Tatau momo be idia noho gabuna ena kastom dainai, hahine idia laloa maragi. Hegeregere, Bolivia ai sekit naria tauna ladana, Hans, ia gwau: “Tatau be idia tubu daekau gabuna ena kastom ese idia ia hagoadaia sibodia idia abia isi totona. Unai dainai idia laloa, idia be hahine idia hereaia bona nega momo hahine idia matauraia lasi.” Taiwan ai elda ta ladana Shengxian, ia gwau: “Lau noho gabuna ai tatau momo idia laloa, hahine be maoro lasi edia lalohadai idia gwauraia totona. Bema tau ta be gau dekenai hahine edia lalohadai ia gwauraia, ena turadia ese do idia matauraia lasi.” Tatau ma haida be dala ma haida ai hahine idia inai henia. Hegeregere, hemataurai lasi dalanai hahine idia hevasehalaia.

To, ena be tatau edia kastom be idauidau, edia laloa dalana idia haidaua diba. Hegeregere, tatau ese hahine idia hereaia lalohadaina idia dadaraia diba. (Efe. 4:​22-24) Bona Iehova ena haheitalai idia tohotohoa karana amo unai idia karaia diba. Inai atikol ai, Iehova ese hahine ia kara henia, tadikaka ese hahine idia kara henia totona Iehova idia tohotohoa, bona elda taudia ese taihu do idia kara henia daladia do ita herevalaia.

IEHOVA ESE HAHINE IA KARA HENIA DALANA

Iehova be hahine kara henia dalana dekenai haheitalai namona ia hahedinaraia. Ia be hebogahisi Tamana dainai, tanobada ai ena natudia ibounai ia lalokau henia. (Ioa. 3:16) Iehova idia abidadama henia hahinedia be iena natuna bamona ia lalokau henidia. Mani Iehova ese hahine ia lalokau henia bona matauraia daladia ita herevalaia.

 Maka tamona ai ia kara henidia. Iehova ese tau bona hahine be iena toana hegeregerena ia karaia. (Gen. 1:27) Ia ese tau ia karaia dalana be hahine ena diba bona aonega ia hereaia lasi; bona tatau ia kara henia hegeregerena hahine ia kara henidia. (2 Siv. 19:7) Tatau bona hahine dekenai ia henia diba be hegeregere, unai dainai Baibel ena hereva momokani do idia lalopararalaia bona ena kara namodia idia tohotohoa diba. Danu, Iehova ese tatau bona hahine edia abidadama karana ia laloa bada. Bona idia dekenai helaro ia henia tanobada paradaisona ai mauri hanaihanai do idia abia eiava guba ai king bona hahelaga gaukara do idia karaia. (2 Pet. 1:​1, ftn.) Unai ese ia hahedinaraia, Iehova be hahine ia inai henia lasi.

Idia ia kamonai henia. Iehova be hahine edia hemami bona lalohadai ia laloa bada. Hegeregere, ia ese Rahela bona Hana edia guriguri ia kamonai bona ia haerelaia. (Gen. 30:22; 1 Sam. 1:​10, 11, 19, 20) Danu Iehova ese Baibel idia torea taudia ia hasiahua, unai amo hahine idia kamonai henia tatau edia sivarai idia torea. Hegeregere, Aberahamo be Iehova ena hereva ia badinaia bona ena adavana, Sara ia kamonai henia. (Gen. 21:​12-14) King Davida be Abigaila ia kamonai henia. Oibe, Davida ia mamia Iehova ese Abigaila ia siaia ia hereva henia totona. (1 Sam. 25:​32-35) Iesu be ena Tamana ena kara ia hahedinaraia goevagoeva, bona iena sinana, Maria, ia kamonai henia. (Ioa. 2:​3-10) Unai haheitalai ese idia hahedinaraia, Iehova ese hahine ia matauraia dalana ta be idia ia kamonai henia.

Idia ia abidadama henia. Hegeregere, Iehova ia diba, Heva be tanobada ai havaraia gaudia do ia naria namonamo. (Gen. 1:28) Unai amo ia hahedinaraia, Iehova ese Heva ia laloa maragi lasi bona ia laloa lasi Adamu ese ia hereaia, to ia diba Heva be ena tau do ia durua. Danu Iehova ese peroveta hahinedia Debora bona Hulida ia abia hidi, iena taunimanima bona hahemaoro tauna ta bona king ta do idia sisiba henia totona. (Hah. 4:​4-9; 2 Ki. 22:​14-20) Hari danu, Iehova ese Keristani hahinedia dekenai gaukara ia henia. Unai abidadama taihudia be pablisa, painia, bona misinari gaukara idia karaia. Danu, Kingdom Hall bona brens rumadia idia design, haginia bona hanamoa gaukaradia idia durua. Haida be Betele bona remote trensleisen ofesi (RTO) dekenai idia gaukara. Inai taihu ibounai be tuari orea badana ta bamona Iehova ese ia gaukaralaia ena ura idia karaia totona. (Sal. 68:11) Unai ese ia hahedinaraia, Iehova ia laloa lasi hahine be manoka eiava idia hegeregere lasi gaukara idia karaia totona.

