1. Iamesi ena ruma bese mani oi herevalaia.

 IESU ena tadina, Iamesi, be Iehova idia abidadama henia ruma besena lalonai ia tubu daekau. Iena tama sina, Iosepa bona Maria, be Iehova idia lalokau henia bada bona idia gaukara goada ia idia hesiai henia totona. Iamesi ese ia moalelaia hahenamo ma ta be, iena kakana be Mesia. Oibe, Iamesi be unai famili lalonai ia noho be hahenamo badana!

2. Dahaka dainai Iamesi ese ena kakana ia laloa bada be namo?

² Badina momo dainai Iamesi be ena kakana ia laloa bada be namo. (Mat. 13:55) Hegeregere, Iesu ena mauri lagani be 12 neganai, Toretore Helagadia ia diba namonamo dainai Ierusalema dekenai hadibaia taudia idia hoa. (Luka 2:46, 47) Bema Iamesi be Iesu ida kapenta gaukara idia karaia hebou, reana ena kakana do ia diba namonamo. Nathan H. Knorr be nega momo ia gwau, “Ta ida oi gaukara hebou neganai, ia do oi diba namonamo.” * Danu, reana Iamesi ese ia itaia “Iesu ia tubu daekau noho lalonai, ena aonega ia bada ia lao bona Dirava bona taunimanima ese ia idia ura henia bada.” (Luka 2:52) Unai dainai, reana do ita laloa Iamesi be Iesu ena hahediba tauna ginigunana ta. To unai bamona ia vara lasi.

3. Iesu ena gaukara ia hamatamaia neganai, Iamesi be Iesu ia badinaia, a?

³ Iesu be ena haroro gaukara ia hamatamaia neganai, Iamesi  be iena hahediba tauna ta ai ia lao lasi. (Ioa. 7:3-5) Bona reana Iamesi be varavara haida bamona ia laloa Iesu be “ia kavakava vadaeni.” (Mar. 3:21) Bona Iesu be hisihisi auna dekenai idia hamasea neganai, Baibel ese ia hahedinaraia lasi Iamesi be ena sinana, Maria, ida ia noho.​—Ioa. 19:25-27.

4. Dahaka do ita herevalaia?

⁴ Gabeai, Iamesi be Iesu ia abidadama henia bona Keristani kongrigeisen ena elda ta ai ia lao. Inai atikol ai, Iamesi dekenai ita dibaia gaudia rua do ita herevalaia: (1) Dahaka dainai ita manau be namo, bona (2) edena dala ai hadibaia tauna namona ai ita lao.

5. Iesu ia toreisi lou murinai Iamesi dekenai ia hedinarai neganai, Iamesi be dahaka ia karaia?

⁵ Edena negai Iamesi be Iesu ia badinaia? Iesu ia toreisi lou murinai, ia be “Iamesi dekenai ia hedinarai, bena aposetolo taudia ibounai dekenai ia hedinarai.” (1 Kor. 15:7) Unai ia vara murinai, Iamesi be Iesu ena hahediba tauna ta ai ia lao. Ierusalema ena atai daiutuna dekenai aposetolo taudia be lauma helaga abia totona idia naria noho lalonai, Iamesi be idia ida ia noho. (Kara 1:13, 14) Gabeai, Iamesi be Keristani taudia ginigunadia edia hakaua oreana ena memba ta ai ia lao. (Kara 15:6, 13-22; Gal. 2:9) Bona lagani 62 C.E. do lasi neganai, lauma helaga ese ia hasiahua bona horoa Keristani taudia dekenai revareva ta ia torea. Hari unai revareva ese ita ia durua danu, ena be iseda helaro be guba o tanobada dekenai. (Iam. 1:1) Aposetolo edia negai histori torea tauna Josephus ia gwau, Iuda ena Hahelaga Tauna Badana Ana ena natuna, Anania, ena oda dainai Iamesi idia hamasea. Iamesi be Iehova ia badinaia noho ela bona ena tanobada maurina ia rakatania.

