1, 2. Iehova ese edena dala ai ena havaraia gaudia ia gaukaralaia?

IEHOVA be hariharibada Diravana. Ita dekenai idia noho gaudia ibounai be ia ese ia henia. Iehova ese golo, siliva, bona tanobada ena dava bada gaudia ma haida ia biagua, bona unai gaudia ia gaukaralaia mauri gaudia ia durua totona. (Sal. 104:13-15; Hag. 2:8) Baibel lalonai idia noho sivarai momo ese idia hahedinaraia, Iehova be hoa dalanai unai gaudia ia gaukaralaia ena taunimanima ia durua totona.

² Lagani 40 lalonai, Israela besena be tano gagaena dekenai idia noho neganai, Iehova ese idia dekenai mana bona ranu ia henia. (Eso. 16:35) Unai dainai “edia aniani bona gau be hegeregere.” (Neh. 9:20, 21) Peroveta tauna Elisaia amo, Iehova ese hoa dalanai abidadama vabu ta ena oela maragina ia habadaia. Dirava ena harihari karana dainai, unai vabu ese ena abitorehai ia haloua bona moni orena amo ia bona ena natudia memero ia naria diba. (2 Kin. 4:1-7) Iehova ena heduru amo, Iesu be hoa dalanai aniani bona moni danu ia henia.​—⁠Mat. 15:35-38; 17:27.

3. Inai stadi ai dahaka do ita herevalaia?

³ Iehova ese gau momo ia havaraia mauri gaudia ia durua  totona. To, ia ese ena hesiai taudia ia noidia edia kohu do idia gaukaralaia ena orea ena gaukara idia durua totona. (Eso. 36:3-7; Aonega Herevadia 3:9 duahia.) Dahaka dainai Iehova ia ura iseda kohu be ia dekenai do ita henia lou? Idaunega abidadama taudia ese edena dala ai Iehova ena gwaukau taudia edia gaukara idia durua? Orea ese edena dala ai hari ita henia kontribusen idia gaukaralaia? Unai henanadai edia haere be inai stadi ai do ita herevalaia.

4. Iehova ena gaukara ita durua neganai, ia dekenai dahaka ita hahedinaraia?

⁴ Iehova dekenai ita henia, badina ia ita lalokau henia bona ita totona ia karaia gaudia dainai ita ura ia ita tanikiu henia. Oibe, ita moale bada, badina Iehova be ita totona gau momo ia karaia vadaeni. King Davida ese dubu helaga haginia gaukarana durua totona, idia henia gaudia ia herevalaia neganai, ia gwau ita dekenai idia noho gaudia ibounai be Iehova amo, bona ia dekenai do ita henia gaudia be ia ese ita dekenai ia henia vadaeni gaudia.​—⁠1 Sivarai 29:11-14 duahia.

5. Baibel ese edena bamona ia hahedinaraia henia karana be tomadiho karana badana ta?

⁵ Henia karana be iseda tomadiho karana ta danu. Matahanai ta ai, aposetolo Ioane ia kamonai Iehova ena hesiai taudia be guba amo idia gwau: “Iehova, aiemai Dirava e, oi be hegeregere momokani, hairai, hemataurai, bona siahu oi abia totona, badina oi ese gau ibounai oi havaraia bona oiemu ura dainai idia noho bona oi havaradia.” (Apok. 4:11) Momokani, Iehova be hegeregere momokani, hairai bona hemataurai ia abia totona, unai dainai ita ura ia dekenai iseda gau namo hereadia ita henia. Iehova ese Mose amo Israela besena ia hagania lagani ta ta lalonai nega toi Iehova vairanai do idia hedinarai. Unai aria ta ta be edia tomadiho karana dainai, idia be “Iehova vairanai imana kavakava do idia hedinarai lasi.” (Deu. 16:16, BHḡ) Hari danu, iseda henia karana amo ita hahedinaraia ita be Iehova ena orea ena gaukara ita laloa bada bona ita ura durua, bona unai be iseda tomadiho ena kahana badana ta.

