1. Dahaka hekwakwanai ita davaridia, to dahaka dainai Iehova be ena hesiai taudia dekenai ia moale? (Laulau ginigunana herevalaia.)

UMUI diba hari inai nega oromana lalonai mauri be auka. Umui tadikaka taihu momo be gorere badana ta umui haheaukalaia noho. Ena be umui haida emui mauri lagani be bada, to emui buruka varavara umui naridia noho. Bona umui haida be umui gaukara goada tauanina dalanai emui ruma bese umui naria totona. Danu ai diba, umui momo be hekwakwanai tamona sibona lasi, to hekwakwanai momo umui haheaukalaia noho! Momokani, unai gaudia dekenai emu nega, goada, bona moni umui haorea diba. To, umui ese Iehova ena gwauhamata umui abidadama henia; bona umui abia dae momokani emui vaira nega be do ia namo. Unai dainai Iehova be ia moale!

2. Isaia 40:29 ese edena dala ai ita ia hagoadaia, to dahaka kerere badana ita karaia diba?

² Nega haida oi mamia mauri ena hekwakwanai ese emu goada ibounai ia haorea, a? Bema oibe, oi lalohekwarahi lasi. Baibel ese ia hahedinaraia, idaunega abidadama taudia be unai bamona idia mamia danu. (1 Kin. 19:4; Iobu 7:7) To idia hesiku lasi, idia be Iehova dekenai idia tabekau. Bona idia lalohisihisi lasi danu, badina iseda Dirava ese “manoka bona hesiku taudia . . . ia hagoadaia noho.” (Isa. 40:29) To madi, Dirava ena taunimanima haida idia laloa mauri ena hekwakwanai haheaukalaia dalana tamona be ‘hereva momokani idia rakatania,’ badina idia dekenai iseda Keristani maduna be metau gauna, to hahenamo lasi. Unai dainai Dirava ena Hereva idia duahia lou lasi, kongrigeisen heboudia dekenai idia lao lasi, bona idia haroro lasi​—⁠unai be Satani ena ura.

3. (a) Satani ena ura ita koua totona, dahaka ita karaia diba? (b) Inai stadi ai dahaka do ita herevalaia?

³ Diabolo a diba bema Keristani gaukara idauidau dekenai ita bisi bada, iseda abidadama be do ia goada, bona ia be unai ia ura lasi. Unai dainai emu tauanina bona lalona idia goada lasi neganai, Iehova oi rakatania lasi. To ia kahirakahira oi lao, badina ‘ia ese oi do ia hagoadaia bona oi do ia haginia goada.’ (1 Pet. 5:10; Iam. 4:8) Inai stadi ai, ita ese ita idia hamanokaia diba gaudia rua do ita herevalaia, bona Baibel ena hakaua herevadia badinaia karana ena namo do ita herevalaia danu. To mani Iehova ese ita ia hagoadaia dalana ita herevalaia guna, Isaia 40:26-31 ese ia hahedinaraia bamona.

4. Isaia 40:26 amo dahaka ita dibaia?

⁴ Isaia 40:26 duahia. Tau ta be guba ena hisiu ibounai ia duahia diba lasi. Saiens taudia idia abia dae, iseda Milky Way galaksi lalonai hisiu ibounai be bilioni 400 bamona. To, Iehova ese hisiu ta ta dekenai ladana ia henia. Unai amo dahaka ita dibaia? Bema Iehova be unai mauri lasi gaudia ia laloa bada, ia ese oi ia laloa bada danu. Oi be ia oi hesiai henia badina ta ese oi ia doria dainai lasi, to badina ia oi lalokau henia. (Sal. 19:1, 3, 14) Iseda guba Tamana be oi ia diba namonamo. Oi emu “kwarana huina ibounai ia duahia vadaeni” danu. (Mat. 10:30) Salamo torea tauna ese ita ia hagoadaia, ia gwau: “Lohiabada ese mai edia kerere lasi taudia ia naria noho.” (Sal. 37:18) Oibe, oi mamia hahetoho ia itaia, bona oi dekenai goada ia henia diba unai hahetoho oi haheaukalaia totona.

5. Edena bamona ita diba Iehova be ita dekenai goada ia henia diba?

⁵ Isaia 40:28 duahia. Iehova be siahu bona goada ena Badina. Hegeregere, ia ese iseda dina dekenai ia henia siahu badana mani oi laloa. Saiens toretore tauna, David Bodanis, ia gwau: “Sekeni ta ta ai, iseda Dina be siahu bada ia halasia, bomu momo be nega tamona idia pou ena siahu hegeregerena.” Tahua gaukara ia karaia tauna ma ta ia gwau: “Dina ese sekeni tamona sibona lalonai ia halasia siahuna ese lagani 200,000 lalonai, tanobada taudia ibounai ia durua diba”! Bema Dirava ese dina dekenai siahu bada ia henia, ia ese ita dekenai goada ia henia diba hekwakwanai idauidau ita haheaukalaia totona, ani?

