1. Iehova ita tura henia totona, edena dala ai iseda nega ita gaukaralaia diba?

 ISEDA lalokau taudia ita bamoa karana ita moalelaia. Headava tau bona hahine be nega ibounai edia hebamo karana idia moalelaia. Matamata taudia be idia ura edia tura namodia idia bamoa. Bona ita ibounai be tadikaka taihu bamoa karana ita moalelaia. To, ita laloa bada gauna be Dirava ita tura henia karana. Unai ita karaia diba bema ia ita guriguri henia, iena Hereva ita duahia, bona iena ura bona kara namodia ita laloa dobu. Iehova ita tura henia totona nega ita atoa be mai anina bada!​—Sal. 139:17.

2. Dahaka dainai Iehova tomadiho henia gaudia ita karaia totona nega haida ia auka?

² Ena be ita ura Iehova ita guriguri henia bona Baibel ita stadilaia, to nega haida ia auka. Dina ta ta ai ita bisi dainai, Iehova ita tomadiho henia totona nega ita atoa be mai ena hekwarahi. Moni gaukara, famili ena maduna idauidau, bona ma gau haida dekenai nega bada ita haorea dainai, nega be lasi ita guriguri, stadi bona laloa dobu totona.

3. Dahaka ese iseda nega ia haorea diba?

³ Gau ma ta ese iseda nega ia haorea diba. Bema ita naria namonamo lasi, ita karaia gaudia haida ese iseda nega bada ia haorea diba. Hegeregere, moale karadia ita karaia totona nega ita atoa be namo. To, bema moale karana ta ita karaia totona  nega bada ita haorea, nega be lasi Iehova ita tomadiho henia totona. Unai dainai namona be ita laloatao, moale karadia be anina bada lasi gaudia.​—Aon. 25:27; 1 Tim. 4:8.

4. Inai stadi lalonai dahaka do ita herevalaia?

⁴ Inai stadi lalonai, dahaka dainai mai anina bada gaudia totona nega ita atoa be namo do ita herevalaia. Ma danu Iehova totona iseda nega ita gaukaralaia namonamo dalana bona unai ita karaia ena namo do ita herevalaia danu.

5. Edena dala ai Efeso 5:15-17 ena sisiba ese matamata tauna ia durua diba?

⁵ Abia hidi namodia oi karaia. Matamata taudia be nega momo edia mauri gaukaralaia namonamo dalana idia laloa bada. Tisa bona Witnes lasi varavara ese matamata taudia idia doria sikuli badana idia lao totona, unai amo gaukara namona mai ena pei badana idia abia diba. Unai abia hidi ese edia nega bada ia haorea. To, tama sina bona kongrigeisen turadia ese matamata taudia idia hagoadaia edia mauri lalonai Iehova ena hesiai gaukara idia karaia totona. Dahaka ese Iehova ia lalokau henia matamata tauna do ia durua abia hidi namona ia karaia totona? Efeso 5:15-17 ia duahia bona laloa dobu karana ese ia do ia durua. (Duahia.) Matamata tauna ta be unai siri ia duahia murinai, sibona do ia nanadaia: ‘“Iehova ena ura” be dahaka? Edena abia hidi ese Iehova do ia hamoalea? Edena abia hidi ese lau do ia durua egu nega lau gaukaralaia namonamo totona?’ Laloatao, “inai nega be nega dikana,” bona Satani ena tanobada be kahirakahira do ia ore. Unai dainai, aonega dalana be iseda mauri do ita gaukaralaia Iehova ita hamoalea totona.

6. Maria be dahaka abia hidi ia karaia, bona dahaka dainai unai be abia hidi maorona?

⁶ Anina bada gaudia oi atoa guna. Iseda nega ita gaukaralaia namonamo totona, ita ura karaia gau namodia amo tamona sibona do ita abia hidi. Iesu ese Maria bona Mareta ia vadivadi henia ena sivarai amo unai point ia hedinarai. Iesu ese idia ia vadivadi henia dainai, Mareta ia moale bada bona aniani badana ia hegaegaelaia. To, iena tadina, Maria be unai nega ia gaukaralaia Lohiabada ena aena badinai ia helai, bona ena hadibaia herevana ia kamonai. Mareta ese ia karaia karana be kerere lasi, to Iesu ia gwau Maria be “gau namona ia abia hidi.” (Luka 10:38-42) Gabeai, reana Maria be idia ania aniani ia laloa boio, to ita diba Iesu amo ia dibaia gauna ia laloa boio lasi. Maria be unai nega kwadogina ai Iesu ia bamoa karana ia laloa bada, unai hegeregerena ita danu ese Iehova totona do ita atoa nega ita laloa bada be namo. Edena dala ai unai nega ita gaukaralaia namonamo diba?

