1-2. Dahaka dainai lagani ta ta ai Memorial ita karaia?

 KAHIRAKAHIRA lagani 2,000 gunanai, Iesu be ita totona ia mase, bona unai amo mauri hanaihanai ita abia diba. Iesu do ia mase hanuaboina ai, iena murinai idia raka taudia ia oda henia iena lalokau karana idia laloatao totona. Ia hamaorodia anibou do idia karaia totona paraoa bona wain do idia gaukaralaia.​—1 Kor. 11:23-26.

² Iesu ita lalokau henia bada dainai, iena oda herevana ita badinaia. (Ioa. 14:15) Lagani ta ta ena Memorial negadiai, nega ita atoa ena mase ena anina ita laloa dobu karana amo, ita hahedinaraia ia karaia gauna ita laloa bada. Danu iseda haroro gaukara ita habadaia, unai amo taunimanima momo ita boiria mai diba. Bona ita ura lasi gau ta ese ita ia koua Memorial dekenai ita lao totona.

3. Inai atikol ai dahaka do ita herevalaia?

³ Inai atikol ai, Iehova ena taunimanima be Memorial idia karaia totona idia badinaia dala toi do ita herevalaia: (1) Iesu ese ia hadibaia dalana idia badinaia, (2) Memorial dekenai haida idia boiria, bona (3) Memorial idia karaia ena be koua gaudia idia vara.

4. Lagani ta ta ena Memorial ai, edena hereva momokani ita herevalaia, bona dahaka dainai unai ita laloa bada be namo? (Luka 22:19, 20)

⁴ Lagani ta ta ena Memorial ai, Baibel tok ta amo henanadai  haida edia haere ita abia. Taunimanima ese mauri davana idia abia ena badina bona tau tamona ena mase ese taunimanima momo edia dika davana ia karaia dalana ita dibaia. Tadikaka ese paraoa bona wain ena anina bona daidia ese unai do idia abia ia herevalaia. (Luka 22:19, 20 duahia.) Bona tanobada ai mauri hanaihanai do idia abia taudia edia hahenamo idauidau ita laloa dobu. (Isa. 35:5, 6; 65:17, 21-23) Namona be unai hereva momokani ita lalodia bada. Taunimanima bilioni momo be unai hereva momokani idia lalopararalaia lasi, bona Iesu ena boubou gauna idia laloa bada lasi. Danu, Memorial karaia totona Iesu ese ia hadibaia dalana idia badinaia lasi. Dahaka dainai?

5. Iesu ena aposetolo taudia idia mase murinai, taunimanima ese Iesu ena Memorial be edena bamona idia karaia?

⁵ Iesu ena aposetolo taudia idia mase murinai, Keristani koikoidia be kongrigeisen lalonai idia vareai. (Mat. 13:24-27, 37-39) Idia ese hereva momokani “idia mogea, hahediba taudia do idia hakaua siri, edia murinai idia raka totona.” (Kara 20:29, 30) Keristani koikoidia ese idia “mogea” herevana ta be idia gwau, Iesu be “nega tamona ia sibona ia henia” lasi “taunimanima momo edia kara dika huaia totona,” to ena boubou karana do idia karaia loulou be namo. (Heb. 9:27, 28) Hari, kudou maoro taudia momo be unai hahediba hereva koikoi idia abia dae. Wiki ta ta eiava dina ta ta ai, dubu dekenai idia lao Iesu ena boubou karana idia laloatao totona. Katolik tomadiho ai unai idia gwauraia “Holy Communion.” b Tomadiho oreadia haida be nega ta ta sibona Iesu ena mase idia laloatao, bona edia dubu taudia momo be Iesu ena boubou karana idia lalopararalaia namonamo lasi. Reana haida idia laloa, ‘Iesu ena mase ena anina be Dirava ese egu kara dika do ia gwauatao, a?’ Dahaka dainai unai bamona idia henanadai? Badina haida ese edia lalona idia veria, idia gwau Iesu ena mase ese taunimanima edia kara dikadia ia gwauatao lasi. Edena dala ai Iesu ena murinai idia raka taudia ese unai lalohadai kererena idia hamaoromaoroa diba?

6. Lagani 1872 bamona ai, Bible Student taudia be dahaka idia lalopararalaia?

⁶ Lagani 1870 bamona murinai, Charles Taze Russell bona Bible Student taudia haida ese Baibel idia stadilaia namonamo. Idia ura diba Iesu ena boubou karana ena anina be dahaka bona edena bamona ena mase do idia laloatao. Lagani 1872 bamona ai, idia laloparara Iesu be taunimanima ibounai totona mauri davana ia henia. Idia dibaia gaudia be idia hunia lasi, to ma haida idia hadibaia buka, niuspepa bona magasin amo idia halasia. Bona daudau lasi murinai, Keristani ginigunadia bamona, idia ese lagani ta ta ai nega tamona Memorial idia karaia.