6. Edena dala ai Iesu ena huaia auna be ia namo, bona unai ese edena bamona ita ia durua?

⁶ Isaia 40:29 duahia. Iehova hesiai henia karana ese ita ia hamoalea diba. Iesu be ena hahediba taudia dekenai ia gwau: “Lauegu huaia auna do umui huaia.” Ma ia gwau: “Goada matamata do umui davaria. Lauegu huaia auna be ia namo, bona umui lau noia do umui huaia gauna be ia metau lasi.” (Mat. 11:28-30) Unai be momokani! Nega haida, ruma ita rakatania bona kongrigeisen hebouna o haroro gaukara dekenai ita lao neganai, ita hesiku bada. To, ruma dekenai ita giroa neganai, iseda hemami be edena bamona? Ita moale​—⁠bona ita noho hegaegae hahetoho idauidau ita hanaia totona. Oibe, Iesu ena huaia auna be ia namo!

7. Mataio 11:28-30 ena hereva ia hamomokania ekspiriens ta gwauraia.

⁷ Taihu ta ladana Kayla be mai ena gorere, unai gorere dainai nega momo ia hesiku bada, ia daradoko, bona ena kwarana ia hisihisi bada. Nega haida ia auka kongrigeisen heboudia dekenai ia lao totona. To, sibona ia hagoadaia bona pablik hebouna ta dekenai ia lao neganai, ia gwau: “Lau kamonai tok be lalometau karana ia herevalaia. Tadikaka ese unai hereva be mai hemami ida ia henia dainai, lau tai matamaia. Unai ese lau ia hagoadaia hebou dekenai lau lao hanaihanai totona.” Unai hebou dekenai ia lao dainai, ia moale bada!

8, 9. Paulo ena hereva ena anina be dahaka, ia gwau: “Lau manoka neganai, goada bada lau abia”?

⁸ Isaia 40:30 duahia. Ena be iseda diba be bada, to ita sibona eda goada amo gau momo ita hagugurua diba lasi. Unai ita diba be namo. Ena be aposetolo Paulo be gau momo ia karaia diba, to ia ura karaia gaudia ibounai ia hagugurua diba lasi. Dirava dekenai ena lalohekwarahi ia gwauraia neganai, Iehova be ia dekenai ia gwau: “Oi manoka neganai, egu siahu be oi amo ia hedinarai goevagoeva.” Paulo be unai hereva ia lalopararalaia dainai, ia gwau: “Lau manoka neganai, goada bada lau abia.” (2 Kor. 12:7-10) Ena hereva ena anina be dahaka?

⁹ Paulo ia diba ia sibona ena goada amo gau momo ia hagugurua diba lasi, to siahu bada tauna ta ena heduru amo unai ia karaia diba. Dirava ena lauma helaga be Paulo dekenai siahu ia henia. Unai sibona lasi, to lauma helaga ese Paulo ia hasiahua dainai, sibona ena goada amo ia karaia diba lasi gaudia ia karaia diba. Ita dekenai unai ia vara diba danu. Iehova be ita dekenai lauma helaga ia henia neganai, do ita goada!

10. Iehova ese edena dala ai Davida ia durua?

¹⁰ Lauma helaga ese salamo torea tauna, Davida, ia durua danu. Ia gwau: “Oi ese goada lau dekenai oi henia noho, vadaeni lau idia hadikaia gwauraia taudia, be lau tuari henidia noho, bona siahu danu lau dekenai oi henia noho, edia magu do lau hamakohia diba.” (Sal. 18:29) Nega haida ita davaria hekwakwanai be haba badadia bamona, bona ita sibona eda goada amo ita hanaidia diba lasi. Unai dainai Iehova ena heduru ita noia be namo.

11. Hekwakwanai negadiai, lauma helaga ese ita ia durua dalana herevalaia.

¹¹ Isaia 40:31 duahia. Ugava manu be sibodia edia goada amo idia roho daekau bona daudau gabudia dekenai idia roho lao diba lasi. To, ia daekau hodahoda ena siahu ese idia ia durua dainai, unai idia karaia diba. Unai dainai hekwakwanai badana ta oi davaria neganai, ugava manu oi laloa. Iehova oi noia oi dekenai “durua tauna, lauma helaga” do ia henia oi ia durua totona. (Ioa. 14:26) Ita moale, badina dina ena hora 24 lalonai, lauma helaga ese ita ia durua diba. Danu, ita bona kongrigeisen tauna ta huanai hekwakwanai ta ia vara neganai, Dirava ena heduru ita noia be namo. To, dahaka dainai unai bamona hekwakwanai idia vara?

