1. King Davida bamona, dahaka henanadai ita gwauraia diba?

ITA IBOUNAI ita ura manau bona maino ai ita noho. Ita ura lasi ita lalohekwarahi. To nega haida, do ita lalohekwarahi. Unai dainai, Iehova ena hesiai taudia haida be King Davida ese Iehova dekenai ia gwauraia henanadai idia gwauraia danu: “Laloa hekwarahi bada ese, lau ia hisihisi henia noho, ia lao bona edena negai?”​—Sal. 13:2.

2. Inai stadi ai dahaka do ita herevalaia?

² Ena be lalohekwarahi ita koua diba lasi, to gau haida ita karaia diba ita hanaia totona. Inai stadi ai lalohekwarahi idia havaraia gaudia haida do ita itaia. Bona lalohekwarahi negadiai, maino ai ita noho totona do ita karaia gaudia siks do ita herevalaia.

3. Dahaka gaudia ese lalohekwarahi idia havaraia, bona ita koua diba, a?

³ Iseda mauri ai gau momo ese ita dekenai lalohekwarahi idia havaraia diba, bona unai ita koua diba lasi. Hegeregere, lagani ta ta ai aniani, dabua, bona ruma ena renta davana idia daekau karana ita koua diba lasi. Danu iseda gaukara eiava sikuli turadia be koikoi bona matabodaga karadia ita karaia totona, hanaihanai ita idia doria karana ita koua diba lasi. Bona iseda gabu ai idia vara kara dikadia ita koua diba lasi. Inai bamona metau ita davaria badina taunimanima momo edia abia hidi be Baibel ena hakaua herevadia hegeregerena lasi. Inai tanobada ena dirava, Satani, ia diba taunimanima haida be “inai nega oromana ena lalohekwarahi” dainai, Iehova hesiai henia karana idia hadokoa diba. (Mat. 13:22; 1 Ioa. 5:19) Unai dainai  ita hoa lasi, taunimanima be metau momo dainai idia lalohekwarahi bada!

4. Dahaka do ia vara bema ita lalohekwarahi momo?

⁴ Bema ita lalohekwarahi momo do ita laloa namonamo lasi. Reana do ita laloa iseda moni be hegeregere lasi iseda dabu gaudia ita hoia totona, eiava do ita gorere dainai moni gaukara ita lao lasi o gaukara ita haboioa. Danu hahetoho ita davaria neganai, reana Dirava ena taravatu do ita utua. Kahirakahira, Satani ese ia biagua taudia do ia gaukaralaia Dirava ena taunimanima idia tuari henia totona, reana unai nega ai do ita karaia gauna ita lalohekwarahilaia. Reana do ita laloa ‘unai gaudia lau lalohekwarahilaia be kerere, a?’

5. Mataio 6:25 ena anina be dahaka?

⁵ Iesu be ena murinai idia raka taudia ia hamaoroa: “Namo lasi emui mauri totona umui lalohekwarahi.” (Mat. 6:25) Iesu ena hereva ena anina be gau ta do ita lalohekwarahilaia lasi, a? Lasi! Iehova ena hesiai taudia haida be guna idia lalohekwarahi danu, to Iehova ese ia lalonamo henidia. * (1 Ki. 19:4; Sal. 6:3) To, Iesu be ita ia hagoadaia noho. Ia ura lasi iseda dabu gaudia dainai ita lalohekwarahi bona Iehova hesiai henia karana ita laloa maragi. To ita lalohekwarahi neganai dahaka do ita karaia?​—Maua itaia: “ Oi Karaia Gaudia.”

6. Filipi 4:6, 7 ena hereva bamona, dahaka ese ita dekenai maino ia henia diba?

⁶ (1) Hanaihanai oi guriguri. Bema Keristani tauna ta be ena hekwakwanai dainai ia laloa momo, heduru totona Iehova ia guriguri henia diba. (1 Pet. 5:7) Iehova ese emu guriguri ia haerelaia neganai, “ena maino, [taunimanima edia] laloparara ibounai ia hereaia gauna” be oi dekenai do ia henia. (Filipi 4:6, 7 duahia.) Iseda lalohekwarahi negadia ai, lauma helaga amo Iehova ese ita dekenai maino ia henia.​—Gal. 5:22.

