1. Iehova be edena bamona oi laloa?

 NEGA ta reana oi laloa, Iehova be edena bamona Diravana? Guriguri amo ia oi hereva henia neganai, dahaka oi laloa? Ena be Iehova ita itaia diba lasi, to Baibel ese dala idauidau ai ia herevalaia. Hegeregere, Iehova be “dina bona kesi” bona “gabua ore lahina bamona.” (Sal. 84:11; Heb. 12:29) Esekiela ese Iehova ia gwauraia, ia be sapairo nadi, auri laboralabora, bona kevau mai ena diari badana bamona. (Ese. 1:​26-28) Baibel ese Iehova ia herevalaia dalana ita laloa neganai, reana do ita hoa eiava ita gari.

2. Dahaka dainai ia auka haida be Iehova kahirakahira idia lao totona?

² Iehova ita itaia diba lasi dainai, reana do ia auka ita abia dae ita ia lalokau henia. Haida be edia mauri ai dika gaudia idia vara dainai, idia laloa Iehova be idia ia lalokau henia lasi. Reana tama ese natuna ia lalokau henia karana idia mamia lasi. Iehova be unai bamona hemami ia lalopararalaia bona ia diba dahaka dainai ia auka ia kahirakahira idia lao totona. Unai dainai ita ia durua totona, Baibel ai iena kara namodia ia hahedinaraia.

3. Dahaka dainai Iehova ena lalokau ita herevalaia be namo?

³ Lalokau be Iehova ena kara badana. (1 Ioa. 4:8) Baibel ia gwau Iehova be lalokau. Bona lalokau dainai gau ibounai ia karaia. Dirava ena lalokau be bada herea dainai, ia idia lalokau henia lasi taudia dekenai ena lalokau ia hahedinaraia danu. (Mat. 5:​44, 45) Inai atikol ai, ita ese Iehova bona ena lalokau do ita herevalaia. Dirava ita diba namonamo neganai, ia dekenai iseda lalokau do ia bada.

IEHOVA ESE ITA IA LALOKAU HENIA BADA

4. Iehova ena lalokau dainai emu hemami be edena bamona? (Laulau itaia danu.)

⁴ “Iehova be lalokau . . . bada Diravana.” (Iam. 5:11) Baibel  ai Iehova be sina lalokauna ta ida sibona ia hahegeregerea. (Isa. 66:​12, 13) Mani sina ta ese ena beibi ia naria dalana ita laloa. Ena natuna ia rosia, ena mamuna dekenai ia atoa, bona mai lalokau bona gado namo ida ia hereva henia. Ia taitai eiava hisihisi ia mamia neganai sinana ese ena ura gaudia ia henia. Unai hegeregerena, ita lalohisihisi neganai ita diba Iehova ena lalokau do ita mamia. Salamo torea tauna ia gwau: “Lau lalohekwarahi bada neganai, oi ese lau oi hagoadaia bona egu lalona oi hanamoa.”—Sal. 94:19.

5. Iehova ena noho hanaihanai lalokauna be edena bamona oi laloa?

⁵ Iehova ena lalokau be ia noho hanaihanai. (Sal. 103:8) Unai dainai kerere ita karaia neganai ita dekenai do ia hesiku haraga lasi. Israela besena be nega momo Iehova idia habadua to edia kerere amo idia helalo-kerehai neganai, idia dekenai ena noho hanaihanai lalokauna ia hahedinaraia, hegeregere idia ia hamaoroa: “Egu matana ai oi be dava bada gauna bamona, oi lau hanamoa, bona lau lalokau henia.” (Isa. 43:​4, 5) Dirava ena lalokau be ia idau lasi. Nega ibounai ia dekenai ita tabekau diba. Ena be kerere badadia ita karaia, to Iehova be ita do ia rakatania lasi. Ita helalo-kerehai bona ia dekenai ita giroa lou neganai, do ita itaia ita ia lalokau henia noho. Ia gwauhamata iseda “kara dika ibounai do ia gwauatao momokani.” (Isa. 55:7) Baibel ia gwau: “Iehova sibona amo goada matamata do [ita] abia.”—Kara 3:19.

