1. Lagani 1935 ena hebouhebou dainai mero matamata ta be dahaka ia karaia?

LAGANI 1926 ai, mero matamata ta ena mauri lagani be 18 neganai ia bapatiso. Iena tama sina be Bible Student * taudia. Unai tau bona hahine edia natudia memero be toi bona kekeni be rua, bona idia hadibadia Dirava do idia tomadiho henia bona Iesu Keriso do idia tohotohoa. Guna Bible Student taudia ma haida hegeregerena, unai mero ia laloa ia be guba do ia lao. Unai dainai, lagani ta ta Lohiabada Ena Anibou ai paraoa bona wain ia abia. To, tok ta ladana “Hutuma Bada Herea Taudia” ia kamonai neganai, iena helaro ia haidaua. Lagani 1935 ai, J.  F.  Rutherford ese Washington, D.C., U.S.A ai ena hebouhebou ta dekenai unai tok ia henia. Unai hebouhebou ai dahaka idia hahedinaraia?

2. Tadikaka Rutherford ena tok ai dahaka diba matamata ia hahedinaraia?

² Tadikaka Rutherford ena tok ai, Apokalupo 7:9 ese ia herevalaia “hutuma bada” taudia ia gwauraia hedinarai. Unai nega ai, Bible Student taudia idia laloa “hutuma bada” taudia be guba dekenai do idia lao orea iharuana, to idia be Dirava idia badinaia namonamo lasi. Tadikaka Rutherford ese Baibel amo ia hahedinaraia hutuma bada be guba do idia lao lasi, to idia be Keriso ena mamoe ma haida. * Idia be “hisihisi badana” amo do idia roho mauri  bona tanobada ai do idia noho hanaihanai taudia. (Apok. 7:14) Iesu ia gwauhamata: “Lau be mai egu mamoe ma haida, idia be inai magu lalonai lasi, idia danu do lau mailaia bona idia ese egu gadona do idia kamonai, bona idia be mamoe serina tamona ai do idia lao, bona mamoe naria tauna be tamona.” (Ioa. 10:16) Unai mamoe ma haida be mai abidadama ida Iehova idia badinaia Witnes taudia, bona edia helaro be tanobada Paradaisona ai do idia noho ela bona hanaihanai. (Mat. 25:31-33, 46) Mani ita itaia edena dala ai unai diba matamata ese Iehova ena taunimanima momo bona unai tadikaka matamatana, edia mauri ia haidaua.​—Sal. 97:11; Aon. 4:18.

3-4. Lagani 1935 ena hebouhebou ai, momo ese dahaka idia lalopararalaia bona dahaka dainai?

³ Unai hebouhebou ai tadikaka ese helai taudia ia hamaoroa: “Emui helaro be tanobada dekenai mauri hanaihanai do umui abia taudia e, mani umui gini toreisi!” Vadaeni hoa gauna ta ia vara. Unai hebou ai ia noho tadikaka ta, ia gwau, helai taudia ibounai 20,000 amo kahana ta idia gini. Bena Tadikaka Rutherford ia gwau: “Itaia! Hutuma bada herea!” Ibounai be mai moale ida idia boiboi badabada. Idia gini taudia idia laloparara Iehova ese idia ia abia hidi lasi guba idia lao totona, bona lauma helaga ese idia ia horodia lasi. Hebouhebou ena dina iharuana ai, Witnes taudia matamatadia 840 be bapatiso idia abia. Idia momo be mamoe ma haida taudia.

⁴ Unai tok murinai, matamanai ita herevalaia mero bona taunimanima tausen ma haida be Lohiabada Ena Anibou ai paraoa bona wain abia karana idia hadokoa. Tadikaka ta be mai manau ida ia gwau: “Lagani 1935 ena Memorial be egu nega ginigabena paraoa bona wain lau abia. Lau laloparara Iehova ese ena lauma helaga amo lau dekenai guba maurina ena helaro ia henia lasi, to egu helaro be tanobada ai do lau noho bona paradaiso ai do ai halaoa.” (Roma 8:16, 17; 2 Kor. 1:21, 22) Unai nega amo hutuma bada taudia edia namba ia daekau bona orena taudia * ida idia gaukara hebou.

