1. Iehova be oi totona dahaka ia karaia?

OI BE edena dala ai Iehova ena Witnes tauna ai oi lao? Reana emu tama sina, gaukara turana ta, sikuli turana ta, eiava ruma-ta-ruma-ta haroro gaukarana amo “sivarai namona” oi kamonai. (Mar. 13:10) Bena ta ese ena nega bada bona goada ia henia oi ida Baibel ia stadilaia totona. Unai stadi amo Iehova oi lalokau henia matamaia bona ia ese oi ia lalokau henia karana oi dibaia. Iehova ese hereva momokani dekenai oi ia veria mai, bona hari oi be Iesu Keriso ena hahediba tauna bona mauri hanaihanai ena helaro oi abia. (Ioa. 6:44) Oibe, Iehova oi tanikiu henia badina Ia ese ta ia gaukaralaia oi dekenai hereva momokani ia hadibaia, bona oi ia abia hidi ena hesiai tauna ai oi lao totona.

2. Inai atikol ai dahaka do ita herevalaia?

² Hereva momokani ita diba dainai, ma haida ita durua mauri dalana ai ita raka hebou be hahenamo badana. Reana taunimanima ita haroro henia be auka lasi, to ta dekenai Baibel stadi karana ita herevalaia eiava ta ita stadi henia be auka. Reana oi danu be unai oi mamia, a? Bema oibe, reana inai atikol ese oi do ia durua. Hahediba taudia halaoa gaukarana ita karaia totona ita idia durua gaudia do ita herevalaia. Danu Baibel stadi ta ita karaia totona koua gaudia ita hanaia dalana do ita herevalaia. To mani dahaka dainai taunimanima ita haroro henia sibona lasi, to ita hadibadia danu be namo ita herevalaia guna.

3. Dahaka dainai ita haroro?

³ Iesu be tanobada ai ia noho neganai, ena murinai idia raka taudia ia hagania gaukara ta mai ena kahana rua do idia karaia. Ginigunana be, ia hamaorodia Basileia sivarai namona do idia harorolaia, bona idia karaia dalana ia hahedinaraia. (Mat. 10:7; Luka 8:1) Unai sibona lasi, to Iesu ese ena hahediba taudia ia hadibaia haida be sivarai namona do idia abia dae bona haida ese do idia dadaraia. (Luka 9:2-5) Danu, ia hamaorodia ena murinai idia raka taudia ese sivarai namona be tano momo dekenai do idia harorolaia, “bese ibounai idia kamonai totona.” (Mat. 24:14; Kara 1:8) Herevana taunimanima be sivarai namona idia abia dae eiava lasi, to Iesu be ena hahediba taudia ia hagania Dirava ena Basileia bona do ia karaia gaudia do idia harorolaia.

4. Mataio 28:18-20 hegeregerena, ita haroro sibona lasi to dahaka ita karaia danu be namo?

⁴ Iesu ese ia herevalaia gaukara ena kahana iharuana be dahaka? Iharuana be, iena murinai idia raka taudia ia hamaoroa taunimanima do idia hadibaia iena hereva ibounai idia badinaia totona. Reana haida idia gwau, Iesu ena hahegani be Keristani taudia ginigunadia totona. To unai be momokani, a? Lasi, Iesu ia gwau unai mai anina bada gaukarana do idia karaia “ela bona inai nega oromana ena dokona.” (Mataio 28:18-20 duahia.) Iesu be iena hahediba taudia 500 mai kahana dekenai ia hedinarai neganai, unai hahegani ia henia. (1 Kor. 15:6) Bona Iesu ese Ioane dekenai ia henia matahanai lalonai, ia hahedinaraia ia ura ena hahediba taudia ibounai ese taunimanima idia durua Iehova idia diba totona.​—Apok. 22:17.

