1-2. Iehova ena hesiai taudia be dahaka hekwakwanai idia davaria?

 BEMA ita dekenai hekwakwanai badana ta ia vara, unai ese iseda mauri do ia haidaua haraga. Hegeregere, tadikaka ta ladana Luis a be kensa gorere ia abia. Bona doketa ese ia hamaoroa hua haida sibona do ia mauri. Monika bona ena adavana be hesiai gaukara lalonai idia bisi. Bena nega ta, Monika ia kamonai ena adavana, elda ta, be nega daudau lalonai hehuni dalanai kara dika ia karaia noho. Singul taihu ta ladana, Olivia be ia noho gabuna ai lai gubana do ia vara dainai, ia heau. Ia giroa lou neganai, ia itaia lai gubana ese ena ruma ia hadikaia. Karaharaga, Luis, Monika, bona Olivia edia noho dalana ia idau. Oi dekenai hekwakwanai ta ia vara dainai, emu mauri ia haidaua haraga, a?

² Ena be mai abidadama ida Iehova ita hesiai henia, to momo dekenai ia vara bamona, hekwakwanai ita davaria bona ita gorere. Danu, Dirava ena taunimanima idia inai henia taudia amo hisihisi bona dagedage ita haheaukalaia. Ena be Iehova ese unai hekwakwanai ia koua lasi, to ia gwauhamata ita do ia durua. (Isa. 41:10) Unai dainai, ita moale noho, abia hidi maorodia ita karaia, bona Iehova do ita badinaia noho. Inai atikol ai, hekwakwanai badadia ita davaria neganai, Iehova ese ita ia durua daladia foa do ita herevalaia. Danu ia henia heduru gaudia amo namo ita davaria totona, ita karaia diba gaudia do ita herevalaia.

 IEHOVA BE OI DO IA GIMAIA

3. Hekwakwanai ta ita davaria neganai, do ia auka dahaka ita karaia totona?

³ Hekwakwanai badadia ita davaria neganai ia auka abia hidi maorodia ita karaia totona. Dahaka dainai? Badina do ita lalohisihisi bada. Danu, do ita daradara bona ita diba lasi dahaka do ita karaia. Matamanai ita herevalaia taihu rua be hekwakwanai idia davaria neganai, edia hemami mani ita laloa. Olivia ia gwau: “Lai gubana ese egu ruma ia hadikaia murinai, lau diba lasi dahaka do lau karaia.” Monika be ena adavana ena kara dainai, ia gwau: “Lau lalohisihisi bada bona lau mamia ta ese kaia amo lau ia gwadaia bamona. Ia auka dina ta ta ena gaukara lau karaia totona. Lau laloa lasi gauna be lau dekenai ia vara.” Ita lalohisihisi neganai, Iehova ia gwauhamata edena bamona ita do ia durua?

4. Filipi 4:​6, 7 hegeregerena, Iehova be dahaka ia gwauhamatalaia?

⁴ Iehova ese ita ia durua dalana. Ia gwauhamata ita dekenai “Dirava ena maino” do ia henia. (Filipi 4:​6, 7 duahia.) Iehova ita tura henia dainai, ia ese unai maino ia henia. Unai maino be “laloparara ibounai ia hereaia gauna,” bona ena hemami be namo herea. Hegeregere, oi guriguri goadagoada murinai, lalomaino oi abia, a? Unai bamona oi mamia badina Dirava ese “ena maino” ia henia.

5. Edena dala ai Dirava ena maino ese iseda kudouna bona lalona ia gimaia?

⁵ Filipi 4:7 ia gwau, Dirava ena maino ese “emui kudouna bona lalona,” do ia gimaia danu. Inai hereva “gimaia” be idaunegai tuari taudia ese idia gaukaralaia, ia be soldia taudia ese siti ta idia gimaia bona naria karana ia herevalaia. Unai dainai siti ai idia noho taudia be maino ai idia noho, badina idia diba tuari taudia ese edia siti idia gimaia. Unai hegeregerena, Dirava ena maino ese iseda kudouna bona lalona ia gimaia neganai, lalomaino ita abia bona ita noho namonamo. (Sal. 4:8) Hana bamona, ena be iseda hekwakwanai be ia ore haraga lasi, to lalomaino ita abia diba. (1 Sam. 1:​16-18) Bona lalomaino ita abia neganai, do ia auka lasi ita laloa namonamo bona abia hidi maorodia ita karaia.