6. Sekaraia 2:8 amo, Iehova dekenai dahaka ita dibaia?

⁶ Sekaraia 2:8 duahia. Iehova be ita ia lalokau henia dainai iseda hemami ia lalopararalaia bona ia ura ita ia gimaia. Ita lalohisihisi neganai ia danu ia lalohisihisi. Unai dainai inai bamona ita guriguri diba: “Lau oi gimaia, emu matana oi gimaia bamona.” (Sal. 17:8) Matana be tauanina dekenai mai anina bada kahana ta. Ita be Iehova ena matana ida ia hahegeregerea dainai, haida ese ita idia hahisia neganai, Iehova ese ia laloa bada gauna idia hahisia danu.

7. Dahaka dainai namona be ita abia dae, Iehova be ita ia lalokau henia?

⁷ Iehova ia ura ita abia dae, ita ta ta ia lalokau henia. To ia diba, guna ita dekenai idia vara dika gaudia dainai, do ita laloa ita ia  lalokau henia lasi. Eiava hari ita davaria hekwakwanai dainai, reana do ita abia dae lasi Iehova be ita ia lalokau henia. To dahaka ese ita do ia durua? Iehova ese Iesu, horoa taudia, bona ita ia lalokau henia karana ita dibaia neganai, do ita abia dae ita ia lalokau henia.

IEHOVA ENA LALOKAU IA HAHEDINARAIA DALANA

8. Dahaka dainai, Iesu ia abia dae momokani, ena Tamana ese ia lalokau henia?

⁸ Iehova bona ena natuna be lagani daudau idia noho hebou, unai dainai edia hetura karana ia goada bona ta ta idia lalokau henia. Mataio 17:5 ai, Iehova ese ia hahedinaraia, Iesu ia lalokau henia. Reana Iehova ia gwau diba, ‘Inai tauna lau lalonamo henia.’ To ia ura ita diba Iesu ia lalokau henia bada, unai dainai ia gwau, “Inai be egu Natuna, egu lalokau.” Iehova be Iesu ese do ia karaia gauna dekenai ia moale bada. (Efe. 1:7) Bona Iesu be ia abia dae momokani, iena Tamana ese ia lalokau henia, bona ena Tamana ena lalokau ia mamia momokani. Nega momo, ma haida ia hamaoroa ena Tamana ese ia lalokau henia.—Ioa. 3:35; 10:17; 17:24.

9. Edena hereva ese Iehova ena lalokau horoa taudia dekenai ia hahedinaraia? Herevalaia. (Roma 5:5)

⁹ Danu, Iehova ese horoa taudia dekenai ena lalokau ia hahedinaraia. (Roma 5:5 duahia.) Mani ita laloa, siri ese ia hahedinaraia, Iehova be ena lalokau amo edia “kudouna ia hahonua.” Baibel Diksenari ta ese Dirava ena lalokau be sinavai ida ia hahegeregerea. Unai laulau herevana ese ia hahedinaraia Iehova be horoa taudia ia lalokau henia bada! Bona horoa taudia idia diba Dirava ese idia ia lalokau henia. (Iuda 1) Aposetolo Ioane ese edia hemami be inai bamona ia gwauraia: “Mani umui laloa, Tamana ena lalokau ita dekenai be bada herea, unai dainai ita idia gwauraia Dirava ena natudia!” (1 Ioa. 3:1) Iehova be horoa taudia sibona ia lalokau henia, a? Lasi, Iehova ia hamomokania ita ibounai ia lalokau henia.

10. Dahaka ese ia hamomokania Iehova be oi ia lalokau henia?

¹⁰ Edena dala ai Iehova ese ena lalokau ia hamomokania? Mauri davana amo unai ia hahedinaraia! (Ioa. 3:16; Roma 5:8) Iehova ese ena natuna lalokauna ia henia, ita ibounai totona ia mase, unai amo iseda kara dika do ia gwauatao bona Iehova turana ai ita lao diba. (1 Ioa. 4:10) Iehova bona Iesu ese ita totona idia henia mauri davana ita laloa dobu neganai, do ita laloparara ita ta ta idia lalokau henia bada. (Gal. 2:20) Iehova be ena hahemaoro dainai mauri davana ia karaia lasi, to lalokau dainai unai ia karaia. Iehova ese ena natuna lalokauna ia bouboulaia karana amo ia hamomokania, ita ia lalokau henia. Oibe, ena natuna ia koua lasi hisihisi ia abia bona ita totona ia mase.

