STADI ATIKOL 4
ANE 18 Mauri Davana Dainai Ai Tenikiu
Mauri Davana amo Dahaka Ita Dibaia?
“Dirava ena lalokau ita totona be inai dala ai ia hahedinaraia.”—1 IOA. 4:9.
STADI ENA BADINA
Iesu ena mase amo Iehova bona Iesu ese idia hahedinaraia kara namodia ita dibaia.
1. Lagani ta ta ai Keriso ena mase ena Memorial dekenai ita lao karana amo dahaka namo ita abia?
DO OI abia dae mauri davana be harihari gauna hereadaena! (2 Kor. 9:15) Iesu be ena mauri ia bouboulaia dainai, oi be Iehova Dirava oi tura henia diba. Danu oi be nega vaira ai mauri hanaihanai oi abia diba. Gau momo dainai Iehova ita tanikiu henia diba, ia ese mauri davana ia henia badina ita ia lalokau henia bada! (Roma 5:8) Mauri davana ita laloa bada bona Iehova bona Iesu Keriso ese idia karaia gauna ita laloaboio lasi totona, Iesu ese ita ia hagania, lagani ta ta ai ena mase ena Memorial dekenai ita lao totona.—Luka 22:19, 20.
2. Inai atikol ai dahaka do ita herevalaia?
2 Inai lagani ai, Memorial be Saturday, April 12, 2025 ai do ita karaia. Oibe, ita ibounai ita ura unai hebou dekenai ita lao. Ita ta ta ese Memorial ena wiki ai bona Memorial murinai, nega ita atoa Iehova bona ena Natuna ese ita totona idia karaia gaudia ita laloa dobu totona. a Inai atikol ai, mauri davana ita herevalaia karana amo Iehova bona ena Natuna do ita dibaia. Atikol 5 be ita do ia durua mauri davana ena anina ita lalopararalaia bona iseda tanikiu karana ita hahedinaraia dalana ita dibaia totona.
MAURI DAVANA AMO IEHOVA ITA DIBAIA
3. Edena dala ai tau tamona ena mase ese taunimanima milioni momo be kara dika bona mase amo ia hamauria diba? (Laulau itaia danu.)
3 Mauri davana amo ita diba Iehova ena kara ibounai be maoromaoro momokani. (Deut. 32:4) Edena dala ai? Mani ita laloa: Adamu ena kamonai lasi karana dainai, ita ibounai be ia amo kara dika ita abia bona ita mase. (Roma 5:12) Iehova ese kara dika bona mase amo ita ia ruhaia totona, ia ese dala ia karaia Iesu ese mauri davana ia henia totona. To edena dala ai goevadae tauna tamona ena mase ese taunimanima milioni momo be kara dika bona mase amo ia ruhaia diba? Aposetolo Paulo ia gwau: “Tau tamona [Adamu] ena gwau-edeede karana dainai, taunimanima momo be kara dika taudia ai idia lao. Unai hegeregerena, tau tamona [Iesu] ena kamonai karana dainai, taunimanima momo be kara maoromaoro taudia ai do idia lao.” (Roma 5:19; 1 Tim. 2:6) Ita gwau diba, goevadae tauna tamona ena kamonai lasi karana dainai, ita ibounai be kara dika bona mase ita davaria. Unai dainai, goevadae tauna tamona ena mase ese ita be kara dika bona mase amo ia hamauria.
Tau tamona ena kara dika dainai kara diba bona mase ita abia. Unai dainai, tau tamona ese ita ia ruhaia (Paragraf 3 itaia)
4. Dahaka dainai Iehova ese maoro ia henia lasi, ia idia badinaia Adamu ena natudia be mauri hanaihanai idia abia totona?
4 Iehova ese Iesu ia siaia ita totona ia mase be maoro, a? Dahaka dainai Iehova ese maoro ia henia lasi ia idia badinaia Adamu ena natudia be mauri hanaihanai idia abia totona? Reana do ita laloa, unai be dala namona unai hekwakwanai hamaoromaoroa totona. To unai ese Iehova ena hahemaoro goevana do ia hahedinaraia lasi. Iehova ena kara ibounai be maoromaoro dainai, ia ese Adamu ena kara dika totona gau ta ia karaia be namo.
5. Dahaka dainai ita diba momokani Iehova be nega ibounai kara maoromaoro do ia badinaia?
5 Bema Iehova ese mauri davana ia henia lasi, bona maoro ia henia lasi ia idia badinaia Adamu ena natudia be mauri hanaihanai idia abia totona, do ia hahedinaraia ia ese ena taravatu maoro bona kerere dekenai ia badinaia lasi. Unai dainai taunimanima do idia laloa ia be gabeai ena taravatu do ia badinaia lasi, bona vaira nega totona ia gwauraia gaudia do ia hagugurua lasi. Danu, taunimanima do idia daradara bema Iehova be ena gwauhamata ibounai do ia badinaia eiava lasi. To unai bamona ita laloa lasi be namo. Dahaka dainai? Badina Iehova be kara maoromaoro ia badinaia, ena be unai ia karaia totona ena Natuna tamona ia bouboulaia.
