1. Dahaka dainai nega haida ita gari?

 ITA IBOUNAI be nega haida ita gari. Oibe, Baibel amo ita abia diba ese ita ia durua, mase, demoni, bona vaira negai do idia vara gaudia totona ita gari lasi. To ita be nega aukana lalonai ita noho dainai, “gari do idia havaraia gaudia,” hegeregere tuari, taravatu utua karadia, bona gorere idauidau dekenai do ita gari. (Luka 21:11) Danu taunimanima dekenai ita gari, hegeregere gavamani taudia eiava eda tomadiho dainai ita idia dagedage henia Witnes lasi famili. Haida be idia lalohekwarahi badina idia laloa, hari eiava vaira nega ai do idia davaria hahetoho idia haheaukalaia diba lasi.

2. Davida be Gata ai ia noho lalonai, ia dekenai ia vara gauna mani oi herevalaia.

² Davida be nega haida ia gari. Hegeregere, King Saulo be Davida hamasea totona ia lulua neganai, Davida be Filistia ena siti Gata dekenai ia heau lao. Gata ena king Akisi ia kamonai, Davida be tuari tauna goadana bona Filistia taudia “ten tausen momo” ia hamasea. Davida be unai ia diba neganai ia “gari bada.” (1 Sam. 21:​10-12) Akisi ese ia dekenai do ia karaia gauna totona ia lalohekwarahi. Dahaka ese Davida ia durua ia gari lasi totona?

3. Salamo 56:​1-3, 11 hegeregerena, edena dala ai Davida be gari karana ia hanaia?

³ Davida be Gata ai noho neganai, ia abia hemami be Salamo  56 ai ia torea. Unai salamo ai Davida be ia gari ena badina bona ena gari karana ia hanaia dalana ia hahedinaraia. Davida ia gari neganai, Iehova ia abidadama henia. (Salamo 56:​1-3, 11 duahia.) Ia be badina maorodia dainai unai bamona ia karaia. Iehova ena heduru amo Davida be palani ta ia karaia: Kavakava tauna bamona ia kara! Unai dainai Akisi ese ia hamasea lasi, to ia hamaoroa ena gabu do ia rakatania. Unai amo Davida ia heau mauri.—1 Sam. 21:13–22:1.

4. Edena dala ai Iehova dekenai iseda abidadama do ita hagoadaia? Herevalaia.

⁴ Ita danu Iehova ita abidadama henia neganai, do ita gari lasi. To ita gari neganai, edena dala ai Iehova dekenai eda abidadama ita hagoadaia diba? Mani inai haheitalai ita laloa. Bema oi davaria oi be mai emu gorere, reana matamanai do oi gari. To bema emu doketa oi abidadama henia do oi gari lasi. Ia be reana oi abia gorere idia abia taudia momo ia durudia. Oi gari ena badina oi herevalaia neganai, ia be emu hereva ia kamonai namonamo, bona oi mamia oi ia laloa bada. Bona reana haida ia durua dalana ta be oi dekenai do ia gwauraia. Unai hegeregerena, Iehova ese ia karaia vadaeni, hari ia karaia noho, bona vaira nega ai do ia karaia gaudia ita laloa neganai, ia do ita abidadama henia. Davida be unai bamona ia karaia. Salamo 56 ai ia torea gaudia do ita herevalaia lalonai, Iehova dekenai emu abidadama do oi hagoadaia bona gari karana oi hanaia dalana oi laloa.

IEHOVA ESE DAHAKA IA KARAIA VADAENI?

5. Davida be ia gari neganai, dahaka gaudia ia laloa dobu? (Salamo 56:​12, 13)

⁵ Davida be hekwakwanai ia davaria neganai, Iehova ese ia karaia vadaeni gaudia ia laloa. (Salamo 56:​12, 13 duahia.) Davida ena mauri lalonai unai bamona ia karaia. Hegeregere, nega haida Iehova ese ia havaraia gaudia ia laloa dobu, unai amo Iehova ena siahu bona taunimanima ia laloa bada karana ia laloa. (Sal. 65:​6-9) Davida be Iehova ese ma haida totona ia karaia gaudia ia laloa dobu. (Sal. 31:19; 37:​25, 26) Danu Iehova ese ia totona ia karaia vadaeni gaudia ia laloa dobu. Davida be ia beibi negana amo  Iehova ese ia durua bona gimaia. (Sal. 22:​9, 10) Momokani, Davida be unai gaudia ia laloa dobu karana ese ia durua Iehova ia abidadama henia totona!

