STADI ATIKOL 3
ANE 35 “Mai Anina Bada Gaudia Do Umui Diba”
Iehova Ia Hamoalea Abia Hidi Oi Karaia
“Iehova gari henia karana be aonega ena matamana, bona Helaga Herea Diravana dibaia karana ese laloparara ia henia.”—AON. 9:10.
STADI ENA BADINA
Mai aonega ida abia hidi ita karaia totona, iseda diba, laloparara bona laloa namonamo dalana do ita herevalaia.
1. Ita ibounai be dahaka ita karaia be namo?
NEGA IBOUNAI abia hidi ita karaia be namo. Abia hidi haida be auka lasi ita karaia totona, hegeregere daba ai dahaka do ita ania eiava edena nega ai do ita mahuta. To abia hidi haida ita karaia be auka, badina ita ura unai ese iseda helt, iseda moale, iseda lalokau taudia bona iseda tomadiho karana do ia durua. Ita ura ita karaia abia hidi be ita sibona bona iseda ruma bese ena namo totona. Bona mai anina bada gauna be, ita ura iseda abia hidi ese Iehova ia hamoalea.—Roma 12:1, 2.
2. Edena dala toi ese oi ia durua diba abia hidi namona oi karaia totona?
2 Abia hidi namona oi karaia diba bema (1) tahua gaukara oi karaia, (2) Iehova ena lalohadai oi tahua, bona (3) do oi karaia gauna oi laloa. Inai atikol ese unai dala toi do ia herevalaia, danu ita do ia durua iseda laloa dalana ita gaukaralaia namonamo totona.—Aon. 2:11.
TAHUA GAUKARA OI KARAIA
3. Dahaka dainai abia hidi ta ita do karaia lasi neganai, tahua gaukara ita karaia be namo? Haheitalai gwauraia.
3 Abia hidi namona oi karaia totona, gau ginigunana be tahua gaukara oi karaia. Dahaka dainai unai be mai anina bada? Mani oi laloa, gorere badana ia abia tauna ta be doketa ena heduru ia tahua. Doketa tauna be gorere tauna ia sekea, eiava ia nanadaia murinai, muramura do ia henia. Oi danu be abia hidi namodia do oi karaia, bema tahua gaukara oi karaia guna. Unai be edena bamona do oi karaia?
4. Aonega Herevadia 18:13 hegeregerena, dahaka dainai tahua gaukara oi karaia be namo? (Laulau itaia danu.)
4 Nega momo tahua gaukara oi karaia totona henanadai oi gaukaralaia diba. Hegeregere, bema moale karana ta dekenai oi idia invait, do oi lao, a? Bema oi diba lasi daika ese unai moale karana do ia gunalaia, eiava dahaka gaudia do idia karaia, namona be ia oi nanadaia: “Edeseniai bona edena nega ai unai moale karana do idia karaia? Unai moale karana ena bada be edena bamona? Daika ese do ia naria? Daidia do idia mai? Dahaka gaudia do idia karaia? Bia eiava alkahol do idia inua, a?” Unai henanadai edia haere oi abia neganai, unai ese oi do ia durua abia hidi namona oi karaia totona.—Aonega Herevadia 18:13 duahia.
Henanadai oi henia unai amo diba maorona do oi abia (Paragraf 4 itaia) a
5. Gau ibounai oi tahua murinai dahaka oi karaia be namo?
5 Tahua gaukara amo diba maorona oi abia murinai, do ia vara gauna oi laloa namonamo. Hegeregere, bema oi diba Iehova ena taravatu idia badinaia lasi taudia be unai moale neganai do idia mai, eiava bia do idia inua, dahaka do oi karaia? Oi laloparara unai moale karana lalonai, Baibel ena taravatu utua karadia momo do idia vara, a? (1 Pet. 4:3) Unai moale karana dekenai oi lao neganai, emu kongrigeisen hebou bona haroro gaukara do oi reaia, a? Unai gau ibounai oi lalohadailaia murinai, oi be abia hidi namona oi karaia diba. To gau ta danu do oi karaia be namo. Oi be do idia vara gaudia ibounai oi diba vadaeni bona abia hidi do oi karaia; to sibona oi nanadaia Iehova be dahaka ia laloa?—Aon. 2:6.
