STADI ATIKOL 5
ANE 108 Dirava be mai Ena Lalokau
Iehova Ena Lalokau Dainai Hahenamo Ita Abia
“Keriso Iesu be tanobada dekenai ia mai, kara dika taudia hamauria totona.”—1 TIM. 1:15.
STADI ENA BADINA
Mauri davana dainai hahenamo ita abia bona Iehova dekenai tanikiu karana ita hahedinaraia dalana do ita herevalaia.
1. Iehova ita hamoalea totona dahaka ita karaia diba?
MANI oi laloa oi lalokau henia bada tauna ta dekenai harihari gauna namona ta oi henia. To ia ese unai harihari gauna be maua dekenai ia udaia bona ia laloa bada lasi neganai reana do oi lalohisihisi! To unai harihari gauna ia gaukaralaia bona oi ia tanikiu henia neganai do oi moale. Unai haheitalai amo dahaka ita dibaia? Iehova be ita ia lalokau henia dainai, ena natuna ia henia. Bona unai harihari gauna dainai ia ita tanikiu henia neganai, ia moale bada!—Ioa. 3:16; Roma 5:7, 8.
2. Inai atikol ai dahaka do ita herevalaia?
2 To nega ia hanaia lalonai, mauri davana ita laloa bada karana ia maragi ia lao diba. Unai be hegeregere Dirava ena harihari gauna be maua lalonai ita udaia bamona. Unai harihari gauna ita abia dainai ita moale, to unai ita laloa bada lasi. Ita dekenai unai ia vara lasi totona, namona be hanaihanai Dirava bona Keriso ese ita totona idia karaia gaudia ita laloa. Inai atikol ese ita do ia durua unai ita karaia totona. Ita ese hari unai mauri davana amo namo ita davaria dalana bona vaira nega ena hahenamo do ita herevalaia. Danu Iehova ena lalokau dekenai iseda tanikiu karana ita hahedinaraia dalana do ita herevalaia, hegeregere memorial dinana ai.
HARI ITA DAVARIA HAHENAMO
3. Hari mauri davana dainai ita abia hahenamo ta be dahaka?
3 Ita be Keriso ena mauri davalaia boubouna dainai hahenamo ita davaria noho. Hegeregere, mauri davana amo Iehova ese iseda kara dika ia gwauatao. Ia ese iseda dika do ia gwauatao karana be anina lasi, to ia ura unai ia karaia. Salamo torea tauna be mai tanikiu ida, ia gwau: “Iehova e, oi be namo bona oi noho hegaegae dika gwauatao totona.”—Sal. 86:5; 103:3, 10-13.
4. Iehova ese mauri davana be daidia totona ia henia? (Luka 5:32; 1 Timoteo 1:15)
4 Ita haida be sibona ita laloa maragi bona ita laloa Iehova ese iseda dika do ia gwauatao lasi. Momokani ia ese iseda dika ia gwauatao be anina lasi. Aposetolo Paulo ia laloparara ‘ia be hegeregere lasi do idia gwauraia aposetolo tauna.’ To ma ia gwau, ‘Dirava ena hebogahisi hereadaena dainai, inai gaukara lau karaia.’ (1 Kor. 15:9, 10) Ita helalo-kerehai neganai Iehova ese iseda kara dika ia gwauatao. Dahaka dainai? Badina ita ia lalokau henia. Bema oi be sibona oi laloa maragi, laloatao Iehova ese mauri davana be kara dika amo idia helalo-kerehai taudia totona ia henia.—Luka 5:32; 1 Timoteo 1:15 duahia.
5. Iehova ese iseda dika ia gwauatao be namo, a? Herevalaia.
5 Namo lasi ita laloa lagani momo lalonai Iehova ita hesiai henia dainai iseda dika ia gwauatao be namo. Momokani, Iehova ese ia totona ita karaia gaudia ibounai ia laloatao. (Heb. 6:10) Ia ese ena Natuna be harihari gauna bamona ia henia, to ia ita hesiai henia ena davana lasi. Unai dainai, bema ita laloa Iehova totona gau momo ita karaia dainai iseda dika ia gwauatao be namo, unai be lalohadai kererena, bema unai ita abia dae, anina be ita laloa Iesu be ita totona ia mase lasi.—Galatia 2:21 hahegeregerea.
