1. Dahaka ese ia hahedinaraia ruma bese lalonai lalokau be lasi?

BAIBEL ia gwau dina gabedia ai, taunimanima be “lalokau” do idia hahedinaraia lasi. (2 Tim. 3:1, 3) Ita itaia unai peroveta herevana be hari ia guguru noho. Hegeregere, ruma bese milioni momo lalonai tau bona hahine idia divos, badu heheni bona natudia idia mamia ta ese idia ia lalokau henia lasi. Ena be ruma bese be ruma tamona lalonai idia noho to idia hetura namonamo lasi. Ruma bese ena kaunsolo tauna ta, ia gwau: “Sina, tama, bona natudia be ta ta amo idia daudau bona edia nega bada be kompiuta, tablet eiava fon, o vidio gadara dekenai idia haorea. Herevana ruma tamona lalonai idia noho, to ta ta idia diba namonamo lasi.”

2-3. (a) Roma 12:10 ena hereva bamona, daidia dekenai lalokau korikorina ita hahedinaraia be namo? (b) Inai atikol lalonai dahaka do ita stadilaia?

² Ita ura lasi tanobada taudia ita tohotohoa bona lalokau ita hahedinaraia lasi. (Roma 12:2) To, namona be iseda ruma bese taudia bona iseda tadikaka taihu totona lalokau korikorina do ita habadaia. (Roma 12:10 duahia.) Lalokau korikorina be dahaka? Unai lalokau ese ruma bese taudia ia durua ta ta idia tura henia namonamo totona. Unai bamona lalokau be iseda Keristani tadikaka bona taihu dekenai ita hahedinaraia be namo. Bema ita lalokau heheni, ibounai ita hagoadaia mai moale ida Iehova ita hesiai henia totona.​—Mika 2:12.

³ Ta ta dekenai lalokau ita hahedinaraia totona, mani Iehova bona ena hesiai taudia haida edia sivarai ita itaia.

4. Iamesi 5:11 ese Iehova ena lalokau be edena bamona ia herevalaia?

⁴ Baibel be Iehova ena kara namodia momo ia herevalaia. Hegeregere ia gwau, “Dirava be lalokau.” (1 Ioa. 4:8) Unai ita dibaia neganai, ita ura ia kahirakahira ita lao. To Baibel ma ia gwau, Iehova be ‘lalokau bada Diravana.’ (Iamesi 5:11 duahia.) Unai ese ia hamomokania Iehova be ita ia laloa bada!

5. Edena dala ai Iehova be hebogahisi ia hahedinaraia, bona edena bamona ita tohotohoa diba?

⁵ Iamesi 5:11 ese Iehova ena lalokau be ena hebogahisi karana ida ia herevalaia hebou. (Eso. 34:6) Iehova ese ita ia hebogahisi henia dalana ta be eda kara dika ia gwauatao. (Sal. 51:1) Baibel ese ia herevalaia hebogahisi karana be kerere gwauatao karana sibona lasi. To, bema tau ta ia itaia ma ta be mai ena metau bona ia be mai ura ida unai tauna ia durua, unai be hebogahisi karana. Iehova ena hemami ita ia durua totona ia herevalaia neganai, ia gwau ena hebogahisi ese sina ta be ena natuna dekenai ia hahedinaraia hebogahisi karana ia hanaia. (Isa. 49:15) Metau ita davaria neganai, Iehova ena hebogahisi dainai ia ura ita ia durua. (Sal. 37:39; 1 Kor. 10:13) Tadikaka taihu dekenai hebogahisi ita hahedinaraia totona, namona be edia kerere ita gwauatao, bona iseda lalona idia hahisia neganai, do ita badu noho lasi. (Efe. 4:32) To, iseda tadikaka taihu dekenai hebogahisi ita hahedinaraia dala hereadaena be metau idia davaria neganai ita durudia be namo. Lalokau dainai ma haida ita hebogahisi henia neganai, ita be Iehova ena haheitalai hereadaena ita tohotohoa unai.​—Efe. 5:1.

6. Edena dala ai Ionatana bona Davida be lalokau korikorina idia hahedinaraia?

⁶ Baibel lalonai goevadae lasi taudia ese lalokau korikorina idia hahedinaraia edia sivarai idia noho. Mani Ionatana bona Davida edia sivarai ita itaia. Baibel  ia gwau: “Ionatana bona Davida be idia turana karaia momokani. Ionatana ese Davida ia lalokau henia, ia sibona ia lalokau henia hegeregere.” (1 Sam. 18:1) Iehova ese Davida ia abia hidi King Saulo ena gabu ia abia totona. Unai murinai, Saulo be Davida dekenai ia badu dikadika bona ia ura Davida ia alaia. To Saulo ia ura Davida ia alaia neganai, Ionatana be ena tamana ia durua lasi. Ionatana bona Davida be idia gwauhamata hanaihanai do idia tura heheni bona heduru heheni.​—1 Sam. 20:42.

