1-2. (a) Edena nega ai idia mase vadaeni lalokau taudia ita laloatao? (b) Iesu ena hanuaboi ginigabena ai dahaka ia karaia?

 HEREVANA iseda lalokau taudia be idia mase bona lagani momo idia ore vadaeni, to idia ita laloatao noho. Bona edia mase dinana ita laloa neganai, idia ita laloa.

² Lagani ta ta ai, ita lalokau henia bada tauna, Iesu Keriso, ena mase laloatao hebouna dekenai taunimanima milioni ida ita lao. (1 Pet. 1:8) Unai hebou ita lao neganai, kara dika bona mase amo ita ia ruhaia totona mauri davana ia karaia tauna ita laloatao. (Mat. 20:28) Oibe, Iesu ia ura iena murinai idia raka taudia ese iena mase do idia laloatao. Ena hanuaboi ginigabena ai, ia ese Lohiabada ena Anibou ia hamatamaia, bona ia gwau: “Inai do umui karaia noho lau umui laloatao totona.”​—Luka 22:19.

3. Inai atikol lalonai dahaka do ita stadilaia?

³ Keriso ena mase ena Memorial dekenai idia lao orea maragi taudia edia namba be bada lasi, idia be guba helarona idia laloa bada taudia. To tanobada helarona idia abia taudia milioni momo be unai hebou dekenai idia lao danu. Inai atikol lalonai, unai orea rua be lagani ta ta ai Memorial dekenai idia lao ena badina haida do ita stadilaia. Unai hebou ita lao ena namo do ita herevalaia danu. Mani horoa taudia be Memorial idia lao ena badina haida ita herevalaia guna.

4. Dahaka dainai Memorial ai horoa taudia ese paraoa idia ania bona wain idia inua?

⁴ Lagani ta ta ai, horoa taudia be Memorial ai idia lao bona paraoa idia ania bona wain idia inua. Dahaka dainai paraoa idia ania bona wain idia inua? Unai ita haerelaia totona, Iesu ese ena hanuaboi ginigabena ai ia karaia gauna mani ita herevalaia. Pasova aria murinai, Iesu ese Lohiabada Ena Anibou ia hamatamaia. Paraoa bona wain be iena aposetolo taudia 11 dekenai ia henia bona ia hamaorodia do idia ania bona inua. Iesu ese idia dekenai gwaubou, o kontraka rua ia herevalaia, unai be gwaubou matamatana bona Basileia ena gwaubou. * (Luka 22:19, 20, 28-30) Unai gwaubou rua ese dala ia kehoa, orea maragi taudia be guba ai king bona hahelaga taudia ai do idia lao. (Apok. 5:10; 14:1) Unai gwaubou rua lalonai idia noho taudia sibona, horoa orena * taudia unai, ese Memorial ai paraoa idia ania bona wain idia inua diba.

5. Horoa taudia ese edia helaro be edena bamona idia laloa?

⁵ Horoa taudia be Memorial hebouna idia lao ena badina ta be: Unai ese idia ia durua edia guba helarona idia lalohadailaia totona. Iehova ese idia dekenai helaro hereadaena ia henia, unai be, guba ai mase diba lasi bona bodaga diba lasi maurina do idia abia, Iesu Keriso bona 144,000 taudia ma haida ida do idia lohia, bona hahenamo badana be Iehova Dirava do idia itaia! (1 Kor. 15:51-53; 1 Ioa. 3:2) Horoa taudia idia diba Dirava ese idia ia boiria guba dekenai unai hahenamo idauidau idia moalelaia totona. To guba dekenai idia lao totona, namona be edia abidadama ia goada noho ela bona idia mase. (2 Tim. 4:7, 8) Horoa taudia be edia guba helarona idia laloa neganai, idia moale bada. (Tito 2:13) To, “mamoe ma haida” be edena bamona? (Ioa. 10:16) Dahaka badina namodia dainai Memorial hebouna idia lao?

