1. Davida be dahaka hekwakwanai ia davaria?

 DAVIDA be ena mauri ia laloa dainai ia heau. Israela ena king goadana, Saulo, ia ura Davida ia hamasea. Davida be aniani ia ura neganai, Nobu ena siti dekenai ia lao bona unuseniai paraoa 5 totona ia noinoi. (1 Sam. 21:1, 3) Gabeai, ia bona ena tatau be kohua ta lalonai idia noho. (1 Sam. 22:1) Dahaka dainai Davida dekenai unai gaudia idia vara?

2. Saulo be dahaka kara dikadia ia karaia? (1 Samuela 23:16, 17)

² Saulo be Davida dekenai ia mama, badina tuari momo lalonai ia kwalimu dainai taunimanima momo ese idia ura henia bona hanamoa. Danu, Saulo ia diba ena kamonai lasi karana dainai Iehova ese ia dadaraia, bona Iehova be Davida ia abia hidi vadaeni king ai do ia lao totona. (1 Samuela 23:16, 17 duahia.) To, Saulo be Israela ena king ai ia do noho, bona ia be mai ena tuari orea badana bona ena taunimanima be momo herea, unai dainai Davida be ena mauri totona ia heau. Saulo ia laloa Dirava ena ura Davida totona do ia koua diba, a? (Isa. 55:11) Baibel be unai ia gwauraia lasi, to ita dibaia gauna be inai: Saulo be sibona dekenai dika ia havaraia noho. Dirava idia dadaraia taudia be hanaihanai idia kwalimu lasi!

3. Ena be Davida ena noho dalana ia auka, to ena hemami be edena bamona?

³ Davida be manau tauna. Ia be Israela ena king ai ia lao totona sibona ese abia hidi ia karaia lasi, to Iehova ese ia abia hidi. (1 Sam. 16:1, 12, 13) Saulo ese Davida ia inai henia bada.  To Davida be ia davaria hekwakwanai dainai Iehova dekenai ia badu lasi. Bona kohua lalonai aniani be bada lasi neganai, ia maumau lasi. To reana Davida be unai kohua lalonai ia noho neganai, inai ane namona ia torea, bona unai ane ena hereva haida be inai atikol ena siri badana ai idia noho, ia gwau: “Iehova idia tahua taudia be gau namodia dekenai do idia dabu lasi.”​—Sal. 34:10.

4. Edena henanadai 4 do ita herevalaia, bona dahaka dainai unai be mai anina bada?

⁴ Hari, Iehova ena hesiai taudia momo be nega haida aniani bona mauri durua gaudia dekenai idia hegeregere lasi. * COVID-19 gorerena lalonai, Iehova ena hesiai taudia momo dekenai unai ia vara. Bona “hisihisi badana” ia kahirakahira noho lalonai, ita diba mauri be do ia auka momokani. (Mat. 24:21) Unai dainai, inai henanadai 4 do ita haerelaia: Edena dala ai Davida be ‘gau namodia dekenai ia dabu lasi’? Dahaka dainai ita laloa ita dekenai idia noho gaudia be hegeregere? Dahaka dainai ita diba momokani Iehova be ita do ia naria? Bona edena dala ai vaira nega totona ita hegaegae diba?

5-6. Salamo 23:1-6 ese edena dala ai ita ia durua, Davida ena hereva “gau namodia dekenai ita dabu lasi” ita lalopararalaia totona?

⁵ Davida ia gwau Iehova ena hesiai taudia be “gau namodia dekenai do idia dabu lasi” ena anina be dahaka? Salamo 23 ese ita ia durua diba unai hereva ita lalopararalaia totona. (Salamo 23:1-6 duahia.) Davida ese unai salamo be inai hereva amo ia hamatamaia: “Iehova be lau ia naria, iena mamoe bamona. Lau be gau ta dekenai do lau dabu lasi.” Bona salamo ena siri oredia ai Davida ese mai anina bada gaudia ia gwauraia, hegeregere ia abia dae Iehova be ena Mamoe Naria Tauna Badana dainai, Iehova ese ia dekenai ena abidadama durua gaudia momo ia henia. Iehova ese Davida be “kara maoromaoro daladia”ai ia hakaua bona nega namo bona nega  dikadia ai ia durua noho. Davida ia diba Iehova ena “rei gabuna namona” ai ia noho neganai, hekwakwanai do ia davaria danu. Nega haida, ia lalomanoka, unai be hegeregere “dibura momokani gabuna” ai ia raka, bona ia do idia inai henia. To Iehova be Davida ena Mamoe Naria Tauna Badana dainai, ia be ‘dika gauna ta dekenai do ia gari lasi.’

