1. Dahaka dainai hari inai nega be idau momokani?

ITA noho negana be nega ma haida amo ia idau momokani. Baibel ia peroveta bamona, Iehova ese “hutuma bada . . . idia be bese ibounai, iduhu ibounai, kopina bona gado idauidau amo” ia haboua noho. Idia be “bese badana mai goadana” milioni 8 mai kahana bamona, bona mai moale ida “dina bona hanuaboi [Dirava ena] hesiai gaukara helagana idia karaia.” (Apok. 7:9, 15; Isa. 60:22) Hari taunimanima momo herea be Iehova bona edia tadikaka idia lalokau henia, guna bamona lasi.

2. Dirava amo idia daudau taudia be edena bamona lalokau do idia hahedinaraia? (Laulau ginigunana herevalaia.)

² Baibel ia peroveta danu iseda nega ai, Dirava amo idia daudau taudia be lalokau idauna do idia hahedinaraia​—⁠sibona lalokau henia karana unai. Aposetolo Paulo ia gwau: “Dina gabediai . . . taunimanima be sibodia do idia laloa bada, moni do idia ura henia bada, . . . moale karadia do idia ura henia bada, to Dirava do idia lalokau henia lasi.” (2 Tim. 3:1-4) Unai bamona lalokau be Keristani  lalokauna amo ia idau. Sibona laloa bada karana ese ta ia hamoalea diba lasi, herevana ia laloa unai kara amo moale do ia davaria. Oibe, sibona lalokau henia karana be do ia bada, bona “unai ese taunimanima do idia hahekwarahia bada.”

3. Inai stadi ai dahaka do ita herevalaia, bona dahaka dainai?

³ Paulo ia diba momo be sibona do idia lalokau henia, bona Keristani taudia dekenai unai be dika. Unai dainai idia ia hagania lalokau kererena idia hahedinaraia taudia amo “do [idia] raka siri.” (2 Tim. 3:5) To, unai bamona taudia do ita dadaraia momokani lasi. Vadaeni, edena dala ai tanobada karadia amo do ita raka siri bona lalokau Diravana, Iehova, ita hamoalea diba? Mani Dirava lalokau henia karana bona 2 Timoteo 3:2-4 ese ia herevalaia lalokauna ena idau ita itaia. Unai ita karaia neganai, do ita diba edena bamona lalokau do ita hahedinaraia, bona unai ese ita ia hamoalea diba.

4. Dahaka dainai sibona ita lalokau henia be kerere lasi?

⁴ Paulo ia gwau: “Taunimanima be sibodia do idia laloa bada.” Sibona ita laloa bada be kerere, a? Lasi, unai be vaia ita karaia karana ta bona unai be kerere lasi. Iehova ese ita dekenai unai ura ia atoa. Iesu ia gwau: “Namona be emu dekena tauna oi lalokau henia, oi sibona oi lalokau henia hegeregerena.” (Mar. 12:31) Bema sibona ita lalokau henia lasi, edena bamona iseda dekena tauna ita lalokau henia diba? Baibel ma ia gwau: “Tatau ese edia hahine do idia lalokau henidia be namo, sibodia edia tauanina idia lalokau henia hegeregerena. Ena hahine ia lalokau henia tauna ese sibona ia lalokau henia, badina tau ta ese sibona ena tauanina ia inai henia lasi, to ia ubua bona ia laloa bada.” (Efe. 5:28, 29) Unai ese ia hahedinaraia sibona ita lalokau henia be kerere lasi.

5. Sibona ia lalokau henia bada tauna be edena bamona do oi herevalaia?

⁵ Timoteo Iharuana 3:2 ese ia herevalaia lalokauna be lalokau maorona lasi. Unai be sibona ena namo tahua karana. Bema ta be sibona ia lalokau henia bada, ia be sibona do ia laloa bada. (Roma 12:3 duahia.) Bona ma haida do ia laloa lasi. Kerere ia vara neganai, ma haida do ia samania, to do ia abia dae lasi unai be iena kerere. Unai bamona taudia be idia moale diba lasi.

