1. Dahaka dainai Iehova ese ita be ma haida ida ia hahegeregerea lasi?

IEHOVA be ia havaraia gaudia ibounai ia lalokau henia. Unai ita diba, badina Ia ese tubutubu gaudia, animal, bona taunimanima edia toana idauidau ia karaia. Unai dainai, Iehova ese oi be ma haida ida ia hahegeregerea diba lasi. Ia ese oi ia diba namonamo. (1 Sam. 16:7) Danu Ia ese oi karaia namonamo gaudia, oi karaia diba lasi gaudia, bona emu mauri dalana ia diba. Bona oi ia doria lasi, oi karaia diba lasi gaudia oi karaia totona. Iehova ese ita ia laloa hegeregerena ita sibona ita laloa be namo. Unai amo do ita “laloa maoromaoro,” bona do ita laloa lasi ita be haida ita hereaia eiava ita be anina lasi.​—Roma 12:3.

2. Dahaka dainai ma haida ida sibona ita hahegeregerea lasi?

² Oibe, haroro gaukara ia karaia namonamo pablisa ta ena haheitalai namona ita tohotohoa karana amo namo do ita davaria. (Heb. 13:7) Reana unai pablisa amo diba do ita abia, iseda haroro gaukara ita hanamoa totona. (Fili. 3:17) To ta ena haheitalai namona tohotohoa karana be ta ida sibona ita hahegeregerea karana amo ia idau. Bema ma haida ida sibona ita hahegeregerea, idia dekenai do ita mama, do ita lalomanoka, eiava do ita mamia ita be anina lasi. Stadi atikol 28 ai ita herevalaia hegeregerena, bema ita laloa ita be iseda tadikaka taihu ita hereaia, unai ese iseda hetura karana Iehova ida ia hadikaia diba. Unai dainai Iehova be mai lalokau ida ita ia hagoadaia: “Namona be ta ta ese sibona ena kara do ia tahua namonamo, vadaeni ia sibona dekenai do ia moale, bona ma ta ida sibona do ia hahegeregerea lasi.”​—Gal. 6:4.

3. Iehova hesiai henia karana dekenai dahaka oi moalelaia?

³ Iehova ia ura ia oi hesiai henia totona oi karaia diba gaudia  oi moalelaia. Hegeregere, bema bapatiso oi abia vadaeni, oi moale diba badina emu tahua gauna oi hagugurua! Oi sibona ese unai disisen oi karaia, badina Dirava oi lalokau henia. Oi bapatiso negana amo oi karaia gaudia mani oi laloa. Hegeregere, sibona emu Baibel duahiduahi bona stadi karana oi goadalaia noho, a? Emu guriguri be mai kudouna ibounai ida oi gwauraia, a? (Sal. 141:2) Emu haroro dalana oi hanamoa noho bona haroro gaukara ena tulu idauidau oi gaukaralaia namonamo, a? Bona bema oi be mai emu famili, Iehova ese oi ia durua tau, hahine eiava tama o sina namona ai oi lao totona, a? Unai gaudia dekenai senisi oi karaia dainai oi moale diba.

4. Inai stadi ai dahaka do ita herevalaia?

⁴ Ma haida ita durua Iehova hesiai henia karana do idia moalelaia. Danu idia ita durua, ma haida ida sibona do idia hahegeregerea lasi. Inai stadi ai, tama sina ese natudia idia durua dalana, headava tau bona hahine idia heduru heheni dalana, bona elda taudia ese edia tadikaka taihu idia durua dalana do ita herevalaia. Dokonai, Baibel ena hakaua herevadia haida do ita itaia, unai ese ita do ia durua ita hagugurua diba tahua gaudia ita atoa totona.

5. Efeso 6:4 hegeregerena, tama sina ese dahaka kara idia dadaraia be namo?

⁵ Namo lasi tama sina ese edia natuna be ma ta ida idia hahegeregerea, eiava idia hamaoroa ia karaia diba lasi gauna ia karaia totona. Bema unai bamona idia karaia, edia natuna do ia moale lasi. (Efeso 6:4 duahia.) Taihu ta ladana, Sakiko * ia gwau: “Sikuli dekenai egu tisa idia ura egu klas turadia do lau hereaia. Danu, egu sinana ia ura sikuli dekenai maka namodia do lau abia, unai amo egu tisa bona egu Witnes lasi tamana ese Iehova ena taunimanima do idia lalonamo henia. Ia ura egu eksam ibounai do lau karaia namonamo, to unai be auka. Ena be sikuli lau haorea bona lagani momo idia hanaia vadaeni, to nega haida lau mamia reana Iehova ese ia totona lau karaia gaudia ia moalelaia lasi.”