6. Edena dala ai Iamesi be tomadiho gunalaia taudia amo ia idau?

⁶ Iamesi be manau tauna. Dahaka dainai unai bamona ita gwau? Iamesi bona tomadiho gunalaia taudia ese Iesu idia kara henia dalana edia idau mani ita laloa. Iamesi ese ia itaia gauna amo ia hamomokania Iesu be Dirava ena natuna, bona mai manau ida unai ia abia dae. To Ierusalema ai dubu biagudia be unai bamona idia karaia lasi. Hegeregere, idia abia dae diba Iesu ese Lasaro ia hatorea isi lou, to unai idia karaia lasi. Bona idia abia dae lasi Iesu be Iehova ese ia siaia. Danu idia ura Iesu bona Lasaro idia hamasea. (Ioa. 11:53; 12:9-11) Gabeai Iesu ia toreisi lou  neganai, idia ura taunimanima amo unai sivarai idia hunia. (Mat. 28:11-15) Unai tomadiho gunalaia taudia be idia hekokoroku dainai, Mesia idia dadaraia.

7. Dahaka dainai hekokoroku karana ita dadaraia be namo?

⁷ Dahaka ita dibaia? Hekokoroku karana ita dadaraia, bona mai ura ida Iehova amo diba ita abia. Gorere dainai ta ena kudouna ia gaukara namonamo lasi, unai hegeregerena hekokoroku karana dainai Iehova ena hakaua daladia do ita badinaia lasi. Farisea taudia be idia hekokoroku dainai, idia ura lasi idia abia dae Iesu be Dirava ena lauma ia abia bona ia be Dirava ena Natuna. (Ioa. 12:37-40) Idia hekokoroku karana be dika momokani, badina unai ese idia dekenai mauri hanaihanai abia dalana ia koua. (Mat. 23:13, 33) Iseda kara, lalohadai, bona ita karaia abia hidi dekenai, Dirava ena Hereva bona ena lauma ese ita ia hakaua be gau badana! (Iam. 3:17) Iamesi be ia manau dainai, mai ura ida Iehova amo diba ia abia. Bona ia manau dainai hadibaia tauna namona ai ia lao, hari unai do ita herevalaia.

8. Dahaka ese ita do ia durua hadibaia tauna namona ai ita lao totona?

⁸ Iamesi be sikuli badana dekenai ia lao lasi. Unai dainai dubu gunalaia taudia idia laloa ia be ‘sikuli bada lasi bona dagi lasi tauna,’ aposetolo Petero bona Ioane hegeregerena. (Kara 4:13) To Iamesi be hadibaia tauna namona, badina iena ladana ia noho Baibel bukana ita duahia neganai, unai ita dibaia. Iamesi bamona, reana ita danu be sikuli badana dekenai ita lao lasi. To, Iehova ena lauma ena heduru bona iena orea amo ita abia treinini dainai, ita danu be hadibaia tauna namona ai ita lao diba. Iamesi be hadibaia gaukara ia karaia namonamo bona unai amo ita dibaia gaudia do ita herevalaia.

9. Iamesi ena hadibaia dalana mani oi herevalaia.

⁹ Iamesi be auka lasi herevadia ia gaukaralaia. Unai dainai, ena kamonai taudia idia diba dahaka do idia karaia bona edena dala ai do idia karaia. Auka lasi dalanai ia hadibaia gauna ta mani ita laloa, hegeregere ia gwau Keristani taudia idia kara auka henia neganai,  idia badu lasi be namo. Ia gwau: “Ita gwau idia haheauka taudia be idia moale. Umui be Iobu ena haheauka sivaraina umui kamonai vadaeni bona Iehova ese ia hanamoa dalana umui diba. Unai amo umui laloparara Iehova be lalokau bona hebogahisi bada Diravana.” (Iam. 5:11) Iamesi be Toretore Helagadia lalonai ia noho haheitalai amo ena tadikaka ia hadibaia. Ia ese Dirava ena Hereva ia gaukaralaia ia hadibaia taudia ia durua, unai amo do idia itaia Iehova be nega ibounai ia idia badinaia taudia ia hanamoa, Iobu ia hanamoa bamona. Iamesi be ena hadibaia karana lalonai auka lasi herevadia bona hamomokania gaudia ia gaukaralaia dainai, taunimanima be Iehova idia hanamoa.