5. Paulo ese haroro bona hadibaia gaukara be dahaka ida ia hahegeregerea (1 Korinto 3:6-9)?

⁵ Aposetolo Paulo ese hahediba taudia halaoa gaukarana be biru gaukara ida ia hahegeregerea, anina be uhe sibona do ita hadoa lasi. Korinto taudia ia hamaoroa: “Lau ese uhe lau hadoa, Apolo ese ia dairia . . . Umui be Dirava ena uma, ia ese unai uma ia birulaia.” (1 Korinto 3:6-9 duahia.) Ita be “Dirava ena uma” dekenai ita gaukara dainai, haida ita haroro henia neganai, unai be uhe ita hadoa bamona bona ita hadibadia neganai, unai be ranu amo ita dairia bamona. (Ioa. 4:35) To ita laloparara Dirava ese unai uhe ia hatubua, anina be ia dekenai unai taudia ia veria lao.

6. Taunimanima ita hadibaia neganai, ita durudia dahaka idia karaia totona?

⁶ Ita be “mauri hanaihanai idia ura kudou maoro taudia” ita tahua noho. (Kara 13:48) Unai taudia be hahediba taudia ai idia lao totona, namona be idia ita durua Baibel amo idia dibaia gaudia do idia (1) lalopararalaia, (2) abia dae, bona (3) badinaia. (Ioa. 17:3; Kol. 2:6, 7; 1 Tes. 2:13) Namona be kongrigeisen taudia ese Baibel stiuden taudia idia lalokau henia bona hebou dekenai idia welkam henia. (Ioa. 13:35) Danu stadi naria tauna ese ena nega bona goada do ia atoa ena stiuden ia durua, ia abia dae “goada momokani” hahediba herevadia eiava kastom karadia ia dadaraia totona. (2 Kor. 10:4, 5) Reana hua momo lalonai stiuden do ia durua unai senisi ia karaia bona ia bapatiso totona. To iseda hekwarahi ese namo do ia havaraia.

7. Dahaka dainai haida dekenai sivarai namona ita harorolaia bona ita hadibaia?

⁷ Dahaka dainai haroro bona hahediba gaukara ita karaia? Gau ginigunana be,  badina Iehova ita lalokau henia. Haroro bona hahediba gaukara ena hahegani oi badinaia neganai, oi hamomokania Iehova oi lalokau henia. (1 Ioa. 5:3) Mani inai oi laloa: Iehova oi lalokau henia dainai taunimanima oi haroro henia. Unai hahegani oi badinaia be auka, ani? Nega ginigunana oi haroro neganai oi gari, a? Oibe! To oi diba Iesu ia ura unai gaukara oi karaia dainai, oi badinaia. Bena oi haroro loulou ela bona oi manada. To Baibel stadi ta oi karaia totona emu hemami be edena bamona? Oi gari, a? Reana. To, mai gari lasi ida ta dekenai Baibel stadi karana oi herevalaia totona Iehova oi noia neganai, ia ese emu ura do ia habadaia bona hahediba taudia halaoa gaukarana oi karaia diba.

8. Mareko 6:34 hegeregerena, dahaka gau ma ta dainai ita ura ma haida dekenai Baibel stadi karana ita herevalaia?

⁸ Gau iharuana be, iseda dekena taudia ita lalokau henia dainai, idia dekenai hereva momokani ita hadibaia. Hegeregere, Iesu bona ena hahediba taudia be dina ibounai idia haroro dainai idia hesiku bada. Bona idia ura gabu ta dekenai idia laga-ani, to hutuma be idia dekenai idia lao. Iesu ese ia hebogahisi henidia dainai, idia dekenai “gau momo” ia hadibaia matamaia. (Mareko 6:34 duahia.) Ena be ia hesiku bada, to idia ia hadibaia. Dahaka dainai? Badina Iesu ese unai taudia edia hemami ia laloa bada. Ia itaia idia be mai edia hekwakwanai momo bona idia be helaro lasi dainai, ia ura idia ia durua. Hari, ena be taunimanima edia toana be idia moale, to idia be mai edia hekwakwanai bona heduru idia abia be namo. Idia be ia boio mamoe bamona bona naria tauna be lasi. Paulo ia gwau unai bamona taudia be Dirava idia diba lasi bona idia be helaro lasi. (Efe. 2:12) Idia be “mase ia lao henia dalana” dekenai idia raka noho! (Mat. 7:13) Iseda teritori ai taunimanima ese Dirava idia dibaia be namo, unai dainai lalokau bona hebogahisi ese ita ia doria idia ita durua totona. Bona unai ita karaia dalana be idia dekenai Baibel stadi karana do ita herevalaia.

