1. Ita diba momokani dahaka do ia vara, bona dahaka dainai?

 TANOBADA ai hekwakwanai idauidau oi itaia neganai, oi laloa gau ibounai do idia namo, a? Famili lalonai lalokau karana ia ore noho. Taunimanima be sibona idia laloa bada bona dagedage karadia idia habadaia noho. Bona momo dekenai ia auka siahu taudia idia trast totona. To unai gaudia ese idia hamomokania gau ibounai do idia namo. Dahaka dainai? Badina Baibel ese “dina gabedia” totona ia perovetalaia gaudia be hari taunimanima edia kara amo ia hedinarai noho. (2 Tim. 3:1-5) Unai peroveta herevadia edia guguru karana ese ia hamomokania, Keriso Iesu be Dirava ena Basileia ena King ai ia lao vadaeni. Unai be Basileia ia perovetalaia herevana ta. Vanegai laganidia ai idia guguru peroveta herevadia ma haida ita laloa lou neganai, unai ese iseda abidadama do ia hagoadaia.

2. Inai atikol ai dahaka do ita herevalaia, bona dahaka dainai? (Rau 1 ena laulau herevalaia.)

² Inai atikol ai do ita itaia, (1) peroveta herevana ta ese ita ia durua Basileia ia lohia matamaia negana ita lalopararalaia totona, (2) peroveta herevadia amo do ita diba Iesu be Dirava ena Basileia ena King ai ia lao vadaeni, bona (3) peroveta herevadia ese Dirava ena Basileia ena inai taudia do idia ore dalana ia hahedinaraia. Inai stadi ai do ita itaia, peroveta herevadia ta ta be gau ta ia hahedinaraia, unai be hegeregere ta be jigsaw puzzle ena kahana ta ta ia hakapua neganai laulau  ena toana ia hedinarai bamona. Momokani peroveta herevadia ta ta idia guguru karana ese ia hahedinaraia, Iehova ese ia gwauraia nega ena dokona be kahirakahira.

3. Daniela 7:13, 14 ena peroveta herevana ese ita dekenai dahaka ia hadibaia?

³ Daniela 7:13, 14 ai ia noho peroveta herevana ese ita ia hadibaia Keriso Iesu be Dirava ena Basileia ena Lohia Tauna namona. Bese idauidau taudia be mai moale ida ia do idia “hesiai henia,” bona ta ese iena gabu do ia abia lasi. Daniela bukana ena peroveta herevana ma ta ia gwau, nega 7 ena dokona ai Iesu be Basileia do ia lohiaia matamaia. Iesu be King ai ia lao negana do ita diba, a?

4. Edena dala ai Daniela 4:10-17 ese ita ia durua Keriso be Basileia ena King ai ia lao laganina ita diba totona? (Futnout itaia danu.)

⁴ Daniela 4:10-17 duahia. “Lagani [o nega, ftn] 7” be lagani ibounai 2,520 ia laulaulaia. Unai nega be lagani 607 B.C.E. ai ia matamaia, unai neganai Babulonia taudia ese Ierusalema dekenai Iehova ena terona amo king dokona idia kokia. Bona lagani 1914 C.E. ai ia doko, unai neganai Iehova ese Iesu, “mai ena maoro tauna,” be Dirava ena Basileia ena King ai ia halaoa. *​—Esek. 21:25-27.

5. Edena dala ma ta ai “lagani 7” ena peroveta herevana ese ita ia durua?

⁵ Edena dala ai inai peroveta herevana ese ita ia durua? Bema “lagani 7” ena peroveta herevana ita lalopararalaia, do ita abia dae Iehova ena gwauhamata be nega maorodia ai ia hagugurua. Iehova be ena abia hidi negana ai Basileia ia haginia, unai hegeregerena iena peroveta hereva ma haida be ena abia hidi negana ai do idia guguru. Oibe, Iehova ena dina be “do ia leiti lasi!”​—Hab. 2:3.

