STADI ATIKOL 28
ANE 123 Tiokratik Dalana Badinaia
Hereva Momokani Bona Koikoi Edia Idau Oi Diba, A?
“Do umui gini goada bona emui gabana dekenai hereva momokani ena beleta do umui kwatua.”—EFE. 6:14.
STADI ENA BADINA
Iehova amo ita dibaia hereva momokani bona Satani bona iseda inai taudia amo idia mai koikoi herevadia edia idau ita diba be namo.
1. Hereva momokani be edena bamona oi laloa?
IEHOVA ena taunimanima be Baibel ai ia noho hereva momokani idia ura henia. Unai gaudia amo iseda abidadama ita hagoadaia. (Roma 10:17) Ita abia dae Iehova ese Keristani kongrigeisen ia haginia, ia be “hereva momokani ena du bona hereva momokani ia durua.” (1 Tim. 3:15) Bona mai moale ida ita idia “hakaua taudia” henunai ita noho. Idia ese Baibel amo hereva momokani idia gwauraia bona Dirava ena ura hegeregerena, hakaua herevadia idia henia.—Heb. 13:17.
2. Iamesi 5:19 hegeregerena, hereva momokani ita abia dae murinai, dahaka ia vara diba?
2 Ena be hereva momokani ita diba bona ita abia dae Dirava ena orea amo hakaua herevadia ita badinaia be namo, to hereva momokani ita rakatania diba. (Iamesi 5:19 duahia.) Satani ia ura Baibel eiava Dirava ena orea amo ita abia hakaua herevadia badinaia karana ita hadokoa.—Efe. 4:14.
3. Dahaka dainai hereva momokani ita badinaia be namo? (Efeso 6:13, 14)
3 Efeso 6:13, 14 duahia. Kahirakahira Diabolo ese koikoi hereva badadia do ia gaukaralaia, bese ibounai ia hakaua kerere totona, unai amo Iehova do idia inai henia. (Apok. 16:13, 14) Danu ita diba Satani do ia gaukara goada, Iehova ena taunimanima ia hakaua kerere totona. (Apok. 12:9) Unai dainai, gau badana be sibona ita hadibaia, hereva momokani bona sivarai koikoi edia idau ita diba totona, unai amo hereva momokani do ita badinaia. (Roma 6:17; 1 Pet. 1:22) Bona hisihisi badana amo ita roho mauri totona, unai be mai anina bada!
4. Inai atikol ai dahaka do ita herevalaia?
4 Inai atikol ai, kara rua do ita herevalaia, unai ese ita do ia durua Baibel ena hereva momokani ita lalopararalaia bona Dirava ena orea amo hakaua herevadia ita abia dae totona. Bena gau toi do ita herevalaia, unai ese ita do ia durua hereva momokani ita dogoatao auka totona.
HEREVA MOMOKANI DIBAIA TOTONA DO ITA HAHEDINARAIA KARADIA
5. Edena dala ai Iehova gari henia karana ese ita ia durua, hereva momokani ita lalopararalaia totona?
5 Iehova gari henia karana. Iehova ita gari henia ena anina be, ia ita lalokau henia bada dainai, ia moalelaia lasi gaudia ita dadaraia. Ita ura bada maoro bona kerere, bona hereva momokani bona koikoi edia idau ita diba, unai amo Iehova ena lalonamo do ita abia diba. (Aon. 2:3-6; Heb. 5:14) Namo lasi taunimanima ita gari henia dainai, Iehova lalokau henia karana ia maragi. Bona taunimanima ia hamoalea gaudia ese nega momo Iehova ia hamoalea lasi.