9. Filipo 2:13 hegeregerena, edena dala ai Iehova ese oi ia durua diba?

⁹ Reana oi gari ta dekenai Baibel stadi karana oi herevalaia, badina oi diba nega bada do oi atoa oi hegaegae bona stadi oi karaia totona. Bema unai bamona oi mamia, namona be Iehova dekenai emu hemami oi gurigurilaia. Oi noia emu ura do ia habadaia ta oi tahua oi stadi henia totona. (Filipi 2:13 duahia.) Aposetolo Ioane ia gwau bema Dirava ena ura hegeregerena ita guriguri unai do ia haerelaia. (1 Ioa. 5:14, 15) Unai dainai oi daradara lasi, Iehova ese emu ura do ia habadaia, hahediba taudia halaoa gaukarana oi karaia totona.

10-11. Dahaka ese ita ia koua haida ida Baibel ita stadilaia totona?

¹⁰ Ita diba hahediba gaukara be mai anina bada, to gau haida ese ita idia koua unai gaukara ita karaia totona. Mani unai koua gaudia haida bona hanaia daladia ita herevalaia.

¹¹ Eda noho dalana be auka. Hegeregere, pablisa haida be idia buruka o idia gorere. Oi be unai bamona, a? Bema oibe, mani COVID-19 gorerena dainai ita dibaia gauna ita laloa. Ita be fon eiava elektronik gaudia amo Baibel stadi ita karaia diba! Unai dainai, reana emu ruma amo Baibel stadi ta oi hamatamaia bona karaia diba. Danu haida idia ura Baibel idia stadilaia, to ita haroro negadiai idia bisi. To reana daba momokani o hanuaboi ai idia bisi lasi. Nega oi atoa diba unai bamona  negadiai idia ida Baibel oi stadilaia totona, a? Iesu ese Nikodemo be hanuaboi ai ia hadibaia, badina Nikodemo dekenai unai be nega namona.​—Ioa. 3:1, 2.

12. Dahaka ese ita ia durua diba hadibaia taudia namodia ai ita lao totona?

¹² Reana ita laloa ta ita stadi henia diba lasi. Reana ita laloa iseda diba ita habadaia o iseda hadibaia dalana ita hanamoa murinai, ta ita stadi henia diba. Bema unai bamona oi laloa, inai gaudia toi ese oi idia durua diba. Ginigunana be, Iehova ia diba oi be hegeregere ma haida oi hadibaia totona. (2 Kor. 3:5) Iharuana be, Iesu, ‘Dirava ese ia dekenai siahu ia henia, guba bona tanobada gaudia ibounai ia biagua’ tauna, ese oi ia hagania ma haida oi hadibaia totona. (Mat. 28:18) Bona ihatoina be, ma haida amo heduru oi abia diba. Iesu be ena Tamana ese ia hadibaia gaudia ia herevalaia, bona oi danu be unai bamona oi karaia diba. (Ioa. 8:28; 12:49) Danu, emu haroro grup naria tadikaka, painia namona ta, o pablisa goadana ta oi noia diba, oi do ia durua Baibel stadi ta oi hamatamaia bona karaia totona. Unai bamona pablisa ta ena stadi ai oi helai neganai, oi do ia durua hadibaia tauna namona ai oi lao totona.

13. Dahaka dainai stadi karaia dalana ita haidaua be namo?

¹³ Reana ia auka stadi dala matamatana bona tulu matamatadia ita gaukaralaia totona. Baibel stadi ita karaia dalana be hari ia idau. Baibel stadi ai do ita gaukaralaia tulu, Mauri Moalelaia Hanaihanai! be guna ita karaia Baibel stadi dalana amo ia idau. Paragraf haida sibona ita duahia bona stiuden ida ita herevahereva momo. Ita hadibaia neganai, vidio bona elektronik gaudia ita gaukaralaia momo, hegeregere JW Library®. Bema inai gaudia oi do manadalaia lasi, ta oi hereva henia oi ia durua totona. Vaia, ita manadalaia daladia sibona ita badinaia bona dala matamatadia ita badinaia be auka. To, Iehova bona ma haida edia heduru amo, unai dala matamata do oi manadalaia bona do oi moale taunimanima oi stadi henia totona. Painia tadikaka ta ia gwau, inai stadi dala matamatana be “pablisa bona stiuden ese idia moalelaia.”

