1-2. Aneru be guria gabuna idia lao hahine dekenai dahaka ia gwau, bona Iesu ese idia dekenai dahaka ia gwau?

NISAN 16, 33 C.E. daba kahanai, Dirava idia gari henia hahine haida be guria gabuna dekenai idia lao, Lohiabada Iesu Keriso ena mase tauanina idia itaia totona, ia be dina ta mai kahana unuseniai idia atoa. Idia ura Iesu ena tauanina dekenai bonana namo muramura bona dehoro idia atoa dainai guria gabuna dekenai idia lao, to idia hoa badina Iesu ena tauanina ia noho lasi! Aneru ta ese hahediba taudia ia hamaoroa Iesu be mase amo ia toreisi lou, bona ia gwau: “Ia be do ia lao guna Galilea dekenai, unuseniai ia do umui itaia.”​—Mat. 28:1-7; Luka 23:56; 24:10.

² Unai hahine be guria gabuna idia rakatania murinai, Iesu ese idia ia hedavari henia bona ia gwau: “Umui lao egu tadikaka umui hadibaia, unai amo Galilea dekenai do idia lao, bona unuseniai lau do idia itaia.” (Mat. 28:10) Toana be Iesu ia ura ena hahediba taudia dekenai mai anina bada herevana ta do ia gwauraia, badina unai be ia toreisi lou murinai ia karaia gauna ginigunana!

3-4. Dahaka dainai ita gwau diba Mataio 28:16-20 ena hahegani herevana be aposetolo taudia totona sibona lasi? (Rau 1 ena laulau itaia.)

³ Mataio 28:16-20 duahia. Iesu ia karaia hebouna ai, ia gwau aposetolo edia negai iena hahediba taudia be mai anina bada gaukarana ta do idia karaia​—unai gaukara tamona be hari inai negai ita karaia noho. Iesu ia gwau: “Unai dainai umui lao, bese ibounai taudia be hahediba taudia ai umui halaoa, . . . bona idia umui hadibaia, umui lau hamaoroa gaudia ibounai be do idia badinaia.”

 ⁴ Iesu ia ura iena murinai idia raka taudia ibounai be do idia haroro. Unai hahegani be iena aposetolo taudia 11 sibona dekenai ia henia lasi. Edena bamona unai ita diba? Galilea ororona ai hahediba taudia halaoa gaukarana ena hahegani ia henia neganai, aposetolo taudia sibona idia noho, a? Laloatao, aneru ese hahine haida ia hamaorodia: “Galilea dekenai, . . . ia do umui itaia.” Reana abidadama hahine haida danu be unai hebou lalonai idia noho. To unai sibona lasi.

5. Korinto Ginigunana 15:6 ena hereva amo dahaka ita dibaia?

⁵ Aposetolo Paulo ese ia hahedinaraia Iesu be “tadikaka 500 mai kahana dekenai nega tamona ia hedinarai.” (1 Kor. 15:6) Edeseniai? Badina namodia haida dainai ita gwau diba, Paulo be Mataio karoa 28 ai Iesu ese Galilea ai ia karaia hebouna ia laloa. Badina haida be dahaka? Ginigunana be, Iesu ena hahediba taudia momo be Galilea taudia. Unai dainai Ierusalema ai ia noho rumana ta ai idia hebou lasi, to Galilea ororona ai badina unai be gabu namona taunimanima momo ida do ia hebou totona. Iharuana be, Iesu ia toreisi lou murinai ia be ena aposetolo taudia 11 ida Ierusalema ena ruma ta dekenai idia hedavari vadaeni. Bema Iesu ia ura ena aposetolo taudia sibona ia hadibaia, haroro bona hahediba taudia halaoa gaukarana idia karaia, reana Ierusalema ai idia do ia hamaoroa, to unai bamona ia karaia lasi; Ia ese aposetolo taudia, hahine haida bona ma haida ia hadibaia Galilea ai ia ida do idia hedavari totona.​—Luka 24:33, 36.

6. Edena dala ai Mataio 28:20 ese ia hahedinaraia hahediba taudia halaoa gaukarana be hari inai negai ita karaia, bona unai hahegani be edena dala ai idia badinaia noho?

⁶ Badina ihatoina be, Iesu ena hahegani be aposetolo taudia edia negai idia noho Keristani taudia sibona dekenai ia henia lasi. Edena dala ai unai ita diba? Iesu ena hereva ginigabena ena hahediba taudia dekenai be inai bamona ia gwauraia: “Lau be dina iboudiai umui ida do lau noho ela bona inai nega oromana ena dokona.” (Mat. 28:20) Iesu ena hereva bamona, hari inai negai hahediba taudia halaoa gaukarana be ia bada ia lao noho. Mani oi laloa. Lagani ta ta ai, taunimanima 300,000 bamona be bapatiso idia abia, Iehova ena Witnes taudia ai idia lao bona Iesu Keriso ena hahediba taudia ai idia lao danu!