⁶ Inai henanadai ena haere do ita dibaia: Edena dala ai Davida be ‘gau namodia dekenai ia dabu lasi’? Iehova kahirakahira ia noho totona ia hagoadaia gaudia be momo herea. Ia moale totona kohu momo ia abia be anina lasi. Ia dekenai Iehova ese ia henia gaudia be hegeregere. Davida dekenai Iehova ena hanamoa bona ena naria karana be mai anina bada.

7. Luka 21:20-24 hegeregerena, Iudea Keristani taudia be dahaka hekwakwanai idia davaria?

⁷ Davida ena hereva amo ita diba kohu momo tahua karana dekenai lalohadai maorona ita abia be mai anina bada. Ita dekenai idia noho kohu ita moalelaia diba, to namo lasi unai gaudia ese iseda mauri idia biagua. Iudea ai idia noho Keristani ginigunadia ese unai hereva momokanina idia lalopararalaia be namo. (Luka 21:20-24 duahia.) Iesu ese idia ia hadibaia nega do ia mai Ierusalema ena siti be ‘tuari oreadia ese do idia hagegea.’ Unai ia vara neganai, namona be “ororo dekenai idia heau lao.” Siti amo idia heau siri dainai do idia mauri, ena be gau momo do idia rakatania. Gima Kohorona ta be inai bamona ia gwau: “Edia tano bona ruma idia rakatania, bona edia ruma lalodiai edia kohu danu idia abia lao lasi. Iehova ena heduru bona naria siahuna idia abidadama henia dainai, iena tomadiho idia atoa guna bona taunimanima ese idia laloa bada gaudia be idia laloa bada lasi.”

8. Iudea ai idia noho Keristani taudia dekenai ia vara hekwakwanai amo dahaka ita dibaia?

⁸ Iudea ai idia noho Keristani taudia dekenai ia vara hekwakwanai amo dahaka ita dibaia? Ataiai ita gwauraia Gima Kohorona ma ia gwau: “Reana kohu ita laloa dalana ai hahetoho do ita davaria; idia be mai anina bada momokani, eiava Dirava ena kahanai idia noho taudia ibounai ese do idia davaria hahemauri be mai anina bada, a? Dokona ia mai negana, hekwakwanai idauidau do ita haheaukalaia bona gau haida do ita dadaraia. Herevana dahaka do ia vara to gau badana be ita noho hegaegae unai ita karaia totona, aposetolo edia nega ai Keristani taudia idia karaia bamona. Idia be Iudea amo . . . idia lao.” *

9. Edena dala ai Paulo ese Heberu taudia dekenai ia henia sisiba be ita ia hagoadaia?

⁹ Mani oi laloa, unai Keristani taudia be gau momo idia rakatania dainai, idia noho gabu matamatana ai edia mauri do ia auka, ani? Namona be idia abia dae momokani Iehova ese idia do ia durua edia mauri durua gaudia idia abia totona. Bona heduru dalana ia noho. Lagani 5 gunanai Roma taudia ese Ierusalema idia do hagegea lasi neganai, aposetolo Paulo ese Heberu taudia dekenai mai anina bada gauna ta ia gwauraia, ia gwau: “Namona be emui mauri dalana amo umui hahedinaraia, moni umui ura henia dikadika lasi, to umui dekenai idia noho gaudia be hegeregere. Badina Dirava ia gwau: “Lau ese umui do lau negea lasi, bona umui do lau rakatania lasi.’ Unai dainai mai lalogoada ida do ita gwau: “Iehova be egu durua tauna, lau be do lau gari lasi. Taunimanima be lau dekenai dahaka do idia karaia?’” (Heb. 13:5, 6) Paulo ena sisiba idia badinaia taudia dekenai ia auka lasi edia noho gabuna matamatana ai, kohu momo lasi maurina idia noholaia totona. Idia diba momokani Iehova be edia ura gaudia do ia henia. Paulo ena hereva ese ita ia hagoadaia, ita danu ita  abia dae diba Iehova ese iseda ura gaudia do ia henia.