6. Dahaka dainai hariharibada karana be mai ena namo? (Laulau ginigunana herevalaia.)

⁶ Namo lasi heduru ita abia sibona, to hariharibada karana ita hahedinaraia danu be namo. (Aonega Herevadia 29:21 duahia.) Mani oi laloa, natu ta be ena tama sina ese idia henia moni sisina amo idia totona harihari gauna ta ia hoia. Iena tama sina be unai harihari gauna idia laloa bada! Bema natu ta be ia painia bona ena tama sina ida ia noho, reana idia dekenai moni sisina ia henia diba aniani bona ma gau haida idia hoia totona. Ena be ena tama sina be ia idia doria lasi, to ena harihari gauna do idia abia dae, badina unai dala amo natuna ia hahedinaraia ena tama sina ese ia totona idia karaia gaudia ibounai ia laloa bada. Unai hegeregerena, Iehova ia diba iseda kohu ita henia karana be mai ena namo.

7, 8. Baibel negadiai, Iehova ena taunimanima be edena dala ai (a) haginia gaukara idia durua? (b) gaukara ma haida idia durua?

⁷ Baibel ese ia hahedinaraia Iehova ena taunimanima be kontribusen idia henia iena gaukara idia durua totona. Nega haida, haginia gaukara durua totona kontribusen idia henia. Hegeregere, Mose ese Israela taudia ia hagoadaia palai dubu haginia gaukara durua totona kontribusen do idia henia, King Davida danu be dubu helaga ia haginia gwauraia neganai, unai ia karaia. (Eso. 35:5;  1 Siv. 29:5-9) King Ioasa ena nega ai, hahelaga taudia ese kontribusen moni idia gaukaralaia Iehova ena ruma idia hanamoa totona. (2 Kin. 12:4, 5) Keristani kongrigeisen ginigunana ai, tadikaka be ia vara hitolo bada ena sivarai idia kamonai neganai, idia “ese edia lalona idia hadaia, idia dekenai ia noho gauna hegeregerena, heduru gaudia be Iudea ai idia noho tadikaka dekenai do idia siaia.”​—⁠Kara 11:27-30.

⁸ Nega ma haida ai, Iehova ena taunimanima ese gaukara idia gunalaia taudia dekenai moni idia henia. Mose Ena Taravatu henunai, Levi taudia be ahuna idia abia lasi, iduhu ma haida bamona. To, Israela taudia ese idia abia karoa 10 amo karoa ta be idia dekenai idia henia, unai amo Levi taudia be dubu helaga ena gaukara sibona dekenai do idia bisi. (Num. 18:21) Unai hegeregerena, Iesu bona ena aposetolo taudia be hahine haida edia hariharibada karana amo namo idia davaria, “idia be edia kohu idia gaukaralaia Iesu bona ena hahediba taudia idia durua totona.”​—⁠Luka 8:1-3.

9. Idaunegai, tadikaka be edena dala ai kontribusen idia henia?

⁹ Momokani, unai kontribusen be dala idauidau amo idia abia. Tano gagaena ai palai dubu idia ura haginia neganai, Israela taudia be Aigupito amo idia abia gaudia danu idia henia. (Eso. 3:21, 22; 35:22-24) Aposetolo edia negai, Keristani taudia haida be edia uma o ruma idia hoihoilaia, bona moni be aposetolo taudia dekenai idia henia. Bona aposetolo taudia ese unai moni be idia dabu taudia dekenai idia haria. (Kara 4:34, 35) Ma haida be moni idia haboua, bona nega ta ta ai idia henia unai gaukara idia durua totona. (1 Kor. 16:2) Momokani, mauri dala idauidau taudia​—⁠taga o ogogami​—⁠be kontribusen idia henia.​—⁠Luka 21:1-4.

10, 11. (a) Edena dala ai Baibel negadiai hariharibada karana idia hahedinaraia taudia ita tohotohoa diba? (b) Basileia gaukarana oi durua karana ena hahenamo be edena bamona oi laloa?

¹⁰ Hari inai negai, reana tadikaka ese ita do idia noia gaukara haida durua monina ita henia totona. Hegeregere, reana emu kongrigeisen be palani idia karaia Kingdom Hall idia hanamoa o matamatana idia haginia totona. Eiava ita idia hadibaia iseda brens ofesi do idia hanamoa, ita lao henia hebouhebouna do ita durua, eiava disasta idia davaria tadikaka taihu ita durua totona. Iseda kontribusen amo hedikwota bona tanobada hegegemadai idia noho brens ofesi ai idia gaukara taudia ita durua diba. Danu, iseda kontribusen amo misinari taudia, spesel painia taudia, bona sekit gaukara idia karaia taudia ita durua. Ma danu hua ta ta ai, emu kongrigeisen be brens ofesi dekenai kontribusen idia siaia, unai amo tano ma haida ai idia noho tadikaka taihu totona, Assembly Hall bona Kingdom Hall matamatadia idia haginia diba.