7. Dirava dekenai ita guriguri neganai dahaka ita laloatao be namo?

⁷ Iehova oi guriguri henia neganai, namona be emu lalohekwarahi ibounai, oi davaria hekwakwanai, bona emu hemami be ia dekenai oi gwauraia. Bema emu hekwakwanai hamaoromaoroa dalana ia noho, Iehova oi noia oi dekenai aonega bona goada ia henia unai oi karaia totona. Bema unai hekwakwanai hamaoromaoroa dalana be lasi, Iehova oi noia oi ia durua unai oi lalohekwarahilaia momo lasi totona. Emu guriguri lalonai emu hekwakwanai oi gwauraia hedinarai neganai, Iehova ese emu guriguri ia haerelaia dalana do oi itaia. Bema emu guriguri ena haere oi abia haraga lasi, guriguri karana oi hadokoa lasi. Iehova ia ura emu hekwakwanai oi gwauraia hedinarai sibona lasi, to hanaihanai oi gurigurilaia.​—Luka 11:8-10.

8. Iseda guriguri lalonai dahaka ita gwauraia diba?

⁸ Emu lalohekwarahi gaudia be Iehova dekenai oi gurigurilaia neganai, namona be tanikiu bona hanamoa herevadia oi gwauraia. Iseda lalohekwarahi gaudia be momo neganai, namona be ita abia hahenamo ita lalodia. Bema nega haida oi diba lasi Iehova dekenai dahaka hereva do oi gwauraia, namona be oi laloatao Iehova be guriguri kwadogina, ‘Mani lau oi durua!’ do ia haerelaia.​—2 Siv. 18:31; Roma 8:26.

9. Ita gari neganai dahaka ita karaia be namo?

⁹ (2) Iehova ena aonega dekenai oi tabekau, oiemu lasi. Peroveta tauna  Isaia ena negai, Iuda taudia be Asuria taudia ese do idia tuari henia dainai idia gari. Iuda taudia idia ura lasi Asuria taudia ese do idia halusia dainai, Aigupito amo heduru idia abia. (Isa. 30:1, 2) Iehova be Isaia amo taunimanima dekenai do idia gari lasi, bona noho namo dalana ia gwauraia. Ia gwau: “Bema umui manau bona lau umui abidadama henia, do umui goada.”​—Isa. 30:15b, NWT.

10. Edena hahetoho idauidau ai oi hahedinaraia diba Iehova oi abidadama henia?

¹⁰ Edena dala ai ita hahedinaraia Iehova ita abidadama henia? Mani inai hahetoho haida oi laloa. Reana kampani ta ese oi dekenai pei bada moni gaukara ia henia, to unai ese emu nega bada do ia haorea bona Iehova hesiai henia karana ia koua. Eiava gaukara gabuna ai mero eiava kekeni ta ia ura oi ia tura henia, to ia be bapatiso Witnes tauna lasi. Eiava dahaka do oi karaia bema emu famili tauna ta ia gwau, Iehova oi hesiai henia neganai oi do ia dadaraia? Unai hahetoho ta ta lalonai, oi be disisen badana ta do oi karaia, to Iehova ese oi dekenai dala maorona do ia hahedinaraia. (Mat. 6:33; 10:37; 1 Kor. 7:39) Henanadai be inai: Oi be Iehova do oi abidadama henia bona iena hakaua herevana do oi badinaia, a?