7. Dahaka dainai guriguri, sibona iseda stadi, bona laloa dobu karana be mai anina bada?

⁷ Guriguri, sibona iseda stadi, bona laloa dobu karana be tomadiho ena kahana ta. Ita guriguri neganai, ita ia lalokau henia guba Tamana ita hereva henia unai. (Sal. 5:7) Danu, Baibel ita stadilaia neganai, ita ese aonega bada herea Diravana amo diba ita abia. (Aon. 2:1-5) Iehova ese ia karaia gaudia ita laloa dobu neganai, iena kara namodia ita laloa bona ita bona taunimanima ibounai totona ia ura karaia gau namodia ita laloatao. Unai be iseda nega ita gaukaralaia namonamo dalana. To, iseda nega be bada lasi dainai, dahaka ese ita ia durua diba?

8. Iesu be tano gagaena ai ia karaia gaudia amo dahaka ita dibaia?

 ⁸ Bema mai dalana, regerege lasi gabuna oi abia hidi. Mani Iesu ena haheitalai oi laloa. Ia ura ena hesiai gaukara ia hamatamaia gwauraia neganai, dina 40 lalonai tano gagaena ai ia noho. (Luka 4:1, 2) Unai regerege lasi gabuna ai, Iesu ese Iehova ia guriguri henia bona iena Tamana ese ia henia gaukara ia laloa dobu. Unai ese ia durua do ia davaria hahetoho ia haheaukalaia totona. Edena dala ai Iesu ena haheitalai ese oi ia durua diba? Bema oi be famili badana lalonai oi noho, reana ruma ai regerege lasi gabuna ta oi davaria be auka. Vadaeni reana murimuri ai gabu ta oi abia hidi diba. France ai, taihu Julie ia ura Iehova ia guriguri henia neganai, unai bamona ia karaia. Ia bona ena adavana be ruma badana ta ai daiutu maragina dekenai idia noho bona regerege be bada. Julie ia gwau: “Unai dainai, dina ta ta ai uma gabu badana ta dekenai lau lao. Unuseniai, regerege be lasi, lau sibona lau helai bona Iehova lau hereva henia diba.”

9. Ena be Iesu ia bisi bada herea, to edena dala ai ia hahedinaraia iena hetura karana Iehova ida ia laloa bada?

⁹ Iesu be ia bisi bada herea. Ena haroro gaukara lalonai gabu ta ta ia lao neganai, hutuma be ia murinai idia lao bona idia ura iena hereva idia kamonai. Nega ta Iesu idia itaia totona, “siti taudia ibounai be ruma ena iduara dekenai idia haboua.” Ena be unai ia vara, to Iesu be nega ia atoa Iehova ia hereva henia totona. Dina ia do daekau lasi lalonai, Iesu be “taunimanima lasi gabuna ta” ia lao bona unuseniai ena Tamana ia guriguri henia.​—Mar. 1:32-35.

10-11. Mataio 26:40, 41 hegeregerena, Getesemane umana ai Iesu be ena hahediba taudia ia hamaoroa dahaka do idia karaia, to dahaka ia vara?

¹⁰ Iesu ena hanuaboi ginigabena ai, ia ese regerege lasi gabuna ta ia tahua lou, unai amo do ia laloa dobu bona guriguri. Unai gabu be Getesemane umana. (Mat. 26:36) Unai hanuaboi ai, Iesu ese ena hahediba taudia dekenai guriguri totona mai anina bada gauna ta ia gwauraia.

¹¹ Mani ia vara gauna ita laloa. Getesemane ai idia ginidae neganai, hanuaboi 12 o’klok ia hanaia vadaeni. Iesu ese ena aposetolo taudia ia hamaoroa “umui gima noho,” bona ia lao ia guriguri totona. (Mat. 26:37-39) To ia guriguri noho lalonai, idia mahuta. Iesu ia davaria idia mahuta noho neganai, idia ia hamaoroa lou, “umui gima noho bona umui guriguri noho.” (Mataio 26:40, 41 duahia.) Iesu ia laloparara idia lalohekwarahi bona idia hesiku bada, bona ia diba edia “tauanina be ia manoka.” To, nega iharuana bona ihatoina guriguri totona ia lao bona ia giroa lou neganai,  ia davaria idia guriguri lasi, to idia mahuta noho.​—Mat. 26:42-45.

