1-2. (a) Dahaka dainai Iesu ese auka lasi dalanai iena mase laloatao dalana ia hegaegaelaia? (b) Iesu ese edena kara ia hahedinaraia?

LAGANI ta ta ai, Iesu ena mase laloatao Memorial be edena bamona do oi herevalaia? Ita momo ese Memorial dekenai idia vara gaudia ita laloatao diba. Dahaka dainai? Badina unai hebou be auka lasi dalana ai idia karaia. Bona ia be mai anina bada. Reana ita sibona dekenai do ita henanadai, ‘Dahaka dainai unai hebou be ia auka lasi?’

² Iesu be tanobada ai ena haroro gaukarana ia karaia neganai, hereva momokani be auka lasi dalanai, bona taunimanima ese idia lalopararalaia dalanai ia hadibaia. (Mat. 7:28, 29) Unai hegeregerena auka lasi dalanai iena mase ita laloatao diba. Memorial hebouna bona Iesu ese ia herevalaia gaudia bona ia karaia gaudia mani ita laloa. Iesu ena manau, gari lasi, bona ena lalokau karana do ita lalopararalaia namonamo bona ia ita tohotohoa daladia do ita dibaia.

3. Mataio 26:26-28 ena hereva hegeregerena, Iesu ese edena dala ai unai mai anina bada hebouna ia hegaegaelaia, bona ia gaukaralaia gaudia rua ese dahaka idia laulaulaia?

³ Iesu be iena aposetolo taudia 11 ida iena mase laloatao hebouna idia karaia. Unai hebou lalonai Iesu be Pasova ariana ai idia abia paraoa bona wain ia gaukaralaia. (Mataio 26:26-28 duahia.) Unai be hatubua lasi paraoana bona wain kakakakana. Iesu be ena aposetolo taudia ia hamaoroa unai gaudia rua ese iena tauanina bona ena rara goevana ia laulaulaia, bona kahirakahira idia totona ena mauri do ia bouboulaia. Unai mai anina bada hebouna ia karaia totona unai gaudia rua sibona ia gaukaralaia, to dahaka dainai iena aposetolo taudia idia hoa lasi?

4. Iesu ese Mareta dekenai ia henia sisiba ese edena dala ai ita ia durua Memorial hegaegaelaia dalana ita lalopararalaia totona?

 ⁴ Hua haida gunanai ia vara gauna mani ita laloa. Unai be Iesu ena lagani ihatoina haroro gaukarana lalonai, ena tura namodia​—Lasaro, Mareta, bona Maria edia ruma dekenai idia ia vadivadi henia. Idia danu ia herevahereva lalonai idia ia hadibaia danu. Mareta be ia ura Iesu totona aniani momo ia hegaegaelaia. To, Iesu be unai ia itaia neganai mai manau ida Mareta ia durua bona ia hamaoroa, aniani momo hegaegaelaia karana be gau badana lasi. (Luka 10:40-42) Iesu ia do mase lasi neganai, ia gwauraia herevana ia badinaia. Ia ura Memorial lalonai gau momo idia hegaegaelaia lasi. Iesu ena kara amo dahaka ita dibaia?

5. Iesu ese unai hebou be auka lasi bona dala maorona ai ia karaia amo dahaka ia hahedinaraia, bona edena dala ai unai be Filipi 2:5-8 ena hereva hegeregerena?

⁵ Iesu be ia gwauraia bona karaia gaudia ibounai lalonai ia manau. Unai ese ia hahedinaraia ena hanuaboi ginigabena ai, ia manau momokani. (Mat. 11:29) Ia diba taunimanima edia histori lalonai do ia henia boubou gauna be hereadae bona Iehova ese do ia hatoreaisi lou bona guba dekenai king ai do ia lao. Ena be ia diba, to ia ura lasi iena mase laloatao totona taunimanima be aria badana ta do idia hegaegaelaia. To, iena hahediba taudia ia hadibaia nega tamona lagani ta ta lalonai unai mai anina bada hebouna idia karaia ia idia laloatao totona. (Ioa. 13:15; 1 Kor. 11:23-25) Unai hebou be auka lasi bona dala maorona ai ia karaia bona unai ese ia hahedinaraia Iesu be ia hekokoroku lasi. Ita moale badina manau karana be iseda King ena kara badana ta.​—Filipi 2:5-8 duahia.