14. Taunimanima idia ura lasi kamonai neganai dahaka ita laloatao be namo, bona 1 Korinto 3:6, 7 be edena bamona ita ia hagoadaia?

¹⁴ Reana iseda teritori ai Baibel stadi ita hamatamaia be auka. Reana taunimanima momo idia ura lasi ita harorolaia sivaraina idia kamonai. Dahaka ese ita ia durua ita haroro noho totona? Namona be ita laloatao inai nega dikana ai taunimanima edia noho dalana do ia idau haraga, bona reana guna idia kamonai lasi taudia be hari Dirava do idia tahua. (Mat. 5:3) Haida be guna iseda pablikeisen idia dadaraia, to gabeai Baibel stadi idia abia dae. Danu ita diba Iehova be gogoa gaukarana ena Biaguna. (Mat. 9:38) Ia ura uhe ita hadoa bona dairia noho, to Ia ese do ia hatubua. (1 Kor. 3:6, 7) Bona namona be ita laloatao, herevana hari ta ita stadi henia lasi eiava pablikeisen momo ita hariharilaia lasi, to ita gaukara goada dainai Iehova ese ita do ia hanamoa! *

15. Ta be Baibel ia stadilaia bona ia dibaia gaudia ia badinaia neganai, Iehova ena hemami be edena bamona?

¹⁵ Tau ta be hereva momokani ia abia dae bona ma haida dekenai ia harorolaia  neganai, Iehova ia moale. (Aon. 23:15, 16) Iehova ia itaia ena taunimanima be mai lalona ibounai ida idia haroro bona haida idia hadibaia neganai, ia moale bada! Hegeregere, ena be lagani 2020 ai tanobada ibounai dekenai COVID-19 gorerena ia vara, to Baibel stadi 7,705,765 ita karaia, bona idia amo 241,994 be Iehova dekenai edia mauri idia gwauhamatalaia bona bapatiso idia abia. Unai hahediba taudia matamatadia ese ma haida do idia stadi henia bona hahediba taudia ai do idia halaoa. (Luka 6:40) Ita diba momokani, ma haida be hahediba taudia ai ita halaoa neganai, Iehova ita hamoalea.

16. Ita hekwarahi dahaka ita karaia totona?

¹⁶ Hahediba taudia halaoa gaukarana be mai ena hekwarahi, to Iehova ena heduru amo ma haida ita durua diba iseda guba Tamana idia lalokau henia totona. Namona be ita hekwarahi Baibel stadi ta ita hamatamaia totona. Bema ita haroro henia taudia ita noia idia ura Baibel idia stadilaia, reana edia haere dekenai do ita hoa. Ita diba Iehova ese iseda hekwarahi do ia hanamoa.

17. Baibel stadi ta ita karaia neganai, iseda hemami be edena bamona?

¹⁷ Taunimanima dekenai hereva momokani ita harorolaia bona hadibaia be hahenamo badana! Inai gaukara dainai ita moale bada. Aposetolo Paulo ese Tesalonika taudia momo ia durua hahediba taudia ai idia lao totona. Bona iena hemami be inai bamona ia gwauraia: “Iseda Lohiabada Iesu ena noho negana ai, ia vairanai emai helaro, eiava emai moale, eiava ai heagilaia ahuna be dahaka? Unai be umui, ani? Momokani, umui be emai hairai bona moale.” (1 Tes. 2:19, 20: Kara 17:1-4) Hari, momo edia hemami be unai bamona danu. Taihu ta ladana Stéphanie bona ena adavana be taunimanima momo idia durua bapatiso idia abia totona. Ia gwau, “Taunimanima ita durua Iehova dekenai edia mauri idia gwauhamatalaia karana ese moale bada ia havaraia.”