NEGA Matamata Trensleisen ai idia hahanaia Grik herevana, “kariota” be kariota idauidau ia herevalaia diba. (Kara 8:​28, 29, 38) Bona toana be unai Etiopia tauna be laolao totona idia karaia kariota badana dekenai ia guia, to tuari eiava heau helulu kariota dekenai ia guia lasi. Mani ita itaia dahaka dainai unai bamona ita hereva.

Etiopia tauna be dagi bada tauna bona gabu daudau dekenai lao. Ia be “Etiopia ena kwini henunai ia gaukara dagi bada tauna, bona kwini ena dava bada kohu ibounai ia naria.” (Kara 8:27) Hari idia noho tano Sudan bona Egypt ena saut kahana ai idia noho tano momo be guna Etiopia henunai idia noho. Eunuko tauna be gabu daudau ia lao dainai reana kariota tamona sibona dekenai ia guia lasi, bona reana kohu momo ia abia danu. Aposetolo edia negai, taunimanima idia guia kariota be mai ena wili foa. Kara bukana ia herevalaia buka ta ia gwau: “Unai bamona kariota ai kohu momo idia atoa diba, taunimanima be edia laolao idia moalelaia diba bona gabu daudau ia heau lao diba.”

Etiopia tauna be ia duahiduahi lalonai Filipo ese ia hedavari henia. Baibel ia gwau: “Filipo be unai kariota badinai ia heau bona ia kamonai [eunuko tauna] be peroveta tauna Isaia ena buka ia duahia badabada noho.” (Kara 8:30) Taunimanima idia guia kariota be idia heau haragaharaga lasi. Unai dainai, eunuko tauna be ia duahiduahi diba bona Filipo be aena amo ia raka neganai eunuko tauna ia hedavari henia.

Etiopia tauna ese “Filipo ia noia do ia guia bona ia badinai do ia helai.” (Kara 8:31) Heau helulu kariota dekenai idia guia taudia be idia gini. To, reana laolao totona idia karaia kariota be ia bada dainai, eunuko tauna bona Filipo idia helai diba.

Kara karoa 8 bona histori ai idia davaria hamomokania gaudia dainai, hari iseda pablikeisen ai idia hahedinaraia Etiopia tauna be laolao totona idia karaia kariota badana dekenai ia guia, to tuari eiava heau helulu kariota dekenai ia guia lasi.