5. Wain bona paraoa abia karana idia hadokoa taudia be Iehova ese edena bamona ia lalodia?

⁵ Lagani 1935 murinai, wain bona paraoa abia karana idia hadokoa taudia be Iehova ese edena bamona ia lalodia? Bema bapatiso Witnes ta be Memorial ai wain bona paraoa ia abia, to gabeai ia laloparara ia be lauma helaga ese ia horoa lasi be edena bamona? (1 Kor. 11:28) Haida be wain bona paraoa idia abia badina edia helaro idia lalopararalaia lasi. To, bema mai momokani ida idia gwau idia kerere, wain bona paraoa abia karana idia hadokoa, bona mai abidadama ida Dirava idia hesiai henia noho, Iehova ese mamoe ma haida bamona idia do ia abia dae. Ena be wain bona paraoa idia abia lasi, to Memorial idia lao noho badina Iehova bona Iesu ese idia totona idia karaia karana idia laloa bada.

6. Iesu ese aneru ia oda henidia dahaka idia karaia totona?

⁶ Hisihisi badana be kahirakahira do ia vara dainai, namona be Apokalupo  karoa 7 ese horoa Keristani taudia bona mamoe ma haida totona ia gwauraia herevadia ma haida ita itaia. Iesu ese aneru ia oda henidia tanobada do idia hadikaia lai foa do idia dogoatao auka. Unai lai do idia rakatania lasi ela bona tanobada ai horoa Keristani taudia ibounai ese edia maka idia abia, eiava Iehova ese ia lalonamo henidia. (Apok. 7:1-4) Edia abidadama goadana dainai, Keriso ena horoa tadikaka be ia ida guba ai king bona lohia gaukara do idia karaia. (Apok. 20:6) Dirava ena guba famili ibounai be mai moale ida horoa taudia 144,000 ese edia guba ahuna do idia abia negana idia naria noho.

7. Apokalupo 7:9, 10 ai, Ioane be daidia ia itaia bona dahaka idia karaia? (Rau 1 ena laulau itaia.)

⁷ Iesu be 144,000 king bona hahelaga taudia ia herevalaia murinai, Ioane ese hoa gauna ta ia itaia, Aramagedono amo idia roho mauri “hutuma bada” taudia. Idia be 144,000 taudia bamona lasi, unai orea be hutuma momokani bona ta ese ia duahia diba lasi. (Apokalupo 7:9, 10 duahia.) Idia be “dabua kurokuro idia hahedokilaia,” unai ese ia hahedinaraia idia be Satani ena tanobada ‘amo idia daudau,’ bona Dirava bona Keriso idia badinaia. (Iam. 1:27) Iehova bona Iesu, Dirava ena Mamoe Natuna ese idia totona hahemauri dalana idia kehoa dainai, mai moale ida idia boiboi badabada. Danu, edia imana ai pama au rigidia idia dogoatao, unai ese ia hahedinaraia mai moale ida idia abia dae, Iesu be King bona Iehova ese ia horoa.​—Ioane 12:12, 13 hahegeregerea.

8. Apokalupo 7:11, 12 ese Iehova ena guba famili be edena bamoa ia herevalaia?

⁸ Apokalupo 7:11, 12 duahia. Guba ai idia noho taudia edia hemami be edena bamona? Ioane ia itaia hutuma bada taudia idia hedinarai neganai, Dirava ena guba famili, unai be Iesu, aneru bona idia toreisi lou vadaeni horoa taudia, ibounai be mai moale ida Iehova idia hanamoa. Iehova ena guba famili be unai matahanai do ia guguru, bona hutuma bada taudia be hisihisi badana amo idia roho mauri idia itaia neganai, do idia moale bada herea.

9. Apokalupo 7:13-15 ena hereva bamona, hutuma bada be dahaka idia karaia noho?

⁹ Apokalupo 7:13-15 duahia. Ioane ia gwau hutuma bada taudia be “Mamoe Natuna ena rarana lalonai edia dabua idia huria bona idia hakurokuroa vadaeni.” Anina be edia lalomamina ia goeva bona Iehova vairanai idia be kara maoromaoro taudia. (Isa. 1:18) Idia be idia gwauhamata bona idia bapatiso Keristani taudia, Iesu ena boubouna gauna idia abidadama henia bona Iehova idia tura henia. (Ioa. 3:36; 1 Pet. 3:21) Unai dainai, idia hegeregere Dirava ena terona vairanai idia gini bona tanobada ai “dina bona hanuaboi iena hesiai gaukara helagana idia karaia.” Hari danu, sibona edia ura idia dadaraia bona Dirava ena Basileia idia tahua guna. Idia be mai kudouna ibounai ida Basileia ena sivarai namona idia harorolaia, bona hahediba taudia halaoa gaukara ena kahana badana idia karaia noho.​—Mat. 6:33; 24:14; 28:19, 20.