6. Edena dala ai, iduhu gunalaia taudia 10 ese taunimanima idia gari henia dainai, hereva momokani idia haidaua?
6 Bema taunimanima ita gari henia dainai Dirava gari henia karana ia maragi, hereva momokani ita rakatania diba. Mani iduhu gunalaia taudia 12 edia haheitalai ita laloa. Idia be Iehova ese Israela taudia totona ia gwauhamatalaia tanona dekenai idia lao spai. To spai taudia 10 be Kanana taudia idia gari henia dainai, Iehova dekenai edia lalokau ia goada lasi. Idia be Israela taudia idia hamaoroa: “Ai be unai taudia ai tuari henia diba lasi, badina edia goada ese emai goada ia hereaia.” (Num. 13:27-31) Taunimanima edia lalohadai dekenai, Kanana taudia edia goada be Israela taudia edia goada ia hereaia. Bona haida idia gwau Israela taudia be hegeregere lasi edia inai taudia idia tuari henia totona, unai ese ia hahedinaraia idia be Iehova idia laloa lasi. Unai spai taudia 10 be Iehova ese idia totona do ia karaia gauna idia laloa be namo. Danu, Iehova ese guna idia totona ia karaia gaudia idia laloa dobu be namo. Unai amo do idia laloparara Iehova ena siahu be Kanana taudia edia goada ia hereaia. Iosua bona Kaleba be unai spai taudia bamona lasi. Idia ese taunimanima idia hamaoroa: “Bema Iehova be ita dekenai ia moale, ia ese unai tano dekenai ita do ia hakaua vareai bona ita dekenai unai tano do ia henia.”—Num. 14:6-9.
7. Edena dala ai Iehova gari henia karana ita hagoadaia diba? (Laulau itaia danu.)
7 Iehova gari henia karana ita hagoadaia totona, namona be ita karaia abia hidi dekenai ia ita hamoalea. (Sal. 16:8) Baibel sivaraidia oi duahia neganai, sibona oi nandaia, ‘Bema lau dekenai unai ia vara, dahaka abia hidi do lau karaia?’ Hegeregere, sibona oi piksaia Israela ena gunalaia taudia 10 be hagaria herevadia idia gwauraia neganai, oi kamonai noho. Edia hereva do oi abia dae bona taunimanima do oi gari henia, eiava Iehova do oi lalokau henia bona ia do oi hamoalea, a? Israela taudia ibounai be idia abia dae lasi, Iosua bona Kaleba be hereva momokani idia gwauraia. Unai dainai, Gwauhamata Tanona dekenai idia vareai lasi.—Num. 14:10, 22, 23.
Daika ena hereva do oi abia dae? (Paragraf 7 itaia)
8. Ita gaukara goada edena kara ita hahedinaraia totona, bona dahaka dainai?
8 Manau karana. Iehova ese manau taudia dekenai hereva momokani ia hahedinaraia. (Mat. 11:25) Hereva momokani ita dibaia totona, mai manau ida heduru ita abia dae. (Kara 8:30, 31) To, namona be ita naria namonamo, unai amo do ita hekokoroku lasi. Bema ta ia hekokoroku, do ia laloa Baibel ena sisiba bona orea amo ita abia hakaua herevadia amo, iena lalohadai danu be maoro.
9. Edena dala ai manau karana do ita hahedinaraia noho?
9 Manau karana ita hahedinaraia noho totona, namona be ita laloatao Iehova be ita taunimanima ia hereaia. (Sal. 8:3, 4) Danu, Iehova ita guriguri henia, ita manau bona diba ita abia totona. Iehova ese ita do ia durua, iena lalohadai ita laloa bada totona, unai be Baibel bona ena orea amo ita dibaia. Emu Baibel duahiduahi lalonai, Iehova ese manau karana ia ura henia, to heagi, ladana abia isi, bona hekokoroku karadia ia inai henia dalana oi laloa. Bema orea lalonai maduna badana ta oi abia dainai, momo be oi idia matauraia, namona be oi gaukara goada manau karana oi hahedinaraia totona.