6. Dahaka dainai Paulo be mai goada ida Iehova ia hesiai henia?
6 Paulo be Iehova totona gau momo ia karaia, to ia diba unai be ena dika do ia gwauatao dalana lasi. To dahaka dainai ia gaukara goada Iehova ia hesiai henia totona? Badina Iehova be hebogahisi Diravana dainai ia ura tanikiu karana ia hahedinaraia. (Efe. 3:7) Paulo bamona, mai goada ida Iehova ita hesiai henia noho, ita do ia hebogahisi henia lasi totona, to ita ura iseda tanikiu karana ita hahedinaraia.
7. Edena dala ma ta ai mauri davana ena namo ita abia? (Roma 5:1; Iamesi 2:23)
7 Mauri davana amo ita abia namo ta be, Iehova ida hetura karana namona ita moalelaia diba. a Atikol 4 ai ita herevalaia bamona, ita vara neganai Dirava ita do tura henia lasi. To mauri davana dainai “Dirava ida maino ai ita noho” bona ia kahirakahira ita lao diba.—Roma 5:1; Iamesi 2:23 duahia.
8. Dahaka dainai guriguri karana ena hahenamo dainai Iehova ita tanikiu henia?
8 Iehova ita tura henia dainai, ia ita guriguri henia diba bona unai be mai anina bada. Iehova ese taunimanima idia haboua neganai idia gwauraia guriguri bona ita sibona ita noho neganai ita gwauraia guriguri ia kamonai. Ita guriguri neganai iseda lalohekwarahi ia maragi bona lalomaino ita abia, to guriguri ena namo be unai sibona lasi. Guriguri karana ese iseda hetura karana Iehova ida ia hagoadaia diba. (Sal. 65:2; Iam. 4:8; 1 Ioa. 5:14) Iesu be tanobada ai ia noho neganai nega momo Iehova ia guriguri henia, badina ia diba ena guriguri ia kamonai noho bona unai ese ena hetura karana ena Tamana ida ia hagoadaia. (Luka 5:16) Ita moale badina Iesu ena boubou gauna dainai, Iehova ita tura henia bona guriguri amo ia ita hereva henia diba!
EDENA DALA AI VAIRA NEGA ENA HAHENAMO ITA ABIA DIBA
9. Edena dala ai Iehova ena abidadama hesiai taudia be vaira nega ai, mauri davana ena hahenamo do idia abia?
9 Edena dala ai Iehova ena abidadama hesiai taudia be vaira nega ai mauri davana ena hahenamo do idia abia? Iehova ese idia dekenai mauri hanaihanai do ia henia. Taunimanima momo idia laloa unai ia vara diba lasi, badina lagani momo lalonai taunimanima momo idia mase noho. To matamanai Iehova ena ura be taunimanima do idia mauri hanaihanai. Bema matamanai Adamu ia kara dika lasi, ta do ia laloa lasi taunimanima be mauri hanaihanai idia abia diba lasi. Bona ena be hari ita mauri hanaihanai diba lasi, to ita abia dae unai do ia vara, badina ita diba Iehova ese dava bada gauna, ena natuna ena mauri ia henia ita mauri hanaihanai totona.—Roma 8:32.
10. Horoa taudia bona mamoe ma haida be vaira nega totona dahaka idia naria noho?
10 Ena be mauri hanaihanai be vaira nega ena hahenamo ta, to Iehova ia ura hari unai ita laloa bada. Horoa taudia be mai moale ida guba ai do idia abia helarona idia naria, idia be Keriso ida tanobada do idia lohiaia. (Apok. 20:6) Mamoe ma haida be tanobada paradaisona ai do idia noho karana idia naria, unuseniai hisihisi bona lalohisihisi ibounai do idia ore. (Apok. 21:3, 4) Oi be tanobada helarona do idia abia taudia huanai oi noho, a? Unai harihari gauna be mai anina bada! Iehova ese taunimanima ia karaia tanobada ai idia noho totona. Unai dainai ita mauri hanaihanai neganai do ita moale bada.