6. Edena dala ma ta ai mauri davana ese Iehova ena lalokau ia hahedinaraia? (1 Ioane 4:9, 10)
6 Mauri davana dainai ita laloparara Iehova ena kara be maoromaoro, bona ita ia durua ita ia lalokau henia ena bada ita lalopararalaia totona. (Ioa. 3:16; 1 Ioane 4:9, 10 duahia.) Mauri davana ese ita ia hadibaia Iehova ia ura mauri hanaihanai do ita abia sibona lasi, to ena ruma bese lalonai do ita noho danu. Mani oi laloa, Adamu ia kara dika neganai, Iehova ese ia idia tomadiho henia ruma bese amo ia kokia. Unai dainai ita ibounai be Dirava ena ruma bese lalonai ita vara lasi. To mauri davana dainai Iehova ese iseda kara dika ia gwauatao bona ia idia abidadama henia bona badinaia taudia ibounai be ena ruma bese lalonai ia hakaua mai: Hari danu, Iehova bona tadikaka taihu ida hetura karana namona ita moalelaia diba. Momokani, Iehova ese ita ia lalokau henia bada!—Roma 5:10, 11.
7. Edena dala ai Iesu ia davaria hisihisi ese ita ia durua, Iehova ese ita ia lalokau henia dalana ita lalopararalaia totona?
7 Iehova ese ita ia lalokau henia ena bada ita lalopararalaia totona, namona be ia henia mauri davana dainai ia mamia hisihisi ita laloa. Satani ia gwau hekwakwanai negadia ai Dirava ena hesiai taudia ese ia do idia badinaia be auka. Iehova ese Satani ena hereva ia hakoikoia totona, Iesu ia davaria hisihisi bona ena mase ia koua lasi. (Iobu 2:1-5; 1 Pet. 2:21) Iehova ia itaia taunimanima ese Iesu idia hevasehalaia, tuari taudia ese idia dadabaia, bona au dekenai idia kokoa kau. Bena Iehova ia itaia ena lalokau Natuna be mai hisihisi bada ida ia mase. (Mat. 27:28-31, 39) Iehova be mai ena siahu dainai unai ibounai ia koua diba. Hegeregere taunimanima idia gwau: “Bema Dirava ese ia ura henia, namona be hari ia do ia hamauria,” Iehova ese unai ia karaia diba. (Mat. 27:42, 43) To, bema Dirava ese unai ia koua, ia ese mauri davana do ia karaia lasi bona ita be helaro lasi. Unai dainai Iehova ese ia itaia ena natuna be hisihisi bada ia davaria bona ia mase neganai, unai ia koua lasi.
8. Iehova ia itaia ena Natuna be hisihisi ia davaria neganai ia lalohisihisi, a? Herevalaia. (Laulau itaia danu.)
8 Namo lasi ita laloa Dirava be siahu ibounai Diravana dainai ia be hemami lasi! Ia ese ita ia havaraia neganai, hemami ia atoa bona ita be ena toana hegeregerena ia karaia, unai dainai ita diba Iehova be mai ena hemami. Baibel ia gwau, Dirava ena “lalona idia hahisia.” (Sal. 78:40, 41) Aberahamo bona Isako edia haheitalai mani ita laloa. Do oi laloatao danu, Aberahamo be Dirava ese ia hamaoroa ena natuna tamona ia bouboulaia totona. (Gen. 22:9-12; Heb. 11:17-19) Aberahamo be kaia amo ena natuna Isako ia ura hamasea neganai, ena hemami mani oi laloa. Iehova ia itaia ena Natuna be kerere tauna ta bamona taunimanima ese idia hahisia neganai, ia lalohisihisi bada!—Inai vidio, Edia Abidadama Tohotohoa—Aberahamo, Kahana 2 be jw.org ai oi itaia.
