1. Hari inai negai taunimanima momo be dahaka idia laloa bada?

 HARI inai negai taunimanima be sibona idia laloa bada? Hegeregere, social media dekenai, haida be sibona edia ladana idia abia isi bona idia kwalimulaia gaudia idia herevalaia. To, haida sibona be Iehova Dirava idia hanamoa. Inai atikol ai Iehova ita hanamoa ena anina bona unai ita karaia ena badina do ita herevalaia. Danu Dirava ita hanamoa dalana bona vaira nega ai ia sibona ese ena ladana do ia hanamoa dalana do ita herevalaia.

IEHOVA ITA HANAMOA ENA ANINA BE DAHAKA?

2. Sinai Ororona ai Iehova be dahaka ia karaia? (Rau 1 ena laulau itaia danu.)

² Baibel ese ia hahedinaraia Iehova ena siahu be bada herea. Iehova ese Israela taudia be Aigupito amo ia ruhaia murinai, ia ese ena siahu bada ia hahedinaraia. Mani oi laloa, Israela taudia milioni momo be Sinai Ororona badinai idia haboua, Dirava ena hereva idia kamonai totona. Kara haraga ori koremana ese ororo ia koua, tano ia mareremarere, guba boiboi bona kevaru ia vara bona kibi ena regena bada hereana ta idia kamonai. (Eso. 19:16-18; 24:17; Sal. 68:8) Mani oi laloa, Iehova be unai negai ena siahu bada ia hahedinaraia neganai Israela taudia idia hoa bada.

3. Iehova ita hanamoa ena anina be dahaka?

³ Ita danu Iehova ita hanamoa diba. Unai ita karaia dalana ta be ma haida dekenai Iehova ena siahu bona ena kara namodia ita herevalaia. Danu, Dirava ena heduru amo ita hagugurua gaudia dainai, ia ita hanamoa. (Isa. 26:12) Iehova hanamoa karana dekenai King Davida be haheitalai namona ia  hahedinaraia. Davida be Israela taudia vairanai, Dirava dekenai ia guriguri. Ia gwau: “Iehova e, emu siahu bona goada bona hairai be bada herea momokani, badina guba bona tanobada ai idia noho gaudia be oiemu.” Davida be ena guriguri ia hadokoa murinai, ‘taunimanima ibounai ese Iehova idia hanamoa.’—1 Siv. 29:11, 20.

4. Edena dala ai Iesu be Iehova ia hanamoa?

⁴ Iesu be tanobada ai hoa karadia ia karaia neganai, taunimanima ia hamaoroa ena Tamana ese siahu ia henia, unai hoa karadia ia karaia totona. (Mar. 5:18-20) Danu Iesu be ena Tamana ia herevalaia bona ma haida ia kara henia dalana amo ia hahedinaraia Iehova ia hanamoa. Nega ta, Iesu be Sinagoga ai ia hadibaia noho. Ena hereva idia kamonai noho taudia huanai, lagani 18 lalonai Demoni ese idia biagua hahinena ta ia noho. Ia be unai gorere dainai ena doruna ia kwaidu bona ia gini maoromaoro diba lasi. Iesu ia diba unai hahine ia lalometau bada! Unai dainai ia dekenai ia lao bona mai hebogahisi ida ia gwau: “Hahine e, emu gorere amo oi lau ruhaia.” Bena Iesu ena imana be unai hahine latanai ia atoa neganai, ena gorere ia namo bona ia gini maoromaoro. Bona Hahine ese “Dirava ia hanamoa matamaia.” (Luka 13:10-13) Unai hahine be badina namona dainai Iehova ia hanamoa. Bona ita danu be unai bamona ita karaia diba.

DAHAKA DAINAI IEHOVA ITA HANAMOA?

5. Dahaka dainai Iehova ita lalokau henia be namo?

⁵ Iehova ita matauraia bada dainai ia ita hanamoa. Badina momo idia noho Iehova ita matauraia totona. Iehova be mai ena siahu ia ura gaudia ia karaia totona bona do ia hesiku lasi. (Sal. 96:4-7) Iena aonega bada be ia havaraia gaudia amo ita itaia diba. Ia be iseda mauri ena badina bona iseda mauri durua gaudia ibounai ia henia. (Apok. 4:11) Ia be ena taunimanima do ia rakatania lasi. (Apok. 15:4) Ia karaia gaudia ibounai idia guguru, bona hanaihanai ena gwauhamata ia badinaia. (Ios. 23:14) Unai dainai peroveta tauna Ieremia ese Iehova ia herevalaia neganai, ia gwau: “Bese idauidau edia aonega taudia huanai bona edia basileia lalonai, oi hegeregerena ta ia noho lasi”! (Ier. 10:6, 7) Momokani, badina namodia idia noho iseda guba Tamana ita matauraia totona. Bona Iehova ita matauraia sibona lasi, to ia ita lalokau henia danu.