11. Ieremia 31:3 amo dahaka ita dibaia?

¹¹ Momokani, Iehova ese ena lalokau be hereva sibona amo lasi, to iena kara amo ia hahedinaraia danu. (Ieremia 31:3 duahia.) Iehova be ita ia lalokau henia dainai, ia dekenai ita ia veria lao. (Deuteronomi 7:​7, 8 hahegeregerea.) Gau ta bona taunimanima ta ese iena lalokau amo ita do ia hapararaia lasi. (Roma 8:​38, 39) Unai lalokau dainai emu hemami be edena bamona? Salamo 23 oi duahia neganai, Iehova ese Davida ia lalokau henia bona naria karana do oi itaia. Bona unai ese oi ia durua dalana oi laloa.

IEHOVA ENA LALOKAU DAINAI EMU HEMAMI BE EDENA BAMONA?

12. Salamo 23 be edena bamona do oi herevalaia?

¹² Salamo 23:​1-6 duahia. Salamo 23 ai Davida be Iehova ese ia lalokau henia bona naria  karana ia herevalaia. Edia hetura karana ia herevalaia neganai, Iehova ia gwauraia iena Mamoe Naria Tauna bamona. Davida be Iehova ena hakaua dalana ia badinaia bona ia dekenai ia tabekau dainai, Iehova ese ia naria. Bona ia diba nega ibounai Iehova ese do ia lalokau henia. Dahaka dainai unai ia abia dae momokani?

13. Dahaka dainai Davida ia diba momokani Iehova ese ia naria?

¹³ “Lau be gau ta dekenai do lau dabu lasi.” Davida ia mamia Iehova ese ia naria namonamo, badina ena dabu gaudia ibounai ia henia. Danu, Iehova ida ena hetura karana ia moalelaia bona ena lalonamo ia abia. Unai dainai ia diba ena be dahaka do ia vara, to Iehova ese do ia naria bona ena dabu gaudia do ia henia. Davida ia abia dae momokani Iehova ese ia lalokau henia, unai dainai ia laloa momo lasi bona ia moale bada.—Sal. 16:11.

14. Edena dala ai Iehova be mai lalokau ida ita ia naria?

¹⁴ Hekwakwanai ita davaria neganai, Iehova be mai lalokau ida ita ia naria. Taihu ta ladana Claire, a be lagani 20 mai kahana Betele dekenai ia gaukara. Ena ruma bese be hekwakwanai badadia idia davaria neganai, ia diba lasi edena bamona idia do ia durua. Ena tamana be stroke gorere ia abia, ena tadina be orea amo idia atoa siri, bona ena ruma bese edia bisinesi maragina idia karaia diba lasi, bona edia ruma be banika ese idia abia lou. Iehova ese edena dala ai idia ia durua? Claire ia gwau: “Iehova ese dina ta ta ai, egu ruma bese edia dabu gaudia ia henia. Bona nega momo, dala idauidau ai iena heduru ai abia!  Iehova ese ai ia durua daladia lau laloa neganai, iena lalokau karana do lau laloaboio diba lasi. Unai ese lau ia durua dainai, ena be hekwakwanai ma haida lau davaria, to mai moale ida Iehova lau hesiai henia noho.”

15. Edena dala ai Davida be goada ia abia? (Laulau itaia danu.)

¹⁵ “Ia ese lau ia hagoadaia.” Nega haida Davida ia lalohekwarahi badina hekwakwanai bona hahetoho momo ia davaria. (Sal. 18:​4-6) To, Iehova ese ia lalokau henia bona ia naria dainai, unai ese ia hagoadaia. Iehova ese ena turana namona Davida be “rei gabuna namona” bona “laga-ani gabu namodia mai edia ranu dekenai . . . ia hakaua lao.” Unai dainai, Davida ia goada bona mai moale ida Iehova ia hesiai henia noho.—Sal. 18:​28-32.

16. Edena dala ai Iehova ena lalokau ese oi ia hagoadaia?

¹⁶ Hari danu, hekwakwanai bona hahetoho ita davaria neganai, “Iehova ena noho hanaihanai lalokauna dainai ita be ita mase lasi.” (Lal. 3:​22, ftn; Kol. 1:11) Mani Rachel ena haheitalai ita laloa. COVID-19 lalonai, ena adavana be ia bona Iehova ia rakatania neganai, ia lalohisihisi bada. Iehova ese ia totona dahaka ia karaia? Ia gwau: “Iehova ese lau ia durua iena lalokau lau mamia totona. Hegeregere turadia be nega idia atoa lau idia bamoa, egu aniani idia abia mai, fon amo meseij bona hagoadaia siridia idia siaia, lau ida idia kiri, bona lau idia hadibaia loulou Iehova be lau ia naria. Hanaihanai Iehova lau tanikiu henia, badina lau idia lalokau henia ruma bese badana ia henia.”