HEREVA MOMOKANI ITA DOGOATAO AUKA DALANA
10. Iehova ese daidia ia gaukaralaia iena taunimanima dekenai hakaua herevadia idia henia totona?
10 Iehova ena orea amo ia mai hakaua dalana oi abidadama henia. Idaunegai Israela ai, Iehova ese Mose ia gaukaralaia bena Iosua amo Iehova ena taunimanima dekenai, hakaua herevadia ia henia. (Ios. 1:16, 17) Israela taudia idia abia dae, Iehova Dirava be unai tatau ia gaukaralaia neganai, hahenamo idia davaria. Lagani handred momo murinai, Keristani kongrigeisen ginigunana idia haginia neganai, aposetolo taudia 12 ese hakaua herevadia idia henia. (Kara 8:14, 15) Gabeai, unai orea lalonai Ierusalema ena tau badadia idia noho danu. Unai abidadama tatau edia hakaua herevadia idia badinaia dainai, “kongrigeisen taudia edia abidadama ia goada ia lao bona dina ta ta ai edia namba ia bada daekau.” (Kara 16:4, 5) Hari iseda negai, Iehova ena orea amo hakaua herevadia ita badinaia neganai, ita do ia hanamoa danu. To Iehova ena hemami be edena bamona, bema ia abia hidi taudia ita matauraia lasi? Unai henanadai ita haerelaia totona, Israela taudia be Gwauhamata Tanona dekenai idia lao lalonai, ia vara gauna mani ita herevalaia.
11. Mose idia gwau-edeede henia taudia dekenai dahaka ia vara? (Laulau itaia danu.)
11 Israela taudia be Gwauhamata Tanona dekenai idia lao noho lalonai, ladana bada taudia be Mose idia gwau-edeede henia, badina Iehova ese ia dekenai maduna ia henia. Idia gwau: “Idia hebou taudia ibounai be helaga [Mose sibona lasi], bona Iehova be idia huanai ia noho.” (Num. 16:1-3) Momokani, Dirava vairanai “idia hebou taudia ibounai” be helaga, to Iehova ese Mose ia abia hidi ena taunimanima ibounai ia gunalaia totona. (Num. 16:28) Unai gwau-edeede taudia be Mose idia gwauraia dika karana amo, Iehova idia gwauraia dika. Idia be Iehova ena ura idia laloa bada lasi, to idia ura siahu bona ladana bada idia abia. Dirava ese gwau-edeede taudia edia gunalaia taudia bona edia lalohadai idia abia dae taudia tausen momo ia hamasea. (Num. 16:30-35, 41, 49) Hari danu, ita abia dae Iehova ena orea ena hakaua dalana idia matauraia lasi taudia ia lalonamo henia lasi.
Bema oi be unuseniai, daika do oi durua? (Paragraf 11 itaia)
12. Dahaka dainai Iehova ena orea dekenai iseda abidadama ita hagoadaia noho?
12 Iehova ena orea dekenai iseda abidadama ita hagoadaia noho. Bema Baibel ena hereva momokani ta, eiava Iehova ita hesiai henia dalana totona, senisi haida idia vara neganai, ita idia gunalaia taudia be karaharaga unai dala matamata idia badinaia. (Aon. 4:18) Unai bamona idia karaia, badina idia ura Iehova idia hamoalea. Danu, idia gaukara goada Dirava ena Hereva hegeregerena, abia hidi idia karaia, unai be hereva momokani bona Iehova ena taunimanima ibounai ese idia badinaia be namo.
13. “Hereva momokani ena lalohadai badana” ena anina be dahaka, bona dahaka ita karaia be namo?
13 “Hereva momokani ena lalohadai badana be oi dogoatao noho.” (2 Tim. 1:13) “Hereva momokani ena lalohadai badana,” ena anina be Baibel ai idia noho Keristani hahediba hereva badadia. (Ioa. 17:17) Unai hahediba herevadia be ita abia dae gaudia ibounai edia badina. Iehova ena orea ese ita ia hadibaia, hereva momokani ita dogoatao auka totona. Unai bamona ita karaia neganai, hahenamo do ita davaria.
