1-2. (a) Edena dala ai Isaia 41:10 ai ia noho herevana ese Yoshiko ia durua? (b) Iehova be daidia totona Isaia 41:10 ena hereva ia gwauraia?

KERISTANI taihu ta ladana, Yoshiko be ena doketa ese ia hamaoroa ia be hua haida sibona do ia mauri. Unai sivarai ia kamonai neganai, dahaka ia karaia? Yoshiko ese ia ura henia bada Baibel siri, Isaia 41:10 ia laloatao. (Duahia.) Ia be mai gari lasi ida doketa ia hereva henia, badina ia diba Iehova be ena imana ia dogoatao bamona. * Unai siri ena hagoadaia herevana ese iseda taihu ia durua Iehova ia abidadama henia totona. Danu unai ese ita ia durua diba hahetoho ita haheaukalaia totona. Unai siri ena hereva ita lalopararalaia totona, do ita itaia dahaka dainai Dirava be Isaia amo unai hereva ia gwauraia.

² Matamanai, Iehova ese Isaia amo unai hereva ia gwauraia Iuda taudia ia hagoadaia totona, badina Babulonia taudia ese idia be igui hesiai taudia bamona do idia abidia lao. Iehova ese unai hereva be Iuda taudia sibona dekenai ia gwauraia lasi, to unai nega amo ema bona hari ena taunimanima ibounai dekenai ia gwauraia danu. (Isa. 40:8; Roma 15:4) Hari inai negai, ita be “nega aukadia” lalonai ita noho, unai dainai Isaia bukana ai ia noho hagoadaia herevana ita laloa dobu be namo.​—⁠2 Tim. 3:1.

3. (a) Lagani 2019 ena siri badana, Isaia 41:10 ai dahaka gwauhamata idia noho? (b) Dahaka dainai unai gwauhamata ita laloa bada be namo?

³ Inai atikol ai, Isaia 41:10 lalonai Iehova ena gwauhamata, do ita herevalaidia, (1) Iehova be ita danu ia noho, (2) ia be iseda Dirava, bona (3) ia ese ita do ia durua. Unai gwauhamata *  toi ita laloa bada be namo badina Yoshiko bamona ita danu mauri lalonai hekwakwanai ita davaria noho. Namona be tanobada ai idia vara hekwakwanai idauidau ita haheaukalaia danu. Ita haida be gavamani edia dagedage karadia ita haheaukalaia. Unai gwauhamata ta ta mani ita herevalaia.

4. (a) Ita ese edena gwauhamata ginigunana do ita herevalaia? (Futnout itaia.) (b) Edena dala haida ai Iehova ese ita ia laloa bada? (c) Dirava ena gwauhamata be edena bamona oi laloa?

⁴ Iehova ese inai gwauhamata ginigunana amo ita ia hagoadaia: “Do umui gari lasi, lau be umui dekenai lau noho!” * Iehova ese ia hahedinaraia ia ese ita ia laloa bada bona lalokau henia. Unai ia hahedinaraia dalana mani ita itaia. Ia gwau: “Umui emui davana be bada herea lau dekenai. Lau ese umui lau matauraia noho, bona umui lau ura henia noho.” (Isa. 43:4) Tanobada bona guba gauna ta ese Iehova ena lalokau iena hesiai taudia dekenai do ia koua diba lasi. (Isa. 54:10) Iena lalokau bona ita ia tura henia karana ese ita ia hagoadaia. Hari ita do ia gimaia, iena turana Aberamo (Aberahamo) ia gimaia hegeregerena. Iehova be ia dekenai ia gwau: “Aberamo e, oi gari lasi. Lau be oiemu kesi.”​—Gen. 15:1.

5-6. (a) Edena dala ai ita diba Iehova ia ura ita ia durua iseda hahetoho ita hanaia totona? (b) Yoshiko ena haheitalai amo dahaka ita dibaia?