¹¹ Inai dina gabediai, Iehova ese ia hagugurua noho gaukarana be ita ibounai ese ita durua diba. Kontribusen idia henia taudia edia ladana be ta ia diba lasi.Kingdom Hall ai idia noho kontribusen maua lalonai moni ita atoa o jw.org amo iseda kontribusen ita siaia neganai, ma haida ita hadibaia lasi ita be moni hida ita atoa. Reana ita mamia ita henia monina be bada lasi. To, orea ese idia abia kontribusen momo be moni sisina idia atoa taudia amo, to moni bada idia atoa taudia amo lasi. Ena be iseda tadikaka haida be Makedonia taudia bamona idia “ogogami momokani,” to idia be mai moale ida hariharibada karana idia hahedinaraia.​—⁠2 Kor. 8:1-4.

12. Orea be edena dala ai kontribusen monina idia gaukaralaia namonamo?

¹² Hakaua Oreana be mai ena kamonai  bona mai ena kara maoromaoro ida kontribusen moni idia gaukaralaia. (Mat. 24:45) Idia abia kontribusen monina be idia bajetia namonamo bona unai hegeregerena idia gaukaralaia. (Luka 14:28) Baibel negadiai, kontribusen idia naria taudia be hakaua herevadia idia badinaia, unai amo idia abia kontribusen be dala maorona ai idia gaukaralaia diba. Hegeregere, Esera be Parasa ena king ese ia henia kontribusen​—⁠golo, siliva, bona gau ma haida edia davana be hari U.S. dola milioni 100 mai kahana bamona​—⁠ia abia bona Ierusalema dekenai ia lao. Esera ese unai kontribusen ia lalodia bada, badina idia be Iehova dekenai do idia henia, unai dainai ia ida idia lao taudia dekenai hakaua herevadia ia henia, unai amo edia inai taudia amo unai kohu do idia gimaia. (Esr. 8:24-34) Lagani momo murinai, aposetolo Paulo ese moni ia gogoa Iudea ai idia noho ogogami tadikaka ia durua totona. Dala ia karaia unai amo kontribusen monina idia abia lao taudia be “mai momokani ida unai gaudia [idia] henia, Iehova ena matanai sibona lasi, to taunimanima edia matanai danu.” (2 Korinto 8:18-21 duahia.) Esera bona Paulo hegeregerena, hari iseda orea be idia abia kontribusen idia gaukaralaia neganai, hakaua herevadia idia badinaia danu.

13. Vanegai laganidia lalonai, dahaka dainai orea be senisi haida ia karaia?

¹³ Reana ruma bese taudia be edia moni idia gaukaralaia dalana idia haidaua diba, unai amo moni do idia negea kava lasi, o kohu momo do idia tahua lasi, bona edia hesiai gaukara do idia habadaia. Iehova ena orea danu be unai bamona. Vanegai laganidia ai, ruma matamatadia momo idia haginidia. Nega haida unai haginia gaukaradia dekenai moni bada idia negea, to idia abia moni be bada lasi. Unai dainai orea be dala haida ia tahua, edena bamona moni bada do idia negea lasi bona gaukara idia hamaragia diba, unai amo ia abia kontribusen amo gaukara namodia momo idia hagugurua diba.

14-16. (a) Emu kontribusen amo orea ese dahaka gaudia haida ia hagugurua? (b) Oi be edena dala ai namo oi abia?

¹⁴ Lagani momo lalonai Iehova idia hesiai henia taudia momo idia gwau, hari ita be orea amo harihari gaudia momo ita abia, guna bamona lasi. Mani oi laloa! Vanegai laganidia ai, ita be jw.org bona JW Broadcasting ita abia. New World Translation of the Holy Scriptures Baibel be gado momo ai idia halasia. Lagani 2014/2015 ai, tanobada hegegemadai, siti ibounai 14 ai idia noho steidiam badadia dekenai “Dirava Ena Basileia Tahua Guna!” Intanesinol Hebouhebou be dina toi lalonai idia karaia. Unai hebouhebou  dekenai idia noho taudia ibounai be idia moale bada.