6. Bema hahetoho ita davaria, edena dala ai Iesu ena manau karana do ita tohotohoa?

⁶ Edena dala ai Iesu ena manau karana ita tohotohoa diba? Ita sibona eda namo ita laloa lasi, to ma haida edia namo ita laloa guna. (Fili. 2:3, 4) Iesu ena hanuaboi ginigabena ai idia vara gaudia mani ita laloa lou. Iesu ia diba ia be hisihisi bada do ia mamia, to ia be ena abidadama aposetolo taudia, kahirakahira ia dainai do idia lalohisihisi taudia unai, ia laloa bada. Unai dainai, ena hanuaboi ginigabena ai idia ia hadibaia, bona hagoadaia. (Ioa. 14:25-31) Iesu be sibona ena namo ia laloa lasi, to mai manau ida  haida edia namo ia laloa bada. Ita dekenai unai be haheitalai namo hereana!

7. Lohiabada Ena Anibou murinai, Iesu ese edena dala ai gari lasi karana ia hahedinaraia?

⁷ Iesu ese Lohiabada Ena Anibou ia karaia murinai, gari lasi karana ia hahedinaraia. Edena dala ai? Herevana Iesu ia diba ia do idia hahemaraia bona hamasea, to ena Tamana ena ura ia abia dae. (Mat. 26:65, 66; Luka 22:41, 42) Iesu be Dirava ia badinaia goevagoeva karana amo Iehova ena ladana ia hahelagaia, Dirava ena lohia siahuna ia abia isi, bona idia helalo-kerehai taudia totona mauri hanaihanai abia dalana ia kehoa. Bona danu, Iesu be ena murinai idia raka taudia edia lalona ia hegaegaelaia, badina ia diba hahetoho do idia davaria.

8. (a) Iesu ese iena abidadama aposetolo taudia dekenai dahaka ia hadibaia? (b) Lagani momo idia ore murinai, edena dala ai Iesu ena hahediba taudia ese iena haheitalai idia tohotohoa?

⁸ Iesu be sibona ena namo ia laloa lasi, to iena abidadama aposetolo taudia edia namo ia laloa bada karana amo gari lasi karana ia hahedinaraia. Iuda ia siaia murinai, Iesu be unai hebou ia hamatamaia, badina unai hebou ese aposetolo taudia ia hadibaia idia be Iesu ena rara amo bona gwauhamata matamatana amo namo do idia abia. (1 Kor. 10:16, 17) Guba helarona idia laloa bada totona, Iesu ese ena murinai idia raka taudia ia durua ia bona ena Tamana edia ura idia badinaia be namo. (Ioa. 15:12-15) Iesu be ena aposetolo taudia ia hadibaia idia be hahetoho do idia davaria danu. Iesu be ena haheitalai amo idia ia hadibaia idia “goada!” be namo. (Ioa. 16:1-4a, 33) Lagani momo idia ore murinai, Iesu ena hahediba taudia be iena  haheitalai, sibona ena ura dadaraia karana bona gari lasi karana idia hahedinaraia. Ena be idia diba hahetoho momo do idia davaria, to idia be ta ta idia durua heheni.​—Heb. 10:33, 34.