IEHOVA ENA LALOHADAI OI LALOA
6. Iamesi 1:5 hegeregerena, dahaka dainai Iehova ena heduru totona ita guriguri be namo?
6 Iehova oi noia oi do ia durua ena lalohadai oi lalopararalaia totona. Iehova ia gwauhamata ita dekenai aonega do ia henia. Unai amo do ita diba edena dala do ita badinaia ia ita hamoalea totona. Ia ese ita ibounai dekenai “mai hariharibada ida” aonega ia henia.—Iamesi 1:5 duahia.
7. Edena dala ai Iehova ena lalohadai do oi dibaia? Haheitalai gwauraia.
7 Iehova ena heduru totona oi guriguri murinai, do ia henia haere oi laloa bada. Haheitalai be inai: Gabu ta oi lao lalonai oi boio, reana unuseniai ia noho tauna ta ena heduru do oi noia. To iena haere ia do henia lasi neganai, do oi raka oho, a? Lasi. Do ia gwauraia hakaua herevadia do oi kamonai namonamo. Unai hegeregerena, Iehova amo aonega oi noia murinai, ena haere oi diba totona Baibel ena taravatu bona hakaua herevadia oi tahua. Hegeregere, matamanai ita gwauraia moale karana totona abia hidi oi karaia neganai, reana moale karadia, hebamo dikadia bona Basileia atoa guna karana dekenai Baibel ena hereva do oi laloa.—Mat. 6:33; Roma 13:13; 1 Kor. 15:33.
8. Bema oi ura diba ma haida oi abia dahaka oi karaia be namo? (Laulau itaia danu.)
8 To nega haida gau ta oi dibaia totona haida edia heduru do oi tahua. Lo tadikaka eiava taihu ta ena lalohadai oi abia diba. To danu, sibona oi durua totona iseda pablikeisen oi stadilaia diba. Iseda stadi tulu idauidau lalonai heduru herevadia momo oi davaria diba, hegeregere Research Guide for Jehovah’s Witnesses bona Scriptures for Christian Living. Laloatao, emu tahua gauna be: abia hidi oi karaia Iehova oi hamoalea totona.
Iehova ena lalohadai oi laloa (Paragraf 8 itaia) b
9. Edena bamona ita diba iseda abia hidi ese Iehova ia hamoalea? (Efeso 5:17)
9 Edena bamona ita diba iseda abia hidi ese Iehova do ia hamoalea? Gau ginigunana be, ia ita diba namonamo. Baibel ia gwau: “Helaga Herea Diravana dibaia karana ese laloparara ia henia.” (Aon. 9:10) Oibe, laloparara ita abia totona Iehova ena kara, ena ura, ia moalelaia bona ia inai henia gaudia ita diba be namo. Sibona oi nanadaia, ‘Iehova lau dibaia karana dekenai, dahaka abia hidi lau karaia diba ia lau hamoalea totona?’—Efeso 5:17 duahia.
10. Dahaka dainai Baibel ena hakaua herevadia ita badinaia be mai anina bada?
10 Nega haida Iehova ita hamoalea totona, iseda turadia eiava ruma bese taudia edia lalona ita hahisia diba. Hegeregere, tama sina haida idia ura edia natuna kekeni be moni momo tauna, eiava dava kara (bride-price) do ia karaia namonamo tauna ia adavaia, ena be unai tauna ena hetura karana Iehova ida be ia goada lasi. Momokani, idia ura edia natuna kekeni be tauanina dalanai ena mauri do ia namo, to daika ese ia do ia durua ena hetura karana Iehova ida ia hagoadaia totona? Unai kara dekenai Iehova be dahaka ia laloa? Haere be Mataio 6:33 ai do ita davaria. Unai siri ese Keristani taudia ia hagoadaia ‘Dirava ena Basileia do idia tahua guna.’ Ena be iseda tama sina bona iseda dekena taudia ita matauraia, to ita laloa bada gauna be Iehova do ita hamoalea.
OI URA KARAIA GAUDIA OI LALOA NAMONAMO
11. Aonega Herevadia 2:11 ese ia herevalaia kara be edena dala ai ita do ia durua ita abia hidi gaudia ita laloa totona?
11 Baibel ena hakaua herevadia oi lalohadailaia murinai, oi karaia gaudia oi laloa namonamo. (Aonega Herevadia 2:11 duahia.) Laloa namonamo karana ese oi do ia durua abia hidi ta oi karaia neganai do idia vara gaudia oi lalopararalaia totona. Nega haida abia hidi oi karaia haraga diba. To abia hidi haida ita karaia be ia auka. Bema ita laloa namonamo, mai anina bada gaudia dekenai abia hidi namona ita karaia diba.