6. (a) Dahaka ese ia hamomokania Keriso be guba ai ia lohia noho? (b) Edena dala ai unai ese Apokalupo 6:2-8 ena peroveta herevana ia hamomokania?

⁶ Iesu ena haroro gaukara ena dokona ai, ia ese tanobada ai do idia vara gaudia ia perovetalaia, unai ese ena murinai idia raka taudia do ia hadibaia ia be guba dekenai ia lohia matamaia vadaeni. Bona ia gwauraia gaudia haida be tuari, hitolo bada, bona tano mareremarere. Danu ia peroveta, “gabu momo ai” daihanai goreredia, eiava gorere dikadia do idia vara, haheitalai ta be COVID-19 pandemic. Unai gaudia be Baibel ese ia gwauraia Keriso ena noho negana ena “toana.” (Mat. 24:3, 7; Luka 21:7, 10, 11) Iesu ia mase bona guba dekenai ia giroa lou, bena lagani 60 murinai aposetolo Ioane dekenai ia gwauraia gaudia ese unai idia hamomokania. (Apokalupo 6:2-8 duahia.) Lagani 1914 ai, Iesu be King ai ia lao neganai, unai gaudia ibounai idia vara.

7. Iesu be King ai ia lao neganai, dahaka dainai tanobada ai dika be ia bada herea?

⁷ Iesu be King ai ia lao neganai, dahaka dainai tanobada ai dika be ia bada herea? Apokalupo 6:2 ese mai anina bada gauna ta ia herevalaia. Iesu be Dirava ena Basileia ena King ai ia lao neganai, ia karaia gauna ginigunana be ia tuari. Daidia ia tuari henia? Diabolo bona ena demoni ia tuari henidia. Apokalupo karoa 12 hegeregerena, Satani be ia kwalimu lasi, bona ia bona ena demoni be tanobada dekenai idia negea diho. Satani ia  badu dikadika, bona unai badu be taunimanima dekenai ia hahedinaraia matamaia, unai dainai ‘tanobada, madi o.’​—Apok. 12:7-12.

8. Edena dala ai peroveta herevadia idia guguru karana ese ita ia durua?

⁸ Edena dala ai unai peroveta herevadia ese ita ia durua? Tanobada ai idia vara gaudia bona taunimanima edia kara ia idau ita itaia neganai, ita diba Iesu be King ai ia lao vadaeni. Unai dainai ita itaia taunimanima be sibona idia laloa bada bona idia dagedage neganai, namo lasi ita badu, to namona be ita laloatao edia kara ese Baibel ena peroveta herevadia ia hagugurua. Oibe, Basileia ia gini vadaeni! (Sal. 37:1) Aramagedono ia kahirakahira noho lalonai, ita diba dika do ia bada ia lao. (Mar. 13:8; 2 Tim. 3:13) Ita moale badina iseda guba Tamana ese ita ia durua, idia vara gaudia edia badina ita lalopararalaia totona.

9. Daniela 2:28, 31-35 ese basileia badana ginigabena be edena bamona ia herevalaia, bona edena negai ia gini?

⁹ Daniela 2:28, 31-35 duahia. Hari unai peroveta herevana ia guguru karana ita itaia. Nebukanesa ena nihi ese “dina dokodia ai” do ia vara gauna ta ia hahedinaraia, bona unai be Keriso ena lohia negana ia matamaia murinai ia vara. Iesu do idia inai henia taudia haida be Baibel ese ia perovetalaia basileia badana ginigabena, bona ia be “auri bona raro aena palapala” ese ia laulaulaia. Unai basileia badana be ia lohia noho. Tanobada Tuarina Ginigunana ai, Britain bona United States idia gaukara hebou neganai, Anglo-America basileiana idia haginia. Nebukanesa ena nihi ese unai basileia badana totona gau rua ia perovetalaia danu, bona  unai ese basileia gunadia amo ena idau ia hahedinaraia.

