Ita Moale Iehova be Uro Karaia Tauna Badana
“Lohiabada e, . . . oi be raro gaukaralaia tauna bamona. Oi ese ai oi karaia vadaeni.”—ISA. 64:8.
ANE: 89 [11], 26
1. Dahaka dainai Iehova be Uro Karaia Tauna Badana?
NOVEMBER 2010 ai, London, England dekenai, tau ta ese lagani 1800 gunanai idia karaia China edia uro ta be dola milioni 70 bamona amo ia hoia. Unai ese ia hahedinaraia, uro karaia tauna ese dava bada lasi gauna ta, hegeregere raro, be uro namo hereana bona dava bada gauna ai ia halaoa diba. To, ura karaia tauna ta be Iehova ida ita hahegeregerea diba lasi. Dina namba 6 dokonai, Dirava ese “tano ena kahu [raro] dekena amo” tau goevadaena ia karaia bona ia dekenai diba ia henia, unai amo ena Havaraia Tauna ena kara ia tohotoho diba. (Gen. 2:7) Tau goevadaena Adamu, tano amo ia karaia tauna be idia gwauraia “Dirava ena natuna.”—Luka 3:38.
2, 3. Edena dala ai idia helalo-kerehai Israela taudia ita tohotohoa diba?
2 To, Adamu ese ena Havaraia Tauna ia gwau-edeede henia murinai, ia idia gwauraia lasi Dirava ena natuna. To, idia hanaia laganidia lalonai, Adamu ena bese taudia haida, “witnes orea badana” unai, be abia hidi idia karaia Dirava ena lohia siahuna idia abia isi totona. (Heb. 12:1) Idia be mai manau ida edia Havaraia Tauna idia badinaia, unai amo idia hahedinaraia idia ura, ia be edia Tamana bona Uro Karaia Tauna, to Satani lasi. (Ioa. 8:44) Edia Dirava badinaia karana dainai, Isaia ena hereva ita laloa, idia helalo-kerehai Israela taudia ia herevalaia, ia gwau: “Lohiabada e, oi be aiemai Tamana. Ai be raro bamona, bona oi be raro gaukaralaia tauna bamona. Oi ese ai oi karaia vadaeni.”—Isa. 64:8.
3 Hari inai negai, lauma ai bona momokani ai Iehova idia tomadiho henia taudia danu be mai manau ida Dirava idia badinaia. Idia dekenai Iehova be edia Tamana bona Uro Karaia Tauna be hahenamo badana. Dirava ena imana ai oi be raro manokana bamona, unai amo ia ese oi be uro namo hereana ai ia halaoa diba, a? Emu tadikaka taihu oi itadia neganai, oi dekenai idia be Dirava ese ia hamaoromaoroa noho uro bamona, a? Ita durua totona, Iehova be Uro Karaia Tauna dainai ia karaia gaudia toi mani ita itaia: (1) Ia ura hamaoromaoroa taudia ia abia hidi dalana, (2) idia ia hamaoromaoroa ena badina, bona (3) unai ia karaia dalana.
IEHOVA ESE IA URA HAMAOROMAOROA TAUDIA IA ABIA HIDI
4. Edena dala ai Iehova ese ia dekenai ia veria mai taudia ia abia hidi? Haheitalai gwauraia.
4 Iehova ese taunimanima ia itadia neganai, ia be edia toana ia laloa lasi. To edia kudouna eiava lalona ia itaia. (1 Samuela 16:7b duahia.) Dirava ese Keristani kongrigeisen ia hamatamaia neganai, unai ia hahedinaraia. Ia ese ia bona ena Natuna dekenai taunimanima momo ia veria mai, taunimanima ese unai bamona taudia idia laloa bada lasi. (Ioa. 6:44) Idia ta be Farisea tauna ladana Saulo—ia ese ‘Dirava ena ladana ia hadikaia, iena taunimanima ia dagedage henia, bona hemataurai karana ia hahedinaraia lasi.’ (1 Tim. 1:13) To, kudouna ia itaia Diravana ese Saulo be raro aukana ta bamona ia laloa lasi. (Aon. 17:3) To ia dekenai Saulo be hegeregere raro manokana bona uro namo hereana ai ia halaoa diba—oibe, ia “abia hidi vadaeni hodu ta bamona, bese idauidau, king taudia bona Israela besena dekenai” do ia haroro. (Kara 9:15) Danu, “anina bada gaukaradia totona” Dirava ese ia abia hidi taudia haida be guna inuinu kekero taudia, matabodaga bona henaohenao taudia. (Roma 9:21; 1 Kor. 6:9-11) Idia ese Dirava ena Hereva idia lalopararalaia bona badinaia neganai, idia hahedinaraia idia ura Iehova ese idia ia hamaoromaoroa.
