1, 2. Dahaka dainai Paulo ese Heberu Keristani taudia ia tore henidia?

LAGANI 61 C.E. ai, Israela ai idia noho Keristani taudia ibounai be maino ai idia noho. Ena be aposetolo Paulo be Roma ena dibura ruma ai ia noho, to ia ura ia idia ruhaia haraga. Badina iena turana Timoteo be dibura ruma amo idia ruhaia, bona idia ura Iudea ai idia noho Keristani taudia idia vadivadi henia. (Heb. 13:23) To idia diba lasi gauna be, lagani 5 murinai Ierusalema be ‘tuari oreadia ese do idia hagegea,’ Iesu ia peroveta hegeregerena. Ia gwau unai ia vara neganai, namona be Iudea bona Ierusalema ai idia noho Keristani taudia, be unai gabu idia rakatania haraga.—Luka 21:20-24.

² Iesu ese unai ia perovetalaia bena lagani 28 idia hanaia lalonai, Israela ai idia noho abidadama Iuda Keristani taudia be dagedage idia davaria. (Heb. 10:32-34) To, Paulo ia diba edia abidadama dainai kahirakahira hahetoho badana do idia davaria. (Mat. 24:20, 21; Heb. 12:4) Unai dainai ia ura do idia noho hegaegae. Unai nega ia ginidae neganai, namona be idia haheauka bona edia abidadama dekenai idia gini goada, unai amo edia mauri do idia haboioa lasi. (Heberu 10:36-39 duahia.) Unai dainai lauma helaga ese Paulo ia hasiahua,  unai tadikaka taihu dekenai revareva ta do ia torea. Hari unai idia gwauraia Heberu bukana.

3. Dahaka dainai Heberu bukana ita laloa bada be namo?

³ Paulo ese Heberu Keristani taudia dekenai ia torea revarevana ita laloa bada be namo. Dahaka dainai? Badina ita noho negana be unai nega hegeregerena. Inai “nega aukadia” lalonai, ita be dagedage karadia idauidau ita davaria. (2 Tim. 3:1, 12) To, iseda abidadama be ia goada bona Dirava ita badinaia noho. Oibe, ena be hari ita be maino ai ita noho bona dagedage ita davaria lasi, to namona be ita laloatao, Paulo ena negai idia noho Keristani taudia bamona, kahirakahira iseda abidadama dainai hahetoho badana do ita davaria!—Luka 21:34-36 duahia.

4. Lagani 2016 ena siri badana be dahaka, bona dahaka dainai ia be siri namona?

⁴ Dahaka ese ita do ia durua ita noho hegaegae totona? Heberu bukana ai, Paulo ese iseda abidadama ia hagoadaia gaudia ia herevalaia. Mai anina bada gauna ta be unai buka ena karoa dokona ena siri ginigunana ese ia hahedinaraia. Unai be lagani 2016 ena siri badana. Ia gwau: “Namona be tadikaka bamona do umui lalokau heheni noho.”—Heb. 13:1.

5. Tadikaka lalokau henia karana be dahaka?

⁵ Tadikaka lalokau henia karana be dahaka? Paulo ese ia gaukaralaia Grik gado herevana, phi·la·del·phiʹa, ena anina be “tadikaka lalokau henia.” Unai lalokau be ruma bese taudia eiava tura namodia huanai ia noho hetura karana goadana ia herevalaia danu. (Ioa. 11:36) Oibe, namo lasi hereva sibona amo ita hahedinaraia ita be tadikaka taihu, to iseda kara amo unai ita hahedinaraia danu. (Mat. 23:8) Iseda hetura karana goadana be inai siri ese ia hahedinaraia. Ia gwau: “Namona be emui abidadama tamona taudia do umui hebogahisi henia bona lalokau henia, tadikaka idia lalokau heheni bamona. Bona umui ta ta dekenai hemataurai hahedinaraia karana do umui gunalaia.” (Roma 12:10) Unai lalokau bona a·gaʹpe lalokauna ese Dirava ena taunimanima ia hatamonaia.