10. (a) Daniela ese ia perovetalaia gaudia be edena dala ai Anglo-America basileia dekenai ia vara? (b) Dahaka dika gauna ita dadaraia be namo? (Maua ladana, “ Dika Gauna Oi Itaia, A?” itaia)

¹⁰ Ginigunana, Anglo-America be matahanai ese ia herevalaia basileia gunadia amo ia idau, badina ia be golo eiava siliva ese ia laulaulaia lasi, to ia be auri bona raro idia mikisi. Raro ese “taunimanima” ia laulaulaia. (Dan. 2:43) Bona hari unai ia hedinarai momokani, hegeregere eleksen, kempein idauidau, bona protest idia vara dainai, ia auka unai basileia badana ese ena gaukara ia hagugurua totona.

11. Dahaka dainai ita abia dae momokani, Anglo-America be Basileia Badana ginigabena?

¹¹ Iharuana be, kaivakuku ena aena, Anglo-America ia laulaulaia gauna unai, be Baibel ese ia perovetalaia basileia badana ginigabena. Ia murinai tanobada ena basileia ma ta do ia gini lasi. Aramagedono tuarina ai, Dirava ena Basileia ese unai basileia bona gavamani ibounai do ia hadikaia ore. *​—Apok. 16:13, 14, 16; 19:19, 20.

12. (a) Daniela ena peroveta herevana ese dahaka ia hamomokania? (b) Bona dahaka dainai unai ese ita ia hagoadaia?

¹² Edena dala ai unai peroveta herevana ese ita ia durua? Daniela ena peroveta herevana ai gau ma haida ia herevalaia, unai ese ia hamomokania ita be nega dokona ai ita noho. Lagani 2,500 gunanai, Daniela ia peroveta Babulonia ia lohia murinai, basileia badadia 4 do idia gini, bona idia ese Dirava ena taunimanima do idia biagua. Ma danu, Daniela ese ia hahedinaraia Anglo-America be basileia badana ginigabena. Unai ese ita ia hagoadaia bona ita abia dae momokani kahirakahira Dirava ena Basileia ese gavamani ibounai do ia haorea bona ia ese tanobada do ia lohiaia.​—Dan. 2:44.

13. Apokalupo 17:9-12 ese ia gwauraia “king namba 8” bona “king 10” be dahaka idia laulaulaia, bona edena dala ai unai peroveta herevana ia guguru?

¹³ Apokalupo 17:9-12 duahia. Tanobada Tuarina Ginigunana ai dika bada ia vara dainai, unai ese Baibel ena peroveta herevana ma ta dina gabedia totona ia hagugurua. Politikol oreadia idia ura tanobada dekenai maino idia havaraia. Unai dainai January 1920 ai, idia ese League of Nations oreana idia haginia, bona October 1945 ai United Nations oreana idia haginia. Unai orea idia gwauraia “king namba 8.” To ia be tanobada ena basileia badana ta lasi. Unai orea be politikol oreadia ese idia durua. Baibel ese unai politikol oreadia ia gwauraia “king 10.”

14-15. (a) Apokalupo 17:3-5 ese “Babulonia Badana” be edena bamona ia herevalaia? (b) Tomadiho koikoi ibounai idia durua taudia dekenai dahaka ia vara noho?

¹⁴ Apokalupo 17:3-5 duahia. Matahanai lalonai, Ioane ese ariara hahinena, “Babulonia Badana” ia itaia, unai be tomadiho koikoi ibounai ia laulaulaia. Unai matahanai ese dahaka ia hahedinaraia? Nega daudau lalonai, tomadiho koikoi oreadia be politikol oreadia ida idia gaukara hebou bona idia durudia. To, kahirakahira Iehova ese ena palani be politikol oreadia edia kudouna ai do ia atoa “iena ura idia hagugurua totona.” Unai amo dahaka do ia vara? Politikol oreadia, “king 10” unai, be tomadiho koikoi ibounai do idia tuari henia bona hadikaia ore.​—Apok. 17:1, 2, 16, 17.

