1-2. (a) Dahaka dainai hekwakwanai ita davaria neganai ita hoa lasi? (b) Inai atikol ai dahaka do ita herevalaia?

 ITA, Iehova ena taunimanima be hekwakwanai ita davaria neganai ita hoa lasi. Ita diba Baibel ia gwau: “Dirava ena Basileia lalonai ita vareai totona, hisihisi idauidau do ita davaria.” (Kara 14:22) Danu, ita diba iseda hekwakwanai haida be do idia ore lasi ela bona Paradaiso lalonai ita noho. Unuseniai “mase, lalohisihisi, taitai, bona hisihisi be do idia ore.”​—Apok. 21:4.

² Iehova be hekwakwanai amo ita ia gimaia lasi, to ita ia durua ita haheauka totona. Aposetolo Paulo ese Roma ai idia noho Keristani taudia dekenai ia gwauraia herevana mani ita laloa. Ia bona tadikaka haida ese idia davaria hekwakwanai haida ia herevalaia, bena ia gwau: “Ai ia lalokau henia tauna dainai, . . . ai kwalimu momokani.” (Roma 8:35-37) Unai ena anina be hekwakwanai oi haheaukalaia noho lalonai, Iehova ese oi do ia durua bona oi kwalimu diba. Iehova ese Iosepa ia durua dainai ia kwalimu dalana, bona oi ia durua diba dalana mani ita herevalaia.

3. Iosepa ena mauri be edena bamona ia idau haraga?

³ Iakobo ia hahedinaraia iena natuna Iosepa ia lalokau henia bada. (Gen. 37:3, 4) Unai dainai, Iakobo ena natudia memero be edia tadina dekenai idia mama. Dala idia davaria neganai, Iosepa be Midiana bisinesi taudia dekenai idia hoihoilaia.  Unai taudia ese gabu daudauna, Aigupito dekenai, Iosepa idia abia lao bona Farao ena gadi tauna badana Potifara dekenai idia hoihoilaia. Iosepa ena mauri be ia idau haraga, guna ia be tamana ese ia lalokau henia merona, hari ia be Aigupito ai hesiai tauna ta!​—Gen. 39:1.

4. Edena dala ai Iosepa ese ia davaria hekwakwanai bamona ita davaria diba?

⁴ Baibel ia gwau, “taunimanima dekenai gau dikadia idia vara.” (Had. 9:11, Holy Bible​—Easy-to-Read Version) Nega haida iseda hekwakwanai be “vaia taunimanima ibounai ese idia davaria” gauna. (1 Kor. 10:13) Eiava ita be Iesu ena hahediba taudia dainai hekwakwanai ita davaria. Hegeregere, iseda abidadama dainai ita idia kirikirilaia, inai henia eiava dagedage henia. (2 Tim. 3:12) Herevana, dahaka hekwakwanai oi davaria, to Iehova dainai do oi kwalimu diba. Edena dala ai Iehova ese Iosepa ia durua?

5. Potifara be Iosepa dekenai dahaka ia itaia? (Genese 39:2-6)

⁵ Genese 39:2-6 duahia. Potifara ia itaia Iosepa be gaukara ia diba momo bona ia gaukara goadagoada. Bona Potifara ia itaia Iosepa “ia karaia gaudia ibounai be Iehova ese ia hanamoa.” b Gabeai, Potifara ese Iosepa be iena hesiai tauna ai ia halaoa, bona ia abia hidi iena ruma ibounai ia naria totona. Bena dahaka ia vara? Iehova ese Potifara ia hanamoa.

6. Iosepa be ia dekenai ia vara gauna be edena bamona ia laloa?

⁶ Mani Iosepa ena hemami ita laloa. Iena ura badana be dahaka? Potifara ese do ia itaia bona ia hanamoa, a? Reana, Iosepa ia ura dikadika do idia ruhaia bona ena tamana dekenai ia giroa lou. Ena be Potifara ena ruma ai hahenamo momo ia davaria, to Iosepa be do hesiai tauna bona iena biaguna be Dirava ia diba lasi. Iehova ese Potifara ena lalona ia veria lasi Iosepa ia ruhaia totona. Bona Iosepa ena hekwakwanai be do ia dika ia lao.

