1-2. (a) Taunimanima milioni momo be Lohiabada Ena Anibou totona idia hebou neganai, Iehova ena hemami be edena bamona? (Rau 1 ena laulau herevalaia.) (b) Inai atikol ai dahaka do ita herevalaia?

TANOBADA hegegemadai taunimanima milioni momo be Lohiabada Ena Anibou totona idia hebou neganai, Iehova ena hemami mani ita laloa? Unai hebou idia lao taudia be hutuma bamona ia laloa lasi; to unai hebou dekenai idia lao taudia ta ta ia laloa bada. Hegeregere, lagani ibounai ai unai hebou idia lao taudia ia itaia. Idia huanai, haida be herevana dagedage idia davaria to unai hebou dekenai idia lao. Ma haida be hanaihanai hebou idia lao lasi to Memorial hebouna lao henia karana idia laloa bada. Danu, Iehova be nega ginigunana Memorial dekenai idia lao taudia ia laloa bada, reana idia ura diba unai hebou ena badina be dahaka.

² Oibe, taunimanima momo be Memorial dekenai idia lao neganai Iehova be ia moale. (Luka 22:19) Herevana taunimanima momo herea be unai hebou dekenai idia lao, to Iehova be taunimanima hida idia lao ena namba ia laloa lasi. Iehova be unai hebou dekenai ita lao ena badina ia laloa bada. Inai atikol ai, ita ese inai mai anina bada henanadai do ita herevalaia: Dahaka dainai Memorial sibona lasi, to Iehova ese ia idia lalokau henia taudia totona ia hegaegaelaia wiki ta ta ena hebou ita lao be namo?

3-4. (a) Dahaka dainai hebou dekenai ita lao? (b) Dahaka ese ita ia durua iseda hebou idauidau ita lao henia totona? (c) Korinto Ginigunana 11:23-26 ia hereva bamona, dahaka dainai Memorial hebouna ita reaia lasi be namo?

³ Kongrigeisen heboudia dekenai ita lao badina unai be iseda tomadiho ena kahana ta. Bona danu hebou ai Iehova ese  ita ia hadibaia. Hekokoroku taudia be idia ura lasi ta ese idia ia hadibaia. (3 Ioa. 9) To, ita be mai iseda ura ida Iehova bona ia gaukaralaia orea ena hadibaia dalana ita abia dae.​—Isa. 30:20; Ioa. 6:45.

⁴ Hebou ita lao henia karana ese ia hahedinaraia ita manau, ita noho hegaegae bona ita ura diba ita abia. Iesu ena mase laloatao hebouna dekenai ita lao neganai namo lasi ita laloa ia be maduna ta dainai ita lao, to unai hebou ita lao badina mai manau ida Iesu ena hahegani ita badinaia, ia gwau: “Inai bamona do umui karaia noho lau umui laloatao totona.” (1 Korinto 11:23-26 duahia.) Unai hebou ese iseda helaro vaira nega totona ia hagoadaia bona Iehova ese ita ia lalokau henia bada karana ia hahedinaraia. To, Iehova ia diba lagani ta lalonai nega tamona sibona lasi, to nega ibounai ita ia hagoadaia be namo. Unai dainai, ita totona wiki ta ta ai hebou ibounai ia hegaegaelaia bona ita ia hadibaia unai hebou ita lao be gau badana. Bema ita manau iena hereva do ita badinaia. Wiki ai hora momo lalonai unai hebou totona ita hegaegae bona ita lao.

5. Dahaka dainai manau taudia ese Iehova ena hadibaia karana idia abia dae?

⁵ Lagani ta ta ai, Iehova ese taunimanima ia boiria hebou dekenai idia mai totona, bona idia manau taudia be unai hebou dekenai idia lao. (Isa. 50:4) Memorial bona hebou ma haida lao henia karana idia moalelaia. (Sek. 8:20-23) Ita ibounai be Iehova “[iseda] hamauria Tauna bona [iseda] Dirava” ena hadibaia bona hakaua dalana ita moalelaia. (Sal. 40:17) Momokani, Iehova bona ia lalokau henia Natuna, Iesu, ese ita idia boiria bona edia hadibaia karana ita abia dae neganai ita moale.​—Mat. 17:5; 18:20; 28:20.

6. Edena dala ai manau karana ese tau ta ia durua Memorial dekenai ia lao totona?

⁶ Lagani ta ta ai, ita gaukara goada taunimanima momo ita invait Iesu ena mase laloatao hebouna dekenai idia mai totona. Idia manau taudia momo be iseda invateisen idia abia dae bona unai hebou ena namo idia moalelaia. Mani inai haheitalai ita laloa. Lagani momo gunanai, tau ta be Memorial invateisen ta ia abia, to tadikaka ia hamaoroa unai hebou dekenai do ia lao lasi. To, Memorial hanuaboina ai, tadikaka be unai tauna ia itaia Kingdom Hall ai ia raka vareai. Unai tauna be tadikaka taihu edia heabidae karana ia moalelaia bona wiki ta ta ena hebou ia lao matamaia. To, vaira laganina lalonai ia be nega toi sibona hebou ia lao lasi. Dahaka ese ia durua hebou ibounai ia lao totona? Ia manau dainai ena lalohadai ia haidaua. Invateisen ia henia tadikakana ia gwau: “Ia be manau tauna.” Oibe, Iehova ese ia veria mai Ia do ia tomadiho henia totona, bona hari ia be tadikaka ta.​—2 Sam. 22:28; Ioa. 6:44.