6. Ita gari neganai, dahaka ese ita do ia durua Iehova ita abidadama henia totona?

⁶ Oi gari neganai, sibona oi nanadaia, ‘Iehova be dahaka ia karaia vadaeni?’ Ia havaraia gaudia oi laloa dobu. Hegeregere, Iehova ese manu bona flaoaflaoa ia naria karana oi “itaia namonamo,” unai gaudia be iena toana hegeregerena ia karaia lasi bona ia idia tomadiho henia diba lasi. Unai gaudia ita laloa neganai, do ita abia dae Iehova ese ita do ia naria danu. (Mataio 6:​25-32) Iehova ese ia idia tomadiho henia taudia totona ia karaia vadaeni gaudia oi laloa danu. Reana Baibel ai abidadama tauna ta ena sivarai oi stadilaia eiava hari inai negai Iehova ena hesiai tauna ta a ena ekspiriens oi duahia. Danu, Iehova ese oi ia naria dalana oi laloa dobu. Edena dala ai oi ia durua hereva momokani oi diba totona? (Ioa. 6:44) Edena dala ai emu guriguri ia haerelaia? (1 Ioa. 5:14) Iena natuna ia bouboulaia karana amo dina ta ta ai dahaka namo oi davaria noho?—Efe. 1:7; Heb. 4:​14-16.

7. Edena dala ai peroveta tauna Daniela ena sivarai ese Vanessa ia durua ia gari lasi totona?

⁷ Haiti ai taihu ta ladana Vanessa, b be ia vara gauna dainai ia gari dikadika. Ia noho gabuna ai, tau ta ia ura Vanessa ia tura henia dainai nega ibounai ia rini bona meseij henia, to taihu ia ura lasi. Unai dainai unai tau be ia badu dikadika bona hagaria herevadia ia gwauraia. Vanessa ia gwau, “Lau gari bada.” Edena dala ai gari karana ia hanaia? Sibona ia gimaia totona gau haida ia karaia. Elda ta ese ia durua pulisi ia rini henia totona. To danu Iehova ese idaunegai ena hesiai taudia ia gimaia dalana ia laloa dobu. Vanessa ia gwau: “Peroveta tauna Daniela ena sivarai lau laloa, ena be kerere ta ia karaia lasi, to laiona ena guri lalonai idia negea diho. To, Iehova ese ia naria. Iehova ena heduru totona lau noinoi bona ia dekenai egu hekwakwanai lau rakatania. Unai murinai, gari mamina lau abia lasi.”—Dan. 6:​12-22.

IEHOVA BE HARI DAHAKA IA KARAIA NOHO?

8. Davida be dahaka ia abia dae? (Salamo 56:8)

⁸ Herevana Gata ai Davida be hekwakwanai badana ia davaria, to ia gari lasi badina Iehova ese unai negai ia durua dalana ia laloa. Davida ia itaia Iehova ese ia naria bona gimaia bona ena hemami ia lalopararalaia. (Salamo 56:8 duahia.) Danu, Davida be ena tura namodia hegeregere, Ionatana bona Hahelaga Tauna Badana Ahimeleka ese idia durua. (1 Sam. 20:​41, 42; 21:​6, 8, 9) Bona ena be King Saulo ia ura Davida ia hamasea, to ia heau mauri. Davida ia abia dae Iehova be ena hekwakwanai bona hemami ia diba.

9. Iehova be edena bamona ita ia laloa?

⁹ Hekwakwanai ta oi davaria bona oi gari neganai, laloatao Iehova be unai ia itaia bona emu hemami ia lalopararalaia. Hegeregere, Aigupito ai Iehova ese Israela taudia idia dagedage henia karana ia itaia sibona lasi, to “idia mamia hisihisi” ia diba. (Eso. 3:7) Davida ena ane lalonai ia hahedinaraia Iehova ese ena “hisihisi” bona “lalometau” ia itaia. (Sal. 31:7) Bona Dirava ena taunimanima be edia abia hidi kereredia dainai, hisihisi idia davaria neganai, Ia “danu ia lalometau.” (Isa. 63:9)  Oi gari neganai, Iehova be emu hemami ia lalopararalaia bona ia ura dikadika oi ia durua oi gari lasi totona.

