Iehova ia ura headava taudia idia moale, ta ta idia lalokau henia bona tura namodia bamona do idia noho. (Mat. 19:4-6) Bema oi ura headava, adavana namona be edena bamona oi davaria diba? Iehova be iseda Havaraia Tauna dainai, adavana namona tahua bona headava ita moalelaia dalana ia diba. Unai dainai, bema ita dekenai ia henia hakaua herevadia oi badinaia, namo do oi davaria. Mani unai ita itaia.

Gau ginigunana be inai do ita diba: “Gau iboudiai amo, kudouna be ia koikoi momo, bona ia ura dika ia havaraia.” (Ier. 17:9) Idia ura headava taudia rua idia hetura matamaia neganai, mahuta hebou urana ia goada haraga diba bona abia hidi maorona idia karaia lasi. Unai dainai idia headava haraga, bona gabeai idia lalohisihisi. (Aon. 28:26) Unai dainai, tau bona hahine idia hetura matamaia neganai, namo lasi ta ta dekenai edia hemami idia gwauraia eiava gwauhamata idia karaia haraga. Namona be idia naria ela bona ta ta idia diba namonamo.

Aonega Herevadia 22:3 ia gwau: “Aonega tauna ese dika ia itaia bona ia raka siri, to diba bada lasi tauna be ia lao noho bona dika ia davaria.” Bema deitin websait ita gaukaralaia, dahaka dika do ita davaria diba? Madi, momo be intanet amo ta idia davaria, idia tura henia, to gabeai idia lalohisihisi bada badina unai tau o hahine ese idia koia. Nega haida koikoi taudia ese ladana bona laulau korikorina idia atoa lasi, diba lasi taudia edia moni idia henaoa totona. Nega haida unai koikoi taudia idia gwau idia be Iehova ena Witnes taudia.

Do ia vara dika ma ta ita laloa. Deitin websait haida ese kompiuta program ta idia gaukaralaia, unai amo idia itaia edena tau bona hahine ida idia hetura diba. To, momo idia gwau unai program ese idia ia durua lasi. Headava be mai anina bada dainai, taunimanima ese idia karaia kompiuta program oi gaukaralaia adavana ta oi tahua totona be aonega karana lasi. Baibel ena hakaua herevadia ese taunimanima edia kompiuta program ia hereaia.​—Aon. 1:7; 3:5-7.

Aonega Herevadia 14:15 ena hakaua herevana ia gwau: “Diba bada lasi tauna ese hereva ibounai ia abia dae, to aonega tauna be do ia karaia gaudia ia laloa namonamo guna.” Bema oi ura ta oi adavaia, namona be  ia oi diba namonamo guna. To, deitin websait dekenai unai oi karaia be auka. Ena be ta ta emui infomeisen umui duahia diba bona nega momo ta ta dekenai mesiji umui siaia, to oi gwau diba unai tau o hahine oi diba namonamo, a? Haida idia laloa edia lalokau tauna eiava hahinena idia davaria vadaeni, to idia hedavari murinai, idia lalohisihisi bada.

Salamo torea tauna ia gwau: “Lau be koikoi taudia lau bamoa lasi, bona edia kara korikori idia hunia taudia lau dadaraia.” (Sal. 26:4) Deitin websait dekenai momo be infomeisen koikoi idia atoa, badina idia ura haida edia lalona do idia veria. Ma haida dekenai mesiji idia siaia neganai, edia kara korikori idia hahedinaraia lasi eiava edia kara dikadia idia hunia. Inai henanadai ita lalodia be mai anina bada: Haida idia gwau idia be Iehova ena Witnes taudia, to idia bapatiso vadaeni, a? Idia be lo Keristani taudia, a? Mai edia kudouna ibounai ida Iehova idia lalokau henia, a? Edia kongrigeisen taudia ese idia matauraidia, a? Eiava idia be haheitalai dikana, eiava ‘hebamo dikana,’ a? (1 Kor. 15:33; 2 Tim. 2:20, 21) Baibel ena hakaua herevadia hegeregerena ia headava diba, a? Namona be unai henanadai edia haere oi diba guna. To do ia auka unai oi karaia totona, bema ia idia diba namonamo Witnes taudia oi diba lasi. (Aon. 15:22) Oibe, Iehova ia lalokau henia bada tauna be abidadama lasi tauna ida do ia “hakapua tamona lasi.”​—2 Kor. 6:14; 1 Kor. 7:39.

Deitin websait oi gaukaralaia neganai dika bada oi davaria diba, unai dainai namona be dala namodia amo tura namona ta oi davaria, bena ta ta umui diba namonamo murinai, umui headava diba. Edena dala ai tura namona ta oi davaria diba? COVID-19 gorerena be lasi neganai, Iehova ena Witnes taudia be kongrigeisen hebou, hebouhebou maragidia bona badadia bona moale karadia dekenai ma haida idia hedavari henia.

To COVID-19 gorerena dainai, elektronik daladia amo hebou ita karaia bona singul taudia be unai dala amo turana ta idia davaria diba. Hebou ai tok idia henia bona edia haere amo edia abidadama idia gwauraia hedinarai karana oi itaia diba. (1 Tim. 6:11, 12) Bema emu kongrigeisen be zoom amo hebou idia karaia, reana hebou murinai breakout room ai umui herevahereva diba. Unai be nega namona oi ura henia tadikaka o taihu ena kara korikorina oi itaia totona. (1 Pet. 3:4) Reana nega sisina daudau lalonai ta ta umui diba namonamo murinai, do umui itaia bema umui ruaosi umui laloa bada gaudia bona tahua gaudia be hegeregere, bena umui headava diba.

Bema singul taudia be Baibel ena hakaua hereva hegeregerena edia adavana idia tahua, inai aonega herevana be idia dekenai do ia guguru: “Bema tau [o hahine] ta be hahine [o tau] namona ia adavaia, ia be gau namona ta ia davaria unai, bona ia ese Iehova ena lalonamo ia abia.”​—Aon. 18:22.