1. Dirava ena lalokau dainai emu hemami be edena bamona?

APOSETOLO Ioane ia gwau, “Dirava be lalokau.” (1 Ioa. 4:8) Unai hereva ese mai anina bada gauna ta ia hahedinaraia: Dirava, mauri ena Badina, be lalokau ena Badina danu. Oibe, Iehova be ita ia lalokau henia! Iena lalokau ese ita ia gimaia, ita moale bona gau ta dekenai ita dabu lasi.

2. (a) Mataio 22:37-40 ese ia herevalaia taravatu badadia rua be dahaka? (b) Dahaka dainai nega haida ia auka taravatu iharuana ita badinaia totona?

² Ita Keristani taudia eda maduna badana be lalokau do ita hahedinaraia. Unai be taravatu ginigunana. (Mataio 22: 37-40 duahia.) Iehova ita diba namonamo neganai, do ia auka lasi taravatu ginigunana ita badinaia totona. Oibe, Iehova be goevadae. Ita ia laloa bada bona mai hebogahisi ida ita ia kara henia. To, nega haida ia auka taravatu iharuana ita badinaia totona. Dahaka dainai? Badina iseda tadikaka taihu, eda dekena taudia unai, be goevadae lasi taudia. Nega haida edia hereva eiava kara ese ita ia hahisia. Iehova ia diba unai hekwakwanai do ita davaria dainai, Baibel idia torea taudia haida ia hasiahua, bena idia ese dahaka dainai bona edena dala ai do ita lalokau heheni ena hakaua herevadia idia torea. Unai ia torea tauna ta be Ioane.​—1 Ioa. 3:11, 12.

3. Ioane ia torea bukadia lalonai dahaka ia herevalaia momo?

³ Ioane be ena toretore lalonai hanaihanai ia hahedinaraia, Keristani taudia ese lalokau idia hahedinaraia be gau badana. Oibe, Ioane ese Iesu ena sivarai ia torea neganai, ia sibona be lalokau ia herevalaia momo. Unai dala amo ia be Evanelia bukadia toi amo ia idau. Ioane ena mauri lagani  be 100 bamona neganai, unai Evanelia bukana bona revareva toi ia toredia. Unai Baibel bukadia ese ita idia hadibaia, iseda kara ibounai be lalokau ese ia biagua be namo. (1 Ioa. 4:10, 11) To, Ioane be lagani haida lalodiai unai ia dibaia.

4. Ioane be hanaihanai ma haida dekenai lalokau ia hahedinaraia, a?

⁴ Ioane be tau matamata neganai, nega momo lalokau ia hahedinaraia lasi. Hegeregere nega ta, Iesu bona ena hahediba taudia be Ierusalema dekenai idia lao totona, Samaria tanona idia raka hanaia. Unuseni ai hanua ta be idia dekenai heabidae karana idia hahedinaraia lasi. Ioane be dahaka ia gwau? Iesu ia nanadaia bema guba amo lahi do idia boiria diho, unai hanua ia hadikaia ore totona! (Luka 9:52-56) Nega ma ta ai, Ioane be aposetolo taudia ma haida dekenai lalokau ia hahedinaraia lasi. Ia bona ena kakana Iamesi be edia sinana idia doria Iesu do ia nanadaia, Basileia lalonai idia ruaosi dekenai dagi bada do ia henia bona ia badinai do idia helai. Aposetolo taudia haida be unai idia kamonai neganai, idia badu dikadika! (Mat. 20:20, 21, 24) Ena be Ioane be kerere momo ia karaia, to Iesu ese ia lalokau henia.​—Ioa. 21:7

5. Inai atikol lalonai dahaka do ita stadilaia?

⁵ Inai atikol ai, Ioane ena haheitalai bona ia torea lalokau ena hakaua herevadia haida do ita stadilaia. Unai amo iseda tadikaka taihu ita lalokau henia dalana do ita dibaia. Bona ruma bese kwarana ese ena famili taudia ia lalokau henia dalana namona do ita dibaia danu.