7. Dahaka ese Davida bona Ionatana edia hetura karana ia hadikaia diba?

⁷ Ionatana bona Davida edia lalokau be hoa gauna, badina gau momo ese edia hetura karana ia hadikaia diba. Hegeregere, Ionatana ena mauri lagani be bada, ia ese Davida ena lagani be lagani 30 amo ia hanaia. Reana Ionatana do ia laloa Davida be mero sibona, bona gau momo ia diba lasi dainai do ia tura henia lasi. To Ionatana be unai ia laloa lasi, ia ese Davida ia matauraia bada.

8. Dahaka dainai Ionatana be Davida ena turana namona?

⁸ Ionatana be Davida dekenai ia mama diba. Ia be King Saulo ena natuna dainai, reana do ia gwau, ia be mai ena maoro king dagina ia abia totona. (1 Sam. 20:31) To ia manau bona Iehova ia badinaia. Unai dainai ia abia dae, Iehova ese Davida ia abia hidi king ai do ia lao. Danu Ionatana ese Davida ia badinaia, ena be unai ese Saulo ia habadua dikadika.​—1 Sam. 20:32-34.

9. Ionatana be Davida ia mama henia, a? Herevalaia.

⁹ Ionatana be Davida ia lalokau henia dainai, ia mama henia lasi. Ionatana be tuari tauna goadana bona diba bona peva gaukaralaia dalana ia diba momo. Momo idia gwau ia bona ena tamana Saulo, be ‘ugava manu ena haraga idia hereaia’ bona ‘laiona ena goada idia hereaia.’ (2 Sam. 1:22, 23) Unai dainai Ionatana be ia karaia gaudia dainai ia hekokoroku diba. To, Ionatana ia laloa lasi ia be Davida ia hereaia, eiava Davida ena kara namodia dainai ia mama lasi. Ionatana be Davida ena boga-auka bona Iehova dekenai ia tabekau karana ia ura henia. Oibe, Davida be Goliata ia alaia murinai, Ionatana ese ia lalokau henia, sibona ia lalokau henia bamona. Edena dala ai tadikaka taihu ita lalokau henidia diba, Ionatana ese Davida ia lalokau henia hegeregerena?

10. “Mai emui kudouna ibounai ida ta ta umui lalokau henia” ena anina be dahaka?

¹⁰ Baibel ese ita ia hadibaia “mai emui kudouna ibounai ida ta ta umui lalokau henia.” (1 Pet. 1:22) Ita dekenai Iehova be haheitalai namona. Iena lalokau be bada herea dainai, bema ia ita badinaia iena lalokau ita totona do ia doko diba lasi. (Roma 8:38, 39) Inai hereva “mai emui kudouna ibounai ida,” ena anina be ita hekwarahi lalokau ita hahedinaraia totona. Nega haida iseda tadikaka taihu ita lalokau henia be auka. Haida ese iseda lalona idia hahisia neganai, namona be ‘mai lalokau ida ita ta ta eda kara do ita haheaukalaia. Do ita gaukara goada lauma helaga ese ia henia lalotamona karana ita badinaia totona, bona maino ese ita do ia hatamonaia.’ (Efe. 4:1-3) Bema ita gaukara goada tadikaka taihu huanai  “maino” ai ita noho totona, edia kerere do ita laloa momo lasi. Do ita hekwarahi noho Iehova ese iseda tadikaka taihu ia laloa hegeregerena idia ita laloa totona.​—1 Sam. 16:7; Sal. 130:3.

11. Dahaka dainai nega haida lalokau korikorina ita hahedinaraia be auka?

¹¹ Iseda tadikaka taihu edia kerere ita diba neganai, lalokau korikorina ita hahedinaraia be auka. Keristani taudia ginigunadia ese unai hekwakwanai idia davaria danu. Hegeregere, Euodia bona Sunutuke be ‘sivarai namona harorolaia gaukarana lalonai, Paulo ida idia gaukara hebou.’ To, hekwakwanai ta dainai idia ruaosi be idia hetura namonamo lasi. Unai dainai Paulo ese idia ia hagoadaia, “Lohiabada ena gaukara umui karaia dainai, do umui lalotamona.”​—Fili. 4:2, 3.

12. Edena dala ai tadikaka taihu lalokau henia karana ita hagoadaia diba?

¹² Hari, edena dala ai iseda tadikaka taihu lalokau henia karana ita hagoadaia diba? Idia ita diba namonamo neganai, do ia auka lasi edia kara ita lalopararalaia bona ita lalokau henidia totona. Mauri lagani bona hanua idauidau ese eda hetura karana do ia koua lasi. Laloatao, Ionatana ena mauri lagani be bada, to Davida ena tura namona ai ia lao. Emu kongrigeisen lalonai matamata o buruka tadikaka eiava taihu ta be emu turana namona ai oi halaoa diba, a? Unai oi karaia neganai, oi be “tadikaka oreana ibounai [oi] lalokau henia.”​—1 Pet. 2:17.

