1-2. Sadoka be daika? (1 Sivarai 12:22, 26-28)

 MANI ia vara gauna ita piksaia. Tatau 340,000 mai kahana idia haboua bona idia ura Davida be Israela ena king ai idia halaoa. Dina toi lalonai, tatau be Heberona ena ororo kahana ai idia noho, bona idia kiri, idia herevahereva, bona mai moale ida Iehova idia hanamoa. (1 Siv. 12:39) Idia huanai tau matamata ta, Sadoka ia noho, reana momo be ia idia diba lasi. To, Iehova ia ura ita diba, Sadoka be unuseni ia noho danu. (1 Sivarai 12:22, 26-28 duahia.) Sadoka be daika?

² Sadoka be hahelaga tauna ta, bona Hahelaga Tauna Badana Abiatara ida ia gaukara. Iehova ese Sadoka dekenai aonega ia henia bona Iehova ena ura ia lalopararalaia diba. (2 Sam. 15:27) Taunimanima be sisiba namona idia abia totona, Sadoka dekenai idia lao. Danu, ia be gari lasi tauna. Bona inai atikol ai iena gari lasi karana do ita herevalaia.

3. (a) Dahaka dainai Iehova idia tomadiho henia taudia idia gari lasi be namo? (b) Inai atikol ai dahaka do ita herevalaia?

³ Inai nega dokona ai, Satani ia gaukara goada noho Iehova dekenai iseda abidadama ia hadikaia totona. (1 Pet. 5:8) Unai dainai mai gari lasi ida ita haheauka noho ela bona Iehova ese Satani bona ena nega oromana dikana do ia haorea. (Sal. 31:24) Sadoka ena gari lasi karana ita tohotohoa daladia toi mani ita herevalaia.

DIRAVA ENA BASILEIA OI DURUA

4. Dahaka dainai Iehova ena taunimanima be Dirava ena Basileia idia durua totona, idia gari lasi be namo? (Laulau itaia danu.)

⁴ Ita be Dirava ena taunimanima dainai, mai kudouna ibounai ida Dirava ena Basileia ita durua, to nega haida unai ita karaia totona, ita gari lasi be namo. (Mat. 6:33) Hegeregere, inai tanobada dikana lalonai Iehova ena taravatu ita badinaia bona Basileia ena sivarai namona ita harorolaia totona, ita gari lasi  be namo. (1 Tes. 2:2) Bona politikol edia hepapahuahu karadia dainai taunimanima idia parara, unai dainai idia amo ita gini siri totona, gari lasi karana ita hahedinaraia be namo. (Ioa. 18:36) Iehova ena taunimanima be politikol karadia eiava tuari lalonai idia vareai lasi dainai, moni ena hekwakwanai idia davaria, idia hahisidia, eiava dibura ruma ai idia atodia.

5. Dahaka dainai Sadoka ese Davida ia durua totona ia gari lasi be namo?

⁵ Sadoka be Heberona dekenai ia lao, Davida be king ai do ia lao karana ia moalelaia totona, to danu tuari totona ia hegaegae. (1 Siv. 12:38) Ia be mai ura ida Davida ia badinaia bona tuari lalonai Israela taudia idia gimaia. Sadoka be tuari totona ena diba be bada lasi, to ia be gari lasi tauna.

6. Edena dala ai Davida be Sadoka dekenai gari lasi kahana ia hahedinaraia? (Salamo 138:3)

⁶ Hahelaga tauna Sadoka be edeseniai gari lasi karana ia dibaia? Ia be idia goada bona gari lasi tatau huanai ia noho. Unai dainai edia haheitalai namona amo diba ia abia. Hegeregere, Davida be mai gari lasi ida “tuari dekenai Israela taudia ia gunalaia,” unai ese idia ia hagoadaia mai kudouna ibounai ida ia idia durua totona. (1 Siv. 11:1, 2) Davida be ena inai taudia ia tuari henia totona, hanaihanai Iehova dekenai ia tabekau. (Sal. 28:7; Salamo 138:3 duahia.) Danu, Sadoka be idia gari lasi taudia, hegeregere Iehoiada bona ena natuna Benaia, ia be tuari tauna goadana, bona Davida idia durua iduhu gunalaia tatau 22 amo diba ia abia. (1 Siv. 11:22-25; 12:26-28) Unai tatau be edia lalona idia hadaia, Davida be edia king ai do idia halaoa bona idia gimaia totona.