6. Dirava ena maino amo namo ita abia totona, dahaka do ita karaia? (Laulau itaia danu.)

⁶ Dahaka Ita Karaia be Namo. Siti taudia ese gadi taudia idia boiria do idia gimadia hegeregerena, ita danu Iehova ita noia diba ita ia gimaia totona. Edena dala ai? Oi guriguri loulou ela bona Dirava ena maino oi abia. (Luka 11:9; 1 Tes. 5:17) Matamanai ita herevalaia tadikaka ladana, Luis bona ena adavana, Ana, be idia davaria hua haida sibona do ia noho neganai, unai idia haheaukalaia dalana ia herevalaia. Luis ia gwau: “Unai  bamona negadiai, medikol heduru bona gau ma haida totona, abia hidi ai karaia be mai ena hekwarahi. To ai guriguri dainai, unai nega aukadia lalonai lalomaino ai abia.” Luis bona ena adavana idia gwau, ai guriguri loulou bona Iehova ai noia lalomaino bona aonega do ia henia, abia hidi namodia do ai karaia totona. Bona ena heduru idia mamia. Bema hekwakwanai badadia oi davaria, oi guriguri loulou bona do oi mamia Iehova ena maino ese emu kudouna bona lalona do ia gimaia.—Roma 12:12.

IEHOVA ESE OI DO IA DURUA LALOHADAI MAORONA OI ABIA

7. Hekwakwanai badana ta ita davaria neganai, ita dekenai dahaka do ia vara?

⁷ Hekwakwanai badana ta ita davaria neganai, do ia auka iseda hemami, iseda lalohadai bona kara ita biagua totona. Bouti ta be hurehure ese ia doria lao bona doria mai hegeregerena, hekwakwanai ita davaria neganai, do ita laloa namonamo lasi. Matamanai ita herevalaia taihu ladana, Ana ia gwau, Luis ia mase neganai, ia laloa namonamo lasi. Ma ia gwau: “Nega haida lau lalohekwarahi neganai, sibona dekenai do lau hebogahisi matamataia.” Luis ia noho lasi dainai, guna ia karaia disisen be hari Ana ese ia karaia, unai dainai do ia badu bona ia mamia ia be sibona ia noho. Nega haida ia mamia ia be davara ena hurehure lalonai ia noho bamona. Hekwakwanai ta ita davaria bona ita laloa namonamo lasi neganai, edena dala ai Iehova ese ita do ia durua?

8. Petero Ginigunana 5:10 ena hereva bamona, Iehova ia gwauhamata dahaka do ia karaia?

⁸ Iehova ese ita ia durua dalana. Iehova ese ita do ia durua lalohadai maorona ita abia bona ita gini goada. (1 Petero 5:10 duahia.) Hurehure ia bada neganai, bouti do ia doria lao bona doria mai. Bouti momo henunai, edia kahana kahana dekenai gau ta idia atoa (fin), unai ese bouti ia durua ia marere momo lasi totona. Bona bouti dekenai idia guia taudia be idia noho namonamo bona edia laolao do idia moalelaia. To unai gauna (fin) do ia gaukara namonamo bema bouti ia heau maoromaoro. Unai hegeregerena, hekwakwanai negadiai Iehova ita hesiai henia noho neganai, ita do ia hagoadaia.