12. Bema ita mamia ita lalohekwarahi bada o hesiku dainai ita guriguri diba lasi, dahaka ita karaia be namo?

¹² Nega maorona oi abia hidi. Nega haida reana ita lalohekwarahi eiava hesiku dainai, ita mamia ita hegeregere lasi ita guriguri totona. Bema oi dekenai unai ia vara, namona be oi diba ma haida dekenai unai ia vara danu. Dahaka oi karaia diba? Hanuaboi ai Iehova idia guriguri henia taudia haida idia mamia adorahi kahanai idia guriguri be namo, badina unai nega ai idia hesiku momokani lasi. Ma haida idia davaria idia helai eiava tui diho neganai, edia guriguri idia gwauraia namonamo diba. To, bema oi mamia oi lalohisihisi eiava lalohekwarahi bada dainai oi hegeregere lasi oi guriguri totona be edena bamona? Iehova dekenai emu hemami oi gwauraia. Bona oi diba momokani iseda hebogahisi Tamana ese emu hemami do ia lalopararalaia.​—Sal. 139:4.

13. Edena dala ai elektronik gaudia ese iseda guriguri, stadi eiava hebou karana ia hadikaia diba?

¹³ Oi stadi neganai lalona veria gaudia oi dadaraia. Eda hetura karana Iehova ida ita hagoadaia totona guriguri karana be gau badana. To unai sibona lasi, namona be Dirava ena Hereva ita stadilaia bona kongrigeisen heboudia dekenai ita lao, unai ese ita ia durua Dirava kahirakahira ita lao totona. Sibona emu stadi oi karaia bona kongrigeisen heboudia totona nega oi gaukaralaia namonamo, a? Sibona oi nanadaia: ‘Lau ura sibona egu stadi lau karaia eiava hebou negadia ai dahaka gaudia ese egu lalona idia veria?’ Reana fon ia rini, email, teks mesiji eiava unai bamona gauna ta, a? Hari inai negai, taunimanima bilioni momo be elektronik gaudia idia gaukaralaia. Tahua gaukara idia karaia taudia haida idia gwau, bema oi ura gaukara ta oi karaia to telefon be oi badinai ia noho, unai ese oiemu lalona ia veria diba. Profesa ta ia gwau: “Emu lalona be oi karaia gaukara dekenai ia noho lasi, to ma gau idauna ta oi laloa noho.” Hebouhebou badadia ai, ma haida edia kamonai karana hadikaia lasi totona, nega momo ita idia hadibaia iseda fon ena regena do ita hamaragia. Sibona ita noho neganai unai bamona ita karaia danu, unai amo ita bona Iehova totona do ita gaukaralaia nega be gau ta ese do ia hadikaia lasi, ani?

14. Filipi 4:6, 7 hegeregerena, edena dala ai Iehova ese ita ia durua diba?

 ¹⁴ Gau ta ese emu lalona ia veria lasi totona Iehova oi noia. Sibona emu stadi oi karaia, eiava kongrigeisen hebouna ai gau ta ese emu lalona ia veria neganai, Iehova oi noia oi ia durua totona. Oi lalohekwarahi neganai, Iehova tomadiho henia karadia oi atoa guna be auka, to unai gaudia oi karaia be mai anina bada. Iehova dekenai maino totona do oi noinoi, unai maino ese emu kudouna bona “lalona” do ia gimaia.​—Filipi 4:6, 7 duahia.

15. Iehova totona nega oi atoa ena namo ta be dahaka?

¹⁵ Nega oi atoa Iehova oi hereva henia, kamonai henia, bona laloa karana be mai ena namo. Edena dala ai? Gau ginigunana be, abia hidi namodia oi karaia. Baibel ia gwau: “Aonega taudia ida ia raka tauna be do ia aonega.” (Aon. 13:20) Unai dainai, aonega ena Badina, Iehova, totona nega oi atoa neganai, oi be aonega tauna ai do oi lao. Do oi laloparara edena bamona ia do oi hamoalea bona ia ura henia lasi gaudia oi dadaraia diba.