7. Edena dala ai Iosepa ena hekwakwanai be ia dika ia lao? (Genese 39:14, 15)

⁷ Genese karoa 39 ese ia hahedinaraia, Potifara ena hahine be Iosepa ia ura henia bona  hanaihanai ena lalona ia veria do idia heudahanai totona. Nega ibounai, Iosepa be ena laloani herevadia ia dadaraia. Bena, unai hahine ia badu dikadika bona Iosepa ia samania koikoi bona ia gwau Iosepa be ia ura ia do ia reipia. (Genese 39:14, 15 duahia.) Potifara be unai ia kamonai neganai, dibura ruma ai Iosepa ia lokaia bona lagani momo lalonai unuseniai ia noho. (Gen. 39:19, 20) Unai dibura rumana be edena bamona? Iosepa ese ia gaukaralaia Heberu gado herevana idia hahanaia “dibura ruma” anina be “ranu guri” o “guri.” Unai ese ia hahedinaraia Iosepa be ia daradoko bona iena noho gabuna be ia dibura. (Gen. 40:15; ftn.) Danu, Baibel ia hahedinaraia nega daudau lalonai, Iosepa ena aena be seini amo idia guia bona aiona dekenai auri idia atoa. (Sal. 105:17, 18) Iosepa ena hekwakwanai be ia dika ia lao noho. Guna idia abidadama henia hesiai tauna be hari dibura ruma ai ia noho bona ia daradoko.

8. Hekwakwanai idia bada idia lao neganai, dahaka ita laloatao be namo?

⁸ Nega ta oi mamia ena be nega momo oi guriguri, to emu hekwakwanai be ia bada ia lao, a? Unai bamona ia vara diba. Satani ia lohiaia tanobadana ai, ita davaria hekwakwanai be Iehova ese ia koua lasi. (1 Ioa. 5:19) To, inai oi laloatao be namo: Iehova be oi dekenai idia vara gaudia ia diba bona oi ia laloa bada. (Mat. 10:29-31; 1 Pet. 5:6, 7) Iehova ia gwauhamata: “Lau ese umui do lau negea lasi, bona umui do lau rakatania lasi.” (Heb. 13:5) Ena be oi laloa dala ta be lasi, to Iehova ese oi ia durua diba emu hekwakwanai oi haheaukalaia totona. Mani Iosepa dekenai ia vara gauna ita laloa.

9. Iosepa be dibura ruma ai ia noho neganai, dahaka ese ia hahedinaraia Iehova be ia ida? (Genese 39:21-23)

⁹ Genese 39:21-23 duahia. Iosepa be dibura ruma ai ia noho neganai, ia karaia gaudia ibounai be Iehova ese ia hanamoa. Edena dala ai? Ofesa tauna badana be, Potifara bamona, Iosepa ia abidadama henia bona matauraia. Unai murinai, ofesa tauna badana ese dibura ruma ai idia noho taudia ibounai be Iosepa ena henari henunai ia atodia. Unai dainai Baibel ia gwau: “Dibura ruma ena ofesa tauna badana be Iosepa ese ia naria gaudia ta dekenai ia laloa momo lasi.” Iosepa be ia daradoko lasi, to iena gaukara ia moalelaia. Unai be senisi idauna, ani? Dahaka dainai idia samania koikoi bona idia gwau Potifara ena adavana ia ura ia reipia tauna be unai dagi badana idia henia? Ena haere be Genese 39:23 ai, ia gwau: “Iehova be Iosepa ida ia noho bona Iosepa ia karaia gaudia ibounai be Iehova ese ia hanamoa.”