6. Salamo 131:1, 2 amo tama sina be dahaka idia dibaia?

⁶ Salamo 131:1, 2 duahia. Tama sina be  unai siri amo mai anina bada gauna ta idia dibaia diba. King Davida ia gwau ia be ‘gau badadia ia tahua lasi’ eiava ‘ia abia diba lasi gaudia ia tahua lasi.’ Ia manau dainai, ia moale bona ia lalomaino. Tama sina ese Davida ena hereva amo dahaka idia dibaia? Idia manau neganai, idia be sibona idia laloa bada lasi bona danu edia natuna idia doria lasi ia karaia diba lasi gauna ia karaia totona. Tama sina ese edia natuna idia durua ia karaia diba gaudia bona ia karaia diba lasi gaudia ia lalopararalaia totona, unai amo ia hagugurua diba tahua gaudia do ia atoa. Taihu ta ladana Marina ia gwau: “Egu sinana ese egu kakana bona egu tadina rua eiava natudia ma haida ida lau ia hahegeregerea lasi. Lau ia hadibaia ta ta edia diba be idauidau bona Iehova ese ita ta ta ia laloa bada. Egu sinana ena heduru dainai, lau be ma haida ida sibona lau hahegeregerea lasi.”

7-8. Edena dala ai tau ese ena adavana ia matauraia diba?

⁷ Headava Keristani tauna ese ena hahine ia matauraia be namo. (1 Pet. 3:7) Hegeregere, tau ese ena hahine ia laloa bada karana amo ia hahedinaraia ena adavana ia matauraia. Ia ese hahine amo gau momo ia noia lasi. Bona hahine ma haida ida ia hahegeregerea lasi. Bema tau be unai bamona ia karaia, hahine ena hemami be edena bamona? Taihu ta ladana Rosa be ena Witnes lasi adavana ese nega momo hahine ma haida ida ia hahegeregerea. Ena tau ena hemataurai lasi herevadia dainai, Rosa ia laloa ia be anina lasi bona haida ese ia idia lalokau henia lasi. Ia gwau: “Namona be ta ese lau ia hadibaia loulou, Iehova be lau ia laloa bada.” To, Keristani tauna be unai bamona lasi, ia ese ena adavana ia laloa bada. Ia diba unai bamona ia karaia neganai, iena hetura karana ena hahine ida bona Iehova ida ia hanamoa. *

⁸ Tau namona ese ma haida dekenai ena hahine ena kara namodia ia herevalaia, ia hamaoroa ia lalokau henia bona ia laloa bada. (Aon. 31:28) Atikol 28 ai ita herevalaia taihu Katerina be ena adavana ese ia durua dainai, ia be anina lasi lalohadaina ia dadaraia. Ia maragi neganai, ena sinana ese nega momo ia be ena turadia bona kekeni ma haida ida ia hahegeregerea. Unai dainai, Katerina be ma haida ida sibona ia hahegeregerea matamaia, bona ena be gabeai Iehova ena Witnes ta ai ia lao, to unai ia karaia noho! To, ena adavana ese ia durua lalohadai maorona ia abia totona. Katerina ia gwau: “Egu adavana ese lau ia lalokau henia, lau karaia gau namodia dainai lau ia hanamoa, bona lau totona ia guriguri. Danu, lau dekenai Iehova ena kara namodia ia herevalaia bona lau ia durua egu lalohadai kererena lau hamaoromaoroa totona.”

9-10. Edena dala ai elda taudia ese taihu ta idia durua, ma haida ida sibona ia hahegeregerea lasi totona?

⁹ Edena dala ai elda taudia ese ma haida ida sibona idia hahegeregerea taudia idia durua diba? Taihu ta ladana Hanuni ena ekspiriens mani ita laloa, ia maragi neganai ma haida ese ia dekenai hanamoa herevadia idia gwauraia lasi. Ia gwau: “Lau hemarai bona lau mamia natudia ma haida ese lau idia hereaia. Lau maragi negana amo ma haida ida sibona lau hahegeregerea.” Ena be gabeai Hanuni be Iehova ena Witnes ta ai ia lao, to unai ia karaia noho. Unai  dainai, ia laloa kongrigeisen ai ia karaia gaudia be anina lasi. To, hari ia be mai moale ida ia painia noho. Dahaka ese ia durua ena lalohadai ia haidaua totona?