5, 6. Ita abia dae Iehova be Uro Karaia Tauna dainai, edena dala ai (a) iseda teritori ai idia noho taudia ita laloa? (b) iseda tadikaka taihu dekenai lalohadai maorona do ita abia?
5 Edena dala ai unai ese ita ia durua diba? Iehova ese kudouna ia itaia bona ia abia hidi taudia be ia sibona dekenai ia veria mai diba dainai, iseda teritori bona kongrigeisen ai idia noho taudia do ita hahemaoro henia lasi. Micheal ena haheitalai mani ita laloa. Ia gwau: “Iehova ena Witnes taudia be egu ruma dekenai idia mai neganai, idia lau dadaraia sibona. Egu kara be ia namo lasi! To gabu ma ta ai, ruma bese ta lau hedavari henidia bona edia kara namodia dainai, idia lau ura henia. Gabeai lau laloparara idia be Iehova ena Witnes taudia neganai, lau hoa bada! Edia kara dainai, lau ese ma haida hahemaoro henia kava karana ena badina lau tahua matamaia. Lau davaria lau ese taunimanima amo lau kamonai herevadia dainai unai lau karaia, to unai be badina maorona lasi.” Unai Witnes ruma bese edia kara ena badina ia lalopararalaia totona, Micheal ese Baibel ia stadilaia matamaia. Gabeai hereva momokani ia abia dae bona ful-taim hesiai gaukara ia hamatamaia.
6 Bema ita abia dae Iehova be iseda Uro Karaia Tauna, iseda tadikaka taihu dekenai lalohadai maorona do ita abia. Dirava ese emu tadikaka taihu ia lalodia hegeregerena, idia oi laloa, a? Hegeregere idia be Dirava ese ia hamaoromaoroa noho urona ta bamona, a? Iehova ese taunimanima ia itaia neganai edia kara dika ia laloa momo lasi. (Sal. 130:3) Iena kara ita tohotohoa totona, iena hesiai taudia edia kara namodia ita laloa bada be namo. Momokani, Uro Karaia Tauna ida ita gaukara diba, bona iseda tadikaka taihu ita durudia lo taudia ai idia lao totona. (1 Tes. 5:14, 15) Elda taudia be “harihari gaudia” dainai, unai kahana dekenai haheitalaia namona idia hahedinaraia be namo.—Efe. 4:8, 11-13.
DAHAKA DAINAI IEHOVA ESE ITA IA HAMAOROMAOROA?
7. Dahaka dainai Iehova ese ia henia sisiba oi lalodia bada?
7 Reana oi kamonai ta be inai bamona ia gwau: ‘Egu tama sina ese idia henia sisiba lau lalodia bada lasi ela bona lau be mai egu natudia.’ Iseda mauri lalonai gau momo ita dibaia neganai, ita abia sisiba do ita lalodia bada bona Iehova hegeregerena, do ita abia dae lalokau dainai unai sisiba idia henia. (Heberu 12:5, 6, 11 duahia.) Oibe, Iehova ese ena natudia ia lalokau henia dainai, mai manau ida idia ia hamaoromaoroa. Ia ura ita aonega, moale bona ia ita lalokau henia. (Aon. 23:15) Ia ura lasi hisihisi ita mamia, bona Adamu amo ita abia hanai kara dika dainai, “ita vara negana amo ita be Dirava ena badu ita abia be maoro,” to Iehova be ia ura lasi ita mase.—Efe. 2:2, 3.
8, 9. Hari Iehova ese edena dala ai ita ia hadibaia noho, bona vaira nega ai be edena bamona?
