1-2. Iehova ena taunimanima momo be dahaka hekwakwanai idia davaria, bona unai dainai dahaka do idia laloa?

MANI inai haheitalai toi ita laloa: Tadikaka matamata ta be gorere badana ta ia davaria. Bona tadikaka ma ta ena mauri lagani 50 bamona be ena moni gaukara ia haboioa, ena be ia hekwarahi moni gaukara ma ta ia tahua, to ta ia davaria lasi. Bona taihu burukana ta be ena goada ia ore ia lao dainai, Iehova ena hesiai gaukara ia karaia momo lasi.

² Bema ita herevalaia hekwakwanai ta be oi dekenai ia vara, reana do oi laloa oi be anina lasi. Unai hekwakwanai ese emu moale karana ia hadikaia diba, sibona do oi laloa maragi, bona emu hetura karana ma hida ida ia hadikaia diba.

3. Satani bona ia gunalaia taudia ese taunimanima edia mauri be edena bamona idia laloa?

³ Inai tanobada ena mauri dalana ese Satani ena lalohadai ia hahedinaraia. Satani ese ia karaia gaudia ese idia hahedinaraia taunimanima ia laloa bada lasi. Ia be Heva ia hamaoroa sibona ena ura ia badinaia diba, ena be Satani ia diba Dirava gwau-edeede henia karana ena davana be mase. Satani be inai tanobada ena bisinesi, politikol oreadia, bona tomadiho koikoi ia gunalaia noho. Unai dainai bisinesi taudia, politikol oreadia, bona dubu gunalaia taudia momo ese Satani ena kara idia tohotohoa bona taunimanima edia mauri idia matauraia lasi.

4. Inai atikol ai dahaka do ita herevalaia?

⁴ To, Iehova be ita ia laloa bada bona ia ura ita moale, bona hekwakwanai ita davaria neganai ita ia durua. (Sal. 136:23; Roma 12:3) Inai atikol ai Iehova ese ita ia durua daladia toi do ita herevalaia: (1) Gorere badana ta ita davaria neganai, (2) moni ena hekwakwanai ita davaria neganai, bona (3) ita buruka dainai ita laloa Iehova ita hesiai henia diba lasi negadiai. Ginigunana, dahaka dainai ita  abia dae momokani Iehova ese ita ta ta ia laloa bada, mani unai ita herevalaia.

5. Dahaka ese ia hamomokania Iehova ese taunimanima ia laloa bada?

⁵ Ena be Iehova ese tano ena kahu amo ita ia karaia, to ita ia laloa bada. (Gen. 2:7) Iehova ese ita ia laloa bada ena badina haida mani ita herevalaia. Ia ese taunimanima ia karaia iena toana hegeregerena, unai amo iena kara do idia tohotohoa. (Gen. 1:27) Bona, taunimanima ese Dirava ia havaraia gaudia ibounai, tanobada bona animal danu idia biagua diba.​—Sal. 8:4-8.

6. Dahaka badina ma ta dainai ita diba Iehova ese goevadae lasi taudia ia laloa bada?

⁶ Ena be Adamu ia kara dika, to Iehova ese taunimanima ia do laloa bada noho. Ita ia laloa bada dainai iseda kara dika ia gwauatao totona, ena lalokau Natuna, Iesu, ia henia mauri davana bamona. (1 Ioa. 4:9, 10) Unai mauri davana amo, Iehova ese Adamu ena kara dika dainai idia mase “kara maoromaoro taudia bona kara maoromaoro lasi taudia” do ia hatoreaisi lou. (Kara 24:15) Baibel ese ia hahedinaraia ena be ita gorere, moni ena hekwakwanai ita davaria, eiava ita buruka, to Dirava ese ita ta ta ia laloa bada.​—Kara 10:34, 35.

7. Dahaka badina ma haida dainai Dirava idia hesiai henia taudia idia diba Iehova be idia ia laloa bada?

⁷ Badina ma haida dainai ita diba Iehova ese ita ia laloa bada. Ia ese ita ia boiria ia kahirakahira ita lao totona, bona ia diba sivarai namona do ita abia dae eiava lasi. (Ioa. 6:44) Iehova kahirakahira ita lao neganai, ia danu be ita kahirakahira ia mai. (Iam. 4:8) Danu, Iehova be ena nega bona goada ia henia ita ia hadibaia namonamo totona, unai ese ia hahedinaraia ita ia laloa bada. Ia diba hari iseda kara be edena bamona, bona gabeai edena bamona taudia ai do ita lao. Bona ita ia lalokau henia dainai matahakani ia henia. (Aon. 3:11, 12) Unai ese ia hahedinaraia Iehova be ita ia laloa bada!

