taudia idia moale badina Dirava ida idia gaukara hebou. Baibel ese Iesu ia herevalaia, ia gwau: “Lohiabada ese . . . lau ia karaia guna. Unai neganai lau be Dirava ena badibadinai lau noho, gaukara karaia tauna bamona. Dina ibounai Dirava be lau dekenai ia moale, bona lau be iena vairana dekenai, lau moale noho nega ibounai.” (Aon. 8:22, 30) Iesu be mai moale ida iena Tamana ida ia gaukara, bona ia ese iena gaukara ia hagugurua bona Iehova be ia dekenai ia moale. Ita be edena bamona?

7. Dahaka dainai haroro gaukara ese ita ia hamoalea?

⁷ Iesu ia gwau, henia karana bona abia karana be mai ena moale. (Kara 20:35) Hereva momokani ita diba bona unai  hereva momokani be ma haida dekenai ita herevalaia neganai, ita moale, ani? Oibe, ita haroro henidia taudia ese Baibel ena hereva momokani idia lalopararalaia bona Dirava bona Baibel ena hereva idia badinaia neganai, idia moale. Bona ita itaia idia ese edia lalohadai bona mauri dalana idia haidaua neganai, ita moale danu, ani? Momokani, sivarai namona harorolaia gaukarana be mai anina bada. Haroro gaukara amo taunimanima ita durua Dirava ida maino idia karaia bona mauri hanaihanai idia abia totona. (2 Kor. 5:20) Momokani, inai gaukara be gaukara namo hereana bona ita ia hamoalea.

8. Haida be Iehova ida idia gaukara hebou dainai, dahaka idia gwau?

⁸ Taunimanima ese ita harorolaia sivaraina idia kamonai neganai, ita moale, ani? To unai sibona lasi, ita moale badina Iehova ese iseda kara bona ia totona ita karaia gaukarana ia laloa bada. (1 Korinto 15:58 duahia.) Tadikaka Marco be Italy ai ia noho, ia gwau: “Lau moale badina mai egu goada ibounai ida Iehova lau hesiai henia, bona lau diba ia ese lau karaia gaukarana do ia laloaboio lasi.” Tadikaka Franco danu be Italy ai ia noho, ia gwau: “Iehova ese dina ta ta ai, iena Hereva bona ia henia gaudia ma haida amo ia hahedinaraia, ia be ita ia lalokau henia bona ia totona ita karaia gaukarana ia laloa bada. Unai dainai lau moale lau be Dirava ida lau gaukara hebou bona lau mamia egu mauri be mai anina.”

9. Iehova bona Iesu edia hetura karana be edena bamona, bona dahaka dainai?

⁹ Ita lalokau henia taudia ida ita gaukara hebou neganai, ita be tura namodia ai ita lao bona edia kara do ita diba namonamo. Idia ura hagugurua gaudia bona idia karaia dalana do ita diba danu. Iesu be Iehova ida reana lagani bilioni momo ia gaukara hebou, bona edia huanai ia noho lalokauna be ia goada. Iesu ese edia hetura karana ia herevalaia, ia gwau: “Lau bona Tamana be tamona.” (Ioa. 10:30) Idia ruaosi be mai lalotamona ida idia gaukara hebou.

10. Edena dala ai haroro gaukara ese ita, Dirava, bona ma haida ia hatamonaia?

¹⁰ Iesu ena guriguri lalonai ia ese Iehova ia noia ena hahediba taudia ia gimaia totona. Dahaka dainai? Ia gwau: “Unai amo do idia tamona, ita ruaosi ita tamona bamona.” (Ioa. 17:11) Dirava ena taravatu ita badinaia bona haroro gaukara ita karaia neganai, iena kara namodia ita dibaia. Ia ita abidadama henia bona ena hakaua herevadia ita badinaia ena namo ita diba danu. Dirava kahirakahira ita lao neganai, ia be ita kahirakahira do ia mai. (Iamesi 4:8 duahia.) Danu, iseda tadikaka taihu ita tura henidia be namo, unai amo do ita gaukara hebou, moale hebou, bona iseda hekwakwanai ita haheaukalaia hebou diba. Taihu Octavia be Britain ai ia noho, ia gwau: “Iehova ida gaukara hebou karana  ese lau ia durua ma haida lau tura henia totona, badina ai ibounai emai tahua gauna be tamona sibona.” Oi be unai oi mamia danu, a? Oi ura Dirava idia hesiai henia taudia oi bamoa, a?