10. Dahaka dainai Iosepa do ia laloa Iehova ese ia hanamoa lasi?

¹⁰ Iosepa idia samania koikoi bona dibura ruma ai idia atoa murinai, oi laloa Iosepa ia mamia ia karaia gaudia ibounai be Iehova ese ia hanamoa, a? Iosepa ena ura badana be dahaka? Ia ura dibura ruma ena ofesa tauna badana ena lalonamo ia abia, a? Lasi, to Iosepa ia ura dikadika ia do idia ruhaia. Dibura ruma amo idia ruhaia tauna ta ia noia, Farao do ia hamaoroa ia danu do idia ruhaia totona. (Gen. 40:14) To, unai tauna be Farao ia hamaoroa lasi. Unai dainai, Iosepa be lagani rua dibura ruma ai ia noho. (Gen. 40:23; 41:1, 14) To, edena dala ai Iehova ese Iosepa ia karaia gaudia ibounai ia hanamoa noho?

11. Iehova ese Iosepa dekenai dahaka diba ia henia, bona edena dala ai Iehova ena ura ia hagugurua?

¹¹ Iosepa be dibura ruma ai ia noho lalonai, Iehova ese Farao dekenai nihi rua ia henia dainai ia lalohekwarahi, bona ia ura dikadika unai nihi edia anina ia diba. Ia kamonai Iosepa  be nihi edia anina ia gwauraia diba neganai, Iosepa totona hereva ia siaia. Iehova ena heduru amo, Iosepa ese nihi edia anina ia gwauraia hedinarai bona ia henia hakaua herevana ese Farao ia hamoalea. Farao ia itaia Iehova be Iosepa ia durua neganai, Iosepa be Aigupito tanona ibounai ena aniani naria tauna ai ia halaoa. (Gen. 41:38, 41-44) Unai murinai, Aigupito bona Kanana ai danu hitolo bada ia vara. Kanana be Iosepa ena famili idia noho tanona. Unai ese dala ia kehoa Iosepa be ena famili ia hamauria, bona gabeai Mesia be unai bese amo ia vara.

12. Edena dala ai Iosepa ese ia karaia gaudia ibounai be Iehova ese ia hanamoa?

¹² Iosepa ena mauri ai idia vara gaudia mani ita laloa. Daika ese Potifara ena lalona ia veria igui hesiai tauna Iosepa ia hoia totona? Daika ese ofesa tauna badana ena lalona ia veria Iosepa ia lalonamo henia totona? Daika ese Farao dekenai nihi rua ia henia bona Iosepa dekenai diba ia henia nihi edia anina ia gwauraia totona? Daika ese Farao ena lalona ia veria Iosepa ia abia hidi Aigupito ai aniani naria tauna ai ia lao totona? (Gen. 45:5) Ita gwau diba Iosepa ia karaia gaudia ibounai be Iehova ese ia hanamoa. Herevana Iosepa ena kakadia idia ura Iosepa idia hamasea, to Iehova ese unai ia haidaua bona Iena ura ia hagugurua.

13. Iehova be ita dekenai idia vara hekwakwanai ibounai ia havaraia bona biagua, a?

¹³ Iosepa ena sivarai amo dahaka ita dibaia? Iehova be ita dekenai idia vara hekwakwanai ibounai ia havaraia, a? Ita davaria hekwakwanai ibounai ia biagua dainai, do ita gwau unai be badina namona dainai idia vara, a? Lasi, Baibel be unai lalohadai ia hadibaia lasi. (Had. 8:9; 9:11) To, inai ita diba be namo: Hekwakwanai ta ita davaria neganai, Iehova be unai ia diba bona heduru totona iseda noinoi ia kamonai. (Sal. 34:15; 55:22; Isa. 59:1) Unai sibona lasi, to Iehova ese ita ia durua hekwakwanai ita haheaukalaia totona. Edena dala ai?