7. Hebou ai ita dibaia gaudia bona Baibel amo ita duahia herevadia ese edena dala ai ita idia durua ita manau totona?

⁷ Hebou ai ita dibaia gaudia bona Baibel lalonai ita duahia herevadia ese ita ia durua ita manau totona. Memorial ena wiki ia do ginidae lasi neganai, iseda hebou ai Iesu ena haheitalai bona mai manau ida ena mauri ia bouboulaia karana ita herevalaia. Bona Memorial ena dina ia do ginidae lasi neganai, namona be Iesu ena mase bona toreisi lou negadia ai idia vara gaudia edia sivarai be Baibel amo ita duahia. Hebou ai ita dibaia gaudia bona Baibel ai idia noho sivaraidia ita duahia neganai unai ese ita ia durua Iesu ese ita totona ia karaia gauna ita laloa bada. Unai ese ita ia hagoadaia iena manau karana ita tohotohoa bona Iehova ena ura ita karaia, herevana ia be auka.​—Luka 22:41, 42.

8. Edena dala ai Iesu be gari lasi karana ia hahedinaraia?

⁸ Iesu ena gari lasi karana ita tohotohoa diba. Iena mase dinana ia kahirakahira neganai, ena gari lasi karana mani oi laloa. Ia diba, iena inai taudia ese kahirakahira ia do idia hahemaraia, botaia bona hamasea. (Mat. 20:17-19) Herevana ia diba do ia mase, to ia gari lasi. Ena mase negana ia kahirakahira neganai, Getesemane ai ena abidadama aposetolo taudia ia hamaoroa, ia gwau: “Umui toreisi, ita lao. Lauegu mase dalana ia karaia tauna be ia mai kahirakahira vadaeni.” (Mat. 26:36, 46) Bona hutuma mai edia tuari gaudia be ia dogoatao totona idia mai neganai, ia gini bona sibona ia gwauraia hedinarai bona soldia taudia ia hadibaia ena aposetolo taudia idia rakatania totona. (Ioa. 18:3-8) Iesu ese gari lasi karana ia hahedinaraia! Hari, horoa Keristani taudia bona mamoe idaudia be idia gaukara goada Iesu ena haheitalai gari lasi karana dekenai idia tohotohoa totona. Edena dala ai?

9. (a) Dahaka dainai mai gari lasi ida hanaihanai hebou ibounai dekenai ita lao? (b) Iseda haheitalai ese edena dala ai dibura ruma ai idia noho tadikaka edia abidadama ia hagoadaia?

⁹ Hanaihanai hebou ita lao totona, namona be ita gari lasi herevana hekwakwanai ita davaria. Tadikaka bona taihu haida be hebou idia lao herevana idia lalometau, idia lalomanoka o gorere badadia idia davaria. Bona ma haida be herevana ruma bese o gavamani amo dagedage idia davaria to mai gari lasi ida hebou idia lao. Mani inai oi laloa, mai gari lasi ida iseda hebou lao henia karana ese dibura ruma ai idia noho tadikaka taihu ia durua bada. (Heb. 13:3) Bona idia kamonai, herevana hahetoho ita davaria to Iehova ita hesiai henia noho, unai ese edia abidadama ia hagoadaia, idia gari lasi bona Dirava idia badinaia noho totona. Aposetolo Paulo dekenai unai ia vara. Roma ena dibura ruma ai ia noho neganai, ia moale badina ia kamonai ena tadikaka be mai abidadama goada ida Dirava idia hesiai henia. (Fili. 1:3-5, 12-14) Reana dibura ruma ia do rakatania lasi neganai, Paulo be Heberu taudia dekenai ena revareva ia torea. Unai revareva ai, abidadama Keristani taudia ia hagoadaia do idia “lalokau heheni” bona hebou karana idia rakatania lasi.​—Heb. 10:24, 25; 13:1.

10-11. (a) Memorial dekenai daidia ita invait? (b) Efeso 1:7 ena hereva hegeregerena, dahaka dainai Memorial dekenai ita lao?

¹⁰ Memorial dekenai iseda varavara, gaukara turadia bona iseda dekena taudia ita invait neganai, unai ese ia hahedinaraia ita be ita gari lasi. Dahaka dainai idia ita invait? Memorial dekenai idia ita invait badina Iehova bona Iesu ese ita totona idia karaia gauna ita laloa bada. Ita ura idia danu be Iehova ena “hebogahisi hereadaena” ena namo, Iesu ena boubou gauna amo ia hahedinaraia gauna unai, idia dibaia.​—Efeso. 1:7 duahia; Apok. 22:17.

¹¹ Bema mai gari lasi ida hebou dekenai ita lao, ita ese mai anina bada karana ma ta ita hahedinaraia, bona unai be Dirava bona  ena Natuna ese dala badadia ai idia hahedinaraia.