10. Dahaka ese Paulo ia durua Dirava dekenai ia tabekau totona?

¹⁰ Paulo ese Timoteo dekenai ia henia sisiba be ita dekenai mai anina bada danu. Ia gwau: “Unai dainai, bema ita be mai iseda aniani, dabua bona noho gabuna, unai be hegeregere.” (1 Tim. 6:8) Unai ena anina be aniani namona do ita moalelaia lasi, ruma namona ai ita noho lasi, eiava dabua matamata ita hoia lasi, a? Paulo be unai bamona ia hereva lasi. To ena hereva anina be, bema ita dekenai tauanina durua gaudia idia noho, unai be hegeregere. (Fili. 4:12) Unai ese Paulo ia durua Dirava dekenai ia tabekau totona. Oibe, iseda hetura karana Dirava ida be mai anina bada, to ita dekenai idia noho kohu be anina bada lasi.​—Hab. 3:17, 18.

11. Mose ese Israela taudia dekenai ia gwauraia herevana amo dahaka ita dibaia?

¹¹ Ita ura henia gaudia dekenai iseda laloa dalana bona Iehova ena laloa dalana be idau. Israela taudia be tano gagaena ai lagani 40 idia noho murinai, mani Mose ese idia ia hamaoroa herevana ita laloa: “Iehova emui Dirava ese umui karaia gaudia ibounai lalonai umui ia hanamoa. Umui be inai taunimanima lasi gabuna dekenai umui loaloa neganai, umui ia naria namonamo. Inai lagani 40 lalonai Iehova emui Dirava be umui ida, bona gau ta dekenai umui dabu lasi.” (Deu. 2:7) Lagani 40 lalonai, Iehova ese Israela taudia dekenai mana ia  henia. Bona Aigupito idia rakatania negana amo, idia karaia dabua be ia dika lasi. (Deu. 8:3, 4) Ena be Israela taudia idia laloa idia dekenai idia noho gaudia be hegeregere lasi, to Mose ese idia ia hadibaia loulou idia be gau ta dekenai idia dabu lasi. Bema ita abia dae ita dekenai idia noho gaudia be hegeregere, Iehova do ia moale. Ia ura ita dekenai ia henia gaudia ita moalelaia bona ita laloparara unai be iena harihari gaudia.

12. Dahaka ese ia hahedinaraia Davida be sibona ena goada dekenai ia tabekau lasi?

¹² Davida ia diba Iehova ese ia idia lalokau henia taudia ia rakatania lasi bona idia ia naria. Davida be ena inai taudia amo ia hunia noho lalonai Salamo 34 ia torea. Iena abidadama be ia goada dainai ia diba momokani “Iehova ena aneru” be ia idia hagegea o “gimaia.” (Sal. 34:7) Reana Davida ese Iehova ena aneru be tuari orea ta ida ia hahegeregerea, idia be hanaihanai edia inai taudia totona idia gima. Ena be Davida be tuari tauna goadana ta bona Iehova ia gwauhamata king ai do ia halaoa, to Davida be vilipopo amo nadi ia negea eiava tuari kaia amo ena inai taudia ia tuari henia totona, sibona ena goada dekenai ia tabekau lasi. (1 Sam. 16:13; 24:12) Davida be Dirava dekenai ia tabekau bona ia diba momokani Iehova ena aneru be ia idia “gari henia taudia ibounai . . . ia hamauria.” Momokani, hari Iehova be hoa dalanai ita do ia gimaia lasi. Unai dainai ena be ita mase, to ita diba Iehova dekenai idia tabekau taudia be mauri hanaihanai do idia abia.

13. Dahaka dainai do ia auka lasi Magoga tauna Goga ese ita ia tuari henia totona, to dahaka dainai do ita gari lasi? (Rau 1 ena laulau itaia.)

