MAURI lagani 25 painia taihu ta, Sylviana, ia gwau: “Egu turadia be painia momo lasi gabudia dekenai idia haroro, bona edia ekspiriens lau kamonai neganai, lau ura bada idia mamia moalena lau mamia danu.” To ia gwau: “Lau gari, badina lau laloa lau be hegeregere lasi painia momo lasi gabuna dekenai lau lao.”

Sylviana ese ia mamia hemamina oi mamia danu, a? Reana oi danu oi ura pablisa momo lasi gabuna ta dekenai oi lao, to reana oi daradara bema unai tahua gauna do oi hagugurua eiava lasi. Bema unai oi mamia, oi lalomanoka lasi! Iehova ena heduru amo, tadikaka taihu tausen momo be edia haroro gaukara ia koua gaudia idia hanaia. Iehova ese idia haida ia durua dalana ita diba totona, Madagascar dekenai do ita lao, tanobada ibounai lalonai ia be motumotu badana namba 4.

Idia hanaia laganidia 10 lalonai, tano 11 * amo pablisa bona painia goadadia 70 mai kahana be unai motumotu dekenai idia lao, unai be Africa dekenai, bona unuseniai taunimanima momo be Baibel idia laloa bada. Africa ai idia noho pablisa momo danu be unai motumotu badana dekenai idia lao, Basileia harorolaia gaukarana idia durua totona. Mani idia haida edia sivarai ita itaia.

Louis bona Perrine, edia mauri lagani be 30 bamona, idia be France amo Madagascar dekenai idia lao. Lagani momo lalonai idia ura gabu ma ta dekenai do idia lao bona edia haroro gaukara do idia habadaia, to Perrine be ia ura lasi tano ma ta dekenai idia lao. Ia gwau: “Lau gari, tano idauna dekenai lau lao totona. Lau ura lasi emai famili, kongrigeisen, ruma, ai diba gabudia ibounai, bona emai mauri dalana lau rakatania. Unai be lau ia koua gauna badana.” Lagani 2012 ai, Perrine ena lalona ia hagoadaia, bona ia bona Louis be edia tano idia rakatania. Idia karaia abia hidi be edena bamona ia laloa? “Ai karaia abia hidi ese emai abidadama ia hagoadaia momokani, bona Iehova ena imana ai itaia.” Louis ia gwau: “Mani oi laloa, Madagascar ai emai nega ginigunana Memorial ai abia neganai, emai Baibel stadi taudia 10 idia mai!”

 Hekwakwanai ia vara neganai, dahaka ese idia ruaosi ia durua? Guriguri amo Iehova idia noia idia dekenai lalogoada do ia henia. (Fili. 4:13) Louis ia gwau: “Ai mamia Iehova ese emai guriguri ia haerelaia, bona ai dekenai ‘Dirava ena maino’ ia henia. Emai hesiai gaukara amo ai davaria moalena ai laloa. Danu, France amo, emai turadia ese ai dekenai e-mail bona revareva idia siaia bona ai idia hagoadaia do ai hesiku lasi.”​—⁠Fili. 4:6, 7; 2 Kor. 4:7.

Louis bona Perrine idia haheauka dainai, Iehova ese idia ia hanamoa. Louis ia gwau: “October 2014 ai, France dekenai idia karaia Keristani Headava Taudia Edia Baibel Sikuli * dekenai ai lao. Unai sikuli be Iehova amo ai abia harihari gauna hereadaena.” Gradueisen murinai, idia ruaosi idia moale bada badina Madagascar dekenai idia siaia giroa lou.

Didier bona Nadine be France amo, idia be lagani 2010 ai Madagascar dekenai idia lao, bona edia mauri lagani be 55 bamona. Didier ia gwau: “Ai matamata negana amo ai painia matamaia, bena emai natudia toi ai naridia. Idia bada neganai, tano ma ta ai hesiai gaukara karaia lalohadaina ai abia.” Nadine ia gwau: “Lau ura lasi emai natudia lau rakatania, to ai idia hamaoroa: ‘Bema haroro gaukara durua totona, pablisa momo lasi gabuna ta dekenai umui lao, do ai moale bada!’ Edia hereva ese ai ia hagoadaia. Ena be emai natudia amo ai daudau, to ai moale badina nega ibounai idia ida ai herevahereva.”