6. Dahaka dainai Iehova ia lalokau henia?

⁶ Iehova ita lalokau henia bada dainai ia ita hanamoa. Iehova ita lalokau henia badina ena kara namodia be momo herea. Hegeregere, ia be hebogahisi Diravana. (Sal. 103:13; Isa. 49:15) Ita lalohisihisi neganai, ia danu be iseda hisihisi ia mamia. (Sek. 2:8) Dala ia karaia ia kahirakahira ita lao totona, unai amo ena turana ai ita lao diba. (Sal. 25:14; Kara 17:27) Bona ia be manau Diravana; “ia igo diho, guba bona tanobada ia itaia totona, ladana maragi taudia be tano ena kahu amo ia abia isi.” (Sal. 113:6, 7) Unai badina ibounai dainai ita ura iseda siahu ibounai Diravana ita hanamoa.—Sal. 86:12.

7. Ita be dahaka mai anina bada gauna ita karaia diba?

⁷ Iehova ita hanamoa badina ita ura ma haida be ia do idia diba. Taunimanima momo be Iehova idia diba lasi. Dahaka dainai? Badina Satani ese koikoi herevadia amo edia lalona ia hadiburaia. (2 Kor. 4:4) Satani ese taunimanima ia koia, ia gwau Iehova be iseda dika do ia gwauatao lasi, ita ia laloa lasi, bona tanobada ena hisihisi ibounai ia havaraia. To ita be iseda Dirava momokanina ena hereva momokani ita diba! Ita  dekenai dala ia noho unai koikoi herevadia ita hamaoromaoroa totona, unai amo Dirava do ita hanamoa. (Isa. 43:10) Salamo 96 be Iehova hanamoa karana ia herevalaia. Inai salamo ai ita herevalaia gaudia haida hegeregerena, dala haida oi laloa, unai amo oi hahedinaraia diba Iehova be hanamoa ia abia be maoro.

EDENA DALA AI ITA HAHEDINARAIA IEHOVA BE HANAMOA IA ABIA BE MAORO?

8. Iehova ita hanamoa diba dalana ta be dahaka? (Salamo 96:1-3)

⁸ Salamo 96:1-3 duahia. Iseda hereva amo Iehova ita hanamoa diba. Inai siri lalonai Iehova ena taunimanima idia boiria ‘Iehova dekenai ane idia abia,’ ‘iena ladana idia hanamoa,’ ‘hamauria ena sivarai namona idia harorolaia’ bona ‘bese idauidau huanai iena hairai idia herevalaia’ totona. Unai dala ibounai amo iseda guba Tamana ita hanamoa diba. Abidadama Iuda taudia bona Keristani taudia ginigunadia be Iehova ese idia totona ia karaia gau namodia ibounai be ma haida dekenai idia herevalaia. (Dan. 3:16-18; Kara 4:29) Edena dala ai unai bamona ita karaia diba?

9-10. Angelena ena sivarai amo dahaka oi dibaia? (Laulau itaia danu.)

⁹ United States ai ia noho taihu ta ladana Angelena a ena haheitalai mani ita laloa. Ia be mai gari lasi ida ena gaukara gabuna ai Iehova ena ladana namona ia herevalaia. Angelena bona ma haida be vanegai sibona idia gaukara matamaia dainai, gaukara ena hebou ta dekenai idia lao bona idia hamaorodia sibona edia sivarai sisina do idia herevalaia. Angelena be ena photo-slide vidio ta ia hegaegaelaia, unai amo Iehova ena Witnes ta ai ia lao dainai ia moalelaia mauri dalana ia hahedinaraia totona. Bona ena sivarai ia do gwauraia lasi neganai, gaukara tauna ta ia hereva guna, ia gwau ia danu be Iehova ena Witnes ruma besena lalonai ia tubu daekau. To unai tauna ese ita abia dae gaudia ia hevasehalaia matamaia. Angelena ia gwau: “Lau gari momokani. To sibona dekenai lau gwau: ‘Ta ese Iehova ia gwauraia koikoi neganai, hereva ta do lau gwauraia lasi, a? Eiava Iehova totona do lau hereva, a?’”