14. Edena dala ai, Keristani taudia haida be “hereva momokani ena lalohadai badana” idia dogoatao auka lasi?
14 Dahaka do ia vara, bema “hereva momokani ena lalohadai badana” ita dogoatao auka lasi? Mani inai haheitalai ita laloa. Aposetolo taudia edia negai, Keristani taudia haida be koikoi dalanai idia gwau, Iehova ena dina be ia ginidae vadaeni. Reana unai be revareva ta, bona taunimanima idia laloa, aposetolo Paulo ese ia torea. Tesalonika ai, Keristani taudia haida be hamomokania gaudia idia tahua lasi dainai, unai hereva idia abia dae, bona ma haida dekenai idia gwauraia loaloa. Bema Paulo be idia ida ia noho, bona ia hadibaia gaudia idia laloatao, unai koikoi herevana do idia abia dae lasi. (2 Tes. 2:1-5) Paulo be ena tadikaka ia sisiba henia, namona be idia kamonai herevadia haida idia abia lasi. Paulo ese Tesalonika taudia ia durua totona, ena revareva iharuana ena dokonai, ia gwau: “Lau Paulo ese egu imana amo inai hanamoa herevana lau torea, egu revareva iboudiai be unai bamona lau torea, unai amo do umui diba unai revareva be lau ese lau torea.”—2 Tes. 3:17.
15. Edena dala ai, koikoi herevadia amo sibona ita gimaia diba? Haheitalai gwauraia. (Laulau itaia danu.)
15 Paulo ese Tesalonika taudia ia tore henia herevana amo dahaka ita dibaia? Bema ita kamonai sivaraina ta be Baibel amo ita dibaia herevana ida ia hegeregere lasi, eiava sivarai idauna ta ita kamonai neganai, namona be mai aonega ida ita kara. Guna idia gwauraia Soviet Union ai, iseda inai taudia ese tadikaka haida dekenai revareva ta idia henia bona idia gwau unai be iseda hedikwota amo ia mai. Unai revareva ese tadikaka haida ia hagoadaia, orea ma ta idia haginia bona idia parara totona. Bona revareva be momo ese do idia abia dae dalanai idia torea. To unai ese abidadama tadikakadia ia koia lasi. Idia laloparara unai revareva lalonai idia torea sivarai be idia dibaia gaudia amo ia idau. Hari, hereva momokani idia inai henia taudia be teknoloji idia gaukaralaia dalana amo, idia ura ita daradara bona ita parara. To, namona be iseda “laloa namonamo karana [ita] negea haraga lasi,” bona sibona ita gimaia totona ita kamonai eiava duahia gaudia be ita dibaia hereva momokani ida ita hahegeregerea.—2 Tes. 2:2; 1 Ioa. 4:1.
Namo lasi lalona veria dalanai idia koikoi taudia ese ita idia koia (Paragraf 15 itaia) a
16. Roma 16:17, 18 hegeregerena, dahaka do ita karaia bema haida be hereva momokani idia rakatania?
16 Iehova idia badinaia taudia ida lalotamona ai ita noho. Dirava ia ura iseda tadikaka taihu ida lalotamona ai ia ita tomadiho henia. Bema hereva momokani ita dogoatao auka, lalotamona ai do ita noho. Hereva momokani idia rakatania taudia be, idia ura kongrigeisen lalonai haida idia hapararaia, unai dainai Dirava ese ita ia hadibaia ‘idia amo ita siri’ totona. Bema unai ita karaia lasi, hereva momokani do ita rakatania.—Roma 16:17, 18 duahia.
17. Hereva momokani ita lalopararalaia bona dogoatao auka dainai, dahaka namo ita davaria?
17 Hereva momokani ita lalopararalaia bona ita dogoatao auka neganai, Iehova kahirakahira do ita noho bona iseda abidadama do ia goada. (Efe. 4:15, 16) Danu, Satani ena hahediba hereva koikoidia bona koikoi karadia ese ita do ia koia lasi, bona hisihisi badana lalonai Iehova ese ita do ia naria. Hereva momokani umui dogoatao auka, “bona maino Diravana be umui ida do ia noho.”—Fili. 4:8, 9.
ANE 122 Marere Lasi, Gini Goada!
a LAULAU: Lagani haida gunanai ia vara gauna idia haheitalaia, guna idia gwauraia Soviet Union ai, tadikaka haida ese revareva ta idia abia, bona unai revareva ena toana be hegeregere iseda hedikwota amo ia mai, to koikoi dalanai iseda inai taudia ese idia siaia. Hari danu, iseda inai taudia be intanet amo Iehova ena Witnes taudia totona koikoi herevadia momo idia halasia.
