Egu tamana be Canada ena United Church ena tau badana, so wiki ta ta ai lau bona egu taihuna maragina be Sunday sikuli dekenai ia siaia, bena 11 oklok ai ia ida guriguri totona dubu dekenai ai vareai. Adorahi be emai sinana ida Kingdom Hall dekenai ai lao. Unai amo tomadiho rua edia idau ai itaia.

Egu sinana ese ia dibaia diba matamata be ena tura namodia dekenai ia herevalaia, bona idia danu be ena hereva momokani idia abia dae. Lagani 1958 ai, Bob bona Marion Hutcheson be New York City ai, dina 8 Divine Will International Assembly dekenai edia natudia memero toi ida lau idia hakaua lao. Unai lau laloatao neganai, lau laloparara idia hekwarahi lau idia abia lao totona, to unai hebouhebou ese lau ia durua bada.

Lau matamata neganai, animal naria gabuna dekenai ai noho bona unai lau moalelaia. Lau ura dikadika animal ena doketa gaukara lau karaia. Egu sinana be kongrigeisen ena elda ta dekenai unai ia herevalaia. Unai elda ese lau ia hamaoroa, ita be “dina gabedia” ai ita noho, bona lau ia nanadaia iunivesiti dekenai lagani momo lau sikuli karana ese egu hetura karana Iehova ida do ia hadikaia diba dalana lau laloa totona. (2 Tim. 3:1)  Unai dainai, abia hidi lau karaia iunivesiti dekenai do lau lao lasi.

To, haisikuli amo lau gradueit murinai do lau karaia gauna lau laloa noho. Ena be wikeni ibounai lau haroro, to haroro gaukara lau moalelaia lasi bona lau laloa lau be painia ta ai do lau lao lasi. Danu, egu tamana bona vavana maragina be lau idia hagoadaia, Toronto ai insurens kampani badana ta dekenai ful-taim gaukara do lau karaia. Unai kampani dekenai egu vavana be mai ena dagi badana, unai dainai unai gaukara lau abia dae.

Toronto ai, hanaihanai ovataim gaukara lau karaia bona murimuri taudia lau bamoa dainai, nega momo hebou bona haroro lau reaia. Guna, egu Witnes lasi tubuna tau ida lau noho, to ia mase murinai, noho gabu ma ta lau tahua.

Lagani 1958 ena hebouhebou dekenai lau idia hakaua lao tadikaka taihu, Bob bona Marion, be egu tama sina bamona. Lau idia boiria edia ruma dekenai lau noho bona lau idia durua egu hetura karana Iehova ida lau hagoadaia totona. Lagani 1960 ai, lau bona edia natuna mero John ai bapatiso hebou. John be painia gaukara ia hamatamaia, bona lau ia hagoadaia egu haroro gaukara lau habadaia totona. Kongrigeisen tadikaka idia itaia lau goada lau lao dainai, lau idia abia hidi Tiokratik Haroro Sikuli lau naria totona. a

Lagani 1966 ai, Randi Berge lau adavaia, ia be pablisa momo lasi gabuna ai ia painia. Emai sekit naria tauna be ai ia tura henia bona ai ia hagoadaia, Ontario ai, Orillia kongrigeisen do ai durua. Vadaeni, unai gabu dekenai ai lao.

Orillia dekenai ai ginidae neganai, Randi ida regula painia gaukara lau karaia. Ai ruoasi ai moale bada! Mai lalona ibounai ida painia gaukara lau karaia neganai, lau moale bada badina Baibel lau gaukaralaia namonamo bona taunimanima be hereva momokani idia abia dae. Ai moale badina Orillia ai, headava tau bona hahine ta ai durua edia mauri idia haidaua bona Iehova ena hesiai taudia ai idia lao.

Toronto ai vadivadi neganai, Arnold MacNamara lau hedavaria henia, ia be Betele gaukara ia gunalaia tadikaka ta. Ia henanadai bema ai ura spesol painia gaukara ai karaia. Karaharaga lau haere: “Oibe! To, Quebec lasi!” Lau ese Canada ai English gado idia mogea taudia ese Quebec ai French gado idia mogea taudia dekenai idia abia lalohadai kererena lau abia dae. Unai negai, Quebec ai taunimanima be gavamani dekenai idia protest bona idia ura Canada amo idia parara.   

Arnold ia haere, “Hari brens ese spesol painia taudia be Quebec sibona dekenai ia siaia, gabu ma ta lasi.” Karaharaga lau gwau do lau lao. Lau diba vadaeni Randi ia ura unuseniai do ia gaukara. Gabeai, lau laloparara unai be disisen maorona!