7. (a) Hari, daidia edia ekspiriens amo gari lasi karana do ita dibaia? (b) Vidio ese ia hahedinaraia bamona, Tadikaka Nsilu ena ekspiriens amo dahaka oi dibaia?

⁷ Iehova ena lohia dalana idia durua taudia  edia haheitalai ita laloa neganai, unai ese ita ia hagoadaia, ita gari lasi totona. Iseda King, Keriso Iesu, be tanobada ai ia noho neganai, mai gari lasi ida Satani ena politikol karadia ia dadaraia. (Mat. 4:8-11; Ioa. 6:14, 15) Bona hanaihanai goada ia abia totona, Iehova dekenai ia tabekau. Hari inai negai danu, tadikaka matamata momo be haheitalai namona idia hahedinaraia, idia be tuari lalonai idia vareai lasi bona politikol karadia idia dadaraia. Umui ai hagoadaia, jw.org ai edia ekspiriens umui duahia totona. a

EMU TADIKAKA OI DURUA

8. Elda taudia be edia tadikaka taihu idia durua totona, edena bamona negadiai, gari lasi karana idia hahedinaraia diba?

⁸ Iehova ena taunimanima be mai ura ida ta ta idia durua. (2 Kor. 8:4) To nega haida unai idia karaia totona, gari lasi karana idia hahedinaraia be namo. Hegeregere, tuari ia vara neganai, elda taudia idia diba, edia tadikaka taihu idia hagoadaia, bona edia dabu gaudia totona heduru idia henia be namo. Elda taudia be tadikaka taihu idia lalokau henia dainai, unai bamona idia karaia ena be edia mauri idia haboioa diba. (Ioa. 15:12, 13) Unai amo Sadoka ena gari lasi karana idia tohotohoa.

9. 2 Samuela 15:27-29 hegeregerena, Davida be Sadoka ia hamaoroa dahaka do ia karaia? (Laulau itaia danu.)

⁹ Davida kahirakahira dika ia davaria. Iena natuna Abesaloma ia ura do ia hamasea bona king dagina ia abia. (Ioa. 15:12, 13) Davida ese Ierusalema ia rakatania haraga be namo! Iena hesiai taudia ia hamaoroa: “Umui toreisi bona ita heau, badina ita ta be Abesaloma amo ia heau mauri diba lasi!” (2 Sam. 15:14) Iena hesiai taudia ibounai idia lao noho lalonai, Davida ia laloparara ta ia noho be namo, unai amo ia dekenai Abesaloma ena palani do ia gwauraia. Unai dainai Sadoka bona hahelaga taudia ma haida be siti dekenai ia siaia giroa bona  spai taudia bamona idia noho. (2 Samuela 15:27-29 duahia.) Bona namona be idia naria namonamo. Abesaloma dekenai do idia spai karana dainai dika idia davaria diba. Abesaloma be dagedage tauna bona sibona ena namo ia laloa dainai ena tamana ia badinaia lasi, bema ia davaria Sadoka bona hahelaga taudia ma haida be Davida gimaia totona idia spai noho, mani idia dekenai do ia karaia gauna oi laloa!

10. Edena dala ai Sadoka bona ia ida idia noho taudia ese Davida idia gimaia?

¹⁰ Davida be Sadoka bona ena turana namona ma ta Husai ida palani ta idia karaia. (2 Sam. 15:32-37) Husai be koikoi dalanai Abesaloma do ia durua bona Davida tuari henia totona palani do idia karaia. Unai amo Davida dekenai nega ia noho, tuari totona do ia hegaegae. Gabeai, Husai ese unai palani be Sadoka bona Abiatara dekenai ia herevalaia. (2 Sam. 17:8-16) Bena unai tatau rua be Davida dekenai sivarai idia siaia lao. (2 Sam. 17:17) Iehova ena heduru amo, Sadoka bona hahelaga taudia be Davida gimaia totona mai anina bada gaukarana idia karaia.—2 Sam. 17:21, 22.