12. (a) Edena dala ai iseda hebou lao henia karana ese iseda lalokau Iehova bona ena Natuna dekenai ia habadaia? (b) Korinto Iharuana 5:14, 15 ese edena dala ai ita ia hagoadaia Iesu ita tohotohoa totona?

¹² Iehova bona Iesu ita lalokau henia dainai hebou dekenai ita lao. Bena hebou ai ita dibaia gaudia ese iseda lalokau Iehova bona ena Natuna dekenai ia habadaia. Ita totona idia karaia gaudia be hanaihanai hebou dekenai ita dibaia. (Roma 5:8) Memorial amo ita diba, idia ese ita bona mauri davalaia boubouna idia do lalopararalaia lasi taudia dekenai idia hahedinaraia lalokauna be bada. Unai kara ita laloa bada dainai, iseda dina ta ta maurina lalonai Iesu ita tohotohoa be namo. (2 Korinto 5:14, 15 duahia.) Danu, mai kudouna ibounai ida Iehova ita hanamoa badina ia ese ita dekenai mauri davalaia boubouna ia henia. Unai ita karaia dalana ta be iseda hebou ai haere ita henia.

13. Edena dala ai ita hahedinaraia Iehova bona ena Natuna ita lalokau henia bada? Herevalaia.

¹³ Iehova bona iena Natuna dekenai iseda lalokau ita hahedinaraia dalana ta be, iseda ura gaudia haida ita dadaraia. Namona be gau haida ita dadaraia unai amo iseda hebou ita lao diba. Kongrigeisen momo be wiki lalonai adorahi ena hebou idia karaia, bona unai bamona negadia ai momo be dina ai idia gaukara dainai edia tauanina ia hesiku bada. Bona hebou ma ta be wiken ai idia karaia, unai bamona dinadia ai taunimanima haida be idia ura idia laga-ani. Herevana ita hesiku bada, to Iehova ese iseda hebou lao henia karana ia laloa bada, a? Oibe, unai ia laloa bada! Bema hebou lao henia totona ita hekwarahi, Iehova ese ia totona ita hahedinaraia lalokauna ia laloa bada.​—Mar. 12:41-44.

14. Edena dala ai Iesu be sibona ena ura dadaraia lalokauna ia hahedinaraia?

¹⁴ Iesu be sibona ena ura dadaraia lalokauna ia hahedinaraia. Dala ta be, ia diba ena hahediba taudia totona do ia mase bona danu iena mauri lalonai ena kara amo ia hahedinaraia sibona ena ura ia dadaraia bona ena hahediba taudia edia ura ia atoa guna. Hegeregere, herevana ia hesiku bada bona ia lalometau to nega ia atoa ena murinai idia raka taudia ida ia herevahereva bona ia hadibadia. (Luka 22:39-46) Bona  ma haida do ia durua daladia ia laloa bada, to idia amo do ia abia gaudia ia laloa lasi. (Mat. 20:28) Iesu hegeregerena, bema eda lalokau Iehova bona iseda tadikaka taihu totona be ia goada, do ita gaukara goada Lohiabada Ena Anibou bona kongrigeisen heboudia ibounai do ita lao.

15. Ita ura daidia ita durua?

¹⁵ Ita be Keristani tadikaka oreana lalonai ita noho, bona mai moale ida nega bada ita gaukaralaia kamonai matamata taudia ita boiria totona. To, ita ura iseda “abidadama tamona tadikaka bona taihu” ita durua badina idia haida be edia abidadama dekenai idia manoka. (Gal. 6:10) Idia ita hagoadaia hebou ibounai bona Memorial idia lao totona, unai ese iseda lalokau idia dekenai ia hahedinaraia. Iehova bona Iesu bamona, do ita moale bada bema ita itaia ia manoka tadikaka o taihu be iseda Lalokau Tamana bona Mamoe Naria Tauna, Iehova dekenai ia giroa lou.​—Mat. 18:14.

16. (a) Edena dala ai ta ta ita hagoadaia heheni diba, bona iseda hebou ibounai ena namo be dahaka? (b) Dahaka dainai inai lagani ai Iesu ena hereva Ioane 3:16 ai ita laloatao be namo?

¹⁶ Wiki lalonai, taunimanima momo umui invait unai amo Friday adorahi, April 19, 2019 ena Memorial idia mai totona. (Maua ladana “Daidia Oi Invait Diba?” itaia.) Inai lagani lalonai, namona be ita ta ta ita hagoadaia heheni, unai amo Iehova ese ita totona ia hegaegaelaia hebou ibounai ita lao henia. Inai nega oromana ena dokona ia kahirakahira noho lalonai, namona be iseda hebou ibounai ita lao, badina unai ese ita do ia durua ita manau, do ita gari lasi bona ma haida ita lalokau henia totona. (1 Tes. 5:8-11) Iehova bona ena Natuna ese ita idia lalokau henia bada dainai, namona be mai kudouna ibounai ida ita hahedinaraia idia ita lalokau henia.​—Ioane 3:16 duahia.