⁵ Ita diba iseda hahetoho idauidau lalonai, Iehova ia ura ita ia durua badina inai gwauhamata herevana ia gwauraia. Ia gwau: “Ranu dobuna umui hanaia gwauraia neganai, lau be umui danu do lau noho. Umui emui laloa hekwarahi ese, umui do idia hadikaia ore lasi. Lahi umui hanaia gwauraia neganai, ena siahu ese umui do ia gabua lasi. Hisihisi aukadia umui dekenai idia mai ese, umui do idia hadikaia lasi.” (Isa. 43:2) Unai hereva ena anina be dahaka?

⁶ Iehova ia gwau lasi unai hekwakwanai do ia kokia, to ia gwauhamata “ranu dobuna” bamona hekwakwanai lalonai do ita  maloa lasi, eiava “lahi” bamona hahetoho ese ita do ia hamorua lasi. Ia gwauhamata ia be ita danu do ia noho, bona ita do ia durua hekwakwanai ita hanaia totona. Iehova be dahaka do ia karaia? Ia ese ita do ia durua ita gari lasi totona, ena be ita diba do ita mase, to ia do ita badinaia noho. (Isa. 41:13) Paragraf ginigunana ai ita herevalaia taihu, Yoshiko dekenai unai ia vara momokani. Iena natuna kekeni ia gwau: “Egu sinana ena gari lasi karana ese ai hagoadaia. Iehova ese ia dekenai lalo-maino ia henia. Ia do mase lasi neganai, egu sinana be nesi taudia bona gorere taudia ma haida dekenai Iehova bona iena gwauhamata ia herevalaia.” Yoshiko ena haheitalai amo dahaka ita dibaia? Dirava ena gwauhamata, “lau be umui dekenai lau noho” ita abidadama henia momokani neganai, do ita goada bona eda hekwakwanai do ita haheaukalaia.

7-8. (a) Gwauhamata iharuana be dahaka bona ena anina be dahaka? (b) Dahaka dainai Iehova ese igui hesiai Iuda taudia dekenai ia gwau: “Gau ta ese umui do ia hagaria lasi”? (c) Dirava ena hagoadaia herevana Isaia 46:3, 4 dekenai be dahaka?

⁷ Isaia ese ia gwauraia gwauhamata iharuana mani ita herevalaia, ia gwau: “Lau be umui emui Dirava gau ta ese umui do ia hagaria lasi.” Unai hereva ena anina be dahaka? Inai hereva “gau ta ese umui do ia hagaria” be hegeregere “gau ta o tau ta ena hagaria karana ta dainai oi laloa momo o oi gari.”

⁸ Dahaka dainai Iehova ese Babulonia ena igui hesiai ai do idia lao Iuda taudia ia hagoadaia ‘gau ta ese idia do ia hagaria lasi’? Badina ia diba Babulonia ai idia noho taudia ibounai be do idia gari. Dahaka dainai? Lagani 70 idia ore bona Iuda taudia be kahirakahira Babulonia do idia rakatania neganai, Mede bona Parasa tuari taudia goadadia ese Babulonia do idia hadikaia. Iehova ese unai tuari oreana do ia gaukaralaia Babulonia ena igui hesiai amo iena taunimanima do ia ruhaia totona. Babulonia taudia bona idau bese taudia idia kamonai edia inai taudia be idia mai noho lalonai, idia ta ta idia hagoadaia bona idia gwau: “Do oi goada.” Danu kaivakuku diravadia idia karaia, badina idia laloa unai ese idia do ia gimaia. (Isa. 41:5-7) To, Iehova be Iuda igui hesiai taudia edia lalona ia hagoadaia, ia gwau: “Umui Israela, be lauegu hesiai tauna . . . Lau be umui emui Dirava, gau ta ese umui do ia hagaria lasi.” (Isa. 41:8-10) Unai siri amo ita itaia Iehova ia gwau: “Lau be umui emui Dirava.” Unai ese ia hahedinaraia Iehova be ia idia tomadiho henia taudia ia laloaboio lasi​—ia be edia Dirava bona idia be iena taunimanima. Idia ia hamaoroa, ia gwau: “Lau ese umui do lau durua, bona umui do lau hamauria.”​—Isaia 46:3, 4 duahia.

9-10. Dahaka dainai gau ta dekenai ita gari lasi be namo? Haheitalai gwauraia.