11. Dahaka dainai Iehova bona iseda tadikaka taihu kahirakahira ita tura henidia be namo?

¹¹ Hari iseda lalokau Dirava bona ma haida dekenai be ia goada, to tanobada matamata ai do ia goada momokani. Vaira nega ai do ita karaia gaukarana mani oi laloa! Mase taudia idia toreisi lou neganai, mai moale ida idia do ita hedavari henia, bona idia dekenai Iehova ena dala do ita hadibaia. Tanobada be paradaiso ai do ita halaoa. Unai be gaukara badana, to do ita moale badina iseda tadikaka taihu ida do ita gaukara hebou bona Mesia Basileia ena lohia henunai goevadae taudia ai do ita lao! Unai neganai, iseda hetura karana Dirava bona tadikaka taihu ida be do ia goada, oibe, ia ese ‘mauri gaudia ibounai edia bogadia do ia hakunua.’—Sal. 145:16 BHḡ.

12. Haroro gaukara ese edena dala ai ita ia gimaia?

¹² Iseda hetura karana Dirava ida ita gimaia be namo. Badina ita noho tanobadana be Satani Diabolo ese ia biagua. Bona ita be goevadae lasi taudia dainai, inai tanobada taudia edia laloa dalana bona kara ita tohotohoa diba. Tanobada taudia edia laloa dalana be sinavai badana ta ena ranu goadana ida ita hahegeregerea diba. Bema ita nahu goadagoada lasi, unai ranu ese ita ia veria lao diba. Unai hegeregerena, namona be ita hekwarahi, tanobada ena lalohadai ita dadaraia totona. Ita haroro neganai, namona be iseda abidadama idia hagoadaia gaudia ita laloa. (Fili. 4:8) Bema unai ita karaia, iseda abidadama do ia goada, bona Dirava ena gwauhamata idauidau bona ena taravatu do ita laloa. Oibe, haroro gaukara ese ita ia durua iseda tuari dabua ita hahedokilaia noho totona.—Efeso 6:14-17 duahia.

13. Tadikaka ta ese haroro gaukara be edena bamona ia laloa?

¹³ Bema haroro gaukara bona iseda tomadiho gaukara ma haida dekenai ita bisi, iseda hekwakwanai do ita laloa momo lasi. Joel be Australia ai ia noho, ia gwau: “Haroro gaukara ese lau ia durua, hari idia vara gaudia lau laloa namonamo totona. Oibe, lau ia durua Baibel ena hakaua herevadia lau badinaia dainai lau davaria hahenamo bona taunimanima edia hekwakwanai lau laloa totona. Haroro gaukara ese lau ia durua dainai, lau manau bona Iehova bona egu tadikaka taihu dekenai lau tabekau diba.”

14. Edena bamona ita diba Dirava ena lauma helaga be ita ida ia noho?

¹⁴ Haroro gaukara ese iseda abidadama ia hagoadaia, badina Dirava ena lauma helaga be ita ida ia noho. Mani inai oi laloa: Bema ta be oi ia hamaoroa emu komiuniti ai idia noho taudia dekenai paraoa do oi hariharilaia. Bona unai oi karaia dainai davana do oi abia lasi. To, gabeai oi diba taunimanima momo be unai paraoa idia ura henia lasi bona haida be unai paraoa oi hariharilaia dainai oi idia inai henia. Unai bamona gaukara do oi karaia noho, a? Taunimanima be unai paraoa idia ura henia lasi dainai, do oi lalomanoka bona unai gaukara do oi hadokoa, ani? To, lagani momo lalonai ita momo be sibona iseda moni ita gaukaralaia haroro gaukara ita karaia totona, ena be haida ese ita idia kirikirilaia. Unai ese ia hahedinaraia Dirava ena lauma helaga be ita ida ia noho, ani?

