1. Baibel oi stadilaia matamaia neganai, dahaka gaudia oi dibaia?

 BAIBEL oi stadilaia matamaia neganai gau ibounai oi laloatao, a? Dirava be mai ena ladana oi dibaia neganai, reana oi hoa. Reana oi moale, badina oi dibaia Dirava be hel lahina ai taunimanima ia hahisia lasi. Bona oi moale bada, badina emu lalokau mase taudia do oi itaia lou bona tanobada paradaisona ai do umui noho hebou.

2. Hereva momokani oi dibaia neganai, dahaka gau ma haida oi karaia? (Efeso 5:1, 2)

² Dirava ena Hereva oi stadilaia noho lalonai, emu lalokau Iehova dekenai ia bada ia lao. Unai lalokau ese oi ia durua oi dibaia gaudia oi badinaia totona. Bona Baibel ena hakaua herevadia amo disisen maorodia oi karaia. Danu emu lalohadai bona kara oi hanamoa badina oi ura Dirava oi hamoalea. Oibe, natu maragina ese ena tama sina ia tohotohoa hegeregerena, oi danu be emu guba Tamana oi tohotohoa.​—Efeso 5:1, 2 duahia.

3. Sibona dekenai dahaka henanadai do ita henia?

³ Reana sibona do ita nanadaia: ‘Lau bapatiso negana amo ema bona hari, egu lalokau Iehova dekenai be ia goada momokani, a? Egu tadikaka taihu lalokau henia karana dekenai, Iehova ena lalohadai bona kara lau tohotohoa, a?’ Bema “oi ese guna oi abia lalokau oi rakatania,” oi lalomanoka lasi. Keristani ginigunadia dekenai unai ia vara danu. To, Iesu be idia ia dadaraia  lasi, bona ita danu do ia dadaraia lasi. (Apok. 2:4, 7) Ia diba guna hereva momokani ita dibaia negana ai ita mamia lalokauna do ita abia lou.

4. Inai atikol ai dahaka do ita herevalaia?

⁴ Inai atikol ai, Iehova bona ma haida lalokau henia karana ita hagoadaia dalana do ita herevalaia. Danu, iseda lalokau karana ita hagoadaia dainai do ita abia hahenamo haida do ita herevalaia.

5-6. (a) Paulo ena haroro gaukara lalonai dahaka hekwakwanai ia davaria? (b) Dahaka ese ia durua Iehova ia hesiai henia noho totona?

⁵ Ena be aposetolo Paulo be Iehova ena hesiai gaukara ia moalelaia, to hekwakwanai momo ia davaria danu. Ia be nega momo gabu daudau dekenai ia loaloa, bona unai be mai ena hekwarahi. Nega haida ‘sinavai ai kahirakahira ia mase,’ ‘henaohenao taudia amo dika ia davaria,’ bona ena inai taudia ese idia dadabaia. (2 Kor. 11:23-27) Danu Keristani tadikaka haida be idia totona ia karaia gaudia idia moalelaia lasi.​—2 Kor. 10:10; Fili. 4:15.

⁶ Dahaka ese Paulo ia durua Iehova ia hesiai henia noho totona? Paulo ese Baibel amo bona ia davaria hekwakwanai amo Iehova ena kara ia diba namonamo. Bona ia abia dae momokani Iehova Dirava ese ia lalokau henia. (Roma 8:38, 39; Efe. 2:4, 5) Unai dainai, ena lalokau Iehova dekenai ia goada. Paulo be ‘helaga taudia ia hesiai henia, bona unai bamona ia hesiai henidia noho,’ unai kara amo ena lalokau Iehova dekenai ia hahedinaraia—Heb. 6:10.

7. Iseda lalokau Iehova dekenai ita hagoadaia dalana ta be dahaka?

⁷ Iseda lalokau Dirava dekenai ita hagoadaia dalana ta be iena Hereva do ita stadilaia namonamo. Baibel oi duahia neganai, namona be siri ta ta ese Iehova ia herevalaia dalana oi laloa dobu. Sibona oi nanadaia: ‘Edena dala ai inai sivarai ese ia hahedinaraia Iehova be lau ia lalokau henia? Dahaka dainai Iehova lau lalokau henia?’

8. Edena dala ai guriguri karana ese ita ia durua iseda lalokau Dirava dekenai ita hagoadaia totona?

⁸ Iseda lalokau Iehova dekenai ita hagoadaia dalana ta be nega ibounai ia dekenai ita guriguri. (Sal. 25:4, 5) Iehova be iseda guriguri do ia haerelaia. (1 Ioa. 3:21, 22) Asia ai taihu ta ia gwau: “Matamanai Iehova lau dibaia dainai lau lalokau henia, to lau itaia egu guriguri ia haerelaia neganai, egu lalokau Iehova dekenai ia goada. Unai dainai lau ura ia hamoalea gaudia lau karaia.”