¹⁰ Gaukara tauna ena hereva ia doko neganai, Angelena be guriguri kwadogina ia gwauraia. Bena mai hemataurai ida unai tauna dekenai ia gwau: “Emu sivarai be egu hegeregerena. Lau danu be Iehova ena Witnes ruma besena lalonai lau tubu, bona ema bona hari  lau be Iehova ena Witnes ta.” Ena be ia auka, to Angelena ia boga-auka. Ena gaukara taudia dekenai ena Witnes turadia ida mai moale ida Iehova idia hesiai henia laulaudia ia hahedinaraia. Bena mai hemataurai ida ia abia dae gaudia ia herevalaia. (1 Pet. 3:15) Bona dahaka ia vara? Angelena ena hereva ia doko neganai, unai tauna ena badu ia ore. Danu Angelena dekenai, Witnes ruma besena lalonai ia tubu daekau lalonai, ia laloatao ekspiriens namodia haida ia gwauraia. Angelena ia gwau: “Iehova totona hereva momokani ita gwauraia be namo. Iena ladana totona ita hereva be hahenamo badana.” Ma haida ese Iehova idia matauraia lasi neganai, ita danu Iehova ita hanamoa diba. Bona unai ita karaia be hahenamo badana.

11. Idaunega amo tomadiho momokani taudia be edena dala ai Salamo 96:8 ena hakaua herevana idia badinaia?

¹¹ Salamo 96:8 duahia. Iseda kohu amo Iehova ita hanamoa diba. Nega momo tomadiho momokani taudia ese Iehova be unai dala amo idia hanamoa. (Aon. 3:9) Hegeregere, Israela taudia be dubu helaga haginia bona hanamoa totona kontribusen idia henia. (2 Ki. 12:4, 5; 1 Siv. 29:3-9) Keriso ena hahediba taudia be “edia kohu” amo Iesu bona ena aposetolo taudia idia durua. (Luka 8:1-3) Danu Keristani taudia ginigunadia be edia tadikaka bona taihu durua totona, heduru gaudia idia haboua bona idia siaia. (Kara 11:27-29) Hari ita danu be iseda kontribusen bona kohu amo Iehova ita hanamoa diba.

12. Edena dala ai iseda kontribusen bona kohu amo Iehova ita hanamoa diba? (Laulau itaia danu.)

¹² Sivarai ta mani ita laloa, unai ese do ia hahedinaraia iseda kontribusen amo Iehova ita hanamoa diba. Lagani 2020 ena ripoti ta ese ia hahedinaraia, Zimbabwe ai nega daudau lalonai medu ia diho lasi. Taunimanima milioni momo dekenai aniani be lasi dainai idia mase diba. Taihu ta ladana Prisca danu be unai hekwakwanai lalonai ia noho. Ena be unai be nega aukana, to Prisca be Wednesday bona Friday ibounai haroro gaukara ia karaia. Bona hadohado negadia ai danu ia haroro. Ena dekena taudia be ia idia hevasehalaia, badina ia be uma dekenai ia lao lasi, to haroro totona ia lao. Idia gwau, “Oi be hitolo dainai do oi mase.” Prisca be mai lalogoada ida ia haere, “Iehova be hanaihanai ena hesiai taudia ia naria.” Daudau lasi murinai, Prisca be iseda orea ese ia siaia aniani bona gau ma haida ia abia danu. Oibe, ita ta ta ese ita henia  kontribusen dainai, iseda orea be unai heduru idia henia diba. Prisca ena dekena taudia idia hoa bona ia idia hamaoroa, “Dirava be hanaihanai oi ia naria, unai dainai ai ura ia ai dibaia.” Bona idia ibounai 7 be kongrigeisen heboudia dekenai idia lao matamaia.