12-13. Edena dala ai laloa namonamo karana ese oi do ia durua moni gaukara ta oi abia hidi totona?
12 Mani inai haheitalai oi laloa. Emu famili durua totona moni gaukara oi tahua noho. Bona gaukara rua oi davaria. Gau ibounai oi tahua namonamo, do oi karaia gaukara, ena sediual, gaukara gabuna ena daudau bona gau ma haida. Oi davaria, unai moni gaukara rua be Baibel ena taravatu ia utua lasi. Reana gaukara ta oi ura henia badina unai gaukara dalana oi ura henia eiava ena pei be bada. To abia hidi namona oi karaia totona gau ma haida oi laloa be namo.
13 Unai moni gaukara rua ena sediual dainai, emu kongrigeisen heboudia do oi reaia, a? Eiava oi be nega lasi emu ruma bese hamoalea gaudia oi karaia bona idia oi durua Iehova kahirakahira idia lao totona, a? Unai bamona henanadai ese oi do ia durua “mai anina bada gaudia” oi atoa guna, hegeregere emu tomadiho karana bona emu ruma bese ena namo. (Fili. 1:10a) Oi be Iehova ese do ia hanamoa abia hidi oi karaia diba.
14. Edena dala ai laloa namonamo karana bona lalokau ita gaukaralaia ma haida ita hahekwakwanaia lasi totona?
14 Danu laloa namonamo karana ese ita do ia durua, ita karaia abia hidi ese ‘ma haida do ia hahekwakwanaia lasi.’ (Fili. 1:10b) Unai be mai anina bada iseda toana bona dabua dekenai abia hidi ita karaia totona. Hegeregere, dabua bona toana dekenai sitaelo ta oi ura henia. To bema kongrigeisen bona murimuri ai ma haida ia hahekwakwanaia be edena bamona? Laloa namonamo karana ese ita do ia durua edia hemami ita matauraia totona. Lalokau ese ita do ia hagoadaia “ma ta ena namo” ita tahua bona ita laloa maoromaoro totona. (1 Kor. 10:23, 24, 32; 1 Tim. 2:9, 10) Bona ita karaia abia hidi amo do ita hahedinaraia ma haida ita matauraia bona lalokau henia.
15. Abia hidi badana ta oi do karaia lasi neganai dahaka palani oi karaia be namo?
15 Bema oi ura abia hidi badana ta oi karaia, unai oi badinaia totona do oi karaia gaudia oi laloa. Iesu ese ita ia hadibaia ‘davana ita laloa’ totona. (Luka 14:28) Unai dainai emu abia hidi oi hagugurua totona emu nega, kohu, bona goada do oi gaukaralaia dalana oi laloa. Nega haida emu ruma bese taudia oi noia diba, gau haida dekenai oi idia durua totona. Dahaka dainai unai bamona palani oi karaia be mai anina bada? Badina reana do laloparara, emu abia hidi dekenai gau haida do oi haidaua eiava abia hidi ma ta oi karaia diba. Danu emu ruma bese taudia oi noia bona edia lalohadai oi kamonai neganai, do idia ura oi idia durua emu abia hidi oi hagugurua totona.—Aon. 15:22.
DO OI HAGUGURUA DIBA ABIA HIDI OI KARAIA
16. Dahaka gaudia ese oi do ia durua emu abia hidi oi hagugurua totona? (Inai maua itaia danu “ Mai Aonega ida Abia Hidi Karaia Dalana.”)
16 Bema oi be ataiai ita herevalaia gaudia ibounai oi karaia vadaeni, oi hegeregere abia hidi namona oi karaia totona. Oi dibaia gaudia bona Baibel ena hakaua herevadia oi laloa karana ese oi do ia durua Iehova ia hamoalea abia hidi oi karaia totona. Bona Iehova oi noia oi do ia durua emu abia hidi oi hagugurua totona.
17. Abia hidi namona oi karaia totona dahaka be mai anina bada?
17 Ena be guna emu abia hidi momo oi hagugurua, to laloatao abia hidi namona oi karaia totona, sibona emu diba eiava ekspiriens dekenai oi tabekau lasi, to Iehova ena aonega dekenai oi tabekau. Ia sibona ese oi dekenai diba momokanina, laloparara bona laloa namonamo karana ia henia diba, bona unai ibounai be aonega ena badina. (Aon. 2:1-5) Iehova ese oi ia durua diba, ia moalelaia abia hidi oi karaia totona.—Sal. 23:2, 3.
ANE 28 Iehova Tura Henia