¹³ Kahirakahira, Iehova dekenai ita tabekau karana do idia tohoa. Magoga tauna Goga, idia haboua tanobada besedia unai, ese Dirava ena taunimanima do ia tuari henia, reana do ita laloa ita do idia hamasea. Namona be ita abia dae momokani Iehova be ita do ia hamauria. Bese idauidau taudia do idia laloa ita be ta ese ia gimaia lasi mamoe bamona. (Ese. 38:10-12) Ita dekenai tuari kohudia be lasi bona ita be tuari totona ita treinini lasi. Unai dainai do idia laloa ia auka lasi ita idia tuari henia totona. To do idia diba lasi Iehova ena aneru be idia hegaegae ita idia gimaia totona. Unai ita diba badina Dirava ita abidadama henia. To bese idauidau taudia be unai idia diba lasi badina Dirava idia abidadama henia lasi. Unai dainai guba ena tuari oreana be ita totona do idia tuari neganai, do idia hoa momokani!​—Apok. 19:11, 14, 15.

14. Dahaka dainai vaira nega totona ita hegaegae?

¹⁴ Dahaka dainai hari vaira nega totona ita hegaegae? Ginigunana be, kohu momo tahua karana dekenai lalohadai maorona ita abia, badina nega ta unai gaudia do idia noho lasi. Danu ita dekenai idia noho gaudia be hegeregere bona ita moale badina Iehova ita tura henia. Magoga tauna Goga ese ita ia tuari henia neganai, do ita abia dae momokani Iehova be ita do ia gimaia badina iseda Dirava ita diba namonamo.

15. Davida ia matamata neganai dahaka ia vara, unai amo ia diba Iehova be ia do ia durua noho?

¹⁵ Mani ita itaia dahaka ese Davida ia durua bona ita ia durua danu hahetoho negadiai ita hegaegae totona. Davida ia gwau: “Iehova oi tohoa bona do oi itaia, ia be namo. Dirava be edia hunia gabuna ai idia halaoa taudia be idia moale.” (Sal. 34:8) Davida ena hereva amo ia hahedinaraia, ia be Iehova ena heduru dekenai ia tabekau. Davida be nega ibounai unai bamona ia karaia bona ena Dirava ese ia  rakatania lasi. Davida ia mero matamata neganai Filistia ena tau badana Goliata ia tuari henia, bona unai tau goadana ia hamaoroa: “Hari dina Iehova ese oi be egu imana dekenai do ia atoa.” (1 Sam. 17:46) Gabeai, Davida be Saulo ena hesiai gaukara ia karaia neganai, nega momo Saulo ia ura Davida ia alaia. To “Iehova be [Davida] ida.” (1 Sam. 18:12) Davida be guna Iehova ese ia durua dainai, ia diba hari ena hekwakwanai lalonai Iehova ese do ia durua.

16. Edena dala ai Iehova ena kara namodia ita “tohoa” diba?

¹⁶ Bema hari Iehova ena heduru dekenai ita tabekau hanaihanai, ita diba momokani ia ese nega vairai ita do ia hamauria. Hegeregere, bosi ita noia dina haida do ita gaukara lasi, unai amo sekit eiava rijinol hebouhebou do ita lao eiava bosi ita noia iseda gaukara ena sediual ia haidaua unai amo kongrigeisen heboudia do ita reaia lasi bona haroro gaukara do ita habadaia, unai ita karaia totona Iehova ita abidadama henia bona ia dekenai ita tabekau be namo. Reana bosi ese iseda noinoi ia dadaraia bona iseda gaukara ita haboioa diba. To ita abia dae momokani Iehova ese ita do ia rakatania lasi bona nega ibounai eda dabu gaudia do ia henia, a? (Heb. 13:5) Ful-taim hesiai gaukara lalonai momo be Iehova ese idia ia durua dalana idia itaia. Oibe, Iehova be ena hesiai taudia ia rakatania lasi.

17. Lagani 2022 ena siri badana be dahaka, bona dahaka dainai ia be siri maorona?

¹⁷ Iehova be iseda kahanai ia noho dainai, vaira negai do idia vara gaudia totona ita gari lasi. Iseda Dirava be ita do ia rakatania lasi, bema iena Basileia ita atoa guna. Idia mai noho nega aukadia totona hari ita hegaegae bona ita abia dae momokani Iehova be ita do ia rakatania lasi. Unai ita laloatao totona Hakaua Oreana ese lagani 2022 ena siri badana be Salamo 34:10 amo ia abia, ia gwau: “Iehova idia tahua taudia be gau namodia dekenai do idia dabu lasi.”