6. Dahaka dainai lagani ta ta ai mamoe ma haida be Memorial dekenai idia lao?

⁶ Mamoe ma haida be Memorial hebouna idia lao, to paraoa idia ania lasi bona wain idia inua lasi. Lagani 1938 ai, tanobada helarona idia abia taudia be nega ginigunana idia boiridia Memorial hebouna idia lao totona. The Watchtower, March 1, 1938, ia gwau: “[Mamoe ma haida] be unai hebou dekenai idia noho bona idia karaia gaudia idia itaia be maoro. . . . Unai nega idia moalelaia danu be namo.” Wedin totona idia boiria taudia be unai nega idia moalelaia hegeregerena, mamoe ma haida be mai moale ida Memorial dekenai idia vara gaudia idia itaia.

7. Dahaka dainai mamoe ma haida idia ura Memorial ena tok idia kamonai?

⁷ Horoa taudia bamona, mamoe ma haida be edia helaro idia lalohadailaia. Idia ura Memorial ena tok idia kamonai, badina unai tok ese Lagani 1,000 Lohia Negana ai Keriso bona ia ida do idia lohia 144,000 taudia ese abidadama taudia totona do idia karaia gaudia ia herevalaia. Iesu Keriso ena lohia henunai, unai lohia taudia ese tanobada be paradaiso ai do idia halaoa, bona kamonai taudia do idia durua goevadae taudia ai idia lao totona. Memorial ai idia mai taudia milioni momo idia  moale, badina nega vaira ai Isaia 35:5, 6; 65:21-23; bona Apokalupo 21:3, 4 edia peroveta herevadia be do idia guguru. Idia bona edia lalokau taudia be tanobada matamatana ai do idia noho karana idia piksaia neganai, unai ese edia helaro vaira negana totona ia hagoadaia, bona edia lalona idia hadaia Iehova idia hesiai henia noho totona.​—Mat. 24:13; Gal. 6:9.

8. Mamoe ma haida be Memorial dekenai idia lao ena badina ma ta be dahaka?

⁸ Mamoe ma haida be Memorial dekenai idia lao ena badina ma ta mani ita itaia. Idia ura horoa taudia totona edia lalokau idia hahedinaraia bona idia durua. Dirava ena Hereva ese ia hahedinaraia horoa taudia bona tanobada helarona idia abia taudia be do idia gaukara hebou namonamo. Edena dala ai? Mani haheitalai haida ita herevalaia.

9. Sekaraia 8:23 ena peroveta herevana ese dahaka ia hahedinaraia?

⁹ Sekaraia 8:23 duahia. Unai peroveta herevana ai mamoe ma haida ese horoa tadikaka bona taihu idia laloa dalana ia hahedinaraia. Inai hereva “Iuda tauna” bona “umui” be orea tamona, eiava horoa orena taudia ia herevalaia. (Roma 2:28, 29) “Bese idauidau edia gado ibounai amo tatau 10” be mamoe ma haida ia laulaulaia. Idia ese horoa taudia, “idia dogoatao” auka, anina be tomadiho goevana idia badinaia. Unai dainai, mamoe ma haida be Memorial hebouna ai idia noho karana ese ia hamomokania idia be horoa taudia idia laloa bada.

10. Iehova be dahaka ia karaia Esekiela 37:15-19, 24, 25 ena peroveta herevana ia hagugurua totona?

¹⁰ Esekiela 37:15-19, 24, 25 duahia. Unai peroveta herevana ia hagugurua totona, Iehova ese horoa taudia bona mamoe ma haida ia haboua, idia gaukara namonamo totona. Unai peroveta herevana ese au rua ia herevalaia. Guba helarona do idia abia taudia be “Iuda ena au” bamona (unai iduhu amo Israela ena king idia abia hidi), bona tanobada helarona idia abia taudia be ‘Eparaima ena au’ bamona. * Iehova ese unai orea rua do ia hatamonaia, unai amo idia be “au tamona” ai do idia lao. Unai anina be idia be edia King, Keriso Iesu, henunai mai lalotamona ida do idia gaukara hebou. Lagani ta ta ai, horoa taudia bona mamoe ma haida be Memorial hebouna idia lao neganai, idia be orea rua lasi, to “mamoe orea tamona,” bona edia “mamoe naria tauna be tamona.”​—Ioa. 10:16.