10. Ta ita hadibaia neganai, edena dala ai Iamesi ita tohotohoa diba?

¹⁰ Dahaka ita dibaia? Auka lasi herevadia ita gaukaralaia, bona Baibel amo ita hadibaia. Ma haida ita hadibaia neganai, namo lasi ita hahedinaraia iseda diba be bada, to gau badana be ita hahedinaraia Iehova ena diba be bada herea bona ia ese idia ia laloa bada. (Roma 11:33) Unai ita karaia totona, nega ibounai ita herevalaia gaudia be Baibel amo ita abia. Hegeregere, iseda stiuden dekenai do ita karaia gauna ita herevalaia lasi, to idia ita durua Baibel ai idia noho haheitalai idia laloa bona Iehova ena lalohadai bona hemami idia lalopararalaia. Unai amo idia dibaia gaudia do idia badinaia bena do idia ura Iehova idia hamoalea.

11. Iamesi ena negai Keristani taudia edia manoka gaudia haida be dahaka, bona dahaka sisiba ia henia? (Iamesi 5:13-15)

¹¹ Iamesi be mai momokani ida ma haida ia durua. Ia torea revareva amo ia hahedinaraia ia be ena tadikaka taihu edia manoka gaudia ia diba, bona hakaua dala namodia ia henia unai idia hanaia totona. Hegeregere, Keristani taudia haida be sisiba idia badinaia haraga lasi. (Iam. 1:22) Haida be kohu momo taudia sibona idia kara namo henia. (Iam. 2:1-3) Bona haida be edia hereva dalana idia biagua lasi. (Iam. 3:8-10) Idia be mai edia manoka gaudia, to Iamesi ia diba edia kara do idia haidaua. Iamesi ese idia ia sisiba auka henia, to mai manau ida unai ia karaia bona idia ia hagoadaia elda taudia amo heduru idia tahua totona.​—Iamesi 5:13-15 duahia.

12. Baibel stiuden ita durua neganai, edena dala ai lalohadai maorona ita abia diba?

¹² Dahaka ita dibaia? Mai momokani ida ma haida ita durua, bona lalohadai maorona ita abia. Ita stadi henia taudia momo be Baibel ena sisiba idia badinaia haraga lasi. (Iam. 4:1-4) Reana nega daudau murinai edia kara dika gunadia idia rakatania bona Keristani kara namodia idia hahedinaraia. Iamesi hegeregerena, namona be mai lalogoada ida eda stiuden ita hamaoroa ena manoka gaudia ia hanamoa totona. Danu lalohadai maorona ita abia, bona ita abia dae Iehova ese ia dekenai manau taudia do ia veria lao bona goada do ia henia edia mauri ai senisi idia karaia totona.​—Iam. 4:10.

13. Iamesi 3:2 hegeregerena, Iamesi be dahaka ia lalopararalaia?

¹³ Iamesi be sibona ia laloa bada lasi. Ia be Iesu ena tadina bona asainmen badana ia abia, to unai gaudia dainai ia laloa lasi ia be tadikaka taihu ma haida ia hereaia. Ia ese Keristani taudia ma haida ia gwauraia “lauegu lalokau tadikaka.” (Iam. 1:16, 19; 2:5) Ia ura lasi ma haida do idia laloa ena kara be maoromaoro. Unai dainai, ia gwau: “Ita ibounai be nega momo ita kerere.”​—Iamesi 3:2 duahia.

14. Dahaka dainai iseda kerere ita gwauraia hedinarai be namo?

¹⁴ Dahaka ita dibaia? Laloatao, ita ibounai be kara dika taudia. Namo lasi ita laloa ita  hadibaia taudia ita hereaia. Dahaka dainai? Badina stiuden do ia laloa ita be kerere ta ita karaia diba lasi, bona reana do ia laloa ia be hegeregere lasi Dirava ena taravatu ia badinaia namonamo totona. To mai momokani ida ia ita hamaoroa ita danu be nega ibounai ita hekwarahi Baibel ena taravatu ita badinaia totona. Bona Iehova ese ita ia durua hekwakwanai idauidau ita hanaia dalana ita herevalaia, unai amo stiuden ita durua bona do ia itaia ia danu be Iehova ia hesiai henia diba.