7. Hari dahaka do ita herevalaia, bona dahaka dainai?

⁷ Baibel idia stadilaia taudia momo be idia goada idia lao bona bapatiso idia abia. To, ita ida Baibel idia stadilaia taudia momo be idia gari dainai idia ura lasi hahediba taudia ai idia lao. Edia stadi karana idia moalelaia to idia gaukara goada lasi bapatiso idia abia totona. Bema oi be Baibel stadi ta oi karaia noho, ai diba oi ura emu stiuden oi durua ia dibaia gaudia ia badinaia bona Keriso ena hahediba tauna ta ai do ia lao. Inai atikol ese stiuden ita durua Iehova ia lalokau henia bona ia goada ia lao dalana do ia herevalaia. Dahaka dainai unai ita herevalaia be namo? Badina nega ta, reana abia hidi do ita karaia iseda Baibel stiuden edia stadi ita karaia noho eiava ita hadokoa.

8. Dahaka dainai nega haida ia auka iseda stiuden ese Iehova idia lalokau henia totona?

⁸ Iehova ia ura taunimanima ese lalokau dainai ia idia hesiai henia. Unai dainai namona be iseda stiuden ita durudia bena idia laloparara, Iehova ese idia ta ta ia laloa bada bona ia lalokau henidia. Ita ura idia ita hadibaia Iehova be “ogogami taudia ia naria noho, bona vabu taudia danu ia gimaia noho.” (Sal. 68:5) Emu stiuden be Dirava ese idia ia lalokau henia karana idia  laloa bada neganai, ia do idia lalokau henia bada. Stiuden ma haida dekenai ia auka Iehova be Tama lalokauna ta bamona idia laloa totona, badina edia tama korikoridia ese idia lalokau henidia lasi bona laloa bada lasi. (2 Tim. 3:1, 3) Stadi oi karaia neganai, namona be Iehova ena kara namodia oi herevalaia namonamo. Namona be emu stiuden oi durua idia laloparara, iseda lalokau Diravana ia ura idia ese mauri hanaihanai idia abia, bona ia noho hegaegae idia do ia durua unai hahenamo idia abia totona. Dahaka gau ma haida do ita karaia?

9-10. Baibel stadi ita karaia neganai, edena pablikeisen ita gaukaralaia be namo, bona dahaka dainai?

⁹ Inai buka rua, “Baibel be Dahaka Ia Hadibaia?” bona “Dirava Ena Lalokau Lalonai Do Umui Noho” oi gaukaralaia. * Unai pablikeisen rua ese iseda stiuden do ia durua Iehova idia lalokau henia totona. Hegeregere Baibel Hadibaia bukana ena karoa 1 ese inai henanadai ia haerelaia: Dirava be ita ia laloa bona ia hebogahisi henia lasi, a?, Dirava ese  kara gageva be edena bamona ia laloa?, Iehova kahirakahira oi lao diba, a? To, Dirava Ena Lalokau Lalonai Do Umui Noho bukana be edena bamona? Unai pablikeisen ese stiuden do ia durua, Baibel ena hakaua herevadia ia badinaia karana ese ena mauri dalana do ia hanamoa, bona Iehova kahirakahira do ia lao dalana ia dibaia totona. Herevana ma haida ida unai pablikeisen rua oi stadilaia vadaeni, to namona be stadi ta ta totona oi hegaegae namonamo, bona stiuden ese heduru ia abia diba daladia oi laloa.

¹⁰ To, bema stiuden ese ia ura henia topik ia herevalaia pablikeisen be iseda Hadibaia Gaukara Ena Tulu Idauidau ai ia noho lasi be edena bamona? Reana ia do oi hagoadaia, sibona ese unai pablikeisen ia duahia totona, unai amo ena stadi be ita herevalaia vadaeni Baibel stadi bukana ta amo do umui karaia noho.

11. Edena negai guriguri amo stadi ita hamatamaia bona koua diba, bona edena dala ai stiuden ita durua unai ia lalopararalaia totona?

¹¹ Stadi be guriguri amo umui hamatamaia. Namona be wiki ginigunadia lalonai stadi ta oi karaia neganai guriguri amo stadi umui hamatamaia bona koua. Namona be stiuden ita durua bena ia diba, Baibel ita lalopararalaia totona, Dirava ena lauma helaga ena heduru ita abia be namo. Baibel idia hadibaia taudia haida ese guriguri amo Baibel stadi hamatamaia ena badina idia herevalaia totona, Iamesi 1:5 idia duahia, ia gwau: “Bema umui ta ena aonega be hegeregere lasi, namona be Dirava dekenai ia noinoi noho.” Stadi naria tauna ese stiuden do ia nanadaia, “Edena dala ai Dirava amo aonega ita noia diba?” Stiuden do ia diba Dirava ita guriguri henia be namo.