TADIKAKA ESE HAHINE IDIA KARA HENIA TOTONA IEHOVA IDIA TOHOTOHOA DALANA

Tadikaka e, bema ita ura diba Iehova ese Keristani taihu ia kara henia dalana ita tohotohoa eiava lasi, namona be iseda lalohadai bona kara ita tahua. Unai ita karaia totona, heduru ita abia be namo. Doketa ese masini ta amo ta ena kudouna ai gorere ia davaria hegeregerena, tura namona bona Dirava ena Hereva ese ita do idia durua, unai amo do ita diba bema ita ese hahine ita inai henia eiava lasi. Dahaka do ita karaia unai heduru ita abia totona?

Tura namona oi nanadaia. (Aon. 18:17) Oi abidadama henia tura namona ta oi nanadaia: “Oi laloa lau ese taihu be edena bamona lau kara henidia? Idia laloa idia lau matauraia, a? Egu kara ta lau haidaua be namo idia lau kara namo henia totona, a?” Bema emu turana ia gwau emu kara haida oi hanamoa, namo lasi oi badu. To mai ura ida senisi oi karaia.

Dirava ena hereva oi stadilaia. Bema ita ura diba iseda taihu ita kara namo henia, dala namona be Dirava ena Hereva amo iseda lalohadai bona kara ita sekea. (Heb. 4:12) Baibel ita stadilaia neganai, hahine idia kara namo henia tatau bona unai bamona idia karaia lasi tatau edia sivarai do ita diba. Bena edia kara be iseda kara ida ita hahegeregerea. Namona be Baibel siri ta be siri ma haida ida ita hahegeregerea, unai amo siri tamona ena hereva dainai hahine kara henia dalana dekenai momo ese idia abia lalohadai kererena do ita durua lasi. Hegeregere, 1 Petero 3:7 ia gwau: “Hahine do umui matauraia, badina idia be idia goada lasi, ia makohia haraga hodu ta bamona.” b  Inai siri ena anina be, hahine be aonega lasi bona gaukara momo idia karaia diba lasi, a? Lasi momokani! Mani Petero ena hereva Galatia 3:​26-29 ita laloa, ia hahedinaraia Iehova ese hahine bona tatau ia abia hidi Iesu ida guba dekenai idia lohia totona. Hahine kara henia totona Dirava ena Hereva ita duahia bona tura namodia ita nanadaia neganai, iseda taihu matauraia dala maorodia do ita diba.

ELDA TAUDIA ESE TAIHU IDIA MATAURAIA DALADIA

Kongrigeisen lalonai tadikaka ese elda taudia edia haheitalai idia tohotohoa diba mai hemataurai ida taihu idia kara henia totona. Edena dala ai taihu matauraia karana dekenai elda taudia be haheitalai namona? Mani inai dala haida ita herevalaia.

Taihu dekenai hanamoa hereva idia gwauraia. Elda taudia dekenai aposetolo Paulo be haheitalai namona. Roma kongrigeisen dekenai ia torea revareva lalonai taihu haida ia hanamoa. (Roma 16:12) Kongrigeisen lalonai tadikaka ese Paulo ena revareva idia duahia neganai, reana unai taihu be idia moale bada. Unai hegeregerena, taihu edia kara namodia bona Iehova totona idia karaia gaukara dainai elda taudia ese idia hanamodia. Unai amo taihu idia diba idia be kongrigeisen taudia ese idia matauraia bona laloa bada. Elda taudia ese taihu dekenai idia henia hagoadaia hereva ese idia ia durua mai abidadama ida Iehova idia hesiai henia noho totona.—Aon. 15:23.

Elda taudia be mai momokani ida taihu idia hanamodia bona hereva maorodia idia gaukaralaia. Dahaka dainai? Taihu ta ladana Jessica ia gwau: “Tadikaka be taihu dekenai idia gwau ‘gaukara  namona,’ unai be namo, to ai ia hagoadaia gauna be ai karaia gauna dainai ai idia hanamoa. Hegeregere, natudia ai hadibaia hebou dekenai idia helai namonamo, eiava nega ai atoa Baibel stiuden ai hakaua hebou dekenai ia mai totona.” Elda taudia ese unai dala ai taihu idia hanamodia neganai, idia mamia kongrigeisen lalonai idia be mai anina bada bona gaukara namona idia karaia.