Didier bona Nadine idia hekwarahi bada Malagasy gado idia dibaia totona. Nadine be mai kiri ida ia gwau: “Emai mauri lagani be 20 lasi.” Dahaka ese idia ia durua? Matamanai, France gado kongrigeisen idia bamoa. Gabeai, Malagasy gado idia diba sisina neganai, Malagasy gado kongrigeisen ta dekenai idia lao. Nadine ia gwau: “Haroro gaukara dekenai ai davaria taudia momo be idia ura Baibel idia stadilaia. Idia ai vadivadi henia dainai, nega momo ai idia tanikiu henia. Matamanai lau laloa lau be lau nihi sibona. Inai teritori ai painia gaukara lau ura henia. Daba ai lau noga neganai, sibona dekenai lau gwau, ‘Namo herea​—⁠hari dina haroro gaukara dekenai do lau lao!’”

Didier be Malagasy gado ia diba matamaia negana ia laloatao. Mai kiri ida ia gwau: “Kongrigeisen hebou ta lau hakaua, to tadikaka taihu edia haere ta lau lalopararalaia lasi. To lau gwau sibona, ‘Tanikiu.’ Taihu ta ena haere dainai ia lau tanikiu henia murinai, ia murinai idia helai taudia be saini amo lau idia hadibaia taihu ese ia henia haere be maoro lasi. Karaharaga tadikaka ma ta lau makaia, bena ia ese haere maorona ia henia.”

Lagani 2005 ai idia karaia hebouhebou ta ai, Thierry, bona ena hahine Nadia, ese drama ladana “Dirava Idia Hanamoa Gaudia Tahua” idia itaia. Unai Baibel drama be Timoteo ia herevalaia, bona unai ese edia kudouna ia hamarerea dainai, edia lalona idia hadaia Basileia gaukara taudia be momo lasi gabuna ta dekenai do idia lao. Thierry ia gwau: “Unai drama ena dokonai, imana ai patapataia noho lalonai, egu adavana dekenai lau gwau, ‘Edeseni do ita lao?’ Egu adavana ia gwau ia danu be unai ia lalohadailaia.” Unai murinai, gau haida idia karaia edia tahua gaudia idia hagugurua totona. Nadia ia gwau: “Metairametaira emai kohu haida ai kokidia ela bona ai dekenai be sutkeisi 4 sibona idia noho!”

Lagani 2006 ai, idia be Madagascar dekenai idia lao, bona unai nega amo edia haroro gaukara idia moalelaia noho. Nadia ia gwau: “Ai hedavari henia taudia ese ai idia hamoalea bada.”

Lagani 6 murinai, idia ruaosi be hekwakwanai ta idia davaria. France ai, Nadia ena sinana, Marie-Madeleine, ia moru bona ena imana ia makohia, bona ena kwarana dekenai bero ia abia. Idia ruaosi ese Marie-Madeleine ena doketa idia hereva henia murinai, edia sinana idia noia bema namo idia ida Madagascar dekenai do ia noho. Ena be ena mauri lagani be 80, to mai moale ida unai noinoi ia abia dae. Hari Marie-Madeleine be dahaka ia laloa? Ia gwau: “Nega haida ia auka gau haida lau manadalaia totona, ena be egu goada be bada lasi, to lau mamia kongrigeisen lau durua diba. Bona lau ia hamoalea gauna badana be, egu natudia be edia haroro gaukara idia karaia noho.”

Riana be tadikaka ta bona ena mauri lagani be 20 bamona. Ia be Alaotra Mangoro ai ia tubu daekau, unai be Madagascar ena ist kahanai. Sikuli ai ena maka be namo dainai, ia ura edukeisen badana ia abia. To Baibel ia stadilaia murinai, iena lalohadai ia haidaua. Ia gwau: “Lau hekwarahi haisikuli do lau haorea bona Iehova dekenai lau gwauhamata, ‘Bema egu eksam dokona lau karaia namonamo, painia gaukara do lau hamatamaia.’” Riana be haisikuli ia haorea murinai, iena gwauhamata ia badinaia. Painia tadikaka ta ida ia noho, pat-taim moni gaukara ia abia, bena ia painia matamaia. Ia gwau: “Unai be abia hidi maorona lau karaia.”

To Riana ena varavara idia daradara, badina ia be moni gaukara namona ia tahua lasi. Riana ia gwau: “Egu tamana, vavana, bona tubuna hahine, idia ura egu edukeisen do lau habadaia. To lau ura lasi gau ma ta totona egu painia gaukara lau rakatania.” Daudau lasi, Riana ia ura pablisa momo lasi gabuna dekenai ena hesiai gaukara do ia karaia. Dahaka ese unai ura ia habadaia? Ia gwau: “Raskol taudia be ai noho rumana dekenai idia vareai bona egu kohu momo idia henaoa. Unai henaohenao karana dainai, Iesu ena hereva lau laloa, ia gwau namona be ‘guba dekenai ita sibona totona dava bada kohu do ita haboua.’ Unai dainai egu lalona lau hadaia egu hesiai gaukara do lau habadaia.” (Mat. 6:19, 20) Bena saut kahana dekenai ia lao, unai gabu ai medu be ia diho momo lasi bona ia noho gabuna amo ia be kilomita 1,300 bamona. Unai gabu dekenai Antandroy taudia idia noho. Dahaka dainai unuseni ia lao?