12. Edena dala ai Salamo 139:2-4 amo stiuden ta oi durua ena guriguri dalana ia hanamoa totona?

¹² Emu stiuden dekenai guriguri dalana oi hadibaia. Ia oi hadibaia Iehova ia ura mai kudouna ibounai ida ia gwauraia guriguri ia kamonai. Danu, oi hadibaia sibona iseda guriguri ita gwauraia neganai Iehova dekenai iseda hemami korikori​—ma haida dekenai ita ura lasi gwauraia gaudia ita herevalaia diba. Laloatao, Iehova be ita laloa gaudia ibounai ia diba. (Salamo 139:2-4 duahia.) Danu, iseda stiuden ita hagoadaia diba Dirava ena heduru ia noia unai amo lalohadai dikadia bona ia manadalaia kara dikadia ia dadaraia totona. Hegeregere, reana nega daudau lalonai Baibel ia stadilaia stiuden ta be tomadiho koikoi amo ia matamaia holidei ta ia ura henia bada. Ia diba unai be kerere, to unai holidei lalonai idia karaia gaudia haida ia moalelaia. Namona be oi hadibaia guriguri amo Iehova dekenai ena hemami korikori ia gwauraia hedinarai, bona Dirava ia ura henia gaudia sibona do ia ura henia.​—Sal. 97:10.

13. (a) Dahaka dainai iseda stiuden ita invait hebou dekenai idia mai totona? (b) Edena dala ai stiuden ta ita durua, Kingdom Hall dekenai ia gari eiava hemarai lasi totona?

¹³ Emu Baibel stiuden oi invait hebou ia mai totona. Emu stiuden be Keristani heboudia dekenai ia kamonai gaudia ese ia do ia hagoadaia bona Iehova ia hesiai henia diba. Vidio ladana, Kingdom Hall ai Dahaka Idia Karaia? oi hahedinaraia bona ia oi invait hebou dekenai umui lao totona. Bema dala ia noho ia oi durua hebou dekenai umui lao totona. Dala namona ta be pablisa idauidau oi boiria emui stadi lalonai idia helai totona. Unai dala amo emu stiuden be kongrigeisen taudia ma haida ia dibaia, bona iseda hebou dekenai ia mai neganai do ia gari eiava hemarai lasi.

14. Dahaka ese stiuden ia durua diba ia goada totona?

¹⁴ Iseda tahua gauna be ita ura iseda Baibel stiuden ita durua ia goada totona. (Efe.  4:13) Bema ta be ia ura Baibel ia stadilaia, reana ia ura stadi amo heduru ia abia dalana ia dibaia. Iena lalokau Iehova dekenai ia goada neganai, kongrigeisen taudia bona ma haida ia durua daladia do ia laloa. (Mat. 22:37-39) Namona be nega maorona ai, ia dekenai kontribiusen dalanai Basileia ena gaukara ita durua dalana oi herevalaia.

15. Edena dala ai Baibel stiuden ta ita durua diba hekwakwanai ia hamaoromaoroa totona?

¹⁵ Emu Baibel stiuden dekenai hekwakwanai do ia hanaia daladia oi hadibaia. Hegeregere, emu stiuden, bapatiso lasi pablisa ese oi ia hamaoroa, kongrigeisen ai ta ese ena lalona ia hahisia neganai dahaka oi karaia diba? Namo lasi oi hamaoroa daika ia maoro bona daika ia kerere, to namona be Baibel ena hakaua herevadia ia badinaia dalana oi hadibaia. Unai tadikaka ena dika ia gwauatao diba, eiava bema unai hekwakwanai ia laloaboio be auka, mai manau bona lalokau ida unai tadikaka ia hereva henia unai amo maino idia karaia. (Mataio 18:15 hahegeregerea.) Emu stiuden oi durua do ia gwauraia herevadia ia laloa totona. Unai hekwakwanai ia hamaoromaoroa totona, ia dekenai JW Library^® app, Research Guide for Jehovah’s Witnesses, bona jw.org^® amo heduru ia abia dalana oi hadibaia. Ia do bapatiso lasi lalonai treinini momo ia abia neganai, bapatiso murinai kongrigeisen lalonai ma haida ida do ia gaukara hebou namonamo diba.