10. Dahaka dainai oi abia dae Iehova be emu hekwakwanai ia laloa bada, bona oi do ia durua?

¹⁰ Bema hekwakwanai ta oi davaria, reana Iehova ese oi ia durua dalana do oi itaia diba lasi. Dahaka do oi karaia? Ia oi noia oi ia durua dalana oi itaia totona. (2 Ki. 6:​15-17) Bena oi laloa: Kongrigeisen hebouna ai tok ta o ta ena haere ese oi hagoadaia, a? Pablikeisen ta, vidio ta, eiava orijinol ane ta ese oi ia hagoadaia, a? Ta ese ena hagoadaia herevana eiava siri namona ta amo oi ia durua, a? Reana iseda tadikaka taihu edia lalokau karana bona Dirava ena Hereva amo ita abia hagoadaia herevana be ita laloa maragi diba. To, unai be Iehova amo ia mai harihari gaudia. (Isa. 65:13; Mar. 10:​29, 30) Unai ese idia hamomokania oi ia laloa bada. (Isa. 49:​14-16) Bona ia oi abidadama henia diba.

11. Dahaka ese Aida ia durua ia gari lasi totona?

¹¹ Senegal ai ia noho taihu ta ladana Aida, be hekwakwanai neganai Iehova ese ia durua dalana ia laloa. Ia be vara guna natuna dainai, ena tama sina idia ura ia be moni bada do ia karaia, unai amo ia sibona bona idia do ia naria diba. To painia gaukara totona, kohu momo lasi maurina ia noholaia dainai, Aida ena moni ia hegeregere lasi. Ena famili be ia dekenai idia badu bona idia gwauraia dika. Ia gwau, “Lau gari badina egu tama sina lau durua lasi neganai, egu famili ese lau do idia gwauraia dika. Idia vara gaudia dainai Iehova dekenai lau badu.” Bena kongrigeisen hebouna ta ai tok ta ia kamonai. “Tok ia henia tauna amo lau kamonai ita lalohekwarahi eiava ita gari ena badina be Iehova ia diba. Metairametaira, elda taudia bona ma haida edia sisiba amo Iehova ena lalokau lau mamia. Iehova lau guriguri henia neganai, lau abia dae lau do ia durua, bona egu guriguri ia haerelaia dainai lalomaino lau abia.” Bena daudau lasi murinai, Aida be moni gaukara ta ia davaria bona unai amo ena painia gaukara bona ena tama sina ia durua. Ia gwau: “Hari, Iehova lau abidadama henia momokani. Bona lau guriguri neganai, lau gari lasi.”

 GABEAI IEHOVA BE DAHAKA DO IA KARAIA?

12. Salamo 56:9 hegeregerena, Davida be dahaka ia abia dae?

¹² Salamo 56:9 duahia. Inai siri ai Davida ese ena gari karana ia hanaia dalana ma ta ia gwauraia. Ena be ena mauri ia haboioa diba, to Iehova ese gabeai ia totona do ia karaia gaudia ia laloa dobu. Davida ia diba Iehova be nega maorona ai ia do ia hamauria, badina Iehova ese Israela ena king ai do ia halaoa. (1 Sam. 16:​1, 13) Davida ia abia dae Iehova ese ia gwauhamatalaia gaudia be do idia guguru.

13. Ita abia dae Iehova be dahaka do ia karaia?

¹³ Iehova ia gwauhamata oi totona dahaka do ia karaia? Ita diba iseda hekwakwanai ibounai do ia kokia lasi. c To inai nega oromana dikana ai ita davaria hekwakwanai be vaira nega ai, Iehova ese do ia haorea. (Isa. 25:​7-9) Iseda Havaraia Tauna be mai ena siahu mase taudia ia hatorea isi lou, gorere bona hisihisi ia haorea, bona iseda inai taudia ia kokia totona.—1 Ioa. 4:4.