10. Hutuma bada be dahaka idia diba, bona edena gwauhamata do ia guguru?

¹⁰ Hisihisi badana amo idia roho mauri hutuma bada idia diba Dirava ese idia do ia naria, badina Baibel ia gwau, “terona latanai ia helai Tauna ese iena palai amo idia do ia koua.” Mamoe ma haida ese idia naria noho gwauhamata be do ia guguru: “[Dirava] ese mata ranu ibounai be edia matana amo do ia dahua oho, bona  mase be do ia ore, bona lalohisihisi, taitai, bona hisihisi danu be do idia ore.”​—Apok. 21:3, 4.

11-12. (a) Apokalupo 7:16, 17 ena hereva bamona, hutuma bada be dahaka hahenamo do idia abia? (b) Memorial ai mamoe ma haida be dahaka do idia karaia bona dahaka dainai?

¹¹ Apokalupo 7:16, 17 duahia. Hari, Iehova ena taunimanima haida be moni lasi dainai idia hitolo, eiava tuari bona dagedage amo hisihisi idia davaria. Haida be edia abidadama dainai dibura ruma ai idia atoa. To, hutuma bada idia moale badina idia diba Dirava ese inai nega oromana dikana ia haorea murinai, hanaihanai Iehova amo hakaua hereva bona aniani momo do idia abia. Iehova ese Satani ena tanobada ia hadikaia bona iena badu be “siahu gauna” bamona bese idauidau latanai ia bubua diho neganai, Dirava ese hutuma bada do ia gimaia. Hisihisi badana murinai, Iesu ese idia roho mauri taudia be “mauri [hanaihanai] ranuna” dekenai do ia hakaudia lao. Mani oi laloa: Hutuma bada be helaro hereadaena idia abia. Tanobada ai idia noho taudia bilioni momo amo, idia be do idia mase diba lasi!​—Ioa. 11:26.

¹² Mamoe ma haida be mai edia helaro namona, unai dainai Iehova bona Iesu idia tanikiu henia bada! Ena be Iehova ese ia abidia hidi lasi guba idia lao totona, to horoa taudia ia lalokau henia hegeregerena idia ia lalokau henia. Unai orea rua taudia be Dirava bona Keriso idia tanikiu henia bada. Unai idia karaia dalana ta be Memorial idia lao.

13-14. Dahaka dainai ibounai ese Memorial idia lao be namo?

¹³ Vanegai laganidia ai, Memorial idia lao taudia tausen tausen amo ta ta sibona be paraoa bona wain idia abia. Kongrigeisen momo ai ibounai be paraoa bona wain idia abia lasi. Idia momo be tanobada helarona idia abia taudia. Vadaeni, dahaka dainai Lohiabada Ena Anibou dekenai idia lao? Memorial idia lao ena badina be ta ese ena turana ena wedin dekenai ia lao ena badina hegeregerena. Wedin idia lao badina idia ura headava tau bona hahine dekenai edia lalokau bona heduru idia hahedinaraia. Unai hegeregerena, mamoe ma haida be Memorial idia lao,  badina idia ura Keriso bona horoa taudia dekenai edia lalokau bona heduru idia hahedinaraia. Danu idia ura hahedinaraia Iesu ena boubou gauna idia abia dae, badina unai boubou gauna dainai tanobada ai mauri hanaihanai idia abia diba.

¹⁴ Memorial idia lao ena badina ma ta be Iesu ena oda herevana idia badinaia. Iesu be ena aposetolo taudia ida Lohiabada Ena Anibou ia hamatamaia neganai, ia gwau: “Inai bamona do umui karaia noho lau umui laloatao totona.” (1 Kor. 11:23-26) Unai dainai, orena taudia be tanobada ai idia do noho lalonai, mamoe ma haida be Memorial do idia lao noho. Oibe, mamoe ma haida ese ibounai idia boiria idia ida Memorial idia lao totona.