16. Pablisa ma haida ese emu stadi ai oi idia bamoa karana ena namo haida be dahaka?

¹⁶ Kongrigeisen amo haida bona emu kongrigeisen ia vadivadi sekit tauna oi invait, emu stadi ai oi idia bamoa totona. Dahaka dainai? Badina ma ta be, pablisa ma haida ese dala ma haida ai emu stiuden idia durua diba. Hegeregere, stiuden ta be nega momo ia ura kuku ania karana ia hadokoa to ia auka. Reana guna kuku ania karana ia dadaraia Witnes ta oi invait, emu stadi ai oi ia bamoa totona. Emu Witnes turana ese dala namodia haida amo stiuden do ia durua diba. Bema oi laloa oi hegeregere lasi ekspiriens tadikaka ia noho neganai stadi oi karaia, namona be unai tadikaka oi noia stadi ia naria totona. Dala idauidau ai haida edia ekspiriens ese emu stiuden ia durua diba. Laloatao, iseda tahua gauna be ita ura iseda stiuden ita durua ia goada ia lao totona.

17-18. Stadi oi do hadokoa lasi neganai, dahaka gau haida oi laloa guna be namo?

¹⁷ Bema emu Baibel stiuden be ena mauri ai senisi haida ia karaia lasi, reana sibona do oi nanadaia, ‘Stadi lau hadokoa be namo, a?’ Abia hidi oi do karaia lasi neganai, namona be stiuden ena laloparara dalana oi laloa. Stiuden haida be nega daudau lalonai idia goada idia lao, to ma haida be lasi. Unai dainai sibona oi nanadaia, ‘Egu stiuden be ena laloparara dalana hegeregerena ia goada ia lao noho, a?’ ‘Ia be ia dibaia gaudia ia “badinaia” noho, a?’ (Mat. 28:20) Reana stiuden be nega daudau murinai  do ia goada ia lao, to ena mauri ai senisi ia karaia be namo.

¹⁸ To, dahaka ita karaia diba bema stiuden ta be nega daudau lalonai ita stadi henia bona ena mauri ai senisi haida ia karaia lasi? Mani inai oi laloa: Emu stiuden be Baibel Hadibaia bukana bona reana Dirava Ena Lalokau Lalonai Do Umui Noho bukana ia stadilaia ore vadaeni, to ia be kongrigeisen hebouna eiava Memorial hebouna ta dekenai ia do lao lasi! Bona nega momo anina lasi gaudia dainai stadi umui karaia lasi. Unai ia vara neganai namona be mai momokani ida stiuden ida oi herevahereva. *

19. Baibel stadi ia laloa bada lasi tauna dekenai dahaka oi gwau diba, bona dahaka oi laloa danu?

¹⁹ Reana inai bamona henanadai oi henia, ‘Iehova ena Witnes tauna ai oi lao totona, dahaka gaudia ese oi idia koua?’ Reana stiuden do ia gwau, ‘Baibel stadilaia karana lau moalelaia, to Iehova ena Witnes ta ai do lau lao lasi!’ Bema iena kara be unai bamona ena be nega daudau lalonai umui stadi, oi laloa umui stadi noho be namo, a? Reana unai negai, emu stiuden be ia ia koua gauna do ia herevalaia matamaia. Hegeregere, reana do ia mamia ia hegeregere lasi ruma ta ta ai ia haroro totona. Hari, iena hemami oi lalopararalaia dainai heduru maorona oi henia diba.

20. Kara 13:48 ese edena dala ai ita ia durua, stiuden ena stadi ita karaia noho eiava ita hadokoa totona?

²⁰ Oibe, stiuden haida be Esekiela ena negai idia noho Israela taudia bamona. Mani Iehova ese Esekiela dekenai idia ia herevalaia dalana oi laloa, ia gwau: “Idia dekenai oi be lalokau ane ia abia noho tauna sibona bamona, iena gadona be namo herea, bona gita be ia gadaralaia namonamo. Badina be oiemu hereva be idia kamonai, to kara ta do idia karaia lasi.” (Ese. 33:32) Reana do ia auka ta ita hamaoroa stadi do ita hadokoa totona. To, “nega be ia kwadogi.” (1 Kor. 7:29) Namo lasi nega bada ita haorea ia goada lasi stiuden ena stadi ita karaia noho, to namona be “mauri hanaihanai idia ura kudou-maoro taudia” ita tahua.​—Kara 13:48 duahia.

21. Lagani 2020 ena siri badana be dahaka, bona dahaka dainai ia be mai ena namo?

²¹ Lagani 2020 ai, iseda lagani ena siri ese ita do ia durua, hahediba taudia halaoa gaukarana ita hanamoa totona. Unai siri ai, Iesu ese Galilea ororona ai ia gwauraia mai anina bada herevana ia noho: “Unai dainai umui lao, . . . hahediba taudia ai umui halaoa, bona . . . idia do umui bapatisoa.”​—Mat. 28:19.