17. Dahaka dainai Davida be ‘dika gauna ta dekenai ia gari lasi’?

¹⁷ “Lau be dika gauna ta dekenai lau gari lasi, badina oi be lau ida oi noho.” Davida ena inai taudia be momo bona nega momo kahirakahira ena mauri ia haboioa. To Iehova ese ia lalokau henia dainai, ia gimaia bona naria. Davida ia mamia Iehova be hanaihanai ia ida ia noho bona unai ese ia hagoadaia. Unai dainai, iena ane lalonai ia gwau: “Lau gari henia gaudia ibounai amo [Iehova ese] lau ia hamauria.” (Sal. 34:4) Ena be nega haida Davida ia gari, to unai ia hanaia badina ia diba Iehova ese ia lalokau henia.

18. Oi gari neganai, edena dala ai Iehova ena lalokau ese oi ia hagoadaia?

¹⁸ Hekwakwanai ta dainai ita gari neganai, edena dala ai Iehova ena lalokau karana ese ita do ia hagoadaia? Painia taihu ta ladana Susi, bona ena adavana mani ita laloa,  edia natuna mero be sibona ia hamasea neganai, idia mamia hisihisi ia herevalaia, ia gwau: “Emu mauri ai hekwakwanai badana ta ia vara neganai, do oi gari bona oi diba lasi dahaka do oi karaia. To ai dekenai unai ia vara neganai, Iehova ena lalokau ai mamia ia ese ai ia naria bona gimaia.” Matamanai ita herevalaia taihu ladana Rachel, ia gwau: “Hanuaboi ta ai sibona dekenai lau hebogahisi neganai, lau laloa momo bona gari, unai dainai mai taitai ida Iehova lau guriguri henia. Bena sina ta ese ena beibi ia naria hegeregerena, lau mamia lalomaino ia henia bona egu hemami ia namo bona lau mahuta namonamo. Unai hanuaboi ai ia vara gauna do lau laloaboio lasi.” Elda ta ladana, Tasos, be ami dekenai ia vareai lasi dainai, dibura ruma ai lagani 4 ia noho. Iehova ese edena dala ai mai lalokau ida ia naria? Ia gwau: “Iehova ese egu dabu gaudia ibounai ia henia. Unai ese Iehova dekenai egu abidadama ia hagoadaia. Danu iena lauma helaga ese lau ia durua dainai, ena be dibura ruma dekenai lau noho, to lau moale noho. Bona lau diba momokani Iehova kahirakahira lau noho neganai, lau do ia naria bona lalokau henia bada. Unai dainai dibura ruma ai lau noho lalonai, regula painia gaukara lau hamatamaia.”

LALOKAU DIRAVANA KAHIRAKAHIRA OI LAO

19. (a) Edena bamona do ita guriguri, bema ita diba Iehova be ita ia lalokau henia? (b) Iehova ena lalokau karadia amo edena oi ura henia bada? (Maua itaia, “ Inai Hereva ese Ita Do Idia Durua Iehova Ena Lalokau Ita Mamia.”)

¹⁹ Ita herevalaia ekspiriens ese idia hamomokania, ‘lalokau Diravana’ Iehova, be ita ida ia noho! (2 Kor. 13:11) Ia be ita ta ta ia laloa bada. Bona ita diba ita dekenai iena “noho hanaihanai lalokauna ia hahedinaraia noho.” (Sal. 32:​10, ftn.) Iena lalokau karana ita laloa dobu neganai, do ita abia dae Iehova be ia noho momokani bona ia kahirakahira do ita noho. Mai gari lasi ida ia do ita guriguri henia bona do ita hamaoroa iena lalokau karana ita laloa bada. Iseda hekwakwanai ibounai be ia dekenai ita gwauraia, badina ita diba iseda hemami ia lalopararalaia bona ia ura ita ia durua.—Sal. 145:​18, 19.

20. Edena dala ai Iehova ena lalokau ese ita ia veria lao ia dekenai?

²⁰ Keru negana ai, lahi badinai ita noho hegeregerena, hekwakwanai ita davaria neganai, Iehova ena lalokau ese ita do ia hagoadaia. Unai dainai, Iehova ena lalokau oi abia dae unai ese oi do ia hagoadaia bona lalomaino do ia henia. Bona ita ibounai be iena lalokau dainai, do ita gwau: “Iehova lau lalokau henia”!—Sal. 116:1.