9. Edena dala ai Iehova ese ia henia tulu namodia ese ita do ia durua? (Laulau itaia danu.)

⁹ Dahaka ita karaia be namo. Hekwakwanai negadiai, oi guriguri loulou, hebou oi lao bona haroro gaukara oi karaia. Momokani, guna oi karaia gaudia be hari oi karaia diba lasi, to laloatao, Iehova be oi do ia doria lasi oi karaia diba lasi gauna oi karaia totona. (Luka 21:​1-4 hahegeregerea.) Danu, nega oi atoa sibona emu stadi oi karaia bona oi laloa  dobu. Dahaka dainai? Iehova be ena orea amo pablikeisen bona vidio namodia ia henia, unai amo ita ia durua hekwakwanai negadiai, lalohadai maorona ita abia totona. Inai tulu namodia oi gaukaralaia diba hegeregere, JW Library^® app, Watch Tower Publications Index, bona Research Guide for Jehovah’s Witnesses. Matamanai ita herevalaia taihu, Monika, ia gwau, Ia lalohisihisi bada neganai, heduru ia abia totona unai tulu ia gaukaralaia. Hegeregere, inai hereva “badu karana” dekenai tahua gaukara ia karaia. Bona nega haida, “badinaia lasi karana” eiava “badinaia karana” dekenai tahua gaukara ia karaia. Bena ia duahia noho ela bona ena hemami ia namo. Ma ia gwau: “Tahua gaukara lau karaia matamaia neganai, lau lalohekwarahi bada, to lau duahiduahi lalonai lau mamia Iehova be lau ia rosia bamona. Bona lau itaia Iehova be egu hemami ibounai ia lalopararalaia bona lau ia durua noho.” Iehova ese unai bamona dala amo oi do ia durua noho, ela bona emu hemami oi biagua bona lalomaino oi abia.—Sal. 119:​143, 144.

IEHOVA BE OI DO IA DURUA

10. Hekwakwanai badana ta ita davaria neganai, iseda hemami be edena bamona?

¹⁰ Bema hekwakwanai badana ta ita davaria, nega haida reana iseda goada do ia ore, bona do ita lalomanoka. Reana heau helulu gadara dekenai bero ia abia tauna bamona do ita mamia, guna ia heau haraga, to gabeai ia raka namonamo lasi. Ita danu be reana guna ita karaia gaudia be hari ia auka ita karaia totona, eiava ita moalelaia gaudia be hari ita ura lasi karaia. Elia bamona, nega haida ita mamia ita ura lasi toreisi bona ita ura mahuta sibona. (1 Ki. 19:​5-7) Ita lalomanoka neganai, Iehova ia gwauhamata dahaka do ia karaia?

11. Iehova ese edena dala ma ta ai ita ia durua? (Salamo 94:18)

¹¹ Iehova ese ita ia durua dalana. Ia gwauhamata ita do ia durua. (Salamo 94:18 duahia.) Bero ia abia heau helulu tauna be ia raka loaloa totona, heduru do ia abia, unai hegeregerena Iehova ita hesiai henia noho totona, heduru ita abia be namo. Nega aukadia ai Iehova ia gwauhamata, ia gwau: “Lau, Iehova emu Dirava, be emu imana idibana lau dogoatao noho, bona oi dekenai lau gwau noho, ‘Oi gari lasi. Lau ese oi do lau durua.’” (Isa. 41:13) King Davida be unai bamona heduru ia abia. Hekwakwanai ia davaria bona haida ese idia inai henia neganai, Iehova dekenai ia gwau: “Emu imana idibana amo lau oi durua.”  (Sal. 18:35) To edena dala ai Iehova ese ita do ia durua?

12. Ita lalohisihisi neganai, Iehova be daika do ia gaukaralaia ita ia durua totona?

¹² Iehova be nega momo ma haida ia gaukaralaia ita idia durua totona. Hegeregere, Davida ia lalomanoka neganai, ena turana Ionatana ese ia vadivadi henia bona hagoadaia. (1 Sam. 23:​16, 17) Unai hegeregerena, Iehova ese Elisaia ia abia hidi Elia ia durua totona. (1 Ki. 19:​16, 21; 2 Ki. 2:2) Hari, Iehova ese iseda famili, turadia, eiava elda taudia ia gaukaralaia ita idia durua totona. To ita lalohisihisi neganai, reana ita ura sibona ita noho bona ita ura lasi ta ita hereva henia. Momo be unai bamona idia karaia. Dahaka do ita karaia Iehova ena heduru ita abia totona?