⁹ Hari inai negai tanobada ai idia vara kara dikadia idia bada idia lao dainai taunimanima be idia gari. Momokani tanobada ai ita noho dainai, ita danu ita gari. To ita gari lasi be namo badina Iehova ese ita ia hamaoroa, ia gwau: “Lau be umui emui Dirava.” Dahaka dainai unai hereva ese ita ia hagoadaia?

¹⁰ Mani inai haheitalai ita laloa: Jim bona Ben be peleini ta lalonai idia guia, bona unai peleini be lai badana ta ia toa dainai ia mareremarere bada. Unai ia vara neganai, pilot be spika amo idia ia hadibaia, ia gwau: “Emui sea ena beleta umui kwatua namonamo. Inai peleini be miniti haida lalonai do ia mareremarere.” Jim be ia gari bada. To pilot be ma ia gwau: “Gau ta dekenai umui gari lasi. Lau be emui pilot.” Jim be  unai kamonai neganai, ia gwau, “Dahaka dainai unai bamona ia hereva?” To ia itaia Ben be gau ta dekenai ia gari lasi. Jim ese ia nanadaia, ia gwau: “Dahaka dainai oi gari lasi?” Ben ia gwau: “Inai pilot lau diba, ia be egu tamana!” Ben ma ia gwau: “Mani egu tamana ena sivarai sisina lau gwauraia. Bema egu tamana ese peleini ia taria dalana oi diba, do oi gari lasi.”

11. Ben bona Jim edia haheitalai amo dahaka ita dibaia?

¹¹ Unai haheitalai amo dahaka ita dibaia? Ben hegeregerena, ita gari lasi badina iseda guba Tamana, Iehova ita diba namonamo. Ena be inai nega dikana lalonai hekwakwanai idauidau ita davaria, to ita diba ia ese ita do ia durua. (Isa. 35:4) Ita be Iehova ita abidadama henia dainai ita gari lasi, to inai tanobada taudia be mai gari ida idia noho. (Isa. 30:15) Ita be Ben bamona iseda dekena taudia dekenai ita gari lasi ena badina ita gwauraia hedinarai. Unai amo do idia diba momokani ena be hekwakwanai idia davaria, to Iehova be idia do ia durua danu.

12. (a) Edena gwauhamata ihatoina do ita herevalaia? (b) Inai hereva, Iehova ena “imana be ia lohia noho” ese dahaka ia hahedinaraia?

¹² Isaia ese ia gwauraia gwauhamata ihatoina mani ita herevalaia, ia gwau: “Lau ese umui do lau hagoadaia, bona umui do lau durua.” Iehova ese unai do ia karaia dalana be Isaia ese ia herevalaia, ia gwau: “Iehova Dirava be mai siahu ida ia mai noho, bona iena imana be ia lohia noho.” (Isa. 40:10, BHḡ) Nega momo Baibel be inai hereva “imana” ia gaukaralaia siahu ia herevalaia totona. Inai hereva Iehova ena “imana be ia lohia” ese ita ia hadibaia Iehova be siahu ibounai ena King. Iehova be ena siahu ia gaukaralaia idaunegai ena hesiai taudia ia durua, bona hari inai negai ia idia abidadama henia taudia ia  hagoadaia bona gimaia noho.​—Deu. 1:30, 31; Isa. 43:10.

13. (a) Edena bamona negadiai Iehova be ita dekenai ena gwauhamata ia hamomokania? (b) Dahaka gwauhamata ese iseda abidadama ia hagoadaia?

¹³ Iseda inai taudia be ita idia dagedage henia neganai, Iehova be ena gwauhamata ia hamomokania, ia gwau: “Lau ese umui do lau hagoadaia.” Hari tanobada ena kahana haida ai, ita idia inai henia taudia be iseda haroro gaukara bona orea ia heau dalana idia koua noho. Herevana unai ia vara, unai dagedage karana dainai ita gari lasi. Iehova ese ita dekenai ia henia gwauhamata ese iseda abidadama ia hagoadaia. Ia gwau: “Tuari gauna ta ese oi do ia hadikaia diba lasi.” (Isa. 54:17) Unai hereva ese mai anina bada gaudia toi be ita dekenai ia hadibaia.