Iehova ia itaia ena Natuna be hisihisi bada ia davaria neganai, ena lalona ia hisihisi bada (Paragraf 8 itaia)
9. Roma 8:32, 38, 39 amo Iehova ena lalokau karana dekenai dahaka oi dibaia?
9 Mauri davana ese ita ia hadibaia Iehova ese ita ia lalokau henia karana be, iseda varavara bona turadia edia lalokau ia hereaia. (Roma 8:32, 38, 39 duahia.) Ita diba momokani, Iehova ese ita ia lalokau henia bada bona unai ese ita sibona ita lalokau henia karana ia hereaia. Oi ura oi mauri hanaihanai, a? Iehova ia ura do oi mauri hanaihanai. Oi ura emu kara dika ia gwauatao, a? Iehova ia ura unai ia karaia. Ita amo ia noia gauna be ia henia harihari gauna do ita abia dae, anina be ia do ita abidadama henia bona ita badinaia. Iehova ese ia henia mauri davana ese ia hahedinaraia ita ia lalokau henia bada. Bona tanobada matamata ai, iseda diba Iehova ena lalokau dekenai do ita habadaia noho.—Had. 3:11.
MAURI DAVANA AMO IESU ITA DIBAIA
10. (a) Iesu be dahaka dainai ia lalohisihisi? (b) Edena dala ai Iesu ese Iehova ena ladana ia hahelagaia? (Maua itaia, “ Iesu Ena Badinaia Karana ese Iehova Ena Ladana ia Hahelagaia.”)
10 Iesu be ena Tamana ena ladana ia laloa bada. (Ioa. 14:31) Iesu ia lalohisihisi bada badina taunimanima idia gwau, ia ese Dirava ena ladana ia hadikaia dainai do idia hamasea. Unai dainai ia guriguri: “Egu Tamana e, bema mai dalana, mani inai kapusi be lau amo oi kokia.” (Mat. 26:39) Iesu be Iehova ia badinaia ela bona ia mase, unai amo ia ese ena Tamana ena ladana ia hahelagaia.
11. Edena dala ai Iesu ia hahedinaraia taunimanima ia lalokau henia bada? (Ioane 13:1)
11 Danu mauri davana ese ita ia hadibaia Iesu ese taunimanima ia laloa bada, bona ena hahediba taudia ia lalokau henia bada. (Aon. 8:31; Ioane 13:1 duahia.) Hegeregere, Iesu ia diba tanobada ai do ia karaia gaudia haida be auka, unai ta be mai hisihisi ida do ia mase. Iesu be unai gaudia ia karaia Iehova ese ia hamaoroa dainai sibona lasi, to taunimanima ia lalokau henia dainai ia karaia. Bona Iesu be mai kudouna ibounai ida haroro bona hadibaia gaukara ia karaia, bona ma haida ia hesiai henia. Iesu do ia mase dinana ai, ia ese nega ia atoa ena aposetolo taudia edia aena ia huria, idia ia hadibaia bona hagoadaia herevadia ia henia. (Ioa. 13:12-15) Iesu be au dekenai idia kokoa bona mai hisihisi ida kahirakahira do ia mase neganai, ena badinai ia noho kara dika tauna ia hamaoroa Paradaiso dekenai do ia noho, danu Ioane ia noia ena sinana ia naria totona. (Luka 23:42, 43; Ioa. 19:26, 27) Iesu be taunimanima ia lalokau henia bada dainai ia mase, to unai sibona lasi, ia be nega ibounai taunimanima ia lalokau henia bona hebogahisi ia hahedinaraia.
12. Edena dala ai Iesu be ita totona gau momo ia karaia noho?
12 Keriso be “nega tamona sibona” ia mase, to ia ese ita totona gau momo ia do karaia noho. (Roma 6:10) Dahaka gaudia ia karaia noho? Mauri davana dainai, Iesu be ia gaukara noho ita dekenai gau namodia momo ia henia totona. Hari ia karaia noho gaukara momo mani oi laloa. Ia be iseda King, Hahelaga Tauna Badana, bona kongrigeisen ena kwarana. (1 Kor. 15:25; Efe. 5:23; Heb. 2:17) Iena maduna be horoa taudia bona hutuma bada taudia do ia haboua noho, unai gaukara be hisihisi bada ena dokona ai do ia hagugurua. b (Mat. 25:32; Mar. 13:27) Danu ia ese hesiai tauna mai ena kamonai oreana ia gaukaralaia iseda abidadama idia durua gaudia ia henia totona. Unai amo inai dina gabedia ai ia ita hesiai henia diba. (Mat. 24:45) Bona iena Lohia Lagani 1,000 lalonai ita totona gau momo do ia karaia noho. Momokani, Iehova ese ena Natuna be ita totona ia henia!
DIBA OI ABIA NOHO
13. Edena dala ai laloa dobu karana ese oi do ia durua, Dirava bona Keriso ena lalokau oi dibaia noho totona?
13 Iehova Dirava bona Keriso Iesu ese ita totona idia hahedinaraia lalokau karana oi laloa dobu neganai, gau momo do oi dibaia noho. Reana inai lagani ena Memorial ena wiki ai eiava ena murina wiki ai evanelia buka ta eiava rua oi duahia namonamo diba. Nega tamona ai karoa momo oi duahia haraga lasi. To oi duahia lalonai, Iehova bona Iesu ita lalokau henia ena badina haida oi tahua. Bona oi dibaia gaudia be ma haida dekenai oi herevalaia.