¹⁰ Hanuni ia gwau elda taudia ese ia idia durua. Ia idia hamaoroa kongrigeisen ai ia be mai anina bada bona ena haheitalai namona dainai idia hanamoa. Ia gwau: “Nega haida elda taudia ese lau idia noia kongrigeisen ai taihu haida lau hagoadaia totona. Unai gaukara idauidau idia henia dainai, lau mamia lau idia laloa bada. Lau laloatao taihu matamata haida lau hagoadaia neganai, elda taudia be lau idia tanikiu henia. Bena lau dekenai 1 Tesalonika 1:2, 3 idia duahia. Unai lau moalelaia bada! Unai elda taudia edia heduru dainai, hari lau mamia kongrigeisen ai lau be mai anina bada.”

11. Edena dala ai Isaia 57:15 ese ia herevalaia “lalometau taudia” ita durua diba?

¹¹ Isaia 57:15 duahia. Iehova ese “lalometau taudia” ia laloa bada. Elda taudia sibona lasi, to ita ibounai ese unai bamona tadikaka taihu ita hagoadaia be namo. Unai ita karaia dalana ta be, ita hahedinaraia idia ita laloa bada. Iehova ia ura idia dekenai ena lalokau ita hahedinaraia. (Efe. 5:1, 2) Danu iseda tadikaka taihu ita durua dalana ta be, ita manau bona iseda diba dainai ita heagi lasi. Bona ita ura lasi sibona ita laloa bada karana dainai, ma haida be ita dekenai idia mama. To, ita ura iseda hereva bona kara ese tadikaka taihu do ia hagoadaia.​—1 Pet. 4:10, 11.

12. Dahaka dainai taunimanima ese Iesu idia ura henia? (Rau 1 ena laulau itaia.)

¹² Iesu ese ena murinai idia raka taudia ia kara henia dalana ita laloa neganai, ma haida kara henia dalana do ita dibaia. Tanobada ai ia be ta ese ia hereaia lasi. To, ia be “manau bona lalomanada tauna.” (Mat. 11:28-30) Ena be ia be mai ena aonega bona gau ibounai ia diba, to ia heagi lasi. Taunimanima ia hadibaia neganai, ia ese auka lasi herevadia bona idia laloparara diba haheitalai ia gaukaralaia, unai ese kamonai taudia edia kudouna ia hamarerea bada. (Luka 10:21) Iesu be tomadiho gunalaia taudia bamona lasi. Ia be hanaihanai ma haida dekenai ia hahedinaraia Dirava be idia ia laloa bada. (Ioa. 6:37) Ia ese ladana maragi taudia ia matauraia bada.

13. Edena dala ai Iesu ese ena hahediba taudia dekenai hebogahisi bona lalokau ia hahedinaraia?

¹³ Iesu ese ena hahediba taudia ia kara henia dalana amo, ena hebogahisi bona lalokau ia hahedinaraia. Ia diba edia diba bona mauri dalana be idauidau. Unai dainai haroro gaukara ai do idia hagugurua gaudia be idauidau. To, idia ta ta ese mai kudouna ibounai ida idia karaia gaukarana ia moalelaia. Iesu ese ia gwauraia parabole amo iena lalohadai ia hahedinaraia. Unai parabole ai, biaguna ese hesiai taudia “ta ta edia diba hegeregerena” gaukara ia henidia. Idia gaukara goada hesiai taudia rua amo, ta ese ia abia gaudia be ma ta ena ia hereaia. To biaguna ese idia ruaosi dekenai hanamoa hereva tamona ia henia, ia gwau: “Oi be hesiai tauna namona, oi karaia gaukara be namo herea!”​—Mat. 25:14-23.

14. Edena dala ai Iesu ita tohotohoa diba?

¹⁴ Iesu be nega ibounai ita ia hebogahisi bona lalokau henia. Ia laloparara iseda diba bona mauri dalana be idauidau, bona mai kudouna ibounai ida ita karaia gaudia dainai ia moale. Iesu ita tohotohoa be namo. Namo lasi iseda tadikaka taihu ese idia karaia diba lasi gaudia dainai idia ita laloa maragi eiava hahemaraia. To, Iehova hesiai henia totona idia gaukara goada dainai, namona be nega ibounai idia ita hanamoa.

15-16. Taihu ta be ia hagugurua diba tahua gaudia ia atoa dainai, dahaka ia vara?