¹⁵ Edena dala ai ita diba Babulonia Badana be kahirakahira do ia ore? Unai henanadai ita haerelaia totona, ita do ia durua gauna ta be idaunegai Babulonia ena siti ita laloatao, ia  be Euperate Sinavai ranudia ese ia gimaia. Apokalupo bukana ese Babulonia Badana idia durua taudia milioni be “ranu momo” ida ia hahegeregerea. (Apok. 17:15) To danu Apokalupo bukana ia gwau unai ranu momo be do idia “kaukau,” unai ese ia hahedinaraia tomadiho koikoi ibounai be idia durua taudia momo ese do idia rakatania. (Apok. 16:12) Hari, unai peroveta herevana ia guguru, badina taunimanima momo be tomadiho idia laloa bada lasi bona edia hekwakwanai hanamodia totona gabu ma haida dekenai heduru idia tahua.

16. United Nations oreana idia haginia negana bona Babulonia Badana do idia hadikaia ore negana ita lalopararalaia neganai edena dala ai ita do ia durua?

¹⁶ Edena dala ai unai peroveta herevadia ese ita ia durua? United Nations oreana idia haginia bona momo be tomadiho koikoi amo heduru idia tahua lasi, unai ese ia hamomokania ita be nega dokona ai ita noho. Ena be taunimanima momo be Babulonia Badana eiava tomadiho koikoi idia rakatania noho, to unai ese ia hahedinaraia lasi tomadiho koikoi be unai dala amo do ia ore. Matamanai ita herevalaia bamona, Iehova ese ena palani be  “king 10,” United Nations oreana idia durua politikol oreadia unai, edia kudouna ai do ia atoa, “iena ura idia hagugurua totona.” Unai bese idauidau ese karaharaga tomadiho koikoi ibounai do idia hadikaia ore, unai dainai tanobada taudia do idia hoa. * (Apok. 18:8-10) Tanobada hegegemadai tomadiho koikoi ibounai do ia ore bona unai ese hekwakwanai badadia do ia havaraia, to Dirava ena taunimanima be badina rua dainai do idia moale. (1) Nega daudau lalonai Dirava ia inai henia tomadiho koikoi ibounai be do ia ore momokani, bona (2) kahirakahira Dirava ese inai tanobada dikana amo ita do ia hamauria!​—Luka 21:28.

17-18. (a) Edena dala ai iseda abidadama ita hagoadaia noho? (b) Atikol 29 ai dahaka do ita herevalaia?

¹⁷ Daniela ia peroveta “diba momokanina” be do ia “bada herea.” Bona unai ia guguru noho! Iseda nega lalonai idia guguru peroveta herevadia be hari ita lalopararalaia. (Dan. 12:4, 9, 10) Unai peroveta herevadia be idia maoro bona momokani, unai ese ita ia hagoadaia Iehova bona ena Hereva ita laloa bada. (Isa. 46:10; 55:11) Unai dainai emu abidadama ia goada noho totona, namona be oi hekwarahi Baibel oi stadilaia bona laloa dobu bona ma haida oi durua edia hetura karana Iehova ida idia hagoadaia totona. Ia dekenai idia tabekau taudia do ia gimaia, bona “noho hanaihanai maino” do ia henidia.​—Isa. 26:3.

¹⁸ Atikol 29 ai, ita ese inai nega dokona ai Keristani kongrigeisen totona ia perovetalaia gaudia do ita herevalaia. Danu do ita dibaia gauna be, unai peroveta herevadia ese idia hamomokania ita be nega dokona ai ita noho. Bona do ita herevalaia gaudia haida ese ia hamomokania Iesu, iseda King, be ia idia badinaia taudia ia hakaua noho.