6. Keristani taudia ese daidia do idia lalokau henia?

⁶ Diba bada tauna ta ia gwau: “Inai hereva, ‘tadikaka lalokau henia,’ be momo idia diba lasi, to Keristani bukadia sibona ai ia noho.” Iuda tomadiho ai, inai hereva “tadikaka” be edia ruma bese taudia bona Iuda besena sibona dekenai idia gwauraia, to Idau Bese taudia dekenai idia gwauraia lasi. To, Keristani taudia ese Dirava idia abidadama henia taudia ibounai do idia lalokau henia, idau bese taudia danu. (Roma 10:12) Oibe, Iehova ese ita ia hadibaia iseda tadikaka taihu ita lalokau henidia totona. (1 Tes. 4:9) To dahaka dainai unai lalokau ita hahedinaraia noho be gau badana?

7. Dahaka badina badana dainai lalokau ita hahedinaraia noho be namo?

⁷ Iehova ia ura iseda tadikaka taihu ita lalokau henia. Unai dainai bema Dirava ita lalokau henia, namona be iseda tadikaka taihu ita lalokau henia danu. (1 Ioa. 4:7, 20, 21) Oibe, inai nega aukadia lalonai, iseda tadikaka oreana ida ita noho be namo. Paulo ia diba Heberu Keristani taudia haida be edia ruma bona kohu do idia rakatania. Iesu ia gwau unai nega  be do ia auka momokani. (Mar. 13:14-18; Luka 21:21-23) Unai dainai Keristani taudia ese ta ta lalokau henia karana idia hagoadaia be namo.—Roma 12:9.

8. Hisihisi badana ia do matamaia lasi neganai, dahaka ita karaia be namo?

⁸ Kahirakahira aneru ese idia dogoatao hisihisi badana ena lai 4 do idia rakatania. (Mar. 13:19; Apok. 7:1-3) Bena, ita ese inai sisiba ita badinaia be namo: “Egu bese taudia e, emui ruma dekenai do umui raka vareai, bona emui iduara do umui koua. Nega sisina lalonai do umui hunia, ia lao bona Dirava ena badu do ia ore.” (Isa. 26:20) Inai hereva “ruma” be reana iseda kongrigeisen ia herevalaia. Vaia hebou negadia sibona ai, ita ibounai ita haboua Iehova ita tomadiho henia totona. To nega ma haida ai unai ita karaia lasi. Paulo ese Heberu Keristani taudia ia hagoadaia unai bamona negadia ai, ta ta do idia hagoadaia bona idia “lalokau heheni bona kara namodia” idia hahedinaraia. (Heb. 10:24, 25) Iseda tadikaka taihu lalokau henia karana ita hagoadaia be gau badana, unai amo gabeai do idia vara hahetoho ita haheaukalaia diba.

9. (a) Edena dala haida ai iseda lalokau ita hahedinaraia diba? (b) Tadikaka ese lalokau idia hahedinaraia daladia haida herevalaia. (Rau 11 ai futnout itaia.)

⁹ Hisihisi badana ia do matamaia lasi neganai, namona be tadikaka lalokau henia karana ita hagoadaia. Iseda tadikaka momo be tano mareremarere, abata, lai-guba, sunami, eiava disasta badadia ma haida amo dika bada idia davaria. Ma haida be dagedage dainai hisihisi idia davaria noho. (Mat. 24:6-9) Danu, kara gageva tanobada ai ita noho dainai, dina ta ta ai iseda moni be ia hegeregere lasi aniani ita hoia totona. (Apok. 6:5, 6) Unai bamona hekwakwanai idia bada idia lao dainai, namona be iseda tadikaka lalokau henia karana ita hagoadaia. Oibe, ena be “taunimanima momo edia lalokau be do ia keru,” to ita lalokau heheni noho be namo.—Mat. 24:12. ^[1]

10. Hari dahaka do ita herevalaia?

¹⁰ Ena be hekwakwanai momo ita davaria, to edena dala ai iseda tadikaka taihu do ita lalokau henidia noho? Edena dala ai unai do ita hamomokania? Aposetolo Paulo ese inai hereva, “namona be tadikaka bamona do umui lalokau heheni noho,” ia gwauraia murinai, ia ese lalokau do ita hahedinaraia daladia haida ia gwauraia. Mani unai daladia 6 ita herevalaia.