6. Dirava lalokau henia karana amo dahaka ia vara?

⁶ Baibel idia diba momo taudia idia gwau aposetolo Paulo ese dina gabediai do idia vara karadia ia herevalaia neganai, ia ese sibona lalokau henia karana ia gwauraia guna, badina unai kara amo gabeai ia gwauraia karadia idia vara. To, Dirava idia lalokau henia taudia edia kara be idau. Baibel ese Dirava lalokau henia karana be moale, maino, boga-auka, hebogahisi, kara namo, abidadama, manau, bona sibona biagua karana ida ia herevalaia. (Gal. 5:22, 23) Salamo torea tauna ia gwau: “Edia Dirava be Lohiabada, ena bese taudia be idia moale noho.” (Sal. 144:15) Iehova be moale Diravana, bona ena taunimanima be unai kara idia hahedinaraia. Danu, Iehova ena hesiai taudia be mai moale ida sibona idia henia ma haida idia durua totona, to sibona idia lalokau henia taudia bona idia ura gau idia abia sibona taudia be unai bamona lasi.​—⁠Kara 20:35.

7. Ita sibona dekenai edena henanadai do ita henia?

⁷ Edena bamona do ita diba ita be sibona ita lalokau henia bada noho, to iseda lalokau Dirava dekenai be ia keru ia lao? Filipi 2:3, 4 ena hahegani mani ita laloa, ia gwau: “Namo lasi umui badu eiava sibona umui abia isi, to mai manau ida do umui laloa ma haida ese umui idia hereaia, umui sibona emui namo  do umui laloa lasi, to ma haida edia namo danu do umui laloa.” Sibona ita nanadaia: ‘Egu mauri ai unai hahegani lau badinaia, a? Mai lalona ibounai ida Dirava ena ura lau karaia noho, a? Lau gaukara goada kongrigeisen ai bona haroro gaukara ai ma haida lau durua totona, a?’ Nega haida do ia auka ita sibona ita henia totona. Badina unai ita karaia totona, ita gaukara goada be namo bona sibona eda ura haida do ita dadaraia. To do ita moale bada bema ita diba guba bona tanobada ena Lohiabada be ita dekenai ia moale.

8. Haida be Dirava idia lalokau henia dainai dahaka idia karaia?

⁸ Haida be Dirava idia lalokau henia dainai, edia moni gaukara namona idia rakatania bona Iehova idia hesiai henia. Ericka be United States dekenai ia noho, bona ia be doketa ta. Ia be ladana bada moni gaukara ia tahua lasi, to regula painia gaukara ia karaia bona ia bona ena adavana be hanua momo dekenai hesiai gaukara idia karaia. Taihu ia gwau: “Idau tano ai haroro karana bona ai davaria tura namodia ese emai mauri ia haidaua momokani. Doketa gaukara lau do karaia noho, to egu nega bona goada bada lau atoa taunimanima lau durua Dirava idia diba totona. Bona kongrigeisen durua karana ese egu lalona ia hamoalea bada.”

9. Dahaka dainai moni ura henia bada karana ese moale ia havaraia lasi?

⁹ Paulo ia gwau taunimanima be “moni do idia ura henia bada.” Lagani haida gunanai, Ireland ai ia painia tadikaka ta be tau ta dekenai Dirava ia herevalaia. Unai tau ese ena paosi ia kehoa, pepa moni haida ia kokia, bona ia gwau: “Inai be egu dirava!” Ena be momo be unai do idia gwauraia lasi, to tanobada ai momo be moni bona moni amo idia hoia diba gaudia idia ura henia bada. Baibel ia gwau: “Moni ia ura henia noho tauna ese moni do ia abia, to unai moni ena bada be hegeregere lasi ia dekenai, vadaeni ma haida ia tahua noho. Bona kohu momo ia ura henia noho tauna ese iena kohu do ia habadaia, to ena bada be hegeregere lasi ia dekenai.” (Had. 5:10) Unai bamona taudia be idia ura bada moni momo idia gogoa, bona do idia gaukara goada moni idia abia totona, to “hisihisi momo” idia davaria.​—⁠1 Tim. 6:9, 10.

