BAIBEL ai abidadama hesiai taudia edia “hemami” be iseda hemami bamona, bona edia sivarai ita duahia diba. (Iam. 5:17) Hegeregere, Paulo ena hereva ita lalopararalaia badina Roma 7:21-24 ai ia gwau: “Lau ura kara namona lau karaia neganai, kara dika be lau ida ia noho. . . . Lau madi o!” Momokani ita be kara dika taudia dainai nega momo ita kerere, to Paulo ena hemami ita dibaia neganai unai ese ita ia hagoadaia.

To, Paulo be gau haida ia herevalaia danu. Galatia 2:20 ai, Paulo ia gwau Dirava ena Natuna be “[Dirava] ia lalokau henia bona [Dirava] totona ia sibona ia henia”! Emu hemami be Paulo ena “hemami” bamona, a? Reana nega haida unai bamona oi mamia.

Bema guna ita karaia kara dikadia dainai ita do lalohisihisi noho, eiava ita laloa Iehova be ita ia lalokau henia lasi bona iseda dika ia gwauatao lasi, reana do ia auka Iesu ena mauri davalaia boubouna ita abia dae totona. Oi abia dae Iesu ena mauri davalaia boubouna be harihari gauna ta, a? Bema unai bamona oi laloa, dahaka ese oi do ia durua? Mani unai henanadai rua ita herevalaia.

Oibe, Iesu ia ura unai harihari gauna ita laloa bada. Edena dala ai ita hahedinaraia unai ita laloa bada? Mani Luka 23:39-43 ese ia sivarailaia gauna ita laloa. Tau ta be Iesu ena badinai idia tauadae. Ia sibona ia gwau ia be kara dika tauna. Unai bamona kara dika taudia be au dekenai idia tauadae. Ia lalometau bada dainai Iesu ia noia, ia gwau: “Emu Basileia lalonai oi vareai neganai lau oi laloa.”

Iesu be dahaka ia karaia? Iesu be unai kara dika tauna ia itaia totona ena kwarana ia giroa neganai ia abia hisihisi mani oi laloa. To, unai kara dika tauna ia laloa bada dainai ia gwau: “Hari dina oi lau hamaoroa momokani, oi be lau ida Paradaiso ai do ita noho.” Iesu be unai tauna ia hagoadaia ia gwau, “Taunimanima ena Natuna bamona, . . . ma haida hesiai henia totona ia mai, bona ena mauri ia henia, taunimanima momo edia mauri davana karaia totona.” (Mat. 20:28) Iesu ese ena mauri ia bouboulaia karana be mai hebogahisi ida unai tauna dekenai ia hahedinaraia dalana oi itaia, a? Iesu be unai tauna ia laloa bada dainai inai hereva “oi” bona “lau” ia gaukaralaia. Bona unai tauna ia hamaoroa ia be tanobada paradaiso ai do ia noho.

Momokani, unai ese ia hahedinaraia Iesu ia ura bada unai tauna danu be iena boubouna gauna amo namo do ia abia. Bema Iesu be Dirava ia hesiai henia lasi tauna dainai ia mase, vadaeni ia ese Dirava ia hesiai henia Keristani tauna dekenai unai bamona ia laloa danu. Ena be guna ita karaia kara dikadia dainai ita do lalohisihisi noho, to dahaka ese ita do ia durua Keriso ena mauri davalaia boubouna amo namo ita abia totona?

Iesu ese Paulo dekenai haroro gaukara ena maduna ia henia dainai, Paulo ia laloparara Iesu be ia totona ia mase. Edena dala ai? Paulo ia gwau: “Lau be iseda Lohiabada Keriso Iesu lau tanikiu henia, ia ese lau dekenai siahu ia henia, badina ia  laloa lau be ia lau badinaia dainai, lau dekenai inai hesiai gaukarana ia henia. Ena be guna Dirava ena ladana lau hadikaia, iena taunimanima lau dagedage henia, bona hemataurai karana lau hahedinaraia lasi.” (1 Tim. 1:12-14) Paulo ia abia maduna ese Iesu ena hebogahisi bona lalokau karana ia hahedinaraia. Unai hegeregerena Iesu be ita ta ta dekenai haroro gaukara ena maduna ia henia badina ia diba unai do ita karaia. (Mat. 28:19, 20) Ita abia dae momokani Iesu be ita dainai ia mase, a?

Albert, lagani 34 lalonai orea murimuri ai ia noho, to vanegai sibona orea ai idia abia vareai lou. Ia gwau: “Guna lau karaia kara dikadia be hanaihanai lau laloa. To haroro gaukara lau karaia neganai, egu hemami be aposetolo Paulo ena hemami bamona, Iesu be lau dekenai haroro gaukara ena maduna ia henia. Paulo ena hereva ese egu mauri, hari bona vaira nega totona ia durua.”​—Sal. 51:3.

Allan be guna hereva momokani ia do dibaia lasi neganai, ia be raskol karadia momo ia karaia bona ia be dagedage tauna, ia gwau: “Taunimanima dekenai lau karaia kara dikadia lau laloa dainai, nega haida lau lalometau. To Iehova lau tanikiu henia badina ia ese dala ia kehoa lau ese ma haida dekenai sivarai namona lau herevalaia totona. Lau itaia taunimanima ese hereva momokani idia abia dae neganai, lau diba Iehova ena kara be namo herea bona ia be lalokau Diravana. Lau mamia ia ese lau ia gaukaralaia unai amo guna lau bamona kara dikadia idia karaia taudia lau durua totona.”

Bema haroro gaukara ita karaia, ita be kara namodia ita hahedinaraia bona lalohadai namodia ita abia. Bona ia hahedinaraia Iesu be ita ia hebogahisi bona lalokau henia, danu ia diba ita dekenai ia henia maduna do ita huaia.

Satani ena tanobada dikana do ia ore negana ita naria noho lalonai, nega haida guna ita karaia kara dikadia dainai do ita lalohisihisi noho. To, dahaka ese ita do ia durua unai bamona hemami ita abia lasi totona?

Jean, ia matamata negana ai ena tama sina ida Kingdom Hall dekenai ia lao neganai ena kara be namo, to bema ia be ena tama sina ida ia noho lasi bona Kingdom Hall dekenai ia lao lasi ena kara be namo lasi. Ia gwau: “Inai hereva, ‘Dirava be iseda kudouna ia hereaia bona gau ibounai ia diba’ lau ura henia.” (1 Ioa. 3:19, 20) Unai hereva ese ita ia hagoadaia badina ita laloparara Iehova bona Iesu idia diba ita be goevadae lasi taudia. Namona be ita laloatao, idia be mai lalokau ida kara dika amo idia helalo-kerehai taudia totona mauri davalaia boubouna idia henia.​—1 Tim. 1:15.

Iesu ese kara dika taudia ia kara henia dalana ita laloa dobu bona iseda maduna haroro gaukara dekenai ita hagugurua neganai, ita abia dae momokani Iesu be ita ta ta dainai iena mauri ia bouboulaia. Unai bamona oi karaia neganai, oi be Paulo bamona, do oi gwau diba: Iesu be “lau ia lalokau henia bona lau totona ia mase.”