Iehova ese Esekiela dekenai ia gwauhamata, Israela besena be gwauhamata tanona dekenai idia giroa lou murinai, unai bese do ia hatamonaia. Unai sivarai ese inai dina dokodia lalonai Dirava ena taunimanima idia noho hebou karana ia perovetalaia danu.

Iehova ese ena peroveta tauna Esekiela ia hamaoroa, au rua ia gaukaralaia ena hereva do ia torea totona. Ia ese au ta latanai inai do ia torea, “Iuda, bona Israela taudia ia ida idia haboua taudia edia,” bona ma au ta latanai inai hereva do ia torea, “Iosepa, (Eparaima ena au) bona Israela besena ibounai, ia ida idia haboua taudia edia.” Esekiela ese unai au rua be “au tamona” bamona do ia dogoatao.​—Ese. 37:15-17 BHḡ.

 Inai hereva “Eparaima” be dahaka ia laulaulaia? Not kahana edia iduhu ten basileia ena king, Ieroboama, be Eparaima edia iduhu amo ia mai, ia be iduhu badana ai ia lao. (Deu. 33:13, 17; 1 Kin. 11:26) Unai iduhu be Iosepa ena natuna Eparaima amo ia mai. (Num. 1:32, 33) Iosepa be ena tamana, Iakobo amo hahenamo ta ia abia. Unai dainai, iduhu ten edia basileia ia laulaulaia auna idia gwauraia “Eparaima ena au” be maoro. To, Esekiela be au rua ena peroveta herevana ia torea neganai, Asuria be lagani 740 B.C.E. ai Israela ena not kahana basileiana ia abia. (2 Kin. 17:6) Unai nega ai Israela taudia momo be Babulonia Basileia ese ia abia gabudia ai idia noho, unai dainai Babulonia Basileiana ese Asuria Basileia ena gabu ia abia.

Lagani 607 B.C.E. ai, saut kahana ena iduhu rua basileia bona not kahana ena iduhu basileia henunai idia noho taudia haida be Babulonia dekenai igui hesiai taudia bamona idia abia lao. Iuda ena bese amo idia mai king taudia ese unai iduhu rua idia lohiaia bona hahelaga taudia be idia danu idia gaukara hebou, badina idia be Ierusalema ena dubu helaga ai idia gaukara. (2 Siv. 11:13, 14; 34:30) Unai dainai, unai au ese iduhu rua basileiana ia laulaulaia bona idia gwauraia “Iuda ena” be maoro.

Edena negai unai au rua idia atoa hebou? Unai be lagani 537 B.C.E. ai, Israela taudia be Ierusalema dekenai idia giroa bona dubu helaga idia haginia lou. Unai iduhu rua basileiana amo bona iduhu ten basileia amo idia mai taudia be Babulonia dekenai idia heau mauri bona Ierusalema ai idia giroa lou. Unai murinai, Israela ena natudia be idia parara lou lasi. (Ese. 37:21, 22) Bona Israela taudia be Iehova idia tomadiho henia lou. Unai noho hebou bona lalotamona karana be peroveta taudia Isaia bona Ieremia ese idia perovetalaia danu.​—Isa. 11:12, 13; Ier. 31:1, 6, 31.

Inai peroveta herevana lalonai, tomadiho momokani ia herevalaia mai anina bada gauna be dahaka? Iehova ese ia idia tomadiho henia taudia ia haboudia. (Ese. 37:18, 19) Hari unai gwauhamata herevana ia vara momokani, a? Oibe. Lagani 1919 ai unai peroveta herevana ia guguru matamaia, Dirava ese ena taunimanima ia hagoevadia, idia ia haboua bona idia ibounai idia hedavari lou. Satani ia ura idia ia hapararaia, to ia kwalimu lasi.

Unai nega ai, idia haboua lou taudia edia helaro be guba ai Iesu ida king bona hahelagaia gaukara do idia karaia. (Apok. 20:6) Laulau dalanai, idia be Iuda ena au idia laulaulaia. To, nega ia heau noho lalonai, tanobada helarona idia abia taudia momo be lauma Israela besena idia bamoa matamaia. (Sek. 8:23) Idia be Iosepa ena au bamona bona idia diba Keriso ida guba ai do idia lohia lasi.

Guba helarona bona tanobada helaro do idia abia taudia be Iehova ena taunimanima dainai, hari Iesu Keriso, edia King henunai idia gaukara hebou noho, Iehova ese ia be inai bamona ia perovetalaia “lauegu hesiai tauna Davida” bamona. (Ese. 37:24, 25) Iesu ia guriguri badina ia ura ena murinai idia raka taudia be ‘do idia tamona, iena Tamana, be ia ida idia hakapua, ia be ena Tamana ida idia hakapua hegeregerena.’ * (Ioa. 17:20, 21) Iesu danu ia gwau, iena murinai idia raka horoa taudia edia mamoe serina bona “mamoe ma haida” be ‘seri tamona’ ai do idia lao. Idia ibounai be mamoe naria tauna tamona henunai do idia noho. (Ioa. 10:16) Iehova ena taunimanima, herevana edia helaro be tanobada eiava guba ai, edia lalotamona karana be Iesu ena hereva ese ia hahedinaraia goevagoeva.