9. Edena dala ai Timoteo ese tadikaka taihu lalokau henia karana hagoadaia?

⁹ Paulo be Keristani tauna ai ia lao murinai, tau matamata ta ladana Timoteo ia hedavari henia. Timoteo be Iehova bona taunimanima ia lalokau henia. Paulo be Filipi Keristani taudia ia hamaoroa: “Lau dekenai ta ia noho lasi Timoteo hegeregerena, ia ese umui do ia durua momokani.” (Fili. 2:20) Paulo be Timoteo ena diba ia herevalaia lasi, to ia itaia Timoteo ese tadikaka taihu ia lalokau henidia bada. Unai dainai, Timoteo ese do ia vadivadi henia kongrigeisen taudia be mai moale ida ia idia naria.​—1 Kor. 4:17.

10. Edena dala ai Anna bona ena adavana ese tadikaka taihu dekenai lalokau idia hahedinaraia?

¹⁰ Dala ita tahua iseda tadikaka bona taihu ita durudia be namo. (Heb. 13:16) Mani atikol 29 ai ita herevalaia taihu Anna ena ekspiriens ita laloa. Lai gubana ta ese gabu ia hadikaia murinai, Anna bona ena adavana be Witnes famili ta edia ruma dekenai idia lao. Idia itaia edia ruma ena guhi ia moru bona edia dabua ibounai be idia miro. Anna ia gwau:  “Edia dabua ai abia lao, ai huria, ai aieni, ai lokua bona ai abidia giroa. Ai laloa ai karaia gauna be gau maragina sibona, to unai kara dainai ai be tura namodia ai ai lao ema bona hari.” Anna bona ena adavana be tadikaka taihu idia lalokau henia dainai, unai dala amo idia durudia.​—1 Ioa. 3:17, 18.

11. (a) Haida dekenai lalokau ita hahedinaraia neganai, edia hemami be edena bamona? (b) Aonega Herevadia 19:17 hegeregerena, lalokau ita hahedinaraia neganai Iehova be dahaka ia karaia?

¹¹ Haida dekenai hebogahisi bona lalokau ita hahedinaraia neganai, idia itaia ita be Iehova ena lalohadai bona kara ita tohotohoa noho. Idia ese iseda hebogahisi karana do idia laloa bada. Matamanai ita herevalaia Asia taihuna be ia matamata neganai ia idia durua taihu edia kara ia laloatao. Ia gwau: “Unai taihu ese haroro gaukara ai lau idia hakaua lao dainai, lau moale bada. Motuka amo lau idia abia, aniani totona lau idia boiria bena motuka amo egu ruma dekenai lau idia abia giroa. Lau laloparara, lau totona idia hekwarahi bada. Bona mai lalokau ida unai idia karaia.” Momokani, haida be idia totona ita karaia gaudia dainai ita do idia tanikiu henia lasi. Unai Asia taihuna be ia idia durua taihu totona inai bamona ia hereva: “Lau ura edia kara namodia edia davana do lau henia, to madi idia noho gabuna lau diba lasi. To, Iehova be ia diba bona lau guriguri Iehova ese edia kara namodia ena davana do ia henia.” Unai taihu ena hereva be maoro. Iehova be ma haida totona ita karaia gaudia ibounai ia itaia, herevana ia be kara maragina sibona. Ia abia dae unai be boubou gauna hereadaena bona unai abitorehai ena davana do ia henia.​—Aonega Herevadia 19:17 duahia.

12. Edena dala ai tadikaka be kongrigeisen lalonai lalokau idia hahedinaraia diba? (Laulau itaia danu.)

¹² Bema oi be tadikaka ta, edena dala ai ma  haida dekenai lalokau oi hahedinaraia bona gau ta oi karaia idia oi durua totona? Tadikaka ta ladana Jordan ese elda ta ia nanadaia dahaka gaudia ma haida ia karaia diba kongrigeisen taudia ia durua totona. Elda tauna ese Jordan ia karaia vadaeni gaudia dainai ia tanikiu henia, bena do ia karaia gaudia totona heduru herevana ia henia. Jordan ia hamaoroa bema namo Kingdom Hall dekenai ia ginidae haraga bona tadikaka taihu ia hedavari henia, hebou dekenai haere ia henia, hanaihanai ena grup ida ia haroro, bona dala ia tahua ma haida ia durua totona. Jordan be unai hereva ia badinaia neganai, kara namodia ia karaia sibona lasi, to ena lalokau tadikaka taihu dekenai ia hagoadaia danu. Jordan ia dibaia gauna be, tadikaka ta be hesiai tauna ai ia do lau lasi neganai ma haida ia durua be namo, bena hesiai tauna ta ai ia lao neganai, unai do ia karaia noho.​—1 Tim. 3:8-10, 13.

