STADI ATIKOL 2
ANE 132 Hari Ita be Tamona
Tatau E, Emui Adavadia Do Umui Matauraia
“Umui tatau e, . . . Hahine do umui matauraia.”—1 PET. 3:7.
STADI ENA BADINA
Tatau ese edia hereva bona kara amo edia adavadia idia matauraia dalana do ita herevalaia.
1. Dahaka badina ta dainai Iehova ese harihari gauna, headava ia henia?
IEHOVA be “moale Diravana,” bona ia ura ita moale danu. (1 Tim. 1:11) Ia ese ita dekenai harihari gaudia momo ia henia, mauri ita moalelaia totona. (Iam. 1:17) Unai harihari gauna ta be headava. Tau bona hahine idia headava neganai, idia gwauhamata ta ta do idia lalokau henia bona matauraia. Tau bona hahine be ta ta idia lalokau henia bada neganai, do idia moale.—Aon. 5:18.
2. Hari inai negai tatau momo ese edia adavadia be edena bamona idia kara henia?
2 To madi, hari inai negai headava taudia momo be edia headava dinana ai idia karaia gwauhamata idia laloaboio. Unai dainai idia moale lasi. Vanegai, World Health Organization ena ripoti ta ese ia hahedinaraia, tatau momo be edia adavadia idia dadabaia, idia hereva dika henia, bona idia kara namo henia lasi. Unai bamona idia karaia tatau haida be taunimanima vairanai edia adavana idia matauraia, to ruma dekenai idia kara namo henia lasi. Headava tatau momo be ponografi idia itaia, unai dainai hahine idia mamia edia tau ese idia lalokau henidia lasi bona idia lalohisihisi.
3. Dahaka dainai tatau haida be edia adavadia idia kara namo henia lasi?
3 Dahaka dainai tatau haida be edia adavadia idia kara namo henia lasi? Reana idia tubu daekau ruma besena lalonai tamana ese sinana ia dagedage henia, unai dainai idia laloa unai kara be kerere lasi. Haida be edia tano ena mauri dalana dainai, edia adavadia idia kara auka henia, unai amo hahine do idia diba tatau ese idia biagudia be namo. Tatau haida be edia hemami idia biagua diba lasi, hegeregere idia badu haraga. Tatau haida be ponografi laulau idia itaia momo dainai, hahine bona mahuta hebou karana dekenai lalohadai kererena idia abia. Ma danu, ripoti haida ese idia hahedinaraia COVID-19 gorerena lalonai, tatau momo be edia adavadia idia dagedage henia matamaia. To momokani, tatau ese edia adavadia idia dagedage henia be maoro lasi.
4. Keristani tatau be dahaka dekenai idia naria namonamo, bona dahaka dainai?
4 Keristani headava tatau ese hahine dekenai lalohadai kereredia idia abia lasi be namo. a Dahaka dainai? Badina tau ese ia laloa gauna be do ia karaia. Aposetolo Paulo ese Roma ai idia noho Keristani taudia ia hadibaia ‘inai nega oromana ai idia noho taudia do idia tohotohoa lasi.’ (Roma 12:1, 2) Paulo ese Roma kongrigeisen ia tore henia neganai, idia be lagani haida lalonai Keristani taudia ai idia lao vadaeni. To, Paulo ena hereva ese ia hahedinaraia kongrigeisen lalonai, haida be tanobada ena kastom karadia bona lalohadai idia do badinaia noho. Unai dainai idia ia sisiba henia, edia lalohadai bona kara idia haidaua totona. Unai sisiba be hari Keristani headava taudia ese idia badinaia diba. To madi, haida be inai tanobada ena lalohadai ese ia hakaua dainai edia hahine idia dagedage henia. b Iehova ia ura tau ese ena adavana be edena bamona ia kara henia? Inai atikol ena siri badana ese unai ia haerelaia.
5. Petero Ginigunana 3:7 hegeregerena, edena dala ai tau ese ena adavana ia kara henia be namo?
5 Petero Ginigunana 3:7 duahia. Iehova ese tatau ia oda henia edia adavadia idia matauraia totona. Tau ta be iena adavana ia matauraia neganai, mai lalokau ida do ia kara henia. Inai atikol ai, tau ese ena adavana do ia matauraia dalana do ita herevalaia. To mani tau ese hahine dekenai do ia karaia lasi gaudia ita herevalaia guna.