11. Edena dala ai Mataio 25:31-36, 40 ese ia gwauraia “mamoe” be Keriso ena tadikaka idia durua?

¹¹ Mataio 25:31-36, 40 duahia. Inai parabole ai “mamoe” be inai nega dokona ai idia noho kara maoromaoro taudia ia laulaulaia, idia be tanobada helarona do idia abia mamoe ma haida. Bona Keriso ena horoa orena tadikaka idia durua mai anina bada gaukarana idia hagugurua totona, unai be tanobada hegegemadai haroro bona hahediba gaukarana.​—Mat. 24:14; 28:19, 20.

12-13. Edena dala haida ai mamoe ma haida ese Keriso ena tadikaka idia durua?

¹² Lagani ta ta ai Memorial dinana ia kahirakahira neganai, tanobada hegegemadai mamoe ma haida be Memorial invateisen idia hariharilaia kamonai taudia idia boiria totona, unai amo idia hahedinaraia Keriso ena tadikaka idia durua. (Maua itaia, “ Memorial Totona Oi Hegaegae, A?”) Danu Memorial totona gau ibounai idia hegaegaelaia, ena be edia kongrigeisen ai horoa tauna ta ia noho  lasi. Mamoe ma haida ese unai dala idauidau ai Keriso ena tadikaka idia durua karana idia moalelaia. Unai mamoe ma haida idia diba Iesu ena tadikaka totona idia karaia gaudia be Iesu ese ia itaia, unai be hegeregere ia totona idia karaia bamona.​—Mat. 25:37-40.

¹³ Herevana iseda helaro be guba ai o tanobada ai, to dahaka gaudia ma haida dainai ita ibounai be Memorial hebouna ita lao?

14. Edena dala ai Iehova bona Iesu ese ita dekenai lalokau hereadaena idia hahedinaraia?

¹⁴ Iehova bona Iesu ese ita dekenai idia hahedinaraia lalokauna ita laloa bada. Iehova ese dala idauidau ai ita dekenai ena lalokau ia hahedinaraia, to dala ta be hereadaena. Iseda Dirava ese ena Natuna lalokauna ia siaia ita totona hisihisi ia mamia bona ia mase karana amo unai lalokau hereadaena ia hahedinaraia. (Ioa. 3:16) Bona ita laloparara Iesu danu be unai lalokau hereadaena ia hahedinaraia, badina mai ena ura ida ita totona sibona ena mauri ia henia. (Ioa. 15:13) Iehova bona Iesu ese idia hahedinaraia lalokauna ena davana ita haloua diba lasi. To dina ta ta ai iseda mauri ita noholaia dalana amo iseda tanikiu karana ita hahedinaraia. (Kol. 3:15) Bona Memorial ita lao badina ita ura edia lalokau ita laloatao bona iseda lalokau idia dekenai ita hahedinaraia.

15. Dahaka dainai horoa taudia bona mamoe ma haida ese mauri davana idia laloa bada?

¹⁵ Iesu ese ia henia mauri davana ita laloa bada. (Mat. 20:28) Horoa taudia ese unai mauri davana idia laloa bada, badina unai ese dala ia kehoa edia guba helarona idia abia totona. Keriso ena boubou gauna idia abidadama henia dainai, Iehova ese idia ia gwauraia maoromaoro bona ena natuna ai ia halaodia. (Roma 5:1; 8:15-17, 23) Mamoe ma haida be mauri davana idia laloa bada danu. Keriso ena boubou gauna idia abidadama henia dainai, Dirava vairanai idia goeva, iena hesiai gaukara helagana idia karaia, bona “hisihisi badana” amo idia roho mauri diba. (Apok. 7:13-15) Horoa taudia bona mamoe ma haida ese mauri davana idia laloa bada dalana ta be, lagani ta ta ai Memorial hebouna ai idia lao.