11. Dagedage ita davaria neganai, edena Baibel sivarai ita lalodia be namo?

¹¹ (3) Haheitalai namodia bona dikadia amo diba abia. Baibel lalonai idia noho sivarai ese idia hahedinaraia ita manau bona Iehova ita abidadama henia be mai anina bada. Unai sivarai oi stadilaia lalonai, mani oi laloa dahaka ese Dirava ena taunimanima ia durua, dagedage negadia ai manau idia hahedinaraia totona. Hegeregere, Iuda ena kota badana ese aposetolo taudia idia oda henia do idia haroro lasi neganai, idia gari lasi. To, mai lalogoada ida idia gwau: “Dirava be emai lohia tauna dainai ia ai kamonai henia be namo, to taunimanima lasi.” (Kara 5:29) Ena be idia dadabadia, to aposetolo taudia be idia gari lasi. Dahaka dainai? Badina idia diba Iehova be idia ia durua bona idia dekenai ia moale. Unai dainai, sivarai namona harorolaia gaukarana idia hadokoa lasi. (Kara 5:40-42) Unai hegeregerena, hahediba tauna Stefano be kahirakahira do idia hamasea neganai, ia manau bona ena “vairana be aneru ta ena vairana bamona.” (Kara 6:12-15) Dahaka dainai? Badina ia diba momokani Iehova be ia dekenai ia moale.

12. Petero Ginigunana 3:14 bona 4:14 ena hereva bamona, dahaka dainai ita moale diba?

¹² Aposetolo taudia idia diba Iehova be idia ida ia noho. Idia dekenai siahu ia henia hoa karadia idia karaia totona. (Kara 5:12-16; 6:8) Hari, ita dekenai unai ia karaia lasi. To, Iehova be mai lalokau ida Baibel amo ita ia hadibaia, bema kara maoromaoro dainai dagedage ita davaria, ita dekenai ia moale bona iena lauma helaga amo ita do ia durua. (1 Petero 3:14; 4:14 duahia.) Unai dainai, namo lasi vaira negai do ita davaria dagedage ita lalohekwarahilaia momo. To, gau badana be hari iseda abidadama ita hagoadaia bona ita abia dae Iehova ese ita do ia durua bona hamauria. Idaunegai hahediba taudia bamona, namona be Iesu ena gwauhamata ita abidadama henia, ia gwau: “Lau ese umui dekenai aonega herevadia do lau henia, emui inai taudia ese unai do idia dadaraia eiava idia hepapahuahulaia lasi.” Iesu ia gwauhamata: “Umui haheauka dainai emui mauri do  umui dogoatao.” (Luka 21:12-19) Bona laloaboio lasi, Iehova ese ia idia hesiai henia ela bona idia mase taudia edia kara maragidia ibounai ia laloatao. Unai ia diba dainai idia do ia hatorea isi lou.

13. Idia manau lasi bona Iehova idia abidadama henia lasi taudia edia sivarai amo dahaka ita dibaia?

¹³ Idia manau lasi bona Iehova idia abidadama henia lasi taudia edia sivarai amo diba do ita abia danu. Edia haheitalai dikana ita stadilaia karana ese ita do ia durua unai kara ita dadaraia totona. Hegeregere, Asa be Iuda ena king ai ia lao bona tuari orea badana ta be ia tuari henia totona idia mai neganai, ia be Iehova dekenai ia tabekau dainai, Iehova ese ia durua bona ia kwalimu. (2 Siv. 14:9-12) Gabeai, Basa, Israela ena king, be ena tuari orea maragina ida ia mai Asa ia tuari henia totona. Unai negai, Asa be Iehova ena heduru dekenai ia tabekau lasi, to Suria ena tuari taudia ia hoia ia idia durua totona. (2 Siv. 16:1-3) Danu ena mauri dokona ai gorere badana ta ia davaria, bona unai negai Iehova ena heduru dekenai ia tabekau lasi.​—2 Siv. 16:12.

14. Asa ena sivarai amo dahaka ita dibaia?

¹⁴ Matamanai Asa be hekwakwanai ia davaria neganai, Iehova ena heduru ia tahua. To, gabeai ia be heduru totona Dirava ia noia lasi, bona sibona ena goada dekenai ia tabekau. Toana be Asa ese Israela taudia tuari henia totona Suria taudia edia heduru ia tahua be aonega karana. To, Iuda taudia edia maino be ia noho daudau lasi. Iehova ese peroveta tauna ta amo ia hamaoroa: “Oi ese Suria ena king oi abidadama henia, to Lohiabada, oiemu Dirava, oi abidadama henia lasi. Bona unai dainai Israela king ena tuari orea be oiemu imana dekena amo idia heau mauri vadaeni.” (2 Siv. 16:7) Namona be ita naria namonamo, hekwakwanai ita hamaoromaoroa neganai sibona eda diba dekenai ita tabekau lasi, to Iehova ita noia ena Hereva amo ita ia hakaua totona. Ena be hekwakwanai ta dainai disisen do ita karaia haraga, to namona be mai manau ida Iehova dekenai ita tabekau, bona ia ese ita do ia durua disisen maorona ita karaia totona.