14. Salamo 119:97 bona futnout hegeregerena, edena dala ai tahua gaukara ese ita do ia durua mauri davana bona hahediba hereva ma haida ita dibaia totona? (Laulau itaia danu.)
14 Bema oi be orea lalonai lagani momo oi noho vadaeni, reana do oi laloa Dirava ena kara maoromaoro, ena lalokau, bona mauri davana dekenai diba ma haida oi abia be namo, a? Oibe, unai gaudia dekenai gau momo idia do noho ita dibaia totona. Unai dainai dahaka do oi karaia diba? Nega oi atoa iseda pablikeisen oi duahia bona stadilaia, unai amo diba ma haida do oi abia. Bema Baibel oi duahia to gau ta oi lalopararalaia lasi, namona be tahua gaukara oi karaia, unai amo diba maorona do oi abia. Bena unai dina lalonai Iehova, ena Natuna, bona oi idia lalokau henia karana dekenai oi dibaia gaudia oi laloa dobu.—Salamo 119:97 bona futnout duahia.
Ena be orea lalonai lagani momo ita noho, mauri davana dekenai gau matamatadia ita dibaia diba, unai ese ita do ia durua Iehova bona Iesu ese ita totona idia karaia gaudia dainai iseda tanikiu karana ita hahedinaraia (Paragraf 14 itaia)
15. Dahaka dainai Baibel amo gau matamata ita dibaia noho karana be mai anina bada?
15 Emu Baibel duahiduahi bona tahua gaukara lalonai bema gau matamata ta oi davaria lasi, namo lasi oi lalohisihisi. Mani golo ia tahua tauna oi laloa. Ia be golo ia tahua neganai, hora bona dina momo murinai, golo maragidia haida ia davaria. To, golo ia tahua noho badina ia dekenai golo ena kahana maragina be dava bada gauna. To Baibel ai gau matamata dibaia karana ese golo ia hereaia! (Sal. 119:127; Aon. 8:10) Unai dainai oi haheauka bona emu Baibel duahiduahi ena sediual oi badinaia noho.—Sal. 1:2.
16. Edena dala ai Iehova bona Iesu ita tohotohoa diba?
16 Oi stadi neganai, oi dibaia gaudia be emu mauri lalonai do oi badinaia dalana oi laloa. Hegeregere, Iehova ena kara maoromaoro oi tohotohoa totona, taunimanima be maka tamona ai oi kara henia. Iesu ese ena Tamana bona ma haida dekenai ia hahedinaraia lalokauna oi tohotohoa. Unai oi karaia dalana be mai lalona ibounai ida Iehova ena ura oi karaia bona emu tadikaka taihu oi durua, ena be nega haida ia auka. Danu, Iesu oi tohotohoa dalana ma ta be ma haida oi haroro henia, unai amo idia danu be Iehova ese taunimanima totona ia karaia noho gaudia do idia dibaia bona mauri davana do idia abidadama henia.
17. Atikol 5 ai dahaka do ita herevalaia?
17 Mauri davana ita dibaia noho neganai, Iehova bona iena Natuna dekenai iseda lalokau do ia bada noho. Bena Iehova bona Iesu be ita do idia lalokau henia bada. (Ioa. 14:21; Iam. 4:8) Unai dainai Iehova ese ita dekenai ia henia gaudia ibounai ita gaukaralaia, mauri davana dekenai diba ma haida ita abia totona. Atikol 5 ai mauri davana amo ita abia hahenamo bona Iehova ena lalokau dainai tanikiu ita hahedinaraia dalana do ita herevalaia.
ANE 107 Dirava Ena Lalokau
a HEREVA ENA ANINA: “Laloa dobu” anina be oi stadilaia gauna oi laloa bona unai oi dibaia namonamo totona gau ma haida oi lalohadailaia.
b Paulo ese Efeso 1:10 ai ia gwauraia “guba gaudia” haboua karana be Iesu ese Mataio 24:31 bona Mareko 13:27 ai ia herevalaia “Dirava ena abia hidi taudia” haboua gaukarana amo ia idau. Paulo be Iehova ese lauma helaga amo Iesu ida do idia lohia taudia ia abia hidi negana ia herevalaia. Iesu be hisihisi badana lalonai tanobada ai idia do noho horoa taudia oredia be guba dekenai do idia haboua negana ia herevalaia.