Hua ta gunanai, raskol taudia be edia ruma lalonai idia do vareai lasi neganai, Riana be Antandroy tatau rua ida Baibel stadi ia karaia. Edia gado ena hereva haida ia dibaia bona Basileia ena sivarai namona idia do kamonai lasi Antandroy taudia momo ia laloa. Ia gwau: “Iehova lau guriguri henia, lau do ia durua Tandroy gado idia hereva taudia edia tano dekenai lau lao totona.”

Riana be unuseni ia lao, to daudau lasi hekwakwanai ta ia davaria. Moni gaukara ia davaria diba lasi. Tau ta be ia dekenai ia gwau: “Dahaka dainai iniseni oi mai? Taunimanima be moni gaukara davaria totona, oi mai gabuna dekenai idia lao!” Wiki rua murinai, Riana be unai gabu ia rakatania bona rijinol hebouhebou dekenai ia lao neganai, ia be moni lasi momokani, ia daradara dahaka do ia karaia. Hebouhebou ena dina dokona ai, tadikaka ta ese Riana ena kouti ena poketi lalonai gau ta ia udaia. Unai tadikaka ia udaia moni be bada bona ia hegeregere Antandroy dekenai ia giroa bona yogurt hoihoilaia bisinesi do ia hamatamaia. Riana ia gwau: “Unai nega ai Iehova ena imana lau itaia. Iehova idia do diba lasi taudia lau durua noho diba!” Kongrigeisen lalonai gaukara danu be momo. Riana ma ia gwau: “Pura ta ta ai, lau idia abia hidi pablik tok do lau henia. Iehova ese iena orea amo lau ia hadibaia.” Hari, Riana be Tandroy gado idia hereva  taudia momo dekenai Basileia ena sivarai namona ia do harorolaia noho.

Iehova ia gwauhamata, ia gwau: “Inai tano dekenai, hanamoa totona ia noinoi gwauraia tauna ese, Hereva bona Kara Momokani ena Dirava ena hanamoa do ia noia.” (Isa. 65:16) Bema koua gaudia ita hanaia bona iseda haroro gaukara ita habadaia, Iehova ese ita do ia hanamoa. Sylviana mani ita laloa lou. Matamanai ia gari badina ia laloa ia hegeregere lasi pablisa momo lasi gabuna dekenai do ia lao. Dahaka dainai unai bamona ia laloa? Ia gwau: “Egu aena laurina be egu aena idibana amo ia kwadogi, sentimita 9 bamona. Unai dainai lau raka namonamo lasi bona lau hesiku haraga.”

To lagani 2014 ai, Sylviana be ena kongrigeisen amo painia taihu matamata ladana Sylvie Ann ia bamoa, bona hanua maragina ta dekenai idia lao, ena daudau be kilomita 85 bamona edia taoni amo. Ena be ia auka, to Sylviana ena ura gauna ia guguru​—⁠bona unai be hahenamo ta! Ia gwau: “Lagani tamona murinai, lau stadi henia hahinena, Doratine, ia be sina matamatana, be emai sekit hebouhebouna dekenai ia bapatiso.”

Pablisa be momo lasi gabuna dekenai idia lao taudia edia ekspiriens ese ia hahedinaraia bamona, bema ita ia koua gauna ita hanaia bona iseda haroro gaukara ita habadaia, Iehova ese ena hesiai taudia dekenai ia henia gwauhamata be do ia guguru, ia gwau: “Lau ese umui do lau hagoadaia, bona umui do lau durua.” (Isa. 41:10) Bona iseda hetura karana Iehova ida be do ia goada. Ma danu, mai ura ida sibona ita henia​—⁠ita noho gabuna ai o tano ma ta dekenai ita lao​—⁠neganai, ita be tanobada matamata ai do ita karaia tiokratik gaukara idauidau totona sibona ita hahegaegaea. Didier ia gwau bamona, “pablisa momo lasi gabudia dekenai ita haroro be treinini namona vaira nega totona!” Unai gaukara idia ura henia taudia ese unai treinini idia abia danu be namo!