7. Bible Student taudia edia tahua karana amo dahaka namo ita abia?

⁷ Lagani momo gunanai unai Keristani tatau ese idia karaia tahua gaukara amo namo ita davaria noho. Edena dala ai? Iehova ena heduru dainai, Iesu ena boubou karana ena anina, bona danu ita bona taunimanima ibounai totona do ia havaraia namo ita lalopararalaia. (1 Ioa. 2:1, 2) Danu, Baibel ese ita ia hadibaia Dirava idia hamoalea taudia edia helaro be rua: Ginigunana be haida be guba ai mase diba lasi maurina do idia abia, bona iharuana be taunimanima milioni momo be tanobada ai mauri hanaihanai do  idia abia. Iehova ese ita ia lalokau henia bona Iesu ena boubou amo ita ta ta ese namo ita davaria dalana ita laloa neganai, ita ura Iehova do ita tura henia. (1 Pet. 3:18; 1 Ioa. 4:9) Idaunega abidadama tadikaka taihu hegeregerena, ita ese ma haida ita boiria ita ida Iesu ia hadibaia dalana hegeregerena Memorial do ita karaia.

8. Iehova ena taunimanima ese dahaka idia karaia ma haida idia boiria Memorial dekenai idia mai totona? (Laulau itaia.)

⁸ Lagani momo lalonai, Iehova ena taunimanima be haida idia boiria Memorial dekenai idia mai totona. Lagani 1881 ai, United States ai tadikaka taihu be tadikaka ta ena ruma, Allegheny, Pennsylvania dekenai Memorial idia karaia. Gabeai, kongrigeisen ta ta be sibodia Memorial idia karaia. March 1940 ai, tadikaka ese pablisa idia hamaorodia teritori ai, kamonai taudia do idia boiria Memorial dekenai idia mai totona. Lagani 1960 ai, nega ginigunana Betele ese kongrigeisen ta ta edia invateisen pepadia idia printaia. Unai nega amo ema bona hari, Memorial invateisen pepadia bilioni momo ita hariharilaia. Dahaka dainai iseda nega bona goada ita gaukaralaia unai ita karaia totona?

9-10. Memorial dekenai taunimanima ita boiria neganai, daidia idia mai? (Ioane 3:16)

⁹ Memorial dekenai taunimanima ita boiria mai ena badina ta be, ita ura nega ginigunana idia mai taudia be Iehova bona Iesu ese ita ibounai totona idia karaia gauna ena hereva momokani idia dibaia. (Ioane 3:16 duahia.) Ita ura Memorial ai idia itaia bona kamonai gaudia ese edia lalona do ia veria,  diba ma haida idia abia bona Iehova ena hesiai taudia ai do idia lao. To, ma haida idia mai danu.

¹⁰ Lagani momo idia manoka taudia ita boiria danu. Unai ita karaia badina ita ura idia diba Iehova be idia ia lalokau henia. Momo be iseda invateisen idia abia dae bona Memorial ai idia ita itaia neganai ita moale bada. Memorial idia mai neganai, mai moale ida Iehova idia hesiai henia negadia idia laloa. Mani Monica ena ekspiriens ita laloa. c COVID-19 gorerena negana ai, ia haroro matamaia lou. Lagani 2021 ena Memorial murinai, ia gwau: “Lau dekenai inai Memorial be spesel. Lagani 20 murinai, inai be egu nega ginigunana taunimanima dekenai lau haroro bona Memorial totona idia lau boiria. Mai kudouna ibounai ida unai lau karaia, badina Iehova bona Iesu ese lau totona idia karaia gauna dainai lau moale bada.” (Sal. 103:1-4) Herevana taunimanima ese invateisen idia abia dae eiava lasi, to ita boiridia noho, bona ita diba Iehova be iseda gaukara ia moalelaia.

11. Iehova ese edena dala ai Memorial dekenai taunimanima ita boiria gaukarana ia hanamoa? (Hagai 2:7)

¹¹ Memorial dekenai taunimanima ita boiria gaukarana be Iehova ese ia hanamoa. Lagani 2021 ai, COVID-19 gorere dainai Kingdom Hall ai ita hebou lasi, to Memorial idia karaia taudia ibounai be 21,367,603. Unai namba ese tanobada hegegemadai Iehova ena Witnes taudia edia namba ia hanaia! Momokani, Iehova be namba ia laloa lasi, to ia be taunimanima ta ta ia laloa bada. (Luka 15:7; 1 Tim. 2:3, 4) Ita diba momokani, taunimanima dekenai invateisen pepadia ita henia neganai, Iehova ese ita ia durua noho kudou maoro taudia ita davaria totona.​—Hagai 2:7 duahia.