13. Edena dala ai lalokau ese tadikaka Christian ia durua elda gaukara ia karaia lou totona?

¹³ Guna oi be hesiai eiava elda gaukara oi karaia, a? Iehova be guna oi karaia gaukara bona oi hahedinaraia lalokauna ia laloaboio lasi. (1 Kor. 15:58) Hari oi hahedinaraia noho lalokauna ia itaia danu. Tadikaka Christian ena elda maduna idia kokia neganai, ia lalohisihisi bada. To, ia gwau: “Egu lalona lau hadaia, herevana lau be elda tauna eiava lasi, to lalokau dainai gau ibounai do lau karaia Iehova lau hesiai henia totona.” Gabeai, elda maduna ia abia lou. Christian ia gwau: “Lau gari sisina elda gaukarana lau karaia lou totona. To, lau laloa bema Iehova ena hebogahisi dainai ia ura unai gaukara lau karaia lou, vadaeni ia bona egu tadikaka taihu lau lalokau henia dainai do lau karaia.”

14. Taihu Elena amo dahaka oi dibaia?

¹⁴ Iehova ena hesiai taudia be edia neiba taudia dekenai lalokau idia hahedinaraia danu.  (Mat. 22:37-39) Hegeregere, Georgia tanona ai, taihu Elena ia gwau: “Matamanai, Iehova lau lalokau henia dainai lau ura haroro gaukara lau karaia. To egu lalokau egu guba Tamana dekenai ia goada ia lao neganai, egu lalokau taunimanima dekenai ia goada danu. Idia davaria hekwakwanai bona idia do ia durua topik lau laloa. Unai lau karaia neganai, lau ura bada idia lau durua.”​—Roma 10:13-15.

15-16. Laulau hegeregerena, ma haida dekenai lalokau hahedinaraia karana ese dahaka hahenamo ia mailaia?

¹⁵ Iseda tadikaka dekenai lalokau ita hahedinaraia neganai, idia sibona ia hagoadaia lasi. COVID-19 gorerena ia matamaia neganai, tadikaka Paolo bona ena adavana ese taihu burukadia momo dekenai telefon, tablet, bona kompiuta amo haroro gaukara karaia dalana idia hadibaia. Taihu ta be matamanai ia hekwarahi, to gabeai ena tablet gaukaralaia dalana ia manadalaia. Ena tablet amo ena varavara be Memorial hebouna totona ia boiridia. Idia ibounai 60 be videoconference amo Memorial hebou idia itaia! Unai taihu bona ena varavara ibounai be Paolo bona ena adavana edia heduru dainai hahenamo idia davaria. Gabeai, taihu be Paolo dekenai revareva ia siaia, ia gwau: “Ai buruka taudia oi hadibaia dainai, oi lau tanikiu henia bada. Iehova ese ai ia laloa bada karana bona emu hekwarahi do lau laloaboioa lasi.”

¹⁶ Unai ekspiriens amo Paolo be mai anina bada gauna ta ia dibaia: Lalokau ese aonega  bona diba ia hereaia. Ia gwau: “Guna sekit naria gaukarana lau karaia. To, hari lau diba ena be tadikaka bona taihu ese egu tok do idia laloaboio, to idia lau durua karana do idia laloatao noho.”

17. Lalokau ita hahedinaraia neganai daika ita durua danu?

¹⁷ Ma haida dekenai lalokau ita hahedinaraia neganai, ita laloa lasi dalanai namo ita davaria danu. New Zealand ai ia noho tadikaka Jonathan be unai ia hamomokania. Saturday adorahi ta ai, dina be ia siahu momokani to ia itaia painia ta be dala badinai ia haroro noho. Jonathan be ena lalona ia hadaia, Saturday haida unai painia ida do ia haroro. Unai nega ai ia laloparara lasi, to iena kara namo ese ia do ia hagoadaia danu. Jonathan ia gwau: “Lau be haroro gaukara lau moalelaia lasi. To painia ena hahediba dalana bona taunimanima ia durua karana lau itaia neganai, haroro gaukara totona egu ura ia habadaia. Unai tadikaka be egu turana namona ai ia lao bona lau ia durua haroro gaukara lau moalelaia bona Iehova kahirakahira lau lao totona.”

18. Iehova ia ura dahaka do ita karaia?

¹⁸ Iehova ia ura iseda lalokau karana Ia bona ma haida dekenai do ita hagoadaia. Ita dibaia hegeregerena, iena Hereva ita duahia, ita laloa dobu bona nega ibounai guriguri amo ia ita hereva henia neganai, iseda lalokau Iehova dekenai ita hagoadaia diba. Danu, dala idauidau ai iseda tadikaka bona taihu ita durua neganai, idia dekenai iseda lalokau karana ita hagoadaia unai. Iseda lalokau ita habadaia neganai, iseda hetura karana Iehova bona tadikaka taihu ida do ia goada, bona do ita moalelaia ela bona hanaihanai!