6. Edena dala ai Iehova ia hahedinaraia ita ia lalokau henia?

⁶ Nega momo ita laloa lalokau be hemami ta eiava ma haida dekenai hereva namodia sibona ita gwauraia. To, bema ita lalokau henidia momokani, namona be idia totona kara namodia ita karaia. (Iamesi 2:17, 26 hahegeregerea.) Hegeregere, Iehova be ita ia lalokau henia. (1 Ioa. 4:19) Bona Baibel ena hereva namodia amo ia hahedinaraia ita ia lalokau henia. (Sal. 25:10; Roma 8:38, 39) To, Dirava ena hereva sibona amo lasi, to ia karaia gaudia dainai ita diba ita ia lalokau henia. Ioane ia gwau: “Dirava ena lalokau ita dekenai be inai dala ai ia hahedinaraia, Dirava ese ena Natuna korikorina be tanobada dekenai ia siaia mai, ia amo mauri do ita abia totona.” (1 Ioa. 4:9) Iehova ese ena natuna lalokauna ia henia, ita totona hisihisi ia mamia bona ia mase. (Ioa. 3:16) Iehova ena lalokau ita dekenai ita daradaralaia, a?

7. Iesu be edena kara amo ita totona iena lalokau ia hamomokania?

 ⁷ Iesu ese ena hahediba taudia ia hamaoroa idia ia lalokau henia. (Ioa. 13:1; 15:15) Iena lalokau idia bona ita totona be hereva sibona amo ia hahedinaraia lasi, to iena kara amo ia hamomokania danu. Iesu ia gwau: “Lalokau karana hereadaena be inai, tau ta ese ena turadia totona ena mauri ia atoa diho.” (Ioa. 15:13) Iehova bona Iesu ese ita totona idia karaia karadia ita laloa neganai, dahaka ita karaia be namo?

8. Ioane Ginigunana 3:18 ena hereva bamona, dahaka ita karaia be namo?

⁸ Iehova bona Iesu ita kamonai henidia neganai, ita hamomokania idia ita lalokau henia. (Ioa. 14:15; 1 Ioa. 5:3) Bona Iesu be ita ia hagania ta ta do ita lalokau henia. (Ioa. 13:34, 35) Iseda tadikaka taihu dekenai iseda lalokau be hereva sibona amo ita hahedinaraia lasi, to ita karaia karadia amo ita hahedinaraia danu be namo. (1 Ioane 3:18 duahia.) Edena dala ai do ita hamomokania idia ita lalokau henia?

9. Lalokau dainai Ioane be dahaka ia karaia?

⁹ Ioane be ena tamana ida ia noho bona edia haoda bisinesi amo moni momo idia karaia diba. To unai ia karaia lasi. Ioane be ena mauri ibounai ia gaukaralaia ma haida dekenai, Iehova bona Iesu edia hereva momokani ia hadibaia totona. Ioane ese ia abia hidi mauri dalana be mai ena metau. Dagedage ia davaria bona ia buruka neganai, idia dogoatao bona motumotu ta ai sibona idia atoa. (Kara 3:1; 4:1-3; 5:18; Apok. 1:9) Ioane be Iesu ena sivarai ia harorolaia dainai, dibura ruma ai idia atoa, to ia be ma haida ia laloa noho. Hegeregere, Patamo motumotu dekenai idia atoa neganai, ia abia matahanai ia torea bona kongrigeisen ibounai dekenai ia siaia unai amo “kahirakahira do idia vara gaudia” do idia diba. (Apok. 1:1) Bena, reana Patamo motumotu amo idia ruhaia neganai, Ioane ese Iesu ena mauri bona haroro gaukara ena sivarai be Evanelia bukana lalonai ia torea. Danu, iena tadikaka taihu ia hagoadaia totona, ia ese revareva toi ia toredia. Ioane be sibona ena ura ia dadaraia maurina ia noholaia. Edena dala ai ia oi tohotohoa diba?

10. Edena dala ai oi hamomokania oi be taunimanima oi lalokau henidia?

¹⁰ Emu mauri ai oi karaia gaudia amo oi hahedinaraia oi be taunimanima oi lalokau henidia. Satani ena tanobada ese oi ia veria diba, emu nega bona goada oi haorea sibona emu ura gaudia, hegeregere moni momo o ladana bada oi abia totona. To, tanobada hegegemadai Basileia harorolaia taudia be nega bada idia henia, taunimanima dekenai sivarai namona idia harorolaia bona Iehova kahirakahira idia veria mai totona. Haida be ful-taim haroro bona hadibaia gaukara idia karaia.