8 “Ita vara negana amo ita be Dirava ena badu ita abia be maoro,” unai dainai guna Dirava ia moalelaia lasi karadia ita hahedinaraia, reana dagedage karadia, animal edia bamona, ita karaia! To, ita moale, badina Iehova ese ita ia hamaoromaoroa dainai, iseda kara ita haidaua, bona ita be mamoe bamona ita kara. (Isa. 11:6-8; Kol. 3:9, 10) Unai dainai, Iehova ese ita ia hamaoromaoroa karana be hegeregere ita be paradaiso ai ita noho bamona. Ena be ita be tanobada dikana ai ita noho, to ita noho namonamo. Danu, lalokau lasi ruma besena lalonai ita tubu daekau taudia be hari lalokau korikorina ita mamia. (Ioa. 13:35) Bona ma haida dekenai lalokau hahedinaraia dalana ita dibaia. Danu gau badana be Iehova ita dibaia bona hari iena lalokau ita mamia.—Iam. 4:8.
9 Tanobada matamata ai, unai hahenamo ibounai do ita abia momokani. Oibe, Dirava ena Basileia ena lohia henunai tanobada paradaisona do ia vara. Unai nega ai, Iehova ese tanobada taudia do ia hamaoromaoroa noho, idia do ia hadibaia namonamo dainai, dika ta do ia noho lasi. (Isa. 11:9) Danu, Dirava ena heduru amo ese iseda lalohadai bona tauanina do ia goevadae, unai amo ena hahediba herevadia do ita lalopararalaia bona ena ura do ita karaia namonamo. Unai dainai namona be hari iseda lalona ita hadaia Iehova ita badinaia noho totona, unai amo ita hahedinaraia ita ura ia ese ita ia hamaoromaoroa, badina ita ia lalokau henia.—Aon. 3:11, 12.
IEHOVA ESE ITA IA HAMAOROMAOROA DALANA
10. Edena dala ai Iesu ese Uro Karaia Tauna Badana ena haheauka karana ia tohotohoa?
10 Uro karaia tauna bamona, Iehova be ia vairanai ia noho “raro” ia diba namonamo, bona unai hegeregerena ia hamaoromaoroa. (Salamo 103:10-14 duahia.) Oibe, ia ese ita ta ta ia hamaoromaoroa, ia ese iseda manoka gaudia, iseda goada ena hetoana, bona iseda abidadama ena bada ia itaia. Ia ese goevadae lasi hesiai taudia ia kara henia dalana be ena Natuna ese ia hahedinaraia. Iesu ena aposetolo taudia be dagi totona idia hepapahuahu neganai, ia ese ia kara henia dalana mani ita laloa. Bema oi be unuseni oi noho bona aposetolo taudia idia hepapahuahu oi itaia, do oi laloa idia be manau, a? To, Iesu be idia ia lalodika henia lasi. Ia diba bema ia haheauka bona mai hebogahisi ida sisiba ia henia, iena aposetolo taudia ia hamaoromaoroa diba bona idia ese ena haheitalai idia tohotohoa diba. (Mar. 9:33-37; 10:37, 41-45; Luka 22:24-27) Iesu ia toreisi lou bona aposetolo taudia be lauma helaga idia abia murinai, idia be dagi idia laloa bada lasi, to idia dekenai ia henia gaukarana idia laloa bada.—Kara 5:42.
11. Edena dala ai Davida be uro manokana bamona ia kara, bona edena dala ai ia ita tohotohoa diba?
11 Hari inai negai, Iehova be ena Hereva, lauma helaga, bona Keristani kongrigeisen amo iena hesiai taudia ia hamaoromaoroa. Dirava ena Hereva ese ita ia hamaoromaoroa diba, bema ita duahia, laloa dobu, bona Iehova ita noia ita do ia durua ita badinaia totona. Davida ia gwau: “Lau be geda dekenai lau hekure neganai, oi dekenai lau laloa noho. Hanuaboi lalonai lau ese oi sibona dekenai lau laloa.” (Sal. 63:6) Ma danu ia gwau: “Lohiabada lau hanamoa noho, badina ia ese lau ia hakaua noho dainai, hanuaboi lalonai laloa maoro ese, egu dala lau dekenai ia hadibaia.” (Sal. 16:7) Oibe, Davida ese Dirava ena sisiba, ena be ia be sisiba auka, to ena kudouna ai ia atoa, unai amo ena lalohadai bona hemami ia hamaoromaoroa diba. (2 Sam. 12:1-13) Davida be ia manau bona Dirava ia badinaia. Ita ese iena kara ita tohotohoa diba! Oi danu be Dirava ena Hereva oi laloa dobu, bona emu kudouna ai oi atoa, a? Unai oi karaia badabada diba, a?—Sal. 1:2, 3.