10. Lake ena natuna Aguru ese taga bona ogogami karana be edena bamona ia herevalaia?

¹⁰ Momokani, ita ibounai be moni ita abia be namo. Moni be ita ia gimaia diba. (Had. 7:12) To bema ta ena moni be ena dina ta ta maurina durua sibona totona, ia moale diba, a? Oibe! (Hadibaia Tauna 5:12 duahia.) Lake ena natuna Aguru ia gwau: “Ogogami o kohu momo lau dekenai do oi henia lasi. To egu hitolo hegeregerena sibona, aniani lau dekenai do oi henia.” Oibe, ia ura lasi ia be do ia ogogami momokani, bona unai ena badina ita lalopararalaia. Danu, ia ura lasi ia henaohenao, badina unai kara amo Dirava ena ladana ia hadikaia diba. To dahaka dainai ia ura lasi kohu momo ia abia? Ia gwau: “Badina bema egu aniani bona kohu momo idia noho neganai, sedira lau be inai bamona do lau gwau garina, ‘Lohiabada be daika?’” (Aon. 30:8, 9) Reana oi diba taudia haida be edia kohu laloa bada, to Dirava idia abidadama henia lasi.

11. Moni ena kahanai, Iesu be dahaka sisiba ia henia?

¹¹ Moni idia ura henia bada taudia be Dirava idia hamoalea diba lasi. Iesu ia gwau: “Tau ta be biaguna rua edia igui hesiai gaukara ia karaia diba lasi, badina ia ese ta do ia inai henia bona ta do ia lalokau henia, eiava ta do ia durua bona ta do ia dadaraia. Dirava bona Taga edia hesiai gaukara umui karaia diba lasi.” To matamanai ia gwau: “Tanobada dekenai umui sibona totona dava bada kohu do umui haboua lasi, badina unuseniai manumanu  bona raraka ese do idia hadikaia bona henaohenao taudia ese do idia henaoa. To guba dekenai umui sibona totona dava bada kohu do umui haboua, unuseniai manumanu bona raraka ese do idia hadikaia lasi, bona henaohenao taudia ese do idia henaoa lasi.”​—⁠Mat. 6:19, 20, 24.

12. Edena dala ai kohu momo lasi maurina ese ta ia durua diba Dirava ia hesiai henia totona? Haheitalai gwauraia.

¹² Momo idia abia dae kohu momo lasi maurina ese idia ia hamoalea sibona lasi, to nega bada ia noho Iehova idia hesiai henia totona. Jack be United States dekenai ia noho. Ia ese ena ruma badana bona bisinesi ia hoihoilaia, badina ia diba unai ia karaia neganai, ena adavana ida idia painia diba. Ia gwau: “Matamanai ia auka emai ruma namona bona tano ai hoihoilaia totona. To lagani momo lalonai, nega momo ruma dekenai lau giroa neganai, gaukara gabunai idia vara hekwakwanai dainai lau lalohekwarahi bada. To egu adavana, ia be ia regula painia, be nega ibounai ia moale. Nega momo ia gwau, ‘Egu biaguna be biaguna namo hereana!’ Hari lau danu lau painia, bona ai ruaosi be Biaguna tamona, Iehova, ai hesiai henia.”

13. Iseda lalohadai moni dekenai be edena bamona do ita diba?

¹³ Iseda lalohadai moni dekenai ita laloa neganai, namona be mai momokani ida sibona ita nanadaia: ‘Baibel ena sisiba moni dekenai lau abia dae bona egu mauri ai lau badinaia, a? Egu mauri ai moni tahua karana lau atoa guna, a? Kohu lau laloa bada, to egu hetura karana Iehova bona taunimanima ida lau laloa bada lasi, a? Lau abia dae momokani Iehova ese egu dabu gaudia do ia henia, a?’ Ita diba momokani ia idia abidadama henia taudia be ia ese do durua.​—⁠Mat. 6:33.

14. Moale karadia be edena bamona ita laloa be namo?

¹⁴ Baibel ia peroveta bamona, hari taunimanima momo be “moale karadia do idia ura henia bada.” Momokani, dala maorona ai sibona ita laloa bona moni ita tahua be kerere lasi, unai hegeregerena dala maorona ai iseda mauri ita moalelaia be kerere lasi danu. Haida idia gwau idia be moale karadia lalonai do idia vareai lasi, to unai be Iehova ena ura lasi. Baibel ese abidadama taudia ia hagoadaia, ia gwau: “Do oi lao, oiemu aniani  do oi ania mai moale danu, bona uaina do oi inua, mai lalona namo danu.”​—⁠Had. 9:7.