13. Dahaka dainai reana haida sibona ita bamoa momo to ma haida be lasi?

¹³ Tadikaka taihu ita lalokau henia ena anina be kongrigeisen lalonai ibounai be iseda tura namodia, a? Lasi, unai ita karaia be hegeregere lasi. Reana tadikaka taihu ma haida ita bamoa momo lasi, to ma haida ita bamoa momo, badina eda ura gaudia be edia ida ia hegeregere. Iesu ese ena aposetolo ibounai ia gwauraia ena “turadia,” to Ioane be iena turana momokani. (Ioa. 13:23; 15:15; 20:2) To, Iesu ese ma haida ia dadaraia bona Ioane sibona ia kara namo henia lasi. Hegeregere, Ioane bona ena kakana Iamesi be  Dirava ena Basileia lalonai dagi totona idia henanadai neganai, Iesu ese idia ia hamaoroa: “Lau ese gwaumaoro do lau henia lasi, daika be egu idibana eiava laurina kahanai do ia helai.” (Mar. 10:35-40) Namona be Iesu ita tohotohoa bona ma haida ita kara namo henidia, to iseda tura namodia sibona ita kara namo henidia lasi. (Iam. 2:3, 4) Bema unai bamona ita karaia, kongrigeisen lalonai maino do ita havaraia.​—Iuda 17-19.

14. Filipi 2:3 ena hereva bamona, edena dala ai ma haida ita hereaia lalohadaina ita dadaraia diba?

¹⁴ Bema kongrigeisen lalonai ita lalokau heheni, do ita laloa lasi ita be ma haida ita hereaia. Laloatao Ionatana be Davida dekenai ia mama lasi, bona ia laloa lasi ia ese king dagina ia abia be maoro. Ita ibounai ese Ionatana ena haheitalai ita tohotohoa diba. Namo lasi emui tadikaka o taihu ese idia karaia gaukara dainai umui mama henidia, “to mai manau ida do umui laloa ma haida ese umui idia hereaia.” (Filipi 2:3 duahia.) Namona be ita laloatao kongrigeisen lalonai ita ta ta be heduru ita henia diba. Bema ita manau, iseda tadikaka taihu edia kara namodia do ita dibaia, bona edia haheitalai namodia amo heduru ita abia.​—1 Kor. 12:21-25.

15. Tanya bona ena famili edia ekspiriens amo dahaka oi dibaia?

¹⁵ Hekwakwanai ita davaria neganai, iseda tadikaka taihu edia lalokau bona heduru amo Iehova ese ita ia hagoadaia. United States ai ruma bese ta be lagani 2019 “Lalokau be Ia Ore Diba Lasi!” Intanesinol Hebouhebou idia lao murinai ia vara gauna mani ita itaia. Tanya, sina ta mai ena natudia toi, ia gwau: “Motuka amo emai hotel dekenai ai giroa noho lalonai,  motuka ma ta ese ai ia bampaia. Ta be bero ia abia lasi, to ai gari, motuka amo ai diho bona dala badinai ai gini. Dala kahana ai tau ta be imana ia davea bona ai ia boiria iena motuka dekenai ai lao totona. Ia be tadikaka ta, ia danu be hebouhebou amo ia mai. To ia sibona ia stopu lasi, Sweden amo hebouhebou totona idia mai tadikaka taihu faiv idia stopu danu. Taihu ese lau bona egu natuna kekeni idia rosia bona goada ai abia! Idia lau hamaoroa ai be ai namo bona idia lao diba, to ai idia rakatania lasi. Ambalans taudia idia ginidae murinai, tadikaka taihu be idia do noho bona emai dabu gaudia idia henia. Unai metau negana ai, Iehova ena lalokau ai mamia momokani. Unai ekspiriens ese emai lalokau tadikaka taihu totona ia hagoadaia, bona Iehova dekenai emai lalokau bona tanikiu karana ia habadaia.” Oi laloatao nega ta heduru oi ura neganai, tadikaka o taihu ta ese oi dekenai lalokau korikorina ia hahedinaraia, a?

16. Dahaka dainai ita ura lalokau korikorina ita hahedinaraia?

¹⁶ Mani tadikaka taihu dekenai lalokau korikorina ita hahedinaraia dainai idia vara gau namodia ita laloa. Hekwakwanai idia davaria neganai idia ita durua. Bona idia ita durua mai moale ida Iehova ita hesiai henia hebou. Ita hamomokania ita be Iesu ena hahediba taudia, bona unai ese kudou-maoro taudia ia veria mai Iehova idia tomadiho henia totona. Mai anina bada gauna be “hebogahisi Tamana bona lalogoada ibounai ia henia Diravana,” Iehova ita hanamoa. (2 Kor. 1:3) Mani ita ibounai ese mai ura ida lalokau korikorina ita habadaia bona ita hahedinaraia!