EMU ADAVANA MATAURAIA LASI KARADIA OI DADARAIA
6. Iehova ena hemami be edena bamona bema tau ta ese ena adavana ia dagedage henia? (Kolose 3:19)
6 Dagedage karana. Iehova ese dagedage tauna ia badu henia. (Sal. 11:5) Tau ese ena adavana ia dagedage henia neganai, Iehova do ia moale lasi. (Mal. 2:16; Kolose 3:19 duahia.) Iseda siri badana 1 Petero 3:7 hegeregerena, bema tau ese ena adavana ia kara namo henia lasi, unai ese ena hetura karana Dirava ida ia hadikaia diba. Danu, Iehova ese ena guriguri do ia kamonai henia lasi.
7. Efeso 4:31, 32 hegeregerena, tau ese edena bamona hereva ia gwauraia lasi be namo? (“Hereva Ena Anina” itaia danu.)
7 Hereva auka karana. Tatau haida be edia adavadia dekenai mai badu ida idia hereva bona lalona hahisia herevadia idia gwauraia. Iehova be “badu, badu dikadika, boiboi badabada, bona hadikaia herevadia ia inai henia.” c (Efeso 4:31, 32 duahia.) Iehova be ita gwauraia gaudia ibounai ia kamonai. Taunimanima vairanai eiava idia sibona idia noho neganai, tau ese ena adavana ia hereva henia dalana be Iehova ese ia laloa bada. Tau ta ese ena adavana ia hereva auka henia neganai, unai ese ena headava ia hadikaia sibona lasi, to ena hetura karana Dirava ida ia hadikaia danu.—Iam. 1:26.
8. Iehova ese ponografi itaia karana be edena bamona ia laloa, bona dahaka dainai?
8 Ponografi itaia karana. Iehova ese ponografi laulau itaia karana be edena bamona ia laloa? Ia ese unai kara ia inai henia. Unai dainai laulau dikadia ia itaia tauna ese ena hetura karana Iehova ida ia hadikaia bona ena adavana ia matauraia lasi. d Iehova ia ura headava tau be ena kara bona lalohadai amo, ena hahine sibona dekenai lalokau do ia hahedinaraia. Iesu ia gwau bema tau ta be mai ura ida hahine ma ta ia raraia noho, ia be ena “kudouna ai” ia heudahanai vadaeni. e—Mat. 5:28, 29.
9. Dahaka dainai Iehova be mahuta hebou karana dekenai tau ese ena adavana ia fosia karana ia inai henia?
9 Mahuta hebou karana. Tatau haida be edia adavadia idia fosia mahuta hebou karana idia karaia totona, ena be unai ese hahine ena lalona ia hahisia eiava ena lalomamina ia hadikaia. Iehova be unai bamona kara dekenai ia moale lasi. Iehova ia ura tau ese ena adavana do ia lalokau henia bona ena hemami ia matauraia. (Efe. 5:28, 29) Bema Keristani headava tau be ena adavana ia matauraia lasi, ia dagedage henia, eiava ponografi ia itaia be edena bamona? Edena dala ai ena lalohadai bona kara ia haidaua diba?
HEMATAURAI LASI KARADIA HANAIA DALANA
10. Edena dala ai headava tatau be Iesu ena haheitalai ese ia durua diba?
10 Dahaka ese headava tauna ia durua diba dagedage bona hemataurai lasi karadia ia dadaraia totona? Ia gaukara goada Iesu ena haheitalai ia tohotohoa totona. Ena be Iesu ia headava lasi, to ena hahediba taudia ia kara henia dalana be tau ese ia tohotohoa diba ena hahine ia kara henia totona. (Efe. 5:25) Hegeregere, Iesu ese ena aposetolo taudia ia kara henia bona hereva henia dalana amo tau ese do ia dibaia gaudia haida mani ita herevalaia.
11. Iesu ese ena aposetolo taudia be edena bamona ia kara henia?
11 Iesu be hanaihanai mai hemataurai ida ena aposetolo taudia ia kara henia. Bona nega ta idia ia kara auka eiava biagua auka lasi. Ena be Iesu be edia Lohiabada bona edia Biaguna, to ena siahu ia gaukaralaia lasi ia idia gari henia eiava edia hemami ia hadikaia totona. To mai manau ida idia ia hesiai henia. (Ioa. 13:12-17) Ena hahediba taudia dekenai ia gwau: “Lau dekenai diba umui abia, badina lau be manau bona lalomanada tauna, bona goada matamata do umui davaria.” (Mat. 11:28-30) Laloatao, Iesu be manau tauna. Tau ta ia manau neganai, unai ese ia hahedinaraia lasi ia be goada lasi. Ia be sibona ia biagua diba. Ia badu neganai ena hemami ia biagua.