12, 13. (a) Dahaka dainai Keristani taudia huanai hekwakwanai idia vara? (b) Iosepa ena sivarai amo Iehova dekenai dahaka ita dibaia?

¹² Ita huanai hekwakwanai idia vara, badina ita be goevadae lasi. Unai dainai nega haida iseda tadikaka taihu edia hereva o kara ese iseda lalona ia hahisia diba​—⁠eiava ita ese edia lalona do ita hahisia. Unai be hahetoho badana. To, Iehova ia ura mai lalotamona ida iseda tadikaka taihu ida ita gaukara hebou, badina ia be idia ia lalokau henia, herevana idia be goevadae lasi. Bema unai ita karaia, ita hahedinaraia ita be Iehova ita badinaia.

¹³ Iehova ena hesiai taudia be hahetoho idia davaria neganai, ia ese unai ia koua lasi. Iosepa ena sivarai amo unai ita dibaia. Ia tau matamata neganai, iena tadikaka idia mama dainai, igui hesiai tauna bamona ia idia hoihoilaia bona Aigupito dekenai idia abia lao. (Gen. 37:28) Iehova be ena turana, kara maoromaoro tauna Iosepa, idia kara henia dalana ia itaia, bona unai ese ena lalona ia hahisia. To, Ia be kara ta ia karaia lasi. Gabeai, Iosepa idia samania koikoi idia gwau ia ura Farao ena hahine ia reipia bona dibura ruma dekenai ia idia atoa neganai, Iehova be unai ia koua lasi danu. To, Iehova ese Iosepa ia laloaboio, a? Baibel ia gwau: “Lohiabada ese Iosepa ia itaia noho, bona iena gaukara ibounai dekenai anina ia havaraia.”​—⁠Gen. 39:21-23.

14. “Badu lasi” karana ena namo be dahaka?

¹⁴ Haheitalai ma ta be Davida. Ia be hisihisi badana ia haheaukalaia, momo dekenai unai ia vara lasi. To Dirava ena turana, Davida, be idia vara gaudia dainai ia badu lasi. Ia gwau: “Do oi badu lasi, do oi dagedage lasi. Do oi laloa hekwarahi o laloa badu lasi, badina unai bamona laloa ese kara dika ia havaraia noho.” (Sal. 37:8) Ita “badu lasi” ena badina badana be ita ura Iehova ita tohotohoa, ia be “iseda kara dika ena bada hegeregerena davana ia henia lasi.” (Sal. 103:10) Ita “badu lasi” be mai ena namo. Bema ta be badu momo tauna, iena rara do ia bada bona do ia hahodi namonamo lasi. Bona iena asena bona pankrias ia hadikaia diba danu, bona ia aniani neganai ena bogana be do ia hisihisi. Ita badu neganai, do ita laloa namonamo lasi. Bona nega haida, ita badu dikadika dainai, nega daudau lalonai ita daradoko diba. To Baibel ma ia gwau, “oiemu kudouna be mai ena maino danu neganai, oiemu tauanina do ia noho namo.” (Aon. 14:30) Unai dainai bema haida ese iseda lalona idia hahisia, dahaka do ita karaia idia ida ita maino totona? Baibel ena aonega sisibana ita badinaia diba.

15, 16. Iseda lalona ia hahisia tauna be edena bamona do ita hereva henia?

¹⁵ Efeso 4:26 duahia. Tanobada taudia ese ita idia hahisia bada neganai, ita hoa lasi. To, bema iseda tadikaka taihu o famili tauna ta ena hereva o kara amo iseda lalona ia hahisia bada, do ita lalohisihisi momokani. Bema ia vara hekwakwanai ita laloaboio diba lasi be edena bamona? Idia do ita badu henia noho, herevana lagani momo idia hanaia, a? Eiava Baibel ena aonega sisiba do ita badinaia bona unai hekwakwanai do ita hamaoromaoroa haraga, a? Bema unai hekwakwanai ita hamaoromaoroa haraga lasi, do ia auka maino ita karaia totona.