9. Edena dala ai Iesu ena gari lasi karana ita tohotohoa diba?

⁹ Hari iseda negai danu, Iesu ena gari lasi karana ita hahedinaraia diba. Hegeregere, iseda tadikaka be edia abidadama dainai dagedage idia davaria neganai, ita be mai gari lasi ida idia ita durua. Nega haida iseda tadikaka be idia samania koikoi dainai dibura ruma ai idia atoa. Bema unai ia vara, namona be ita hekwarahi idia ita durua bona edia abidadama dekenai idia gini goada totona, idia totona ita guriguri. (Fili. 1:14; Heb. 13:19) Dala ma ta be, “mai gari lasi ida” ita haroro. (Kara 14:3) Ena be taunimanima ese ita idia inai henia bona dagedage henia, to Iesu bamona iseda lalona ita hadaia Basileia ena sivarai namona ita harorolaia noho totona. To nega haida ita gari. Dahaka ese ita do ia durua?

10. Memorial ia lao henia wiki lalonai dahaka do ita karaia, bona dahaka dainai?

¹⁰ Keriso ena mauri davalaia boubouna ena helaro namona ita laloa bada neganai, unai ese ita dekenai goada ia henia. (Ioa. 3:16; Efe. 1:7) Memorial ia lao henia wiki be nega namona Iesu ena mauri davalaia boubouna ita laloa bada totona. Unai nega ai, Memorial ena Baibel duahiduahi ita karaia bona Iesu ia do mase lasi negana ai idia vara gaudia ita laloa dobu. Lohiabada Ena Anibou ena hebou ai ita noho neganai, paraoa bona wain edia anina bona Iesu ena boubou gauna ena namo do ita lalopararalaia. Iehova bona Iesu ese ita bona eda lalokau taudia totona idia karaia gaudia ita  lalopararalaia neganai, unai ese iseda helaro ia hagoadaia bona mai gari lasi ida do ita haheauka ela bona dokona.​—Heb. 12:3.

11-12. Ita be dahaka ita dibaia vadaeni?

¹¹ Lohiabada Ena Anibou amo Iesu ena mauri davalaia boubouna ena namo sibona ita dibaia lasi, to iena manau bona gari lasi karana danu. Ita moale badina Iesu be Hahelaga Tauna Badana guba ai bona mai manau bona mai gari lasi ida ita totona Dirava ia noia. (Heb. 7:24, 25) Iseda tanikiu karana ita hahedinaraia totona, namona be Iesu ese ita dekenai ia henia hahegani ita badinaia bona iena mase ita laloatao. (Luka 22:19, 20) Ita be Nisan 14 ena dina ida ia hegeregere dinana ai unai hebou do ita karaia, lagani ta ta ai unai dina be mai anina bada.

¹² Lohiabada Ena Anibou ai idia karaia gaudia amo Iesu ena kara ma ta ita dibaia, unai kara dainai ita totona ia mase. Tanobada dekenai ia noho neganai, inai kara ia hahedinaraia. Unai be dahaka?

13. Edena dala ai Ioane 15:9 bona 1 Ioane 4:8-10 ese Iehova bona Iesu edia lalokau ia herevalaia bona daidia be unai lalokau amo namo idia abia?

¹³ Iesu ia karaia gaudia ibounai lalonai Iehova ena lalokau ita totona ia hahedinaraia. (Ioane 15:9; 1 Ioane 4:8-10 duahia.) Iesu be mai ena kudouna ibounai ida ita totona iena mauri ia henia. Herevana ita be horoa taudia eiava “mamoe ma haida,” ita be Iehova bona iena Natuna ese idia hahedinaraia lalokauna amo namo ita abia. (Ioa. 10:16; 1 Ioa. 2:2) Memorial ai ita gaukaralaia gaudia mani ita laloa, unai gaudia rua ese Iesu ena lalokau bona iena hahediba taudia ia laloa bada dalana ia hahedinaraia. Edena dala ai?

14. Iesu be edena dala ai ia hahedinaraia iena hahediba taudia ia lalokau henia?

¹⁴ Iesu be iena horoa hahediba taudia dekenai iena lalokau ia hahedinaraia, ia ura lasi aria badana idia karaia, to unai hebou be auka lasi dalanai idia karaia. Nega ia hanaia lalonai, horoa hahediba taudia be lagani ta ta ai Memorial idia karaia, nega haida idia be dibura ruma dekenai idia noho. (Apok. 2:10) Idia ese Iesu ena hereva idia badinaia, a? Oibe!