12. Iesu be edena dala ai ma haida ia hereva henia?
12 Iesu be ena hereva amo ma haida ia hagoadaia. Ia ese ena murinai idia raka taudia ia hereva auka henia lasi. (Luka 8:47, 48) Ena be ena inai taudia ese idia hereva dika henia bona idia ura habadua, to “idia ia hereva dika henia lasi.” (1 Pet. 2:21-23) Nega haida, Iesu be edia hereva ia haloua lasi. (Mat. 27:12-14) Unai be Keristani headava tatau dekenai haheitalai namona!
13. Mataio 19:4-6 hegeregerena, edena dala ai tau be “ena hahine danu do ia hakapua” diba? (Laulau itaia danu.)
13 Iesu ese headava tatau ia hadibaia hanaihanai edia hahine do idia lalokau henia. Ia ese ena Tamana ena hereva ia gwauraia lou, ia gwau tau be “ena hahine danu do ia hakapua” be namo. (Mataio 19:4-6 duahia.) Inai siri ai “hakapua” totona idia gaukaralaia Grik herevana ena anina be hatamonaia. Unai dainai, headava tau bona hahine huanai edia lalokau ia goada be namo. Unai be hegeregere glu amo gau ta oi hatamonaia bamona. Unai dainai, idia ta ena kara amo ma ta ia hahisia neganai, idia ruaosi do idia lalohisihisi. Bema headava tau ese ena hahine ia lalokau henia bada, ponografi itaia karana do ia dadaraia. Ia be kara haraga “anina lasi gaudia” itaia karana amo do ia raka siri. (Sal. 119:37) Iobu hegeregerena ena lalona ia hadaia, lalohadai kererena ida hahine ta do ia raraia lasi.—Iobu 31:1.
Iena adavana ia lalokau henia tauna be ponografi ia itaia lasi (Paragraf 13 itaia) g
14. Ena hahine ia dagedage henia tauna be dahaka do ia karaia Iehova bona ena adavana ida hetura karana ia hanamoa totona?
14 Bema headava tau be ena hahine ia dagedage henia eiava ia hereva auka henia, namona be dala haida do ia badinaia ena hetura karana Iehova bona ena adavana ida ia hanamoa totona. Dahaka do ia karaia? Ginigunana be, ia laloparara ena kara ia hanamoa be namo. Iehova ena matanai gau ibounai be idia hehuni lasi. (Sal. 44:21; Had. 12:14; Heb. 4:13) Iharuana be, ena hahine ia dagedage henia karana ia hadokoa bona ena kara ia haidaua be namo. (Aon. 28:13) Ihatoina be, ena adavana bona Iehova dekenai ia sori bona ia noinoi ena dika idia gwauatao totona. (Kara 3:19) Danu, namona be Iehova ia noia ena ura do ia hagoadaia senisi haida ia karaia totona, unai amo ena lalohadai, hereva bona kara amo Iehova do ia hamoalea. (Sal. 51:10-12; 2 Kor. 10:5; Fili. 2:13) Namba 4 be, iena guriguri hegeregerena ia kara, bona ia gaukara goada dagedage bona hereva auka karana ia dadaraia totona. (Sal. 97:10) Namba 5 be, kongrigeisen lalonai elda taudia edia heduru ia tahua haraga. (Iam. 5:14-16) Namba 6 be, palani ta do ia karaia unai ese ia do ia durua, ia dadaraia karadia ia karaia lou lasi totona. Ponografi ia itaia headava tauna be unai bamona daladia ia badinaia be namo. Iehova ese ia do ia durua ena kara ia haidaua totona. (Sal. 37:5) To tau ese ena adavana hahisia karadia ia dadaraia sibona be hegeregere lasi. Namona be ena hahine matauraia karana ia dibaia danu. Unai be edena bamona ia karaia diba?