¹⁵ Momo be Iehova ena orea amo idia abia noho harihari gaudia namodia dainai moale herevadia idia siaia. Hegeregere, Asia dekenai ia noho tadikaka ta bona ena adavana be JW Broadcasting dainai edia hanamoa hereva idia siaia, idia gwau: “Ai be siti maragina ta dekenai emai hesiai gaukara ai karaia. Unai dainai nega haida ai mamia ai be emai tadikaka taihu amo ai daudau, bona Iehova ena gaukara ena bada ai laloaboio danu. To JW Broadcasting ena program idauidau ai itaia neganai, ai mamia ai be tanobada hegegemadai tadikaka oreana lalonai. Iseda tadikaka taihu be JW Broadcasting dainai idia moale bada. Nega momo ai kamonai idia gwau, hua ta ta ena program idia itaia murinai, idia mamia idia be Hakaua Oreana kahirakahira idia noho. Hari idia moale bada, badina idia be Dirava ena orea lalonai.”

¹⁶ Tanobada hegegemadai, Kingdom Hall ibounai kahirakahira 2,500 idia haginia o idia hanamoa noho. Honduras kongrigeisen ta be edia Kingdom Hall matamatana idia gaukaralaia matamaia neganai, inai revareva idia torea, idia gwau: “Ai moale bada, badina ai be Iehova ena ruma bese badana lalonai bona tanobada ibounai tadikaka oreana ida ai gaukara hebou, edia heduru dainai emai noho gabuna ai inai Kingdom Hall matamata ai abia diba.” Momo be edia gado ai Baibel bona pablikeisen ma haida idia abia, eiava disasta negana ai heduru idia abia, eiava pablik gabudiai haroro karana ese ia havaraia namo idia itaia neganai, idia moale bada.

17. Orea ese ia hagugurua gaudia ese edena bamona idia hamomokania Iehova be iseda gaukara ia durua?

¹⁷ Taunimanima momo be idia daradara edena bamona iseda gaukara ibounai be ita henia kontribusen monina amo ita karaia diba. Kampani badana ta ena bosi be iseda printa gabudia ia vadivadi henia neganai, ia hoa bada badina iseda gaukara ibounai be volantia taudia ese idia karaia, kontribusen monina amo idia naria, bona hoihoi karana amo moni idia karaia lasi. Ia gwau ita karaia gaudia be sibona iseda goada amo ita karaia diba lasi. Iena hereva dekenai ita lalotamona! Oibe, ita diba Iehova ena heduru dainai, unai gaukara ita hagugurua diba.​—⁠Iobu 42:2.

18. (a) Basileia ita durua neganai, dahaka hahenamo ita abia? (b) Iseda natudia bona kamonai matamata taudia be edena bamona do ita durudia?

¹⁸ Iehova ese ita dekenai maoro ia henia hari ita karaia noho gaukara badana ita durua totona. Ia gwauhamata bema ena Basileia ita durua, hahenamo momo do ita abia. (Mal. 3:10) Iehova ia gwauhamata mai hariharibada ida ia henia tauna be do ia noho namo. (Aonega Herevadia 11:24, 25 duahia.) Henia karana ese ita ia hamoalea danu, badina “henia kara ena moale be bada, to abia kara ena moale be maragi.” (Kara 20:35) Iseda hereva bona kara amo iseda natudia bona kamonai matamata taudia do ita durua inai gaukara idia durua totona, unai amo hahenamo momo do idia abia.

19. Inai stadi ese edena bamona oi ia hagoadaia?

¹⁹ Ita dekenai idia noho gaudia ibounai be Iehova amo. Unai dainai bema ia dekenai ita henia lou, ita hahedinaraia ia ita lalokau henia bona ita ura ia ita tanikiu henia, badina ita totona gau momo ia karaia. (1 Siv. 29:17) Israela taudia be dubu haginia gaukara totona kontribusen idia henia neganai, “mai edia laloa namo danu unai harihari gaudia momo Lohiabada dekenai idia henia dainai, idia be mai moale bada danu.” (1 Siv. 29:9) Ita danu ita ura mai moale ida Iehova amo ita abia gaudia be ia dekenai ita henia lou.