12. Dahaka dainai nega haida ia auka Memorial ita karaia totona? (Laulau itaia.)

¹² Iesu ia gwau nega dokona ai hekwakwanai momo do ita davaria. Hegeregere, famili ese ita idia inai henia, gavamani ese ita idia dagedage henia, tuari idia vara, gorere idauidau bona hekwakwanai ma haida do idia vara. (Mat. 10:36; Mar. 13:9; Luka 21:10, 11) Unai gaudia dainai, nega haida ia auka Memorial ita karaia totona. Iseda tadikaka taihu be unai koua gaudia hanaia totona, dahaka idia karaia bona edena dala ai Iehova ese idia ia durua?

13. Edena dala ai Iehova ese Artem ena gari lasi karana bona hekwarahi ia hanamoa?

¹³ Dibura ruma ai. Iseda tadikaka haida be edia abidadama dainai dibura ruma ai idia atodia, unai bamona negadiai idia hekwarahi Memorial idia karaia totona. Artem ena ekspiriens mani ita laloa. Lagani 2020 ena Memorial negana ai, Artem be sel maragina ta dekenai idia atoa, bona unai sel lalonai tatau faiv idia noho. Ena be dibura ruma ai ia noho, to gau haida ia abia hegaegae paraoa bona wain laulaulaia totona, bona palani ia karaia ia sibona totona Memorial tok do ia henia. To unai sel tamona ai idia noho taudia be kuku idia veria bona hereva dikadia idia gwauraia momo. Dahaka ia karaia? Idia ia noia hora tamona sibona lalonai kuku idia veria lasi bona hereva dikadia do idia gwauraia lasi. Artem ia hoa badina ena noinoi idia abia dae. Artem ia gwau, “Lau ura idia dekenai Memorial lau herevalaia.” Ena be idia ura lasi kamonai, to Memorial dekenai Artem ese ia karaia gaudia idia itaia murinai, henanadai momo idia henia.

14. COVID-19 gorere negana ai momo ese Memorial be edena bamona idia karaia?

 ¹⁴ COVID-19 gorere negana. Inai gorere ia matamaia neganai, Iehova ena taunimanima be Memorial karaia totona grup badadia ai idia haboua lasi. To unai ese idia ia koua lasi. d Kongrigeisen haida be mai edia intanet dainai videoconference eiava zoom amo Memorial idia karaia. To intanet be lasi taudia milioni momo be edena bamona? Tano ma haida ai, dala idia karaia tok be TV ai idia itaia eiava reidio amo idia kamonai totona. Danu, brens ese gado 500 mai kahana ai tok idia rekodia, unai amo gunika gabudia ai idia noho taudia ese Memorial idia karaia diba. Bona tadikaka be dala idia karaia idia rekodia Memorial tok be unai tadikaka taihu dekenai idia abia lao.

15. Baibel stiuden ta ladana, Sue ena sivarai amo dahaka oi dibaia?

¹⁵ Famili ese idia koua negana. Haida ese idia davaria hekwakwanai be Memorial idia lao totona edia famili ese idia koua. Baibel stiuden ta ladana Sue mani ita laloa. Lagani  2021 ai, Memorial dinana vairanai, Sue ese ena Baibel stadi ia naria taihuna ia hamaoroa ena famili ese idia koua dainai, Memorial dekenai do ia lao lasi. Taihu ese Luka 22:44 ia duahia. Bena ia hamaoroa hekwakwanai ita davaria neganai, namona be Iesu ena haheitalai ita tohotohoa, anina be Iehova ita guriguri henia bona ita abidadama henia momokani. Memorial dinana ai, Sue ese paraoa bona wain ia abia hegaegae bona jw.org ai, Daba Ena Tomadiho ena spesel program ia itaia. Adorahi ai, iena daiutu lalonai fon ta amo ia konek bona Memorial tok ia kamonai. Unai murinai, Sue ese ena Baibel stadi ia naria taihuna dekenai revareva ia siaia, ia gwau: “Varani, lau oi hagoadaia bada. Dala lau tahua Memorial lau karaia totona bona Iehova ese lau ia durua. Lau moale bada bona lau ura oi lau tanikiu henia!” Bema oi dekenai unai bamona hekwakwanai ia vara, oi laloa Iehova ese oi do ia durua, a?

16. Dahaka dainai ita diba momokani Iehova ese iseda hekwarahi Memorial ita karaia totona do ia hanamoa? (Roma 8:31, 32)

¹⁶ Iehova be iseda hekwarahi Memorial karaia totona ia laloa bada. Ita diba momokani, ia ese ita do ia hanamoa, bema ita hahedinaraia ita totona ia karaia gauna ita laloa bada. (Roma 8:31, 32 duahia.) Namona be ita gaukara goada inai lagani ena Memorial dekenai ita lao, bona dala ita tahua Memorial dinana vairanai bona murinai Iehova ena hesiai gaukara ita habadaia totona.