11. Iseda tadikaka taihu ita durua neganai, edena dala ai Sadoka ena gari lasi karana ita tohotohoa diba?

¹¹ Bema nega dikadia lalonai, ita idia noia iseda tadikaka taihu ita durua totona, edena dala ai Sadoka ena gari lasi karana ita tohotohoa diba? (1) Hakaua dalana badinaia. Hekwakwanai negadiai, lalotamona ai ita noho be mai anina bada. Iseda brens ofesi amo idia mai hakaua herevadia ita badinaia. (Heb. 13:17) Elda taudia ese nega momo disasta totona idia abia hadibaia herevana idia riviulaia be namo, hegeregere disasta ia do vara lasi neganai, ita hegaegae dalana bona ia vara neganai, dahaka do ita karaia. (1 Kor. 14:33, 40) (2) Oi gari lasi bona oi gima noho. (Aon. 22:3) Gau ta oi do karaia lasi neganai, oi laloa guna be namo. Bona sibona oi naria namonamo. (3) Iehova dekenai oi tabekau.  Laloatao Iehova be oi bona emu tadikaka taihu edia namo ia laloa bada. Oi ia durua diba emu tadikaka taihu oi gimaia totona.

12-13. Viktor bona Vitalii edia ekspiriens amo dahaka oi dibaia? (Laulau itaia danu.)

¹² Mani inai tadikaka rua Viktor bona Vitalii ita laloa, Ukraine ai idia be tadikaka bona taihu totona aniani bona ranu idia abia lao. Viktor ia gwau: “Gabu ibounai dekenai aniani ai tahua. Nega momo emai badinai ipidi regedia ai kamonai. Tadikaka ta ese ena daiutu ai ia haboua aniani be tadikaka taihu totona ia henia. Unai amo dina momo lalonai idia dekenai aniani ia noho. Emai motuka dekenai unai aniani ai udaia lalonai, ai noho gabuna ena daudau 20 mita bamona amo bomu ta ia diho to ia pou lasi. Unai dina ibounai lalonai, Iehova lau noia lau dekenai goada do ia henia, tadikaka taihu lau durua noho totona.”

¹³ Vitalii ia gwau: “Gari lasi karana ai hahedinaraia be namo. Nega ginigunana lau lao gabuna ena daudau be hora 12 bamona. Unai dina ibounai lalonai Iehova dekenai lau guriguri.” Vitalii be ia gari lasi, to danu sibona ia naria namonamo. Ma ia gwau: “Iehova lau noia loulou aonega bona manau karana lau hahedinaraia totona. Bona gavamani ese gwaumaoro idia henia motuka daladia sibona dekenai lau heau. Tadikaka taihu idia gaukara hebou karana ese egu abidadama ia hagoadaia. Idia ese motuka ena dala idia hagoevaia, aniani, dabua, bona gau ma haida idia udaia. Danu lau bona Viktor emai laolao totona, aniani bona noho gabudia idia hegaegaelaia.”

IEHOVA OI BADINAIA NOHO

14. Bema ita lalokau henia tauna ta be Iehova ia rakatania, iseda hemami be edena bamona?

¹⁴ Iseda ruma bese tauna ta eiava turana ta be Iehova ia rakatania neganai, ita lalohisihisi bada. (Sal. 78:40; Aon. 24:10) Unai tauna oi lalokau henia dainai, do ia auka ia vara gauna oi abia dae totona. Bema unai bamona hekwakwanai badana ta oi davaria, Sadoka ena badinaia karana ese oi do ia hagoadaia.

