Sibodia gimaia totona, Keristani taudia idia aonega be namo, bona Baibel ena hakaua herevadia idia badinaia. Bona laloatao, Baibel ese tuari kohudia, hegeregere ipidi gaukaralaia karana ia taravatua. Mani heduru dala haida ita itaia:

Iehova ena matanai taunimanima edia mauri be helaga. Salamo torea tauna, Davida, ia diba Iehova be “mauri ibounai ena badina.” (Sal. 36:9) Unai dainai, bema Keristani tauna ia ura ia sibona eiava ena ruma ia gimaia, ia be do ia hekwarahi ala-ala karana ia dadaraia totona, unai amo ta ena rara dekenai do ia kerere lasi.​—Deu. 22:8; Sal. 51:14.

Momokani, gau idauidau gaukaralaia karana amo ita be rara bubua karana dekenai ita kerere diba. Bona danu, bema ipidi ita gaukaralaia, do ia auka lasi ta ita hamasea totona. * Danu, nega haida henaohenao tauna do ia gari bema ia itaia ma ta be ipidi ia dogoatao, bona unai ese hekwakwanai bada herea ia havaraia eiava mase ia havaraia diba.

Iesu ena hanuaboi ginigabena ai, ia ese ena murinai idia raka taudia ia hamaoroa kaia do idia abia neganai, ia be sibona gimaia karana ia laloa lasi. (Luka 22:36, 38) To, idia ia hamaoroa edia kaia do idia abia, badina ia ura idia ia hadibaia idia dagedage lasi totona, herevana hutuma ese idia dagedage henidia. (Luka 22:52) Petero ese hahelaga tauna ena hesiai tauna ta dekenai tuari kaia ia gaukaralaia murinai, Iesu ese Petero  ia hamaoroa: “Emu tuari kaia be ena gabu dekenai oi atoa lou.” Bena Iesu ese mai anina bada herevana ia gwauraia, bona unai be mai anina ita dekenai danu, ia gwau: “Tuari kaia idia gaukaralaia taudia ibounai be tuari kaia amo do idia mase.”​—Mataio 26:51, 52.

Mika 4:3 ena hereva hegeregerena, Dirava ena taunimanima ese “edia tuari kaia, be hama dekenai do idia botaia, bona tano geia auridia do idia halaoa. Bona edia io danu be hama dekena amo, au rigidia utua kaia do idia halaoa.” Aposetolo Paulo ese Keristani taudia korikoridia edia kara ia herevalaia, ia gwau: “Tau ta ena dika davana umui haloua lasi. . . . Bema mai dalana bona bema umui karaia diba, taunimanima ibounai ida maino ai do umui noho.” (Roma 12:17, 18) Ena be Paulo ese hekwakwanai momo ia davaria, hegeregere “henaohenao taudia amo kahirakahira dika [ia] davaria,” to ia sibona ena hereva ia badinaia, bona sibona ena namo ia laloa lasi to Baibel ena hakaua herevadia ia badinaia. (2 Kor. 11:26) Paulo be Dirava bona Baibel lalonai idia noho aonega herevadia ia abidadama henia, unai “aonega ena namo ese tuari gaudia edia namo ia hereaia.”​—Had 9:18.

Keristani taudia ese mauri idia laloa bada to kohu lasi. Baibel ia gwau: “Kohu ese [ta] dekenai mauri do ia henia lasi.” (Luka 12:15) Bema mai manau ida ita hereva, to unai ese ipidi ia dogoatao henaohenao tauna ia koua lasi, aonega karana be Iesu ena hakaua herevana ita badinaia, ia gwau: “Emu kouti ia abia tauna dekenai emu siedi danu oi henia.” Anina be ia ura gauna be ia dekenai do ita henia. (Luka 6:29; Mat. 5:39, 40) * Unai dala amo iseda mauri do ita haboioa lasi. Bema iseda ‘kohu heagilaia karana’ ita dadaraia, bona iseda dekena taudia dekenai ita hahedinaraia ita, Iehova ena Witnes taudia, be maino taudia, raskol taudia ese ita do idia dagedage henia lasi.​—1 Ioa. 2:16; Aon. 18:10.

Keristani taudia ese ma haida edia lalomamina idia matauraia. (Roma 14:21) Bema tadikaka taihu idia kamonai ta be sibona gimaia totona ipidi ta ia abia, reana unai ese haida do ia hahekwakwanaia diba. Ena be ita diba ita be taravatu ita badinaia, to lalokau karana ese ita ia doria diba ma haida edia namo ita laloa guna totona.​—1 Kor. 10:32, 33; 13:4, 5.

Keristani taudia ese haheitalai namona do idia hahedinaraia. (2 Kor. 4:2; 1 Pet. 5:2, 3) Bema Keristani tauna be Baibel amo sisiba ia abia, to sibona gimaia totona ipidi ia do dogoatao noho, ia be haheitalai dikana. Bona kongrigeisen lalonai maduna ma haida do ia abia lasi. Bema Keristani tauna ta ena moni gaukara dainai ipidi ia dogoatao loaloa, ia dekenai danu unai do ia vara. Aonega karana be moni gaukara ma ta ia tahua. *

Keristani tauna ese ia sibona, iena ruma bese, eiava ena kohu ia gimaia dalana be ia sibona ena abia hidi, bona iena moni gaukara danu be sibona ena abia hidi. Baibel ena hakaua herevadia ese Dirava ena aonega bona ena lalokau ita dekenai ia hahedinaraia. Unai hakaua herevadia dainai, lo Keristani taudia be sibodia gimaia totona ipidi idia abia loaloa lasi. Oibe, Keristani taudia idia diba bema Dirava idia abidadama henia bona Baibel ena hakaua herevana idia badinaia, do idia noho namonamo.​—Sal. 97:10; Aon. 1:33; 2:6, 7.