11, 12. Heabidae karana ita hahedinaraia ena anina be dahaka? (Laulau ginigunana herevalaia.)

¹¹ “Heabidae karana do umui laloaboio lasi.” (Heberu 13:2 duahia.) Grik gado herevana idia hahanaia “heabidae” ena anina be “idau taudia hebogahisi henidia.” Reana Aberahamo bona Lota edia haheitalai ita laloa. Idia ruaosi ese idia diba lasi taudia toi dekenai hebogahisi idia hahedinaraia. Bona idia be aneru toi. (Gen. 18:2-5; 19:1-3) Paulo ese unai haheitalai ia gaukaralaia, unai amo Heberu Keristani taudia ia hagoadaia edia tadikaka dekenai heabidae karana idia hahedinaraia totona.

¹² Edena dala ai heabidae karana do ita hahedinaraia? Iseda ruma dekenai ma haida ita boiria diba aniani totona, eiava ita moale hebou bona hagoadaia heheni. Unai ita karaia totona, gau momo ita hegaegaelaia be mai anina bada lasi, eiava iseda kara namo do idia haloua taudia sibona ita boiria. (Luka 10:42; 14:12-14)  Momokani, ita ura iseda tadikaka taihu ita hagoadaia, to namo lasi ita sibona ita abia isi! Ena be iseda sekit naria tauna bona ena adavana ita diba namonamo lasi, to heabidae karana ita hahedinaraia, a? (3 Ioa. 5-8) Oibe, ita be nega momo ita bisi bona gau idauidau ita lalohekwarahilaia, to ‘heabidae karana ita laloaboio lasi’ be namo.

13, 14. Edena dala ai “dibura ruma lalonai idia noho taudia” do ita lalodia?

¹³ “Dibura ruma lalonai idia noho taudia umui laloa.” (Heberu 13:3 duahia.) Paulo be dibura ai idia noho taudia ibounai ia herevalaia lasi. To edia abidadama dainai dibura ruma ai idia atodia tadikaka ia herevalaia. Ia danu be lagani 4 dibura ruma ai ia noho, unai nega ai Heberu Keristani taudia dekenai unai hereva ia torea. (Fili. 1:12-14) Tadikaka ia hanamodia, badina idia ese ‘dibura lalonai idia noho tadikaka idia hebogahisi henia.’ (Heb. 10:34) Paulo be dibura ruma ai ia noho neganai, kahirakahira idia noho tadikaka ese ia idia durua, to Heberu Keristani taudia edia noho gabuna be daudau. Vadaeni edena dala ai Paulo idia laloa? Edia guriguri amo unai idia karaia.—Heb. 13:18, 19.

¹⁴ Hari danu, ita be dibura ruma ai idia noho tadikaka kahirakahira ita noho lasi. Bona idia dekenai heduru ita henia diba lasi. To, edena dala ai hebogahisi bona lalokau ita hahedinaraia diba? Dala ta be hanaihanai unai abidadama taudia ita laloa bona idia totona Iehova ita guriguri henia. Hegeregere, iseda tadikaka taihu, bona natudia momo be Eritrea ena dibura ruma ai idia noho. Idia haida be, tadikaka Paulos Eyassu, Isaac Mogos, bona Negede Teklemariam. Idia be lagani 20 dibura ruma ai idia noho. Unai tadikaka ita lalodia, a?

15. Dahaka dainai iseda headava do ita matauraia?

¹⁵ “Taunimanima ibounai ese headava idia matauraia be namo.” (Heberu 13:4 duahia.) Lalokau ita hahedinaraia dalana ta be iseda kara ia goeva be namo. (1 Tim. 5:1, 2) Bema ta be tadikaka o taihu ta o iena ruma bese tauna ta ida ia mahuta hebou, bona “ena tadikaka ia hahisia eiava ena maoro ia kokia,” unai ese tadikaka huanai ia noho lalokauna ia hadikaia diba. (1 Tes. 4:3-8) Danu, bema hahine ta ia itaia ena adavana be ponografi laulau ia itaia, oi laloa unai hahine be edena bamona do ia mamia? Oi laloa ia be ena hahine ia lalokau henia bona edia headava ia matauraia, a?—Mat. 5:28.

