PABLISA be momo lasi tanodia ai idia haroro goadagoada Witnes taudia momo be singul taihudia. Idia haida be lagani momo lalonai unai tanodia dekenai hesiai gaukara idia karaia. Dahaka ese idia ia durua dainai, idau tano dekenai idia lao? Idau tano ai hesiai gaukara idia karaia lalonai dahaka idia dibaia? Dahaka hahenamo idia davaria? Ai ese unai taihu haida ai intaviu henia. Bema oi be singul taihu ta bona oi ura bada moale korikorina ia mailaia gaukarana oi durua, ai diba unai taihu edia ekspiriens ese oi do ia hagoadaia. Momokani, Dirava ena taunimanima ibounai be edia haheitalai amo namo bada idia davaria diba.

Oi laloa oi hegeregere, idau tano ai painia gaukara oi karaia totona, a? Anita, ena mauri lagani be 75, be guna ia laloa ia hegeregere lasi. Ia be England ai ia tubu daekau, bona ena mauri lagani be 18 neganai, ia painia matamaia. Ia gwau: “Lau ura bada taunimanima dekenai Iehova lau herevalaia, to lau laloa idau tano ai unai lau karaia diba lasi. Lau be idau gado ta lau dibaia lasi bona lau diba do ia auka gado ta dibaia totona. Unai dainai Gilead Sikulina dekenai lau idia boiria neganai, lau hoa bada. Lau mamia lau hegeregere lasi unai hahenamo do lau abia. To lau laloa, ‘Bema Iehova ia ura unai lau karaia, do lau tohoa.’ Unai be lagani 50 mai kahana gunanai. Unai nega amo Japan ai misinari gaukara lau do karaia noho.” Anita ma ia gwau: “Nega haida mai moale ida taihu matamatadia lau hamaoroa, ‘Emui baege umui abia bona inai laolao hereadaena dekenai lau umui bamoa!’ Lau moale badina momo be unai idia karaia.”

Idau tano ai hesiai gaukara idia karaia taihu momo be matamanai idia lalorua dainai idia ura lasi tano ma ta dekenai idia lao. To, dahaka ese idia ia durua dainai idia boga-auka?

Maureen, ena mauri lagani be 64, ia gwau: “Lau tubu daekau noho lalonai, lau ura bada egu mauri lau moalelaia bona ma haida lau durua.” Iena mauri lagani be 20 neganai, Canada ena provinsi ta, Quebec, dekenai ia lao, unai gabu ai painia be momo lasi. “Gabeai, Gilead Sikuli totona lau idia boiria, to lau gari badina egu turadia do lau rakatania bona idau tano dekenai do lau lao.” Ma ia gwau: “Lau lalohekwarahi danu, badina bema lau lao, egu sinana sibona ese egu gorere tamana do ia naria. Hanuaboi momo mai taitai ida Iehova dekenai egu lalohekwarahi lau gwauraia. Lauegu lalohekwarahi be egu tama sina dekenai lau gwauraia neganai, idia ese lau idia hagoadaia unai boiboi herevana lau abia dae totona. Danu, lau itaia emai kongrigeisen taudia ese egu tama sina idia durua bada. Iehova ena henari karana lau itaia neganai, lau diba Ia ese lau do ia naria danu. Unai nega ai egu lalona lau hadaia do lau lao!” Lagani 1979 amo, Maureen be lagani 30 mai kahana lalonai West Africa dekenai misinari gaukara ia karaia. Hari ia be Canada ai iena sinana ia naria, to spesel painia gaukara ia do karaia noho. Idau tano ai ia noho negana ia laloa lou, ia gwau: “Iehova be hanaihanai egu dabu gaudia be nega korikori ai ia henia.”

Wendy, ena mauri lagani be 65, be ia matamata neganai, Australia ai painia gaukara ia matamaia. Ia gwau: “Lau gari dainai ia auka idau taudia lau hereva henia totona. To painia gaukara ese lau ia durua taunimanima idauidau lau hereva henia totona. Gabeai lau be mai gari lasi ida lau haroro diba. Painia gaukara ese lau ia durua Iehova dekenai lau tabekau totona, bona idau tano ai Ia hesiai henia karana lau moalelaia matamaia. Danu, lagani 30 mai kahana lalonai, Japan ai misinari gaukara ia karaia singul taihu ta ese lau ia boiria, ia ida Japan dekenai do lau lao bona unuseniai hua toi lau noho. Ia ida lau gaukara karana ese egu ura ia habadaia idau tano dekenai lau lao totona.” Lagani 1986 ai, Wendy be Vanuatu dekenai ia lao, Australia ena ist kahana amo, unai motumotu be kilomita 1,770 bamona.