15. Iamesi ese ia gaukaralaia laulau herevadia be edena bamona do oi gwauraia? (Iamesi 3:2-6, 10-12)

¹⁵ Iamesi be laulau herevadia ia gaukaralaia ta ena kudouna hamarerea totona. Momokani, ia be lauma helaga ese ia durua, bona danu ena hadibaia dalana ia hanamoa totona ena kakana, Iesu, ese ia gaukaralaia laulau herevadia ia stadilaia namonamo. Iamesi ena revareva lalonai ia gaukaralaia laulau herevadia be auka lasi, bona idia badinaia haraga diba.​—Iamesi 3:2-6, 10-12 duahia.

16. Dahaka dainai laulau hereva maorodia ita gaukaralaia?

¹⁶ Dahaka ita dibaia? Laulau hereva maorodia oi gaukaralaia. Laulau hereva maorodia oi gaukaralaia neganai, taunimanima ia durua diba oi hadibaia gauna idia piksaia totona. Unai ese kamonai taudia ia durua mai anina bada hereva momokanidia idia laloatao totona. Iesu be laulau hereva maorodia gaukaralaia dalana ia diba momo, bona ena tadina Iamesi ese ena haheitalai ia tohotohoa. Iamesi ese ia gaukaralaia laulau herevana ta bona dahaka dainai unai ese namo ia havaraia mani ita herevalaia.

17. Dahaka dainai Iamesi 1:22-25 ai ia noho laulau herevana ese ita ia durua?

¹⁷ Iamesi 1:22-25 duahia. Iamesi ese ia gaukaralaia laulau herevana, hevarivari, amo gau haida ita dibaia. Ia be mai anina bada gauna ta ia hadibaia, unai be, Dirava ena Hereva ita duahia sibona lasi, to ita badinaia, unai amo namo ita davaria. Iamesi be kamonai taudia ese idia lalopararalaia laulau herevana ta ia gaukaralaia, unai be tau ta be hevarivari ai ena toana ia itaia. Unai amo dahaka ita dibaia? Bema tau ta be hevarivari ai ena toana ia itaia, bona ia diba gau ta ia hamaoromaoroa be namo, to unai ia karaia lasi be kavakava karana. Unai hegeregerena, bema Baibel ita duahia bona ita itaia iseda kara ta ita hanamoa  be namo, to gau ta ita karaia lasi be kavakava karana.

18. Laulau herevadia ita gaukaralaia neganai, edena dala toi ita badinaia?

¹⁸ Laulau herevadia ita gaukaralaia neganai, inai dala toi amo Iamesi ena haheitalai ita tohotohoa diba: (1) Ita gaukaralaia laulau herevana be ita herevalaia point ia durua be namo. (2) Kamonai taudia ese idia lalopararalaia haraga laulau herevana ita gaukaralaia. (3) Do idia badinaia dalana ita hahedinaraia namonamo. Bema laulau hereva maorona ta oi davaria be auka, mani Watch Tower Publications Index oi itaia. Hereva kwarana “Illustrations” henunai, laulau herevadia momo idia noho, unai oi gaukaralaia diba. Maikrofon ese iseda gado regena ia habadaia hegeregerena, laulau herevana ese ita gwauraia point ia hahedinaraia. Bema laulau herevadia momo oi gaukaralaia, kamonai taudia do idia daradara. Unai dainai point badana ia durua laulau herevadia sibona oi gaukaralaia be namo. Oibe, iseda hadibaia dalana ita hanamoa ena badina be, ita ura momo ita durua Iehova ena ruma bese lalonai idia vareai, to ita idia hanamoa totona lasi.

19. Edena dala ai ita hahedinaraia eda tadikaka taihu ita lalokau henia?

¹⁹ Iamesi ena kakana be goevadae tauna, to ita be lasi. To Iehova ena ruma bese badana lalonai eda tadikaka taihu ida Iehova ita hesiai henia be hahenamo badana. Idia ita bamoa, idia amo diba ita abia, bona idia ida haroro bona hadibaia gaukarana ita karaia neganai, ita hahedinaraia idia ita lalokau henia. Ita gaukara goada iseda kara bona hadibaia dalana dekenai Iamesi ena haheitalai ita tohotohoa neganai, Iehova ita hanamoa bona kudou maoro taudia ita durua iseda guba Tamana kahirakahira idia lao totona.