¹⁶ Bema tadikaka o taihu ta ese emu lalona ia hahisia bona unai oi laloaboio diba lasi be edena bamona? Dahaka do oi karaia, maino oi karaia totona? Gau ginigunana be, Iehova oi guriguri henia. Ia oi noia oi do ia durua, unai amo ta ta hagoadaia herevadia sibona umui gwauraia diba. Laloatao, ia be Iehova ena turana ta. (Sal. 25:14, BHḡ) Dirava be ia ia lalokau henia. Iehova ese iena turadia be mai hebogahisi ida ia kara henia, bona ia ura unai ita karaia danu. (Aon. 15:23; Mat. 7:12; Kol. 4:6) Gau iharuana, do oi gwauraia herevadia oi laloa. Namo lasi oi laloa emu tadikaka o taihu be ia ura emu lalona ia hahisia dainai unai ia karaia; reana ena kara ena badina ita lalopararalaia lasi. Namona be oi laloa maoromaoro, badina reana emu kara o hereva ta dainai tadikaka be unai bamona ia kara. Emu hereva oi hamatamaia neganai, reana oi gwau: “Reana egu lalona be ia hisihisi haraga, to varani lau oi hereva henia neganai, lau . . . ” Bema umui herevahereva, to namo ta ia vara lasi, maino karaia dalana ma ta oi laloa. To, emu tadikaka o taihu totona oi guriguri; Iehova oi noia ia do ia hanamoa. Bona Dirava oi noia emu tadikaka o taihu ena kara namodia sibona oi laloa totona. Ena be dahaka ia vara, to oi abia dae momokani Iehova be ia moale, badina oi hekwarahi emu tadikaka o taihu​—⁠Iehova ena turana​—⁠ida maino oi karaia totona.

17. Ita kara dika neganai, Iehova ese edena dala ai ita ia durua, bona dahaka dainai unai heduru dalana ita abia dae be namo?

¹⁷ Haida idia laloa idia be Iehova idia hesiai henia diba lasi, badina guna kara dika badana ta idia karaia. Kara dika lalohisihisilaia karana ese ta ena maino, moale, bona goada ia haorea diba. King Davida danu be ia karaia kererena dainai ia lalohisihisi, ia gwau: “Egu kara dika lau gwauraia hedinarai lasi neganai, lauegu tauanina ia maragi lao, dina ibounai lau taitai dainai. Badina be dina bona hanuaboi ibounai, oi Lohiabada ese lau oi matakani henia noho.” Oibe, Davida be mai boga-auka ida ena hekwakwanai ia hamaoromaoroa. Ia gwau: “Unai neganai lauegu kara dika, be oi dekenai lau gwauraia hedinarai. Lauegu kerere lau hunia lasi . . . vadaeni oi ese lauegu kara dika oi gwauatao.” (Sal. 32:3-5) Bema kara dika badana ta oi karaia, Iehova be ia noho hegaegae emu dika ia gwauatao, bona oi do ia durua emu hetura karana ia ida oi hanamoa totona. To elda taudia amo ia henia heduru oi abia dae be namo. (Aon. 24:16; Iam. 5:13-15) Oi naria lasi​—⁠dika mauri hanaihanai helarona oi haboioa! To bema emu kara dika idia gwauatao, to oi karaia kererena dainai emu lalomamina be oi ia kota henia noho be edena bamona?

18. Paulo ena haheitalai ese edena dala ai idia lalomanoka taudia ia durua diba?

¹⁸ Aposetolo Paulo danu be ia karaia kerere haida dainai ia lalohekwarahi. Ia gwau: “Aposetolo taudia ibounai huanai lau be maragi herea, bona lau be hegeregere lasi do idia gwauraia aposetolo tauna, badina lau ese Dirava ena kongrigeisen lau dagedage henia.” Ma ia gwau: “To Dirava ena hebogahisi hereadaena dainai, inai gaukara lau abia.” (1 Kor. 15:9, 10) Ena be Paulo be goevadae lasi, to Iehova ese ia dekenai unai gaukara ia henia. Bona Iehova ia ura Paulo be unai ia diba. Bema kara kerere gunadia dainai oi helalo-kerehai bona emu kerere oi gwauraia hedinarai, namona be oi abia dae momokani Iehova be emu dika do ia gwauatao. Unai dainai Iehova ena hereva oi abidadama henia, bona ena gwauatao karana oi abia dae!​—⁠Isa. 55:6, 7.

19. Lagani 2018 ena siri badana be dahaka, bona dahaka dainai ia be maoro?

¹⁹ Inai tanobada oromana ena dokona be kahirakahira, unai dainai hekwakwanai momo do ita davaria. To, namona be oi abia dae momokani “manoka bona hesiku taudia be Lohiabada ese ia hagoadaia noho, bona goada lasi taudia edia goada ia habadaia noho.” (Isa. 40:29; Sal. 55:22; 68:19) Lagani 2018 ai, kongrigeisen heboudia totona Kingdom Hall dekenai ita lao neganai, unai mai anina bada herevana do ita laloa. Lagani ena siri badana ese unai do ia hahedinaraia, ia gwau: “[Iehova] dekenai idia abidadama henia taudia ese, edia goada do idia hamatamataia lou.”​—⁠Isa. 40:31.