¹⁵ Iehova hesiai henia totona tahua gaudia ita atoa neganai, iseda mauri be mai ena badina. To namona be ita hagugurua diba tahua gaudia ita atoa, bona namo lasi ma haida edia tahua gaudia ita badinaia. Bema unai bamona ita karaia, do ita lalohisihisi bona lalomanoka diba. (Luka 14:28) Painia taihu ta ladana Midori ena haheitalai ita laloa.

¹⁶ Midori ia maragi neganai, ena Witnes lasi tamana ese ia be ena tadina rua bona klas turadia ida ia hahegeregerea. Midori ia gwau, “Lau mamia lau be anina lasi.” To, ia bada neganai lalohadai maorona ia abia. Ia gwau, “Dina ta ta ai Baibel lau duahia neganai, lalomaino lau abia bona lau mamia Iehova ese lau ia lalokau henia.” Danu, ia karaia diba tahua gaudia ia atoa, bona ia guriguri unai ia hagugurua totona. Unai ese Midori ia durua Iehova hesiai henia karana ia moalelaia totona.

17. Edena dala ai ‘iseda lalona do ita hamatamataia noho,’ bona dahaka namo do ia havaraia?

¹⁷ Ita abia lalohadai kereredia be do idia ore haraga lasi. Unai dainai Iehova ese ita ia hagoadaia, ia gwau: “Emui lalona do umui hamatamataia noho be namo.” (Efe. 4:23, 24) Unai ita karaia totona, namona be ita guriguri, Baibel ita stadilaia, bona ita laloa dobu. Unai gaudia oi karaia noho, bona Iehova oi noia oi dekenai goada ia henia totona. Iena lauma helaga ese oi do ia durua ma haida ida sibona oi hahegeregerea lasi totona. Danu, bema hekokoroku eiava mama lalohadaina oi abia, Iehova ese oi do ia durua unai do oi lalopararalaia bona emu kara oi haidaua haraga totona.

18. Edena dala ai 2 Sivarai 6:29, 30 ese oi ia hagoadaia?

 ¹⁸ 2 Sivarai 6:29, 30 duahia. Iehova be ita laloa gaudia ia diba. Danu ia diba ita hekwarahi noho inai tanobada ena kara dikadia bona iseda manoka gaudia ita dadaraia totona. Iehova ia itaia unai gaudia dadaraia totona ita gaukara goada neganai, iena lalokau ita dekenai ia habadaia.

19. Iehova ese ita ia laloa dalana be dahaka ida ia hahegeregerea?

¹⁹ Iehova ese ita ia laloa dalana be sinana bona natuna huanai ia noho lalokau ida ia hahegeregerea. (Isa. 49:15) Mani sinana ta ladana Rachel ena haheitalai ita laloa. Ia gwau: “Egu natuna kekeni Stephanie be ena vara negana korikori ai lau havaraia lasi. Nega ginigunana ia lau itaia neganai, ia be maragi momokani bona goada lasi. To hua ginigunana hospital ai ia noho neganai, doketa ese gwaumaoro ia henia dina ta ta ai Stephanie do lau rosia. Unai negadia ai, ai ruaosi huanai lalokau ia goada momokani. Hari ena mauri lagani be 6 bona ia ida lagani tamona idia vara natudia amo ia be maragi momokani. To, ia lau lalokau henia bada, badina ia mauri totona ia hekwarahi bada, bona ia dainai lau moale bada!” Ita moale badina ita diba Iehova totona ita gaukara goada neganai, iena lalokau ita dekenai ia habadaia!

20. Dahaka dainai Iehova ena hesiai taudia idia moale?

²⁰ Oi be Iehova ena hesiai tauna ta dainai, iena ruma bese lalonai oi be mai anina bada bona oi ia laloa bada. Namo lasi oi laloa Iehova ese ia kahirakahira oi ia veria lao badina oi be ma haida oi hereaia. Lasi, to Iehova ese oi be ia dekenai ia veria lao badina ia itaia oi manau, oi ura Ia oi dibaia, bona oi ia hamaoromaoroa diba. (Sal. 25:9) Namona be oi diba, Iehova oi hesiai henia totona oi gaukara goada neganai, ia moale. Iehova oi badinaia bona oi haheauka noho dainai, unai ese ia hahedinaraia oi be “kudou namo” tauna. (Luka 8:15) Unai dainai Iehova totona oi gaukara goada noho, bena oi “sibona dekenai do [oi] moale.”