11. Edena dala ai haida idia hamomokania Iehova bona tadikaka taihu idia lalokau henia?

¹¹ Abidadama Keristani taudia momo be ful-taim moni gaukara idia karaia, unai amo idia sibona bona edia ruma bese idia naria diba. To, unai pablisa taudia be mai ura ida dala idauidau ai Dirava ena orea idia durua. Hegeregere, idia haida be disasta ia vara neganai heduru idia henia, konstraksen gaukara idia karaia, bona tanobada ibounai gaukara durua totona kontribiusen idia henia. Unai idia karaia badina Dirava bona edia tadikaka taihu idia lalokau henia. Wiki ta ta ena hebou ita lao bona haere ita henia neganai, ita hamomokania iseda tadikaka taihu ita  lalokau henia. Ena be ita hesiku bada to hebou dekenai ita mai. Ena be ita gari to haere ita henia. Bona ena be ita ta ta be mai iseda hekwakwanai, to hebou vairana o murinai ma haida ita hagoadaia. (Heb. 10:24, 25) Iseda abidadama tadikaka taihu be unai bamona idia karaia dainai edia gaukara ita laloa bada!

12. Edena dala ma ta ai Ioane ia hahedinaraia ena tadikaka taihu ia lalokau henia?

¹² Ioane ese ena tadikaka taihu ia lalokau henia dalana ma ta be idia ia hanamoa sibona lasi, to ia sisiba henidia danu. Hegeregere, iena revareva ta ai Ioane be ena tadikaka taihu edia abidadama bona gaukara namodia dainai ia hanamodia, to edia kerere dainai ia sisiba auka henidia danu. (1 Ioa. 1:8–2:1, 13, 14) Ita danu be iseda tadikaka taihu edia gaukara namona dainai do ita hanamodia. To, bema ta be lalohadai kererena ia abia eiava kerere ta ia karaia loulou, lalokau dalana be mai manau ida ia ita sisiba. Emu turana oi sisiba henia totona lalogoada oi hahedinaraia be namo, to Baibel ia gwau tura korikoridia be auri bamona ta ta do idia segea o hamaoromaoroa.​—Aon. 27:17.

13. Dahaka kara do ita karaia lasi?

¹³ Iseda tadikaka taihu dekenai eda lalokau ita hamomokania dalana ma ta be do ita badu lasi. Hegeregere, bema ita dekenai hereva kererena ta idia gwauraia, ita badu haraga lasi. Iesu ena tanobada maurina dokona ai ia dekenai ia vara gauna mani oi laloa. Iena hahediba taudia ia hamaoroa bema idia ura mauri idia abia, iena hidio do idia ania bona rara do idia inua. (Ioa. 6:53-57) Unai hereva ese ena hahediba taudia ia hahekwakwanaia bona momo be Iesu idia rakatania. To ena tura korikoridia be ia idia badinaia noho, idia ta be Ioane. Iesu ena hereva ena anina idia lalopararalaia lasi, bona reana idia hoa danu. To, Iesu ena tura korikoridia idia laloa lasi ena hereva be kerere bona idia badu. Lasi, to idia abidadama henia bona idia diba ia gwauraia gauna be hereva momokani. (Ioa. 6:60, 66-69) Gau badana be iseda turadia ese idia gwauraia hereva dainai ita badu haraga lasi! To, namona be nega ita henia edia hereva ena anina idia gwauraia hedinarai totona.​—Aon. 18:13; Had. 7:9.

14. Dahaka dainai inai heheni karana ita dadaraia be namo?

¹⁴ Ioane ese ita ia sisiba henia, eda tadikaka taihu do ita inai henia lasi. Bema  unai sisiba ita badinaia lasi, Satani be ita ia gaukaralaia diba. (1 Ioa. 2:11; 3:15) Keristani ginigunadia edia negai haida dekenai unai ia vara. Satani ia gaukara goada Dirava ena taunimanima huanai inai heheni karana ia havaraia bona idia parara totona. Ioane ena revareva ia torea negana ai, Satani ena kara idia tohotohoa taudia be kongrigeisen lalonai idia vareai vadaeni. Hegeregere, kongrigeisen ta lalonai Diotrepe be lalotamona karana ia hadikaia noho. (3 Ioa. 9, 10) Ia be hakaua oreana ena gwaukau taudia ia matauraia lasi. Bona tadikaka ma haida be ia inai henia taudia dekenai heabidae karana idia hahedinaraia neganai, ia ura unai tadikaka be kongrigeisen amo ia kokidia. Unai be hekokoroku karana! Hari danu, Satani ia gaukara goada noho Dirava ena taunimanima ia hapararaia bona hadikaia totona. Namo lasi inai heheni karana ese ita ia hapararaia.