11-12. Paradaiso ai dahaka hahenamo haida do ita moalelaia? (Laulau itaia danu.)
11 Mani tanobada Paradaisona ai do oi noho maurina oi laloa. Oi be gorere bona mase totona do oi lalohekwarahi lasi. (Isa. 25:8; 33:24) Iehova ese oi ura henia gau namodia ibounai do ia henia. Unai negai dahaka oi ura dibaia? Oi ura animal oi stadilaia, a? Oi ura miusiki gadaralaia dalana oi diba, a? Eiava oi ura laulau penia dalana oi diba, a? Paradaiso ai ruma idia palanilaia taudia, ruma idia haginia taudia, bona biru taudia idia noho be namo. Danu aniani hegaegaelaia taudia, tulu idauidau karaia taudia, hadohado taudia, bona naria taudia idia noho be namo. (Isa. 35:1; 65:21) Oi mauri hanaihanai neganai, nega bada ia noho oi ura dibaia gaudia ibounai oi karaia totona.
12 Mani oi laloa mai moale ida toreisi lou taudia do oi welkam henia! (Kara 24:15) Danu Iehova ena havaraia gaudia idauidau oi stadilaia neganai, ia oi dibaia noho karana do oi moalelaia. (Sal. 104:24; Isa. 11:9) Bona gau namo hereana be, kara dika ta do oi karaia lou lasi, unai dainai Iehova oi hesiai henia diba bona emu dika ia gwauatao totona ia do oi noia lou lasi. Vaira nega ena hahenamo idauidau do oi laloa bada lasi bona hari “nega sisina do ia noho gauna” do oi karaia, a? (Heb. 11:25) Lasi! Badina vaira nega ai do ita abia mauri namona be inai tanobada ai ita abia gaudia ia hereaia. Laloatao, tanobada Paradaisona be hanaihanai do ita naria noho gauna lasi. To ia be do ia vara momokani bona do ita noholaia. Iehova be unai gaudia ibounai do ia karaia, badina ita ia lalokau henia bona ena Natuna ia bouboulaia!
Paradaiso ai dahaka gaudia oi ura karaia? (Paragraf 11-12 itaia)
IEHOVA ENA LALOKAU DAINAI TANIKIU KARANA OI HAHEDINARAIA
13. Edena dala ai Iehova ena lalokau dainai iseda tanikiu karana ita hahedinaraia diba? (2 Korinto 6:1)
13 Iehova ese ita dekenai mauri davana ia henia dainai, edena dala ai tanikiu karana ita hahedinaraia diba? Namona be iseda mauri lalonai ena hesiai gaukara be mai anina bada gauna ai ita halaoa. (Mat. 6:33) Laloatao, Iesu ia mase “unai amo idia mauri taudia be sibona totona do idia mauri lasi, to idia dainai ia mase bona ia toreisi lou tauna totona do idia mauri.” (2 Kor. 5:15) Iehova be mai hebogahisi ida iseda dika ia gwauatao. Unai dainai iseda tanikiu karana ita hahedinaraia dalana be ita gaukara goada ia ita hesiai henia totona.—2 Korinto 6:1 duahia.
14. Edena dala ai Iehova ena hakaua dalana ita abidadama henia diba?
14 Danu Iehova ena lalokau ita laloa bada dalana ta be mai abidadama ida ena hakaua dalana ita badinaia. Edena dala ai? Bema ita ura abia hidi ta ita karaia, hegeregere sikuli bada do ita lao eiava moni gaukarana ta ita abia hidi, namona be Iehova ena ura ita laloa danu. (1 Kor. 10:31; 2 Kor. 5:7) Iseda abidadama be kara amo ita hahedinaraia neganai, gau namodia idia vara unai be iseda abidadama bona iseda hetura karana Iehova ida ia goada. Danu ita abia dae vaira nega ai do ita mauri hanaihanai.—Roma 5:3-5; Iam. 2:21, 22.