Wendy be Vanuatu dekenai ia do noho, bona rimout trensleisen ofesi ta dekenai ia gaukara. Ia gwau: “Lau itaia grup bona kongrigeisen matamatadia idia hamatamaia be moale bada gauna. Unai motumotu ai Iehova ena gaukara lau durua be hahenamo hereadaena.”

Kumiko, ena mauri lagani be 65, be Japan ai regula painia gaukara ia karaia noho lalonai, ena painia turana ese ia hamaoroa Nepal dekenai do idia lao. Kumiko ia gwau: “Ia ese lau ia noia loulou, to nega momo lau gwau lasi. Lau lalohekwarahi badina gado matamata do lau dibaia bona egu noho dalana do lau haidaua. Danu, idau tano dekenai lau lao totona, moni dalanai lau dabu. Unai lau lalohadailaia noho lalonai, motabaik amo aksiden lau davaria bona hospital dekenai lau noho. Unai neganai, lau laloa: ‘Lau dekenai gabeai do ia vara gauna be daika ia diba? Reana gorere badana ta do lau abia bona idau tano ai painia gaukara do lau karaia lasi. Idau tano ai lagani tamona lalonai painia gaukara lau karaia diba, a?’ Iehova lau noia goadagoada lau do ia durua totona.” Kumiko be hospital ia rakatania murinai, loaloa totona Nepal dekenai ia lao, bona gabeai ia bona ena painia turana be unuseni idia lao.

Kumiko be kahirakahira lagani 10 lalonai Nepal ai hesiai gaukara ia karaia, ia gwau: “Guna lau lalohekwarahilaia gaudia be lau laloa lou lasi. Lau moale badina pablisa be momo lasi gabuna dekenai lau lao. Ruma ta ai Baibel lau herevalaia neganai, nega momo neiba taudia 5 o 6 idia mai bona idia kamonai. Natuna maragidia danu be mai hemataurai ida Baibel ena pepapepa totona idia noinoi. Unai bamona teritori ai haroro karana lau moalelaia.”

Ai intaviu henidia singul taihu be hekwakwanai haida idia davaria danu. Unai hekwakwanai be edena dala ai idia hanaidia?

Diane, ia be Canada amo, ia gwau: “Matamanai, lau mamia egu famili lau reaia bada.” Iena mauri lagani be 62, bona ia be lagani 20 lalonai Ivory Coast (hari idia gwauraia Côte d’Ivoire) dekenai misinari gaukara ia karaia. Ia gwau: “Iehova lau noia lau do ia durua, egu teritori ai idia noho taudia lau lalokau henia totona. Gilead ai, emai tisa ta, Tadikaka Jack Redford, ese ai ia hamaoroa emai teritori taudia edia noho dalana ai itaia neganai, reana matamanai do ai hoa, badina idia haida be idia ogogami momokani. To ia gwau: ‘Edia ogogami maurina umui laloa lasi. To unai taudia edia vairana bona matadia umui itaia. Baibel ena hereva momokani idia kamonai neganai, edia toana umui itaia.’ Unai lau karaia, bona hahenamo lau abia! Basileia ena sivarai lau herevalaia neganai, lau itaia taunimanima idia moale!” Dahaka ese Diane ia durua dainai ia ura idau tano ai hesiai gaukara ia karaia? Ia gwau: “Lauegu Baibel stadi taudia lau tura henia bona mai abidadama ida Iehova idia hesiai henia matamaia neganai, lau moale bada. Lauegu asainmen be egu hanua ai lau halaoa. Iehova ena orea lalonai sinana bona tamana, tadikaka bona taihu lau davaria, Iesu ena gwauhamata hegeregerena.”​—⁠Mar. 10:​29, 30.