13. Iehova ena heduru ita abia totona, dahaka ita karaia be namo? (Laulau itaia danu.)

¹³ Dahaka ita karaia be namo. Namona be sibona oi noho karana oi dadaraia. Sibona ita noho bona ma haida ita bamoa lasi neganai, ita sibona bona ita davaria hekwakwanai do ita laloa momo. Unai bamona lalohadai dainai, abia hidi kereredia ita karaia diba. (Aon. 18:1) Momokani, hekwakwanai ita davaria neganai, sibona ita noho be kerere lasi. To nega momo sibona ita noho neganai, Iehova ia ura ma haida amo ita ia durua dalana do ita koua. Unai dainai hekwakwanai ita davaria neganai, namona be iseda famili, turadia bona elda taudia edia heduru ita abia dae. Iehova ese idia ia gaukaralaia ita idia durua totona.—Aon. 17:17; Isa. 32:​1, 2.

IEHOVA ESE OI DO IA HAGOADAIA

14. Dahaka gaudia dainai ita gari diba?

¹⁴ Reana ita dekenai idia vara gaudia dainai do ita gari. Baibel ai, Dirava ena hesiai taudia be edia inai taudia eiava gau ma haida dainai, idia lalohisihisi bona gari karana idia herevalaia. (Sal. 18:4; 55:​1, 5) Unai hegeregerena, ita danu be sikuli, gaukara gabunai, bona iseda famili eiava gavamani amo dagedage ita davaria. Danu, gorere badana ta ita abia dainai ita gari, badina ita ura lasi ita mase. Unai bamona negadiai, natu maragina ta bamona ita ura heduru ita abia. Edena dala ai Iehova ese ita do ia durua?

15. Salamo 94:19 hegeregerena Iehova be ita totona dahaka do ia karaia?

¹⁵ Iehova ese ita ia durua dalana. Ia ese ita ia hagoadaia bona iseda lalona ia hanamoa. (Salamo 94:19 duahia.) Unai salamo ena hereva dainai kekeni maragina ta ita laloa, ia be lai gubana dainai ia gari bona ia mahuta  namonamo lasi. Iseda lalona ai ita piksaia diba tamana ia mai, ia abia isi bona ia rosia ela bona ia mahuta. Ena be unai lai gubana ia ore lasi, to ena tamana ese ia rosia dainai ia gari lasi. Hekwakwanai badadia ita davaria bona ita gari neganai, laulau dalanai do ita ura iseda guba Tamana ese ita ia rosia ela bona ita gari lasi. Edena dala ai Iehova ena heduru ita abia diba?

16. Iehova ese oi ia hagoadaia totona, dahaka oi karaia be namo? (Laulau itaia danu.)

¹⁶ Dahaka ita karaia be namo. Hanaihanai nega oi atoa Iehova oi guriguri henia bona iena Hereva oi duahia. (Sal. 77:​1, 12-14) Bema unai oi karaia, hekwakwanai negadiai, do oi ura karaia gau ginigunana be emu guna Tamana ena heduru oi tahua. Iehova dekenai emu gari bona lalohekwarahi gaudia oi herevalaia. Bena ena hereva oi duahia karana amo ia oi kamonai henia bona oi do ia durua dalana do oi itaia. (Sal. 119:28) Oi gari neganai, Baibel ena kahana haida duahia karana ese oi do ia hagoadaia. Hegeregere, Iobu, Salamo, Aonega Herevadia bona Iesu ena hereva Mataio karoa 6 amo, hagoadaia hereadia do oi davaria. Iehova oi guriguri henia bona ena Hereva oi duahia neganai, oi do ia hagoadaia.

17. Dahaka ita abia dae momokani?

¹⁷ Ita abia dae momokani, hekwakwanai negadiai, Iehova ese ita do ia durua. Bona do ita mamia sibona ita noho lasi. (Sal. 23:4; 94:14) Iehova ia gwauhamata ita do ia gimaia, ita do ia durua lalohadai maorona ita abia bona ita do ia hagoadaia. Iehova totona, Isaia 26:3 ia gwau: “Oi dekenai idia tabekau momokani taudia do oi gimaia. Idia dekenai noho hanaihanai maino do oi henia, badina idia be oi dekenai idia abidadama.” Unai dainai Iehova oi abidadama henia bona oi gaukara goada ia henia heduru oi abia totona. Bema unai bamona oi karaia, hekwakwanai negadiai, do oi goada noho.