15. Edena dala ai Memorial negana ai Iehova dekenai iseda tanikiu karana ita hahedinaraia diba?
15 Dala ma ta ia noho Iehova dekenai iseda tanikiu karana ita hahedinaraia totona. Unai be Memorial neganai, Iehova dekenai ita hahedinaraia ita ese mauri davana ita laloa bada. Memorial do ita lao totona ita palani lalonai, ma haida ita boiria danu. (1 Tim. 2:4) Oi boiria taudia dekenai Memorial ai do idia vara gaudia oi herevalaia. Bona idia dekenai jw.org amo inai vidio, Dahaka Dainai Iesu Ia Mase? bona Iesu Ena Mase Ita Laloatao oi hahedinaraia. Elda taudia ese manoka taudia idia boiria be namo. Mani oi laloa, idia boio mamoe haida be Iehova dekenai idia giroa lou neganai, guba bona tanobada ai moale bada ia vara! (Luka 15:4-7) Memorial hebouna ai, iseda diba taudia sibona ita hanamoa lasi, to nega ginigunana idia mai eiava nega daudau idia mai lasi taudia ita hanamoa be namo. Ita ura idia mamia idia ita welkam henia!—Roma 12:13.
16. Dahaka dainai Memorial negana ai Iehova ena hesiai gaukara ita habadaia be namo?
16 Memorial negana ai Iehova totona emu hesiai gaukara oi habadaia diba, a? Unai be dala namona Iehova bona Iesu ese oi totona idia karaia gau namodia dainai emu tanikiu karana oi hahedinaraia. Iehova dekenai iseda hesiai gaukara ita habadaia neganai, iena heduru do ita mamia bona unai ese iseda abidadama ia dekenai do ia hagoadaia. (1 Kor. 3:9) Danu, Dina Iboudiai Buka Helagadia Tahua buklet eiava hebou pepana ai ia noho Memorial Baibel Duahiduahi ena sediual oi badinaia. Bona unai Baibel siridia haida oi gaukaralaia diba emu stadi projek oi karaia totona.
17. Dahaka ese Iehova ia hamoalea? (Maua itaia danu, “ Iehova Ena Lalokau Dainai Tanikiu Karana Hahedinaraia Dalana.”)
17 Momokani, emu noho dalana dainai reana do oi hegeregere lasi, Iehova ena hesiai gaukara oi habadaia totona. Laloatao, Iehova be ia totona oi karaia gaudia be ma haida ida ia hahegeregerea lasi; to ia ese emu kudouna ai ia noho gauna ia itaia. Iehova ia moale, bema ia itaia oi be mai kudouna ibounai ida ia henia harihari gauna, mauri davana oi laloa bada.—1 Sam. 16:7; Mar. 12:41-44.
18. Dahaka dainai Iehova Dirava bona Iesu Keriso dekenai iseda tanikiu karana ita hahedinaraia be namo?
18 Mauri davana sibona ese dala ia kehoa Iehova ese iseda dika ia gwauatao, ia ita tura henia, bona mauri hanaihanai ita abia diba. Iehova be ita ia lalokau henia dainai, unai hahenamo ibounai ia henia. Unai dainai hanaihanai ia dekenai iseda tanikiu karana ita hahedinaraia. (1 Ioa. 4:19) Danu namona be Iesu dekenai iseda tanikiu karana ita hahedinaraia, badina ita ia lalokau henia bada dainai ita totona ia mase!—Ioa. 15:13.
ANE 154 Lalokau Do Ia Ore Lasi
a Iesu ese mauri davana ia do henia lasi neganai, Iehova ese idaunegai ia idia tomadiho henia taudia ia gwauatao. Iehova be unai ia karaia badina ia abia dae momokani ena Natuna be ia do ia abidadama henia ela bona ia mase. Unai dainai, Iehova ena matanai Iesu be mauri davana ia henia vadaeni bamona, ena be unai negai, Iesu ia do mase lasi.—Roma 3:25.