13. Edena dala ai iseda kara amo Iehova ita hanamoa diba? (Salamo 96:9)

¹³ Salamo 96:9 duahia. Iseda kara amo Iehova ita hanamoa diba. Iehova ena dubu helaga ai hesiai gaukara idia karaia hahelaga taudia edia toana ia goeva be namo. (Eso. 40:30-32) Ita danu ita goeva be namo, to iseda toana ia goeva sibona be hegeregere lasi, namona be iseda kara idia goeva danu. (Sal. 24:3, 4; 1 Pet. 1:15, 16) Baibel ia gwau iseda “mauri gunana” be dabua bamona ita kokia bona “mauri matamata” ita atoa be namo. Unai ena anina be Iehova ese ia inai henia lalohadai kereredia bona kara dikadia ita dadaraia. Bona Iehova ena lalohadai ita abia bona ena kara namodia ita tohotohoa. (Kol. 3:9, 10) Iehova ena heduru amo, kara dika badadia idia karaia taudia bona dagedage taudia be edia kara idia haidaua diba bona mauri matamata be dabua bamona idia atoa.

14. Jack ena sivarai amo dahaka oi dibaia? (Laulau itaia danu.)

¹⁴ Jack ena sivarai ita laloa, ia be dagedage bada tauna, unai dainai ia idia gwauraia Demoni. Jack be kara dika badadia momo ia karaia dainai, kota ia gwau do idia hamasea. To, ena mase dinana ia naria noho lalonai, dibura ia vadivadi henia tadikaka ta ese ia haroro henia bona Baibel stadi ia abia dae. Ena be Jack be kara dika momo ia karaia, to ena kara ia haidaua, bapatiso ia abia bona Iehova ena Witnes tauna ai ia lao. Jack be ena kara ia haidaua momokani dainai, dibura ena gadi taudia haida be mai tai ida ia idia bamahuta henia. Dibura ruma ena biaguna ia gwau: “Guna, iniseniai Jack be tau dikana momokani, to hari ia be tau namona ta.” Jack ia mase bona wiki ta murinai, tadikaka be hebou karaia totona dibura ruma dekenai idia lao neganai, nega ginigunana hebou dekenai ia lao dibura tauna ta idia hedavari henia. Dahaka dainai hebou totona ia lao? Badina Jack ena mauri ia haidaua dalana ia itaia, unai ese ena lalona ia veria dainai ia ura diba dahaka do ia karaia Iehova ia tomadiho henia totona. Unai ese ia hahedinaraia, iseda kara amo iseda guba Tamana ita hanamoa diba!—1 Pet. 2:12.

 VAIRA NEGA AI IEHOVA BE EDENA DALA AI ENA LADANA DO IA HANAMOA?

15. Vaira nega ai Iehova be edena dala ai ena ladana do ia hanamoa? (Salamo 96:10-13)

¹⁵ Salamo 96:10-13 duahia. Salamo 96 ena siri dokodia ese idia hahedinaraia Iehova be King bona Hahemaoro Tauna maorona. Vaira nega ai, Iehova be edena dala ai ena ladana do ia hanamoa? Hahemaoro ia karaia neganai, ena ladana do ia hanamoa. Kahirakahira, Iehova ese Babulonia Badana do ia hadikaia ore, badina ena ladana helagana ia hadikaia. (Apok. 17:5, 16; 19:1, 2) Babulonia Badana ia dika negana idia itaia taudia haida be edia lalona do idia hadaia, bona ita ida tomadiho momokanina do idia bamoa. Dokonai, Iehova ese Aramagedono ai Satani ena orea ibounai do ia hadikaia ore. Dirava ese ena inai taudia bona iena ladana idia hadikaia taudia ibounai do ia haorea, to ia idia lalokau henia, idia badinaia bona mai moale ida ena ladana idia hanamoa taudia ibounai do ia hamauria. (Mar. 8:38; 2 Tes. 1:6-10) Keriso Ena Lohia Lagani 1,000 ia ore bona hahetoho ginigabena murinai, Iehova ese do ia hamomokania taunimanima ibounai ese ia sibona idia tomadiho henia be maoro. (Apok. 20:7-10) Unai nega ai, “tanobada be Iehova ena hairai dibaia karana amo do ia honu, davara be ranu amo ia honu bamona.”—Hab. 2:14.

16. Emu lalona oi hadaia dahaka oi karaia totona? (Laulau itaia danu.)

¹⁶ Vaira nega ai taunimanima ibounai be mai moale ida Iehova ena ladana do idia hanamoa! Hari inai negai, namona be ita gaukara goada Iehova ita herevalaia bona iseda kara amo ia ita hanamoa. Unai ita karaia be mai anina bada, unai dainai Hakaua Oreana ese lagani 2025 ena siri badana be Salamo 96:8 amo idia abia: “Iehova ena ladana dainai ia umui hanamoa.”