15. Timoteo Iharuana 3:4 ese moale karadia be edena bamona ia herevalaia?

¹⁵ Timoteo Iharuana 3:4 ese moale karadia idia ura henia, to Dirava idia lalokau henia lasi taudia ia herevalaia. Unai siri ia gwau lasi taunimanima be moale karadia do idia ura henia bada, to Dirava idia lalokau henia maragi, anina be idia be Dirava idia lalokau henia danu. Lasi, to siri ia gwau idia be “Dirava do idia lalokau henia lasi.” Moale karadia idia ura henia bada taudia dekenai unai be hadibaia hereva aukana! Inai hereva “moale karadia do idia ura henia bada” ese “moale karadia idia laloa bada” taudia ia herevalaia.​—⁠Luka 8:14.

16, 17. Iesu ese moale karadia be edena bamona ia laloa?

¹⁶ Iesu be moale karadia ia laloa maoromaoro. Ia be “headava ariana ta” bona “aria badana” ta dekenai ia lao. (Ioa. 2:1-10; Luka 5:29) Headava gabunai, wain ia ore gwauraia neganai, ia ese hoa dalanai ranu be wain ai ia halaoa. Bona nega ma ta ai, haida idia gwau Iesu be ia aniani bona inuinu momo neganai, ia hahedinaraia unai taudia be idia laloa maoromaoro lasi.​—⁠Luka 7:33-36.

¹⁷ To, Iesu be ena mauri lalonai moale karadia ia atoa guna lasi. Ia ese Iehova ia atoa guna bona ia gaukara goada ma haida ia durua totona. Danu, ia ese hisihisi badana ia mamia ela bona au ta dekenai ia mase, unai amo taunimanima momo idia mauri diba. Iesu be ia murinai idia raka taudia dekenai ia gwau: “Lau dainai taunimanima ese umui idia gwauraia dika, idia dagedage henia bona mai koikoi ida hereva dikadia idauidau idia gwauraia neganai, do umui moale. Do umui moale bada badina emui davana guba dekenai be bada. Guna idia noho peroveta taudia be unai bamona idia dagedage henidia danu.”​—⁠Mat. 5:11, 12.

18. Moale karadia dekenai edena henanadai ita lalodia be namo?

¹⁸ Edena bamona do ita diba ita be moale karadia ita laloa bada? Namona be sibona ita nanadaia: ‘Moale karadia lau atoa guna, to hebou bona haroro gaukara lau laloa maragi, a? Moale karadia lau dadaraia, unai amo Dirava lau hesiai henia diba, a? Moale karadia lau abia hidi neganai, Iehova ese egu abia hidi be edena bamona ia laloa?’ Bema Dirava ita lalokau henia, ia inai henia gaudia sibona do ita dadaraia lasi, to ia moalelaia lasi gaudia danu do ita dadaraia.​—⁠Mataio 22:37, 38 duahia.

19. Daidia be idia moale diba lasi?

¹⁹ Taunimanima be lagani 6,000 bamona lalonai hisihisi idia mamia vadaeni, to kahirakahira Satani ena tanobada be do ia ore. Tanobada ai momo be idia sibona, moni, bona moale karadia idia laloa bada. Do idia abia gaudia sibona idia laloa, bona edia mauri lalonai edia ura gaudia sibona idia tahua. Unai bamona taudia be idia moale diba lasi. To Salamo torea tauna ia gwau: “Iakobo ena Dirava ese ia durua noho taudia, be idia moale noho.”​—⁠Sal. 146:5.

20. Iehova lalokau henia karana ese edena dala ai oi ia hamoalea?

²⁰ Iehova ena taunimanima be ia idia lalokau henia bada, bona lagani ta ta ai edia namba be ia bada daekau. Unai ese ia hahedinaraia Dirava ena Basileia be ia lohia noho, bona kahirakahira tanobada ai hahenamo momo do ia mailaia. Dirava ena ura ia karaia tauna be do ia moale, badina ia diba ia be Atai Momokani Diravana ia hamoalea. Bona Iehova idia lalokau henia taudia be do idia moale ela bona hanaihanai! Vaira wiki ena stadi ai, ita ese sibona laloa bada karana ena dika bona Iehova ena hesiai taudia ese idia hahedinaraia kara namodia do ita herevalaia.