15. Dahaka dainai Sadoka ese Iehova ia badinaia totona ia gari lasi be namo? (1 King Taudia 1:5-8)

¹⁵ Sadoka be Iehova ia badinaia noho, ena be ena turana namona Abiatara ese Iehova ia rakatania. Davida ena lohia negana ena dokona ai unai ia vara. Davida ia buruka bona kahirakahira ia mase neganai, iena natuna Adonaisa ia ura king ai sibona ia halaoa, ena be Iehova ia ura Solomona be king ai do ia lao. (1 Siv. 22:9, 10) Abiatara ese Adonaisa ia durua. (1 King Taudia 1:5-8 duahia.) Unai ia karaia neganai, ia be Davida sibona lasi, to Iehova dekenai badinaia karana ia hahedinaraia lasi! Mani oi laloa Sadoka be ia hebogahisi bona ia lalohisihisi. Lagani 40 mai kahana lalonai ia bona Abiatara be hahelaga gaukara idia karaia. (2 Sam. 8:17) Idia ese “Dirava momokani ena Maua” idia naria. (2 Sam. 15:29) Bona Davida ia lohia matamaia neganai, ia idia durua bona Iehova ena hesiai gaukara lalonai gaukara momo idia karaia.—2 Sam. 19:11-14.

16. Dahaka ese Sadoka ia durua, badinaia karana ia hahedinaraia totona?

¹⁶ Sadoka be Iehova ia badinaia, ena be Abiatara ese abia hidi kererena ia karaia. Davida be ia daradara lasi badina ia diba, Sadoka be badinaia karana do ia hahedinaraia. Adonaisa ena palani ia hedinarai neganai, Davida ese Sadoka, Natana bona Benaia ia abia hidi Solomona be king ai idia halaoa totona. (1 Ki. 1:32-34) Sadoka be Iehova ena hesiai taudia, hegeregere Natana, bona King Davida idia durua taudia ma haida ia bamoa dainai, ia idia hagoadaia. (1 Ki. 1:38, 39) Solomona be king  ai ia lao neganai, ia ese “hahelaga tauna Sadoka ia abia hidi, Abiatara ena gabu ia abia totona.”—1 Ki. 2:35.

17. Bema oi lalokau henia tauna ta be Iehova ia rakatania, edena dala ai Sadoka do oi tohotohoa?

¹⁷ Edena dala ai Sadoka do oi tohotohoa? Bema oi lalokau henia tauna ta be Iehova ia rakatania, namona be oi hahedinaraia Iehova do oi badinaia. (Ios. 24:15) Iehova ese oi dekenai goada do ia henia kara maorona oi karaia totona. Guriguri amo Iehova dekenai oi tabekau bona ia idia badinaia tura namodia oi bamoa. Iehova ese emu badinaia karana ia laloa bada bona oi do ia hanamoa.—2 Sam. 22:26.

18. Marco bona Sidsa edia ekspiriens amo dahaka oi dibaia?

¹⁸ Mani Marco bona ena adavana, Sidsa edia haheitalai ita laloa, edia natuna kekeni rua be Iehova idia rakatania. Marco ia gwau: “Emu natudia idia vara negana amo idia oi lalokau henia bada. Bona gau ibounai do oi karaia dika amo idia oi gimaia totona. Unai dainai Iehova idia rakatania neganai, do oi lalohisihisi bada. To Iehova be ai ia durua, ai haheauka totona. Hegeregere, lau lalomanoka neganai, egu adavana be lau ia hagoadaia bona ia lalomanoka neganai, ia lau hagoadaia.” Sidsa ia gwau: “Bema Iehova ese ai dekenai goada ia henia lasi, do ai haheauka lasi. Lau hebogahisi bada bona lau mamia egu kerere dainai, egu natuna kekeni rua be Iehova idia rakatania, unai dainai Iehova dekenai egu hemami lau gwauraia. Daudau lasi murinai, lagani momo lau itaia lasi taihu ta be lau dekenai ia mai, egu pagana dekenai ena imana ia atoa, lau ia itaia bona ia gwau: ‘Sidsa, laloatao, unai be emu kerere lasi!’ Iehova ese lau ia durua dainai, mai moale ida ia lau hesiai henia noho.”

19. Emu lalona oi hadaia dahaka do oi karaia?

¹⁹ Iehova ia ura ia idia tomadiho henia taudia ibounai be Sadoka bamona idia gari lasi. (2 Tim. 1:7) To, ia ura lasi iseda goada dekenai ita tabekau. Ia ura ia dekenai ita tabekau. Unai dainai hekwakwanai ta oi davaria neganai, namona be Iehova dekenai oi tabekau. Oi abia dae Sadoka hegeregerena, oi do ia hagoadaia!—1 Pet. 5:10.