Anne, ena mauri lagani be 46, be Asia ai misinari gaukara ia karaia, unuseniai iseda gaukara idia taravatua. Ia gwau: “Idia hanaia laganidia ai, tano idauidau ai lau haroro neganai, nega tamona ai noho hebou taihu edia mauri dalana bona kara be egu amo ia idau momokani. Unai dainai nega haida unai ese hekwakwanai ia havaraia. Unai ia vara neganai, unai taihu lau tura henidia toho, badina lau ura edia mauri dalana lau dibaia. Danu, lau hekwarahi idia lau lalokau henia bona lau lalomanau totona. Lau moale badina unai ese anina namona ia havaraia, badina ai be tura namodia ai ai lao bona idia ese lau idia durua lau haheauka totona.”

Lagani 1993 ai, Ute, ia be Germany amo, bona ena mauri lagani be 53, be Madagascar ai misinari gaukara ia karaia. Ia gwau: “Matamanai, lau hekwarahi gado lau dibaia, mauri dala idauna lau abia dae, bona gorere idauidau amo sibona lau gimaia totona, hegeregere malaria, amoeba, bona gorere idia havaraia gaigai maragimaragi. To heduru bada lau abia. Taihu taudia, edia natudia, bona egu stadi taudia ese lau idia durua edia gado lau dibaia totona. Lau gorere neganai, egu misinari turana ese lau ia naria. To momokani Iehova ese lau ia durua bada. Nega ibounai guriguri amo ia dekenai egu lalohekwarahi lau gwauraia. Bena egu guriguri ena haere lau naria​—⁠nega haida dina momo o hua momo​—⁠to lau hesiku lasi. Iehova ese hekwakwanai ibounai ia hamaoromaoroa.” Ute be lagani 23 lalonai Madagscar dekenai hesiai gaukara ia karaia.

Pablisa momo lasi gabudiai hesiai gaukara idia karaia taudia ma haida bamona, idau tano ai idia noho singul taihu momo idia gwau idia karaia gaukarana ese edia mauri ia hanamoa bada. Idia davaria hahenamo haida be dahaka?

Heidi, ia be Germany amo, bona ena mauri lagani be 73, be lagani 1968 amo Ivory Coast (hari idia gwauraia Côte d’Ivoire) ai misinari gaukara ia karaia. Ia gwau: “Orea lalonai lau naria natudia be ‘hereva momokani ai idia raka noho’ neganai, lau moale bada. Lauegu Baibel stadi taudia haida be hari painia gaukara idia karaia bona ma haida be kongrigeisen elda taudia. Idia momo ese lau idia boiria Sinana eiava Tubuna Hahine. Elda tadikaka ta bona ena adavana bona natudia ese lau be edia famili ai idia halaoa. Unai dainai lau gwau diba Iehova ese lau dekenai natuna mero ta, ravana hahine, bona tubudia toi ia henia.”​—⁠3 Ioa. 4.

Karen be Canada amo, ena mauri lagani be 72, be lagani 20 mai kahana West Africa dekenai ia noho. Ia gwau: “Misinari gaukara ese lau ia durua sibona egu ura lau dadaraia, ma haida lau lalokau henia, bona lau haheauka totona. Danu, tano idauidau amo idia mai tadikaka taihu ida gaukara karana ese lau ia durua bada. Lau diba dala idauidau ai gaukara ita karaia diba. Bona tano idauidau amo tura namodia ita davaria be hahenamo badana! Ena be aiemai mauri bona asainmen idia idau, to ai be do tura namodia.”

Margaret be England amo, ena mauri lagani be 79, bona ia be Laos ai misinari gaukara ia karaia. Ia gwau: “Idau tano ai misinari gaukara lau karaia neganai, lau itaia Iehova ese kopi bona noho dala idauidau taudia ibounai be iena orea dekenai ia hakaua vareai. Unai ese egu abidadama ia hagoadaia momokani. Bona lau abia dae momokani Iehova ese iena orea ia hakaua noho bona iena ura be do ia guguru.”

Momokani, idau tano ai Iehova idia hesiai henia singul taihudia be Keristani gaukara namo hereana idia karaia. Unai dainai idia ita hanamoa be namo. (Gun. 11:​40, NWT) Ma danu, edia namba be ia bada daekau noho. (Sal. 68:​11, NWT) Emui noho dalana do oi haidaua bona ai intaviu henia taihudia edia haheitalai do oi badinaia, a? Bema unai oi karaia, do oi abia dae momokani Iehova “be namo momokani.”​—⁠Sal. 34:⁠8.