Wiki faiv lalonai French gado ena klas ia ore murinai, lau, Randi bona tadikaka ta mai ena adavana be Rimouski dekenai ai lao. Ia be Montreal ena notist kahana ai bona ena daudau be kilomita 540 (336 mi) bamona. Gado ai do dibaia noho badina hebou ai hadibaia hereva lau duahia neganai hereva haida lau gwauraia kerere. Hegeregere, lau ura gwau, do ia vara hebouhebou dekenai “Austrian vadivadi taudia” do idia mai, to lau gwau, “ostris ena vadivadi taudia” do idia mai.   

Rimouski ai, singul taihu foa bona tadikaka bona taihu Huberdeau bona edia natudia kekeni rua ese ai idia bamoa. Tadikaka bona Taihu Huberdeau be ruma badana ta idia rentaia, bona unuseniai idia noho painia taudia ibounai be renta davana idia henia. Unai ruma ena ladana ai atoa White House, badina ena vaira kahana bona du badadia be kurokuro. Nega momo taunimanima 12 eiava 14 ai noho. Lau bona Randi be spesol painia dainai, daba, adorahi, bona hanuaboi, keru negadiai danu, haroro totona ai lao, bona ai moale badina ta ia noho hegaegae ai ia bamoa totona.

Unai abidadama painia taudia ai diba namonamo bona idia be emai famili korikorina ai idia lao. Nega haida lahi ai karaia bona ai helai hagegea, eiava dina ta ai abia hidi ai nanadu hebou totona. Tadikaka ta be miusiki ia gadaralaia tauna, unai dainai nega momo Saturday hanuaboi ai ane ai abia bona ai mavaru.

Rimouski ai momo idia ura Baibel idia stadilaia! Lagani faiv lalonai, ai moale badina Baibel stiuden taudia haida idia goada, bapatiso idia abia bona kongrigeisen pablisa edia namba ia daekau lao 35.

Quebec ai, evanelia gaukara totona treinin namona ai abia. Iehova ese emai dabu gaudia ia henia bona emai haroro gaukara ia hanamoa. Danu, French gado idia mogea taudia edia gado bona mauri dalana ai ura henia. Unai ese ai ia durua mauri dala idauidau taudia ma haida ai ura henia totona.​—2 Kor. 6:13.

Daudau lasi murinai, brens ese ai idia noia Tracadie taoni dekenai do ai lao, unai be New Brunswick ena ist kahana. To, ai be hari sibona kontraka ai sainia daiutu ta ai rentaia totona, bona sikuli ena hedmasta ida kontraka lau sainia pat-taim hahediba gaukara lau karaia totona. Ma danu, emai Baibel stiuden taudia haida be hari sibona pablisa taudia ai idia lao, bona Kingdom Hall haginia gaukarana ai do haorea lasi.

Tracadie be Rimouski amo ia idau, unai dainai wikeni ibounai unai ai gurigurilaia bona ai lao unai gabu ai itaia. To, ai laloa, Iehova ia ura unuseni do ai lao dainai, ai lao be namo. Iehova ai tohoa bona ai itaia emai koua gaudia ta ta ia kokia.  (Mal. 3:10) Vaia, Randi ena hetura karana Iehova ida be ia goada, sibona ena ura ia dadaraia, bona hevaseha momo hahinena dainai, ia auka lasi gabu ma ta ai lao totona.

Emai kongrigeisen matamata ai, elda tauna tamona be Robert Ross. Ia bona ena hahine, Linda be painia gaukara idia karaia. Edia natuna mero ginigunana ia vara murinai, idia ura unuseni do idia noho. Ena be idia be mai edia natuna mero maragina, to edia heabidae bona haroro goadagoada karana ese ai ia hagoadaia bada.

Tracadie ai lagani rua ai painia murinai, hoa gauna ma ta ia vara—ai idia boiria sekit gaukara ai karaia totona. Lagani seven ai English gado ena sekit gaukara ai karaiamurinai, Quebec dekenai ai idia siaia lou French gado kahana ena sekit lau naria totona. Quebec ai, emai distrik naria tauna, Léonce Crépeault ese lau henia tok dainai lau ia hanamoa. To, gabeai ia henanadai loulou, “Edena dala ai emu tok ese ma haida ia durua diba?” b Unai ese lau ia hagodaia egu tok henia dalana lau hanamoa, bona taunimanima idia laloparara dalanai tok lau henia.