8. Edena dala ai Salamo 18:27-29 ena hereva ese ita ia durua diba ita davaria hekwakwanai ita laloa momo lasi totona?

⁸ Herevana haida ese King Davida idia laloa bada lasi, to ia diba Iehova ese ia ia lalokau henia bona durua. Davida be unai ia diba dainai iena hekwakwanai ia laloa momo lasi. (2 Sam. 16:5-7) Ita lalomanoka eiava hekwakwanai idauidau ita davaria neganai, Iehova ese ita ia durua diba ita laloa maoromaoro bona ita idia koua gaudia ita hanaia totona. (Salamo 18:27-29 duahia.) Iehova amo heduru ita abia neganai, gau ta ese ita do ia koua lasi mai moale ida ia ita hesiai henia noho totona. (Roma 8:31) Hekwakwanai idia vara neganai, Iehova ese ita ia lalokau henia bona laloa bada daladia toi mani ita herevalaia.

9. Ita gorere neganai dahaka hemami ita abia diba?

⁹ Ita gorere neganai ita lalomanoka diba, bona do ita mamia ita be anina lasi. Reana do ita hemarai bema haida idia diba iseda goada be hegeregere lasi eiava bema hanaihanai haida amo heduru ita abia. Ena be haida be iseda gorere idia diba lasi, to reana do ita hemarai badina guna ita karaia gaudia haida ita karaia diba lasi. Unai bamona lalohekwarahi negadiai, Iehova ese ita ia hagoadaia noho. Edena dala ai?

10. Aonega Herevadia 12:25 ena hereva bamona, ita gorere neganai dahaka ese ita ia durua diba?

 ¹⁰ Ita gorere neganai, “hereva namodia” ese ita idia hagoadaia diba. (Aonega Herevadia 12:25 duahia.) Baibel lalonai, Iehova ena hereva namodia momo ese ita idia hadibaia ena be ita gorere, to Iehova ese ita ia laloa bada. (Sal. 31:19; 41:3) Bema Dirava ena hereva ita duahia eiava ita duahia loulou, Iehova ese ita do ia durua iseda gorere dainai ita abia lalohadai idauidau ita haheaukalaia totona.

11. Tadikaka ta be edena dala ai Iehova ena heduru ia abia?

¹¹ Jorge ena ekspiriens mani ita laloa. Jorge be mero matamata neganai, gorere ta ia abia bona unai gorere ia bada momokani dainai, ia mamia ia be anina lasi. Jorge ia gwau: “Lau davaria gorere dainai taunimanima ese lau idia raraia neganai lau hemarai. Egu gorere ia bada ia lao neganai, egu mauri do ia idau dalana lau laloa. Lau lalohisihisi bada, bona Iehova lau noia lau ia durua totona.” Iehova ese edena dala ai ia durua? Jorge ia gwau: “Nega haida lau duahia gaudia lau laloa bada lasi dainai, lau idia hagoadaia Salamo bukana ai Iehova ese ena hesiai taudia ia naria daladia ia herevalaia siri kwadogidia sibona lau duahia totona. Dina ta ta ai unai siri lau duahidia loulou, bona unai ese lau ia hagoadaia bada. Gabeai, taunimanima idia itaia lau kiri momo. Bona idia gwau egu kara ese idia ia hagoadaia bada. Lau diba Iehova ese egu guriguri ia haerelaidia! Ia ese lau ia durua dainai lalohadai maorona lau abia. Bona, Baibel ai Iehova ese lau ia hagoadaia daladia lau laloa bada, ena be lau gorere.”

12. Bema oi be gorere ta oi haheaukalaia noho, edena dala ai Iehova ena heduru oi abia diba?

¹² Bema oi be gorere ta oi haheaukalaia noho, namona be oi abia dae Iehova be oi  abia hemami ia diba. Heduru totona ia oi noia unai amo lalohadai maorona oi abia diba. Bona Iehova ese Baibel ai oi totona ia atoa hereva namodia oi tahua. Danu Iehova ese ena hesiai taudia ia laloa bada karana idia herevalaia siridia oi duahia. Bema unai bamona oi karaia, do oi itaia Iehova be mai abidadama ida ia idia hesiai henia taudia ia hanamoa.​—Sal. 84:11.

13. Ena moni gaukara ia haboioa ruma bese kwarana ta be dahaka hemami ia abia diba?

¹³ Ruma bese kwaradia ibounai idia ura edia famili durua gaudia idia henia. To, tadikaka ta be ena gaukara ia haboioa diba, ena be kerere ta ia karaia lasi. Danu, ia hekwarahi gaukara ma ta ia tahua totona, to ta ia davaria lasi. Unai bamona hekwakwanai ia davaria dainai, reana do ia mamia ia be anina lasi. Edena dala ai Iehova ena gwauhamata namodia laloa karana ese unai tadikaka ia durua diba?

14. Dahaka badina momo dainai Iehova ese ena gwauhamata ia badinaia?

¹⁴ Iehova be hanaihanai ena gwauhamata ia badinaia. (Ios. 21:45; 23:14) Badina momo dainai unai bamona ia karaia. Ginigunana, ia ura lasi iena ladana, eiava ena kara namodia idia hadikaia. Iehova ia gwauhamata iena abidadama hesiai taudia do ia naria, bona ia ura unai gwauhamata ia hagugurua. (Sal. 31:1-3) Danu Iehova ia diba, bema iena ruma bese lalonai idia noho taudia ia naria lasi, do ita lalohisihisi. Ia gwauhamata iseda dabu gaudia do ia henia, bona ita do ia durua mai abidadama ida ia ita hesiai henia totona, gau ta ese ia do ia koua lasi unai gwauhamata ia hagugurua totona!​—Mat. 6:30-33; 24:45.