Taihu idia kamonai henia. Idia manau elda taudia idia abia dae ma haida danu be lalohadai maorodia idia gwauraia danu. Unai bamona tadikaka ese taihu haida idia boiria edia lalohadai idia gwauraia totona, bona idia hereva neganai tadikaka idia kamonai namonamo. Unai amo, elda taudia ese taihu idia hagoadaia bona sibodia idia durua danu. Edena dala ai? Betele dekenai ia gaukara elda ta ladana Gerardo, ia gwau: “Lau ese taihu lau noia edia lalohadai idia gwauraia totona, unai ese lau ia durua egu gaukara lau karaia namonamo, badina taihu momo be lagani daudau idia gaukara.” Kongrigeisen lalonai, taihu momo be idia painia dainai, edia haroro teritori ai idia noho taudia momo idia dibaia. Elda ta ladana Bryan, ia gwau: “Iseda taihu be edia kara bona gaukara namodia amo orea idia durua bada. Unai dainai edia ekspiriens amo diba oi abia be namo!”

Elda taudia ese taihu edia lalohadai idia dadaraia lasi be namo. Dahaka dainai? Elda ta ladana, Edward ia gwau: “Taihu ta ena lalohadai herevadia bona ena ekspiriens ese tadikaka ta ia durua, ena gaukara ia hanamoa bona ma haida edia hemami ia lalopararalaia totona.” (Aon. 1:5) Ena be nega haida elda ta ese taihu ta ena lalohadai ia badinaia lasi, to namona be ia gwauraia lalohadai dainai taihu ia tanikiu henia be namo.

Taihu idia treinia. Elda taudia be dala idia tahua taihu dekenai treinini idia henia. Hegeregere, haroro gaukara totona bapatiso tadikaka idia noho lasi neganai, haroro hebouna karaia dalana idia hadibaia. Danu, konstraksen gaukara bona orea ena meintenens gaukara durua totona, tulu eiava masini gaukaralaia daladia idia hadibaia. Betele ai, ovasia ese taihu dekenai treinini idauidau idia henia hegeregere meintenens, purchasing, accounting, computer programming, bona gaukara ma haida. Elda taudia ese taihu idia treinia neganai, idia abia dae momokani taihu be gaukara idauidau idia karaia diba.

Taihu momo be elda taudia ese idia henia treinini idia gaukaralaia ma haida idia durua totona. Hegeregere, taihu haida be konstraksen ai idia abia treinini idia gaukaralaia, disasta murinai tadikaka taihu edia ruma idia haginia lou totona. Taihu haida be pablik haroro totona idia abia treinini be taihu ma haida dekenai idia hadibaia, unai amo idia danu be unai gaukara idia durua diba. Taihu be idia dekenai treinini idia henia elda taudia be edena bamona idia laloa? Taihu ta, Jennifer, ia gwau: “Kingdom Hall konstraksen lau durua neganai, ovasia ese nega ia atoa lau ia treinia totona. Lau karaia gaukara ia itaia, bona lau ia hanamoa. Lau moale ia ida lau gaukara badina lau mamia lau ia laloa bada bona ia diba gaukara namona lau karaia diba.”

TAIHUDIA BE EMU FAMILI BAMONA OI KARA HENIA ENA NAMO

Iehova bamona iseda abidadama taihudia ita lalokau henia! Unai dainai iseda famili bamona ita kara henidia. (1 Tim. 5:​1, 2) Ita moale idia ida ita gaukara hebou bona unai be hahenamo badana. Idia mamia idia ita lalokau henia bona ita durudia neganai, ita moale. Taihu ta, Vanessa, ia gwau: “Iehova lau tanikiu henia badina iena orea lalonai tadikaka momo idia noho bona idia ese lau idia hagoadaia bada.” Taiwan ai taihu ta ia gwau: “Iehova lau tanikiu henia badina iena orea ese hahine edia hemami idia matauraia. Unai ese egu abidadama ia hagoadaia bona Iehova ena orea lalonai lau noho karana lau laloa bada.”

Iehova hegeregerena Keristani tatau ese hahine idia laloa bada bona matauraia neganai, ia moale bada! (Aon. 27:11) Scotland ai elda ta, Benjamin, ia gwau: “Hari inai negai tatau be hahine idia matauraia lasi. Unai hahine be Kingdom Hall lalonai idia raka vareai neganai, ita ura do idia mamia idia ita matauraia bona lalokau henidia.” Namona be ita gaukara goada Iehova ita tohotohoa bona mai lalokau ida iseda taihu ita kara henia bona matauraia.—Roma 12:10.