16. Memorial hebouna ita lao ena badina ma ta be dahaka?

¹⁶ Memorial hebouna ita lao ena badina ma ta be ita ura Iesu ena hereva ita badinaia. Herevana iseda helaro be guba ai o tanobada ai, to ita ta ta ita ura Iesu ena oda herevana ita badinaia, ia gwau: “Inai do umui karaia noho lau umui laloatao totona.”​—1 Kor. 11:23, 24.

17. Edena dala ai Memorial ese ita ia durua Iehova kahirakahira ita lao totona?

¹⁷ Iehova kahirakahira ita lao. (Iam. 4:8) Inai stadi amo ita dibaia hegeregerena, Memorial ese dala ia kehoa Iehova ese ita dekenai ia henia helaro bona ia hahedinaraia lalokau hereadaena ita laloa dobu totona. (Ier. 29:11; 1 Ioa. 4:8-10) Vaira nega ena helaro bona Dirava ena noho hanaihanai lalokauna ita laloa neganai, iseda lalokau Iehova dekenai ita habadaia bona iseda hetura karana ia ida ita hagoadaia.​—Roma 8:38, 39.

18. Iesu ena haheitalai ita laloa dobu karana ese edena dala ai ita ia durua?

¹⁸ Iesu ena haheitalai ita tohotohoa. (1 Pet. 2:21) Memorial dinana ia kahirakahira neganai, Baibel lalonai Iesu ena wiki ginigabena lalonai idia vara gaudia, iena mase, bona toreisi  lou sivaraina ita duahia bona laloa dobu. Bena Memorial hanuaboina ai, idia henia tok ese ita ia durua Iesu ena lalokau ita dekenai ita laloa totona. (Efe. 5:2; 1 Ioa. 3:16) Iesu ese sibona ena mauri ia henia sivaraina ita duahia bona laloa dobu neganai, ita do ia durua “Iesu ia raka hegeregerena do [ita] raka noho” totona.​—1 Ioa. 2:6.

19. Edena dala ai Dirava ena lalokau lalonai ita noho diba?

¹⁹ Eda lalona ita hadaia Dirava ena lalokau lalonai ita noho totona. (Iuda 20, 21) Dirava ena lalokau lalonai ita noho totona, iena taravatu do ita badinaia, iena ladana do ita hahelagaia, bona ena kudouna do ita hamoalea. (Aon. 27:11; Mat. 6:9; 1 Ioa. 5:3) Memorial hebouna ese ita ia hagoadaia dina ta ta ai eda mauri dalana amo Iehova dekenai ita gwau: ‘Lau ura emu lalokau lalonai do lau noho hanaihanai!’

20. Dahaka badina namodia dainai Memorial hebouna ita lao?

²⁰ Herevana iseda helaro be guba eiava tanobada ai, to badina namodia dainai Memorial hebouna ita lao be namo. Lagani ta ta ai unai dina dekenai ita hebou neganai, eda lalokau tauna, Iesu Keriso ena mase ita laloatao. To gau badana be, Iehova ese ita dekenai ia hahedinaraia lalokau hereadaena ita laloatao, unai be Ia ese ena Natuna ia henia iseda mauri davana karaia totona. Inai lagani ai, Memorial hebouna be Friday, April 15, 2022 ena adorahi ai do ita karaia. Iehova bona ena Natuna ita lalokau henia. Unai dainai, Iesu ena mase laloatao dinana ai, namona be gau ta ese ita ia koua lasi Memorial hebouna ita lao totona.