15-16. Haida ese Lohiabada Ena Anibou be edena dala ai idia karaia, herevana nega aukadia lalonai idia noho?

¹⁵ Keristani taudia edia nega amo ema bona hari, Keristani taudia momokanidia ese Iesu ena mase idia laloatao noho. Lohiabada Ena Anibou idia karaia dalana idia badinaia, ena be nega haida hekwakwanai idia vara. Mani inai haheitalai ita laloa. Tadikaka Harold King be China ena dibura ruma dekenai sibona ia noho neganai, dala ia karaia Memorial hebouna ia hegaegaelaia totona. Hehuni dalanai ia dekenai idia noho gaudia ia gaukaralaia Memorial hebouna ia karaia. Danu ia sibona ese Memorial ena dina ia abia hidi. Bona ia laloa dinana ia ginidae neganai, dibura ruma ai ane ia abia, ia guriguri, bona Baibel tok ta ia henia.

¹⁶ Mani haheitalai ma ta ita laloa. Tanobada Tuarina Iharuana ai taihu haida be dibura kamepadia ai idia noho neganai, idia diba edia mauri idia haboioa diba to Lohiabada Ena Anibou idia karaia. Unai hebou be auka lasi dainai, idia be mai aonega ida Memorial hebou idia karaia. Idia gwau: “Ai ibounai ai gini hagegea bona emai huanai be teibolo maragina ta mai ena dabua kurokuro, ia latanai paraoa bona wain ai atoa. Kandolo ena diari sibona amo unai ai karaia, unai amo ai  karaia gaudia do idia itaia lasi. . . . Iseda guba Tamana dekenai mai emai goada ibounai ida ai gwauhamata Iena ladana helagana do ai hanamoa.” Unai be abidadama goada karana! Iesu be mai lalokau ida dala ia kehoa unai amo Memorial hebouna ita karaia diba, herevana ita be nega aukadia ai ita noho.

17. Ita ta ta sibona dekenai dahaka henanadai ita henia?

¹⁷ Memorial dinana ia kahirakahira lalonai, ita ta ta sibona dekenai inai henanadai ita henia: ‘Edena dala ai Iesu ena haheitalai, lalokau hahedinaraia karana dekenai, lau tohotohoa diba? Lau be sibona egu namo lau laloa eiava egu tadikaka taihu edia namo lau laloa bada, a? Herevana egu tadikaka taihu edia goada be mai ena hetoana, to idia lau doria idia karaia diba lasi gaudia idia karaia totona, a?’ Namona be nega ibounai Iesu ena kara ita tohotohoa bona ‘iseda tadikaka ita lalokau henia.’​—1 Pet. 3:8.

18-19. (a) Ita diba momokani dahaka do ia vara? (b) Emu lalona oi hadaia dahaka oi karaia totona?

¹⁸ Keriso ena mase laloatao totona ita karaia Memorial be do ia noho daudau lasi. Iesu be hisihisi badana ena nega lalonai “ia ginidae” neganai, ia ese ia “abia hidi taudia” be guba dekenai do ia haboudia, bona unai nega ai Memorial do ita karaia lou lasi.​—1 Kor. 11:26; Mat. 24:31.

¹⁹ Ena be Memorial do ita karaia lou lasi, ita diba momokani Iehova ena taunimanima ese unai hebou be auka lasi dalanai idia karaia. Unai ese Iesu ena manau, gari lasi, bona lalokau karana hereadaena ia hahedinaraia, bona unai do idia laloaboio lasi. Unai nega ai, Memorial dekenai idia lao taudia be idia toreisi lou taudia dekenai unai gaudia ibounai do idia herevalaia. Hari unai hebou amo namo ita abia totona, namona be ita gaukara goada Iesu ena manau, gari lasi, bona iena lalokau karana ita tohotohoa. Bema unai bamona ita karaia, ita abia dae momokani Iehova ese ita dekenai davana namona do ia henia.​—2 Pet. 1:10, 11.