15. Baibel ita duahia neganai dahaka ita karaia be namo?

¹⁵ (4) Baibel siridia laloatao. Bema oi duahia siri haida ese oi idia durua oi manau bona Iehova dekenai oi tabekau totona, namona be oi lalodiatao. Oi laloatao totona oi duahia badabada, eiava oi toredia unai amo oi duahia lou diba. Iehova ese Iosua ia hamaoroa Taravatu bukana be hanaihanai gadona maragina ai do ia duahia, unai amo mai aonega ida ia raka diba. Iehova ena Hereva ia duahia karana amo goada do ia abia bona mai lalogoada ida Dirava ena taunimanima ia gunalaia diba. (Ios. 1:8, 9) Bema oi lalohekwarahi eiava oi gari, Baibel lalonai idia noho herevadia ese oi dekenai lalomaino ia henia diba.​—Sal. 27:1-3; Aon. 3:25, 26.

16. Iehova ese edena dala ai tadikaka taihu amo ita ia durua maino ai ita noho totona?

¹⁶ (5) Dirava ena taunimanima bamoa. Iehova ese iseda tadikaka taihu amo ita ia durua maino ai ita noho bona ia ita abidadama henia totona. Iseda kongrigeisen heboudia ai, ita kamonai tok, iseda tadikaka taihu edia haere bona herevahereva karana amo goada ita abia. (Heb. 10:24, 25) Danu, kongrigeisen lalonai tura namodia dekenai iseda hemami ita gwauraia neganai, ita idia hagoadaia  diba. Tura namona ta ena “hereva namodia” ese lalohekwarahi negana ai oi ia durua diba.​—Aon. 12:25.

17. Heberu 6:19 ena hereva bamona, edena dala ai nega aukadia ai iseda helaro ese ita ia hagoadaia diba?

¹⁷ (6) Emu helaro dogoatao auka. Basileia ena helaro be “mauri ena dogo bamona,” nega aukadia bona hahetoho ita davaria neganai ita dekenai goada ia henia. (Heberu 6:19 duahia.) Iehova ese vaira nega totona ia gwauhamatalaia maurina oi laloa dobu. Unai nega ai ta be gau ta dainai do ia lalohekwarahi lasi. (Isa. 65:17) Mani tanobada matamatana ai sibona oi piksaia, unuseniai lalohekwarahi havaraia gauna ta do ia vara lasi. (Mika 4:4) Danu, ma haida dekenai tanobada matamatana oi herevalaia neganai, emu helaro oi hagoadaia noho. Namona be mai goada ibounai ida haroro bona hahediba taudia halaoa gaukarana oi karaia. Unai bamona oi karaia neganai, emu “helaro do [oi] dogoatao noho ela bona dokona.”​—Heb. 6:11.

18. Inai nega oromana ena dokona ai dahaka do ia vara, bona edena dala ai unai ita hanaia diba?

¹⁸ Inai nega oromana ena dokona be ia kahirakahira lalonai, hekwakwanai momo ese lalohekwarahi idia havaraia diba. Iseda lagani 2021 ena siri badana ese ita ia durua diba hekwakwanai ita hanaia bona maino ai ita noho totona, sibona iseda goada dekenai ita tabekau lasi to Iehova ita abidadama henia. Inai lagani ai, namona be iseda kara amo ita hahedinaraia Iehova ena gwauhamata ita abidadama henia, ia gwau: “Umui manau bona lau umui abidadama henia, do umui goada.”​—Isa. 30:15, NWT.