14. Dahaka gaudia ita laloa dobu diba?

¹⁴ Oi gari neganai, vaira nega ai, Iehova ese oi totona do ia karaia gaudia oi laloa dobu. Mani oi laloa unai negai Satani do ia noho lasi, kara maoromaoro taudia sibona do idia noho bona dina ta ta ai, do idia goevadae idia lao. Lagani 2014 ena rijinol hebouhebou ese iseda helaro ita laloa dobu karana ia hahedinaraia. Tama ta be ena famili ida 2 Timoteo 3:​1-5 ena peroveta herevana ia herevalaia neganai, ia gwau paradaiso ai unai siri ai idia noho herevadia be reana inai bamona do idia torea: “Tanobada matamatana ai moale negadia do idia vara. Badina taunimanima be ma haida do idia laloa bada, Dirava ena hereva do idia ura henia, do idia manau, Dirava do idia hanamoa, tama sina do idia kamonai henia, tanikiu karana do idia diba, ma haida do idia badinaia, famili lalonai lalokau do ia noho, do idia lalotamona, ma haida edia ladana do idia hadikaia lasi, sibona do idia biagua, do idia dagedage lasi, kara namodia do idia ura henia, edia turadia edia mauri hadikaia dalana do idia karaia lasi, do idia kwara auka lasi, do idia heagi lasi, moale karadia do idia ura henia lasi, bona Dirava do idia lalokau henia, edia mauri ai Dirava do idia badinaia, unai bamona taudia oi bamoa.” Emu famili eiava tadikaka taihu ida tanobada matamatana ai do idia vara gaudia umui herevalaia, a?

15. Ena be Tanya ia gari to dahaka ese ia durua?

¹⁵ North Macedonia ai taihu ta ladana Tanya, be vaira nega ena hahenamo ia laloa dobu dainai ena gari karana ia hanaia. Baibel ia stadilaia dainai ena tama sina ese idia dagedage henia. Ia gwau: “Lau garilaia gaudia be lau dekenai idia vara. Hebou murinai nega ibounai egu sinana ese lau ia botaia. Egu tama sina idia gwau, bema Iehova ena Witnes ta ai lau lao lau do idia hamasea.” Gabeai, Tanya idia hamaoroa ruma do ia rakatania. Dahaka ia karaia? Ia gwau: “Dirava badinaia karana amo, hari bona vaira nega ai do lau abia moalena lau laloa. Danu, Iehova ese tanobada matamatana ai hari lau haboioa gaudia do ia henia lou bona dika gaudia do ia kokia negana lau laloa dobu.” Tanya be Dirava ia badinaia. Bona Iehova ena heduru amo noho gabuna ta ia davaria. Hari, Tanya be tadikaka namona ta ia adavaia bona mai moale ida ful-taim hesiai gaukara idia karaia noho.

 IEHOVA DEKENAI EMU ABIDADAMA OI HAGOADAIA

16. Luka 21:​26-28 ena peroveta herevana ia guguru ita itaia neganai, dahaka ese ita do ia durua ita gari lasi totona?

¹⁶ Hisihisi badana lalonai, inai tanobada taudia be do idia “gari dikadika bona do idia moru.” To Dirava ena taunimanima be mai gari lasi ida do idia noho. (Luka 21:​26-28 duahia.) Dahaka dainai do ita gari lasi? Badina Iehova abidadama henia karana ita diba vadaeni. Matamanai ita herevalaia taihu ladana Tanya, ia gwau ia dekenai idia vara vadaeni gaudia ese ia idia durua do idia vara hekwakwanai ia haheaukalaia totona. Ma ia gwau: “Lau dibaia gauna be, Iehova ese ita ia durua iseda hekwakwanai ita haheaukalaia bona ita do ia hanamoa. Nega haida toana be idia vara gaudia be ma haida ese idia biagua, to ita diba momokani Iehova ena goada be edia goada ia hereaia. Bona ena be ita davaria hekwakwanai be bada, to do ia ore.”

17. Edena dala ai lagani 2024 ena siri badana ese ita do ia durua? (Rau 1 ena laulau itaia.)

¹⁷ Hari idia vara gaudia dainai do ita gari. To Davida bamona, gari karana ita hanaia diba. Lagani 2024 ena siri badana be Davida ena guriguri Iehova dekenai, ia gwau: “Lau gari neganai, lau ese oi lau abidadama henia.” (Sal. 56:3) Baibel ia diba bada tauna ta ese unai siri be inai bamona ia gwauraia, “Davida be ia idia hagaria gaudia eiava ena hekwakwanai ia laloa momo lasi, to ia do ia Hamauria Tauna dekenai ia tabekau.” Gabeai hekwakwanai badadia oi davaria bona oi gari neganai, iseda lagani ena siri badana oi laloatao. Nega oi atoa Iehova ese ia karaia gaudia, idaunegai, hari, bona vaira nega totona oi laloa. Bena, Davida bamona, oi gwau diba: “Dirava lau abidadama henia, lau gari lasi.”—Sal. 56:4.