15. Ruma bese kwarana be dahaka ia laloatao be namo?

¹⁵ Ruma bese kwarana ia hahedinaraia ena ruma bese ia lalokau henia dalana ta be tauanina dalanai edia dabu gaudia ia henia. (1 Tim. 5:8) To, namona be ia laloatao, mai anina bada gauna be ena ruma bese do ia durua Iehova idia tura henia totona. (Mat. 5:3) Iesu ese ruma bese kwarana totona haheitalai namona ia hahedinaraia. Ioane ena Evanelia bukana ese ia hahedinaraia Iesu be hisihisi auna ai idia tauadae neganai, iena famili ia laloa noho. Iesu idia tauadae gabuna ai, Ioane be Iesu ena sinana badinai ia gini. Ena be Iesu be hisihisi bada ia mamia, to Ioane ia noia Maria ia naria totona. (Ioa. 19:26, 27) Iesu be mai ena tadidia bona tauanina dalanai idia ese Maria idia naria diba, to toana be idia ta be Iesu ena hahediba tauna ai ia do lao lasi. Iesu ia ura ta ese tauanina bona tomadiho dalanai Maria do ia naria.

16. Ioane be dahaka maduna momo ia huaia?

¹⁶ Ioane be mai ena maduna momo. Ia be aposetolo tauna ta dainai, haroro gaukara ia gunalaia. Reana ia be headava tauna danu, unai dainai ia gaukara goada ena famili be tauanina bona tomadiho dalanai ia durua totona. (1 Kor. 9:5) Hari, ruma bese kwaradia be unai haheitalai amo dahaka idia dibaia?

17. Dahaka dainai ruma bese kwarana ese tomadiho dalanai ena ruma bese ia durua be gau badana?

 ¹⁷ Ruma bese kwarana be maduna momo ia huaia. Hegeregere, moni gaukara gabuna ai gaukara do ia karaia namonamo, unai amo Iehova ena ladana ia hanamoa diba. (Efe. 6:5, 6; Tito 2:9, 10) Bona kongrigeisen lalonai mamoe vadivadi ia karaia bona haroro gaukara ia gunalaia. Danu, namona be hanaihanai iena hahine bona natudia ida ruma bese tomadiho ia karaia. Do idia moale badina tauanina dalanai, hemami bona tomadiho dalanai idia ia durua.​—Efe. 5:28, 29; 6:4.

18. Ioane be dahaka ia diba?

¹⁸ Ioane be lagani daudau ia mauri bona mai ena ekspiriens namodia momo. Hekwakwanai momo ia davaria bona ena abidadama ia manoka diba. To, hanaihanai ia gaukara goada Iesu ena taravatu ia badinaia totona, tadikaka taihu lalokau henia ena taravatu danu. Badina Ioane ia diba Iehova bona Iesu ese idia lalokau henia, bona goada do idia henia hekwakwanai idauidau ia hanaia totona. (Ioa. 14:15-17; 15:10; 1 Ioa. 4:16) Satani eiava tanobada gauna ta ese Ioane ia koua diba lasi, iena kara bona hereva amo ena tadikaka taihu ia lalokau henia totona.

19. Ioane Ginigunana 4:7 ese ita ia hagoadaia dahaka ita karaia totona, bona dahaka dainai?

¹⁹ Ita be Ioane bamona, Satani ese ia biagua tanobadana ai ita noho, ia be tau ta ia lalokau henia lasi tauna. (1 Ioa. 3:1, 10) Satani ena ura be iseda tadikaka taihu do ita inai henidia, to namo lasi ena dala ita kehoa. Namona be mai kudouna ibounai ida iseda tadikaka taihu ita lalokau henidia, iseda kara bona hereva amo unai lalokau ita hahedinaraia. Bona lalokau ita hahedinaraia neganai, mai moale ida Iehova ena ruma bese lalonai do ita noho.​—1 Ioane 4:7 duahia.