Lagani 1978 ai, Montreal dekenai “Victorious Faith” International Convention ai lau karaia asainmen ta do lau laloa boio lasi. Aniani nadua gaukarana lau naria. Ai laloa taunimanima 80,000 do idia mai, bona idia do ai ubua dalana be guna amo ia idau. Gau ibounai be matamata, hegeregere aniani hegaegaelaia kohudia, do ai nadua aniani ena lista, bona aniani ai hegaegaelaia dalana. Frisa badadia 20 bamona idia noho, to nega haida idia gaukara lasi. Hebouhebou be kahirakahira neganai, steidiam dekenai gaudia ai atoa hegaegae diba lasi, badina gadara badana ta idia karaia. Unai dainai, ai naria ela bona 12 oklok hanuaboi emai kohu ai atoa totona. Bena daba kahanai, aveni ai hasiahua daba ena aniani ai hegaegae totona! Ai hesiku bada, to ai gaukara hebou tadikaka idia gaukara goada, ta ta idia laloa bada bona hevaseha karana amo gau momo lau dibaia. Unai nega amo emai hetura karana ia goada noho ema bona hari. Ena be Quebec ai, lagani 1940 bona 1950 lalodiai dagedage badadia idia vara, to unai hebouhebou ai moalelaia bada!

Montreal ena hebouhebou badadia ai, gaukara idia naria tadikaka amo gau momo lau dibaia.  Lagani ta, David Splane, hari Hakaua Oreana ena tadikaka ta, ese hebouhebou naria gaukarana ia karaia. Gabeai hebouhebou ta ai, lau idia noia unai asainmen do lau karaia neganai, tadikaka David ese lau ia durua.

Lagani 36 lalonai sekit gaukara ai moalelaia murinai, 2011 ai lau idia boiria Kongrigeisen Elda Taudia Edia Sikuli ena hahediba gaukara do lau karaia. Lagani rua lalonai, lau bona Randi be bedi idauidau 75 dekenai ai mahuta, to unai be gau ta lasi, badina emai hesiai gaukara ai moalelaia. Wiki ta ta dokonai, elda taudia idia moale bada badina idia mamia Hakaua Oreana be edia hetura karana Iehova ida ia laloa bada.

Gabeai, Basileia Evanelia Sikuli ena hahediba tauna ai lau lao. Stiuden taudia be idia gari bona idia lalohekwarahi, badina dina ta lalonai hora seven do idia helai, hanuaboi ai hora toi homwek do idia karaia, bona wiki ta ai asainmen foa eiava faiv do idia karaia. Lau bona hahediba tadikaka ma ta ese idia ai hamaoroa, unai do idia hagugurua diba bema Iehova ena heduru totona idia noinoi. Lau laloatao gauna be: ena be idia laloa do idia hegeregere lasi,, to Iehova dekenai idia tabekau bona gau momo idia hagugurua dainai idia hoa.   

Egu sinana be ma haida ia laloa dainai, ena Baibel stadi taudia ia durua edia stadi idia goadalaia, bona egu tamana danu ia durua ena lalohadai ia haidaua totona. Ai hoa badina egu sinana ia mase bona dina toi murinai, emai tamana be Kingdom Hall dekenai ia mai pablik tok ia kamonai totona, bona lagani 26 lalonai hebou dekenai ia lao. Herevana egu Tamana be ia bapatiso lasi, to elda taudia idia gwau ia be wiki ibounai hanaihanai hebou dekenai ia ginidae haraga.

Lau bona egu taihudia dekenai emai sinana be haheitalai namona. Egu taihudia toi bona edia adavadia be mai abidadama ida Iehova idia hesiai henia noho. Egu taihudia rua be brens ofesi dekenai idia gaukara—ta be Portugal dekenai bona ma ta be Haiti dekenai.

Hari lau bona Randi be Ontario ai, spesol painia gaukara ai karaia noho. Guna, sekit gaukara lalonai, ai moale badina tadikaka taihu ai bamoa edia lou henia bona Baibel stadi ai karaia totona. To hari ai moale bada, badina ai itaia emai Baibel stadi taudia be idia goada idia lao noho. Bona emai kongrigeisen matamata ai tadikaka taihu ai tura henidia neganai, goada ai abia badina ai itaia Iehova ese nega namo bona nega dika ai idia ia durua noho.

Ma haida ese ai idia laloa bada karana ai laloatao neganai, goada ai abia. Unai dainai, ai ura ma haida ai “laloa bada” bona idia ai hagoadaia Iehova idia hesiai henia totona. (2 Kor. 7:6, 7) Hegeregere, famili ta lalonai, sina, natuna mero, bona natuna kekeni be ful-taim hesiai gaukara idia karaia. Edia tamana lau nanadaia bema painia gaukara ena lalohadai ia abia. Ia gwau painia taudia toi ia durua noho. Vadaeni, lau nanadaia: “Oi laloa Iehova ese idia do ia naria namonamo lasi, a?” Lau hagoadaia namona be idia moalelaia gaukarana ena mamina ia moalelaia danu. Hua siks murinai ia be painia gaukara ia hamatamaia.

Lau bona Randi ese “gabeai do idia mai uru” dekenai Iehova ena “gaukara namodia” do ai herevalaia noho, bona idia ese Iehova hesiai henia gaukarana do idia moalelaia ai moalelaia hegeregerena.​—Sal. 71:17, 18.