15. Edena dala ai Dirava bona Keriso ita hanamoa diba?

¹⁵ Memorial hebouna be nega namona ane bona guriguri amo Dirava bona Keriso ita hanamoa totona. Inai lagani ena Memorial tok ena sinado be, “Dirava Bona Keriso Ese Oi Totona Idia Karaia Karana Oi Laloa Bada!” Unai tok ese oi do ia durua Iehova bona Keriso oi tanikiu henia totona. Paraoa bona wain idia siaia loaloa ita itaia neganai, Iesu ena tauanina bona iena rara do ita laloa. Do ita laloatao, Iehova ese iena Natuna ia henia ita totona ia mase, unai amo mauri ita abia diba. (Mat. 20:28) Iseda guba Tamana bona iena Natuna idia lalokau henia taudia ibounai be do idia ura Memorial idia mai.

16. Edena dala ma haida ai, horoa taudia bona mamoe ma haida be idia hegeregere?

¹⁶ Horoa taudia bona mamoe ma haida be dala ma haida ai idia hegeregere. Iehova ese unai orea rua be maka tamona dekenai ia lalokau henidia bona ia lalodia bada. Oibe, iena lalokau Natuna ena mauri amo horoa taudia bona mamoe ma haida ia hoia. Gau badana be idia ese Dirava bona Keriso do idia abidadama henia noho. To, edia helaro be idauidau. (Sal. 31:23) Bona laloatao, Dirava ese ena lauma helaga be maka tamona ai ita ibounai dekenai ia henia. Unai anina be Iehova ese ita ta ta eda ura hegeregerena ai, ena lauma helaga ia henia ita ia durua totona.

17. Horoa orena taudia be mai ura bada ida dahaka idia naria noho?

¹⁷ Horoa Keristani taudia be guba helarona danu idia vara lasi. Dirava ese edia kudouna ai unai helaro ia atoa. Horoa oreana taudia be edia helaro idia laloa, idia gurigurilaia, bona mai ura bada ida do idia abia ahuna idia naria noho. Idia diba lasi guba ai edena bamona tauanina  do idia abia. (Fili. 3:20, 21; 1 Ioa. 3:2) To, mai moale ida idia ura bada guba dekenai Iehova, Iesu, aneru, bona horoa taudia ma haida idia hedavari henia. Idia ura dikadika Basileia ai idia huanai do idia helai.

18. Mamoe ma haida be mai ura bada ida dahaka idia naria noho?

¹⁸ Mamoe ma haida be tanobada ai do idia noho hanaihanai ena helaro idia moalelaia. Unai be taunimanima edia ura badana. (Had. 3:11) Idia ura dikadika nega matamata ai tanobada ibounai be paradaiso ai do idia halaoa. Edia ruma do idia haginia, uma gabu do idia karaia, natudia do idia havaraia bona idia gorere lasi. (Isa. 65:21-23) Danu, ororo gabudia, uda badadia bona davara ai do idia loaloa bona Dirava ena havaraia gaudia do idia stadilaia. To idia moalelaia gauna badana be edia hetura karana Iehova ida do ia goada ia lao.

19. (a) Memorial negana ai dahaka do ita karaia? (b) Memorial be edena negai?

¹⁹ Iehova ese ena hesiai taudia ta ta dekenai vaira negana ena helaro namona ia henia. (Ier. 29:11) Keriso ena Memorial be nega namona ita ta ta ese Dirava bona Keriso ita tanikiu henia totona, badina dala idia hegaegaelaia mauri hanaihanai ita moalelaia totona. Keristani taudia dekenai Memorial be mai anina bada hebouna ta. Saturday, March 27, 2021 ena dina diho murinai do ita karaia. Inai lagani ai momo be unai mai anina bada hebouna do idia lao. Ma haida be dagedage idia davaria, haida be dibura rumana ai, to Memorial do idia karaia. Iehova, Iesu, aneru bona idia toreisi lou vadaeni horoa taudia be guba amo idia itaia noho lalonai, mani kongrigeisen ta ta, grup bona sibona umui noho taudia ibounai ese Memorial umui moalelaia!