15. Edena dala ai haroro gaukara ese Dirava ena ura ia hagugurua?

¹⁵ Sivarai namona harorolaia gaukarana amo ita ese Iehova ena ura ita hagugurua. Oibe, Dirava ia ura taunimanima be tanobada ai do idia noho hanaihanai. Ena be Adamu ia kara dika, to Iehova ese Iena ura ia haidaua lasi. (Isa. 55:11) Ia ese dala ia karaia taunimanima be kara dika bona mase ena igui amo ia ruhaia totona. Unai dainai Iesu be tanobada dekenai ia mai bona kamonai taudia totona ena mauri ia bouboulaia. To, ta be kamonai tauna ai ia lao totona, ia ese Dirava ena ura ia lalopararalaia be namo. Unai dainai Iesu ese taunimanima dekenai Dirava ena ura ia hadibaia, bona ena hahediba taudia ia hamaoroa unai bamona do idia karaia danu. Bema taunimanima ita durua Dirava ida maino ai idia noho totona, ita ese idia ita durua kara dika bona mase ena igui idia rakatania totona.

16. Edena dala ai haroro gaukara ese Dirava ena taravatu hereadaena ia hagugurua?

¹⁶ Bema taunimanima ita durua mauri hanaihanai idia abia totona, ita hahedinaraia ita be idia bona Iehova ita lalokau henia. Badina “iena ura be taunimanima idauidau do ia hamauria bona hereva momokani ena diba maoromaoro do idia abia.” (1 Tim. 2:4) Israela taudia ese idia abia taravatu dekenai edena taravatu be hereadae be ta ese ia henanadailaia neganai, Iesu ia gwau: “‘Namona be Iehova emu Dirava oi lalokau henia mai emu kudouna ibounai, mai emu mauri ibounai, bona mai emu darana ibounai ida.’ Unai taravatu be hereadae bona ia be ginigunana. Iharuana be inai: ‘Namona be emu dekena tauna oi lalokau henia, oi sibona oi lalokau henia hegeregerena.’” (Mat. 22:37-39) Haroro gaukara ita karaia neganai, ita hahedinaraia ita be unai taravatu ita badinaia.—Kara 10:42 duahia.

17. Sivarai namona harorolaia gaukarana be edena bamona oi laloa?

¹⁷ Haroro gaukara be hahenamo badana! Iehova ese ita dekenai unai gaukara ia henia, unai amo ita be Ia bona ma haida kahirakahira ita lao diba, bona iseda hetura karana Dirava ida ia gimaia. Danu, haroro gaukara ese ita ia durua Dirava bona iseda tadikaka taihu ita lalokau henia totona. Tanobada hegegemadai, Dirava ena taunimanima edia noho dala be idauidau, ena be idia be matamata o buruka, taga o ogogami, goada o manoka, to idia milioni momo be idia gaukara goada ma haida dekenai edia abidadama idia gwauraia hedinarai totona. Chantel be France ai ia noho, ia gwau: “Siahu bada Tauna, gau ibounai ia Havaraia Tauna bona moale Diravana unai, be lau dekenai ia gwau: ‘Oi lao! Oi haroro! Mai emu kudouna ibounai ida lau totona do oi hereva. Lau ese oi do lau hagoadaia bona durua. Oi dekenai egu Hereva Baibel do lau henia, bona oi do idia bamoa taudia danu. Sikuli idauidau amo oi do lau treinia, bona nega korikori ai oi dekenai hadibaia herevadia do lau henia.’ Iehova ese ita dekenai ia henia gaukarana bona ia ida ita gaukara hebou be hahenamo badana!”