15. (a) Keristani taudia ginigunadia be dahaka hekwakwanai idia davaria? (b) Salamo 37:18, 19 ai dahaka hagoadaia hereva ia noho?

 ¹⁵ Iehova ese ena gwauhamata ia badinaia daladia ita laloa neganai, moni ena hekwakwanai idauidau ita hanaia diba. Keristani taudia ginigunadia edia haheitalai mani ita laloa. Ierusalema kongrigeisen ai dagedage badana ta ia vara neganai, “hahediba taudia ibounai idia heau . . . to aposetolo taudia sibona idia noho.” (Kara 8:1) Unai negai moni ena hekwakwanai be bada! Keristani taudia momo be edia ruma bona bisinesi idia haboioa. To, Iehova ese idia ia rakatania lasi; bona idia lalohisihisi lasi. (Kara 8:4; Heb. 13:5, 6; Iam. 1:2, 3) Iehova ese unai abidadama Keristani taudia ia durua, bona ita do ia durua danu.​—Salamo 37:18, 19 duahia.

16. Dahaka dainai do ita laloa Iehova ese iseda hesiai gaukara ia laloa bada lasi?

¹⁶ Ita buruka ita lao neganai, reana do ita mamia Iehova ena hesiai gaukara ita karaia momo lasi. King Davida ia buruka neganai reana unai bamona hemami ia abia danu. (Sal. 71:9) Edena dala ai Iehova ese ita ia durua diba?

17. Taihu ta ladana Jheri ena ekspiriens amo dahaka ita dibaia?

¹⁷ Taihu ta ladana Jheri, ena ekspiriens mani ita laloa. Ia idia boiria Kingdom Hall meintenens ena hebou ta dekenai, to ia ura lasi ia lao. Jheri ia gwau: “Lau be buruka, lau be vabu ta, bona lau dekenai diba ta ia noho lasi Iehova ese ia henia gaukara ta lau karaia totona.” Unai treinini dekenai ia do lao lasi neganai, hanuaboi ai guriguri amo Iehova dekenai ena lalohekwarahi ibounai ia gwauraia. Bena dabai Kingdom Hall dekenai ia ginidae neganai, hebou lalonai do ia noho dainai  ia laloa momo. Hebou lalonai treinini ia henia tauna ese idia ia hadibaia, bema mai ura bada ida unai gaukara idia karaia Iehova ese idia ia hadibaia diba. Jheri ia gwau: “Lau laloa, ‘lau dekenai unai diba ia noho!’ Lau tai matamaia badina lau laloparara Iehova be egu guriguri ia haerelaia. Iehova be lau ia hadibaia noho, iena gaukara lau durua diba, bona ia be mai ura ida lau dekenai treinini do ia henia!” Jheri ma ia gwau: “Unai dina lau laloatao, treinini lalonai lau raka vareai neganai lau gari, bona lau lalomanoka. To hebou murinai lalogoada lau abia, bona lau mamia ta ese lau ia laloa bada!”

18. Edena dala ai Baibel ese ia hahedinaraia ena be ita buruka, to Iehova ese iseda tomadiho ia abia dae?

¹⁸ Ena be ita buruka ita lao, to ita diba momokani Iehova be gaukara ma haida do ia henia ita karaia totona. (Sal. 92:12-15) Iesu ese ita ia hadibaia, herevana iseda diba bona goada be mai ena hetoana, to Iehova ese ena hesiai gaukara totona ita karaia gaudia ia laloa bada. (Luka 21:2-4) Oi karaia diba gaudia sibona oi karaia. Hegeregere, Iehova ena sivarai namona oi herevalaia, emu tadikaka totona oi guriguri, bona haida oi hagoadaia mai abidadama ida idia gini goada totona. Iehova be oi ia boiria ia ida oi gaukara hebou totona, gaukara oi karaia namonamo dainai lasi, to mai ura ida ia oi badinaia dainai.​—1 Kor. 3:5-9.

19. Edena dala ai Roma 8:38, 39 ese ita ia hagoadaia?

¹⁹ Ita moale bada badina ena hesiai taudia ia laloa bada Diravana, Iehova ita tomadiho henia! Ita ia karaia ena ura do ita hagugurua totona, bona mai momokani ida ia ita tomadiho henia karana ese iseda mauri ia hanamoa. (Apok. 4:11) Ena be inai tanobada taudia ese ita be anina lasi taudia bamona idia laloa, to Iehova ese ita be unai bamona ia laloa lasi. (Heb. 11:16, 38) Bema gorere, moni ena hekwakwanai, eiava ita buruka dainai ita lalohekwarahi, namona be ita laloatao gau ta ese iseda guba Tamana ena lalokau amo ita ia hapararaia diba lasi.​—⁠Roma 8:38, 39 duahia.