EMU ADAVANA MATAURAIA DALANA
15. Edena dala ai headava tau be ena adavana dekenai lalokau ia hahedinaraia diba?
15 Lalokau oi hahedinaraia. Edia headava lalonai idia moale tadikaka haida be dina ta ta ai gau ta idia karaia edia hahine dekenai lalokau idia hahedinaraia totona. (1 Ioa. 3:18) Headava tau be ena adavana dekenai lalokau ia hahedinaraia totona, gau maragidia haida ia karaia, hegeregere ena imana ia dogoatao eiava ia rosia. Ia ese ena hahine dekenai fon amo meseij ia siaia bona ia hamaoroa, “Oi lau laloa noho” eiava ia nanadaia, “Emu dina be edena bamona?” Bona kadi ta dekenai ena hahine ia lalokau henia herevadia ia torea diba. Headava tau be unai gaudia ia karaia neganai, ena adavana ia matauraia bona edia headava ia goada.
16. Dahaka dainai tau ese ena adavana ia hanamoa be namo?
16 Emu adavana oi hanamoa. Iena adavana ia matauraia tauna be ena hereva amo ena adavana ia laloa bada bona ena hemami ia hanamoa. Unai ia karaia dalana ta be ena hahine ese ia karaia gaudia dainai, ia tanikiu henia. (Kol. 3:15) Hahine do ia moale, bema tau ese mai momokani ida ia hanamoa. Bona hahine be do ia laloa momo lasi, ia mamia ena tau ese ia lalokau henia bona ia matauraia.—Aon. 31:28.
17. Edena dala ai tau ese ena adavana dekenai hemataurai ia hahedinaraia diba?
17 Kara namodia bona hemataurai hahedinaraia. Tau namona ese ena adavana ia lalokau henia bada. Bona ia ese ena hahine be Iehova amo ia mai harihari gauna bamona ia laloa. (Aon. 18:22; 31:10) Unai dainai, mai hemataurai ida ena hahine ia kara henia, idia ruaosi idia mahuta hebou negadiai danu. Ia ese ena adavana do ia fosia lasi ena hemami ia hahisia eiava ena lalomamina ia hadikaia mahuta hebou karadia idia karaia totona. f Tau danu, unai bamona negadiai Iehova ena vairanai ena lalomamina ia goeva be namo.—Kara 24:16.
18. Headava tatau be dahaka idia karaia be namo? (Maua itaia danu, “ Headava Tau ese Hemataurai Ia Hahedinaraia Daladia Foa.”)
18 Headava tatau e, namona be oi abia dae emu adavana oi matauraia totona oi karaia gaudia ibounai be Iehova ese ia itaia bona laloa bada. Emu lalona oi hadaia hemataurai lasi karadia oi dadaraia bona emu adavana dekenai kara namodia, hemataurai, bona lalokau oi hahedinaraia totona. Unai oi karaia neganai, emu hahine dekenai oi hahedinaraia ia oi lalokau henia bona laloa bada. Emu adavana oi matauraia, unai amo Iehova ida emu hetura karana namona do oi gimaia.—Sal. 25:14.
ANE 131 “Dirava ese Tau Bona Hahine Ia Hakapua”
a January 2024 Gima Kohorona ena atikol ladana, “Iehova ese Hahine Ia Kara Henia Dalana Oi Tohotohoa, A?” Headava tatau be unai atikol idia duahia diba.
b Adavadia ese idia dagedage henia taudia be inai atikol ese ia durua diba, “Ruma ai Idia Dagedage Henia Taudia Durudia.” Unai oi duahia totona oi lao JW Library® bona jw.org ai, “More Topics” ena kahana itaia.
c HEREVA ENA ANINA: “Hadikaia herevadia” ena anina be ma ta gwauraia dika karana bona ladana hadikaia herevadia. Danu, hanaihanai ma ta amo oi ura henia lasi gaudia gwauraia karana.
d JW Library bona jw.org ai inai atikol itaia, “Ponografi ese Emu Headava Ia Hadikaia Diba.”
e Bema hahine ta ena adavana be ponografi ia itaia, unai hahine be inai atikol ese do ia durua, “Dahaka Do Oi Karaia Bema Emu Adavana be Ponografi Ia Itaia?” August 2023, Gima Kohorona.
f Baibel ese ia gwauraia hedinarai lasi headava tau bona hahine edia mahuta hebou karana lalonai dahaka kara be kerere bona dahaka be maoro. Keristani headava taudia ese idia karaia abia hidi lalonai, namona be idia hahedinaraia Iehova idia matauraia, ta ta idia hamoalea, bona edia lalomamina ia goeva. To, headava taudia ese idia karaia gaudia be ma haida ida do idia herevalaia lasi.
g LAULAU: Tadikaka ta be ena gaukara turadia ese idia doria edia ponografi magasin ia itaia totona.