16. Edena dala ma ta ai iseda lalokau ita hahedinaraia diba?

¹⁶ “Umui dekenai idia noho gaudia be hegeregere.” (Heberu 13:5 duahia.) Bema Iehova ita abidadama henia, gau ma haida do ita lalohekwarahilaia lasi. Unai ese ita do ia durua moni bona kohu dekenai lalohadai maorona ita abia totona. (1 Tim. 6:6-8) Danu, do ita laloparara iseda hetura karana Iehova bona iseda Keristani tadikaka ida be mai anina bada, bona moni amo unai ita hoia diba lasi. Ia dekenai idia noho gaudia ia moalelaia tauna be hariharibada karana ia laloa bada. To ia maumau lasi, eiava ta ena kerere ia tahua lasi, bona ia mataganigani lasi, badina unai bamona kara ese iseda huanai ia noho lalokauna ia hadikaia diba.—1 Tim. 6:17-19.

17. “Lalogoada” karana ese edena dala ai ita ia durua?

¹⁷ “Mai lalogoada ida.” (Heberu 13:6 duahia.) Ena be hahetoho idauidau ita davaria, to ita lalogoada, badina Iehova ita abidadama henia. Unai ese ita ia durua lalohadai maorona ita abia totona.  Bema tadikaka ita lalokau henia bona lalohadai maorona ita abia, unai ese ita do ia durua iseda tadikaka taihu ita hagoadaia totona. (1 Tes. 5:14, 15) Hisihisi badana ia matamaia neganai, ita be do ‘ita gini tore bona iseda kwarana ita abia isi,’ badina ita diba iseda hahemauri negana be kahirakahira.—Luka 21:25-28.

18. Edena dala ai iseda elda taudia dekenai lalokau ita hahedinaraia diba?

¹⁸ “Umui idia hakaua taudia do umui laloatao.” (Heberu 13:7, 17 duahia.) Ena be iseda elda taudia be davana idia abia lasi, to idia karaia gaukarana ita laloa neganai, unai ese ita do ia durua lalokau ita hahedinaraia noho bona idia do ita laloa bada. Ita ura lasi edia moale idia haboioa o ita karaia gauna ta dainai idia lalohisihisi. To, idia ita kamonai henia bona edia henunai ita noho neganai, ‘edia gaukara dainai, idia do ita lalokau henia bona do ita lalodia bada.’—1 Tes. 5:13.

19, 20. Edena dala ai iseda lalokau karana do ita “habadaia”?

¹⁹ Taunimanima ibounai idia diba Iehova ena taunimanima be edia tadikaka idia lalokau henia. Paulo ese unai kara ia hanamoa. To, ia ese ibounai ia hagoadaia ‘unai kara do idia habadaia.’ (1 Tes. 4:9, 10) Namona be ita hekwarahi unai kara ita hahedinaraia noho totona!

²⁰ Unai dainai inai lagani ena siri badana ita itaia neganai, namona be inai henanadai ita lalodia: Ibounai dekenai heabidae karana lau hahedinaraia diba, a? Dibura ruma ai idia noho tadikaka be edena bamona lau lalodia? Dirava ese ia hamatamaia headava dalana lau matauraia, a? Lau dekenai idia noho gaudia dainai egu lalona ia hegeregere, a? Iehova abidadama henia karana be edena bamona lau hagoadaia diba? Edena dala ai ita idia hakaua taudia ida lau gaukara hebou diba? Bema unai dala 6 be iseda mauri lalonai ita badinaia, do ita hahedinaraia iseda lagani ena siri badana be mai anina bada. Ia gwau: “Namona be tadikaka bamona do umui lalokau heheni noho.”—Heb. 13:1.