14. Dahaka dainai Dirava idia inai henia taudia be ita do idia dagedage henia?

¹⁴ Gau ginigunana be, ita be Keriso ena murinai ita raka taudia dainai, taunimanima be ita do idia inai henia. (Mat. 10:22) Iesu ia gwau iena hahediba taudia be dina gabediai taunimanima ese do idia dagedage henia. (Mat. 24:9; Ioa. 15:20) Gau iharuana be, Isaia ena peroveta herevana ese ita ia hadibaia iseda inai taudia be ita do idia inai henia sibona lasi, to gau ma haida do idia gaukaralaia ita idia hadikaia totona. Hegeregere, idia gwauraia koikoi herevadia do idia hunia, unai amo taunimanima do idia laloa ia be koikoi herevana lasi, bona mai dagedage ida dibura ruma ai ita idia atoa. (Mat. 5:11) Iseda inai taudia be unai gaudia do idia gaukaralaia ita idia hadikaia totona, to Iehova be unai do ia koua lasi. (Efe. 6:12; Apok. 12:17) To dahaka dainai ita gari lasi be namo?

15-16. (a) Dahaka gau ihatoina ita laloatao be namo bona edena dala ai Isaia 25:4, 5 ese unai hereva ia durua? (b) Isaia 41:11, 12 ena hereva bamona, iseda inai taudia dekenai dahaka do ia vara?

¹⁵ Gau ihatoina mani ita laloa. Iehova ia gwau, “tuari gauna ta” ese ita “do ia hadikaia diba lasi.” Lai badana amo haba ta ese  ita ia gimaia bamona, Iehova ese “bogahisihisi lasi taudia edia badu” amo ita ia gimaia diba. (Isaia 25:4, 5 duahia.) Iseda inai taudia ese ita do idia hadikaia diba lasi.​—Isa. 65:17.

¹⁶ Iehova be ita “idia badu henia taudia” dekenai do idia vara gaudia ia gwauraia hedinarai goevagoeva karana amo ita ia hagoadaia. (Isaia 41:11, 12 duahia.) Herevana iseda inai taudia edia dagedage o tuari karana ita dekenai be bada, to do idia kwalimu lasi. Dirava ese ena taunimanima idia dagedage henia taudia ibounai ‘do ia alaia mase.’

17-18. (a) Baibel duahia karana ese edena dala ai iseda abidadama ia hagoadaia diba? Haheitalai ta gwauraia. (b) Edena dala ai lagani 2019 ena siri badana ita laloa dobu karana ese ita do ia durua?

¹⁷ Iehova dekenai iseda abidadama ita hagoadaia dalana be ia ita diba namonamo. Dirava ita dibaia dalana badana be, Baibel ita duahia namonamo bona ita duahia gauna ita laloa dobu. Iehova ese idaunegai ena taunimanima ia gimaia edia sivarai be Baibel lalonai idia noho. Unai ese ia hamomokania hari ia ese ita ia gimaia diba.

¹⁸ Iehova be ita ia gimaia dalana be Isaia ese laulau herevana ta amo ia haheitalaia. Ia hahedinaraia Iehova be mamoe naria tauna bona Dirava ena hesiai taudia be mamoe bamona. Isaia ese Iehova be inai bamona ia herevalaia, ia gwau: “Ia ese mamoe edia natudia do ia haboua, bona iena imana dekenai idia do ia rosia, idia do ia huaia lao.” (Isa. 40:11) Iehova ena gimaia karana ita mamia neganai, unai be hegeregere ena imana amo ita ia rosia bona huaia. Hakaua oreana ese ita idia durua ita gari lasi totona, idia ese lagani 2019 ena siri badana be Isaia 41:10 (NWT) amo idia abia. Ia gwau: “Oi laloa momo lasi badina lau be emu Dirava.” Unai hagoadaia herevana oi laloa dobu be namo. Unai ese oi do ia durua do oi davaria hekwakwanai idauidau oi haheaukalaia totona.