14. Nega aukadia lalonai edena dala ai Iehova ese ita ia durua?

¹⁴ Iehova ese ita ia durua dalana ta be,  nega korikori ai ita ia hagoadaia. (2 Kor. 1:3, 4) Turkmenistan ai tadikaka ta ladana Eziz dekenai unai bamona ia vara. Ia be ena abidadama dainai dibura ruma dekenai idia atoa. Ia gwau: “Kota dinana ai, tadikaka ta ese lau dekenai Isaia 30:15 ia hahedinaraia, unai siri ia gwau, ‘Bema umui manau bona lau umui abidadama henia, do umui goada.’ Unai siri ese lau ia durua lau manau bona gau ibounai lalonai Iehova dekenai lau tabekau totona. Dibura ruma ai lau noho negadiai, unai siri lau laloa dobu bona lau ia hagoadaia.” Emu mauri lalonai Iehova ese oi ia hagoadaia negana ta oi laloatao, a?

15-16. Tori ena ekspiriens amo dahaka oi dibaia?

¹⁵ Nega momo hekwakwanai lalonai Iehova ena heduru dalana ita itaia lasi, to ita haheaukalaia ela bona ia ore murinai unai ita lalopararalaia. Taihu ta ladana Tori dekenai unai ia vara. Iena natuna merona Mason, be lagani siks lalonai kensa gorere ia haheaukalaia ela bona ia mase. Madi, taihu Tori ia lalohisihisi bada. Ia gwau: “Lau laloa inai bamona hekwakwanai badana do lau davaria lasi. Lau diba tama sina haida be inai do idia abia dae: Oi itaia emu natuna be hisihisi ia mamia neganai, emu hemami be ia dika momokani. Unai ese oi mamia hisihisi ia hereaia.”

¹⁶ Herevana unai be hekwakwanai badana, to gabeai Tori be Iehova ese ia durua dalana ia laloa lou. Ia gwau: “Egu natuna ia gorere negadia lalonai Iehova ena heduru lau mamia. Hegeregere, ena be Mason be ia gorere dikadika bona vadivadi taudia do ia itaia lasi, to tadikaka taihu be hora rua lalonai motuka amo idia heau mai ia idia itaia totona. Hospital ena daiutu ta ai idia helai bona ai idia durua totona idia naria. Danu, emai dabu gaudia idia henia. Unai nega aukana ai, gau ta  dekenai ai dabu lasi.” Iehova ese Tori bona Mason ia durua idia haheauka totona.​—Maua ladana “ Iehova ese Aiemai Dabu Gaudia Ia Henia” itaia.

17-18. Dahaka ese ita do ia durua nega aukadia ai Iehova ese ia karaia gaudia ita laloa totona? (Salamo 40:5)

¹⁷ Salamo 40:5 duahia. Ororo ia daekau tauna ena tahua gauna be ororo ena dorina ai do ia ginidae. To, laga-ani gabudia idia noho, unuseniai ia gini sisina bona gabu ena hairai ia itaia diba. Unai hegeregerena, namona be hanaihanai nega oi atoa hekwakwanai oi haheaukalaia negadiai, Iehova ese oi ia durua daladia oi laloa lou totona. Dina ta ta ena dokona ai, sibona oi nanadaia: ‘Hari dina Iehova ese lau dekenai dahaka hahenamo ia henia? Ena be hekwakwanai ia vara noho, to edena dala ai Iehova ese lau ia durua lau haheauka totona?’ Mani Iehova ese oi ia durua dalana ta oi laloa.

¹⁸ Momokani, reana oi guriguri noho emu hekwakwanai ia ore totona. Unai bamona oi karaia be maoro bona mai anina bada. (Fili. 4:6) To hari ita abia hahenamo ita lalodia danu be namo. Iehova ia gwauhamata ita do ia hagoadaia bona ita do ia durua ita haheauka totona. Unai dainai, Iehova ese ita ia durua dalana ita laloa boio lasi. Unai oi karaia neganai, Iehova ese Iosepa ia hanamoa bamona, nega aukadia ai oi do ia hanamoa noho.​—Gen. 41:51, 52.