16. Edena dala ai Iehova totona nega ita atoa karana ese iseda hadibaia gaukarana ia hanamoa diba?

¹⁶ Gau iharuana be, hadibaia tauna namona ai oi lao. Ma ta ida Baibel ita stadilaia neganai, iseda tahua gauna badana be ita ura stiuden ita durua Iehova kahirakahira ia lao totona. Iseda guba Tamana ida ita herevahereva bona iena kara ita diba namonamo neganai, iseda lalokau ia totona be do ia goada ia lao, bona do ita hegeregere iseda stiuden ita durua Iehova ia lalokau henia totona. Iesu be unai bamona ia karaia. Ia be mai ura bada ida ena Tamana ia herevalaia dainai, ia murinai idia raka taudia ese Iehova idia lalokau henia danu.​—Ioa. 17:25, 26.

17. Iseda abidadama ia goada totona, dahaka dainai guriguri bona sibona iseda stadi karana be mai anina bada?

¹⁷ Gau ihatoina be, emu abidadama ia goada ia lao. Dirava oi noia oi ia durua, hagoadaia, bona hakaua neganai, ia vara gauna mani oi laloa. Iehova ese unai guriguri ta ta ia haerelaia neganai, ia dekenai emu abidadama ia goada ia lao. (1 Ioa. 5:15) Dahaka gauna ma ta ese emu abidadama ia hagoadaia diba? Sibona emu stadi karana. Laloatao, “taunimanima be hereva idia kamonai murinai, idia abidadama.” (Roma 10:17) To, abidadama ia goada totona, diba ita abia sibona be hegeregere lasi. Dahaka gauna ma ta ita karaia be namo?

18. Dahaka dainai ita laloa dobu be namo? Haheitalai gwauraia.

¹⁸ Ita dibaia gaudia ita laloa dobu be namo. Mani Salamo 77 ia torea tauna ita laloa. Ia lalohisihisi badina ia mamia Iehova ese ia bona iena Israela varavara ia lalonamo henia lasi.  Unai ia laloa momo dainai hanuaboi ai ia mahuta namonamo lasi. (Siri 2-8) Dahaka ia karaia? Iehova ia hamaoroa: “Bona emu gaukara ibounai do lau laloa dobu, bona oi karaia karadia do lau laloa dobu.” (Siri 12) Momokani, salamo torea tauna be guna Iehova ese iena taunimanima totona ia karaia gaudia ia diba, to ia laloa: “Dirava be ena lalonamo karana ia laloaboio vadaeni, a? Eiava ia badu dainai ena hebogahisi karana ia ore, a?” (Siri 9) Ia ese guna Iehova ia karaia hoa gaudia bona ia hahedinaraia heduru bona hebogahisi karadia ia laloa. (Siri 11) Dahaka ia vara? Salamo torea tauna ia diba momokani Iehova be iena taunimanima do ia dadaraia lasi. (Siri 15) Unai hegeregerena, guna Iehova ese iena taunimanima bona oi totona ia karaia gaudia oi laloa dobu neganai, emu abidadama do ia goada.

19. Bema Iehova totona nega ita atoa, dahaka namo ma ta do ita davaria?

¹⁹ Mai anina bada gauna namba 4 be, emu lalokau Iehova totona ia goada ia lao. Lalokau ese oi do ia doria Iehova oi kamonai henia, Ia oi hamoalea totona senisi haida oi karaia, bona hahetoho do oi haheaukalaia. (Mat. 22:37-39; 1 Kor. 13:4, 7; 1 Ioa. 5:3) Iehova oi tura henia namonamo karana be dava bada gauna!​—Sal. 63:1-8.

20. Edena dala ai Iehova totona nega oi gaukaralaia namonamo diba?

²⁰ Laloatao, guriguri, sibona iseda stadi, bona laloa dobu karana be iseda tomadiho ena kahana ta. Iesu hegeregerena, Iehova oi hereva henia totona regerege lasi gabudia oi tahua. Emu lalona idia veria anina lasi gaudia oi dadaraia. Tomadiho karadia idauidau oi karaia neganai, Iehova ena heduru oi noia unai gaudia sibona oi laloa totona. Bema hari emu nega oi gaukaralaia namonamo, Iehova ese oi do ia hanamoa bona Dirava ena tanobada matamatana lalonai mauri hanaihanai do oi moalelaia.​—Mar. 4:24.