12, 13. Edena dala ai Iehova ese lauma helaga bona Keristani kongrigeisen amo ita ia hamaoromaoroa?
12 Lauma helaga ese dala idauidau ai ita ia hamaoromaoroa diba. Hegeregere, ita ia durua diba Keristani kara namodia, lauma huahua unai, do ita hahedinaraia. (Gal. 5:22, 23) Unai huahua ta be lalokau. Ita be Dirava ita lalokau henia bona ita ura ia ita kamonai henia bona ia ese ita ia hamaoromaoroa, badina ita diba iena taravatu be metau lasi. Danu lauma helaga ese ita ia durua diba tanobada bona ena lalohadai dikadia ita dadaraia totona. (Efe. 2:2) Aposetolo Paulo be ia matamata neganai, Iuda tomadiho gunalaia taudia edia hekokoroku karadia ia tohotohoa, to gabeai ia gwau: “Lau dekenai siahu ia henia tauna amo goada lau abia gau ibounai lau karaia totona.” (Fili. 4:13) Unai dainai, Paulo bamona, namona be lauma helaga totona ita noinoi noho. Iehova ese manau taudia edia noinoi do ia kamonai.—Sal. 10:17.
Iehova ese Keristani elda taudia amo ita ia hamaoromaoroa, to ita danu kara ta ita karaia be namo (Paragraf 12, 13 itaia)
Gal. 6:1) Idia be mai manau ida Dirava ena heduru idia tahua, bona ia idia noia laloa kehoa bona aonega ia henia totona. Idia ese eda hekwakwanai idia laloa, bona edia guriguri hegeregerena Dirava ena Hereva bona iseda Keristani pablikeisen idia stadilaia. Unai amo heduru maorona idia henia diba. Bema oi dekenai idia mai bona mai lalokau ida oi idia durua, reana emu dabua ena sitaelo idia herevalaia, edia sisiba do oi abia dae badina ia be Dirava ena lalokau karana, a? Bema unai oi karaia, Iehova ena imana dekenai oi be raro manokana bamona, oi ura ia ese oi do ia hamaoromaoroa.
13 Iehova ese Keristani kongrigeisen bona ena gunalaia taudia ia gaukaralaia ita ta ta ia hamaoromaoroa totona. Hegeregere, bema elda taudia idia itaia iseda hetura kara Iehova ida be ia manoka noho, dala idia tahua ita idia durua totona—to sibona edia aonega dekenai do idia karaia lasi. (14. Ena be Iehova be mai ena siahu, to edena dala ai iseda ura kwalimu ia matauraia?
14 Bema Dirava ese ita ia hamaoromaoroa dalana ita lalopararalaia, unai ese iseda hetura karana iseda tadikaka taihu ida do ia durua, bona iseda teritori ai idia noho taudia bona iseda Baibel stadi taudia ita kara namo henia diba. Baibel negadiai, uro karaia tauna be tano amo raro ia abia bona maoromaoro uro ta ia karaia lasi. To, ia ese raro ia hegaegaelaia guna, anina be raro amo nadi bona momoru ia kokia. Unai hegeregerena, Dirava ese mai edia ura ida iena heduru idia tahua taudia ia hegaegaelaia, unai amo idia ia hamaoromaoroa diba. Idia ia doria lasi unai idia karaia totona, to iena kara maoromaoro taravatudia ia henia, unai amo idia sibona ese edia mauri idia hanamoa diba.
15, 16. Baibel stadi taudia ese edena bamona idia hahedinaraia idia ura Iehova ese idia ia hamaoromaoroa? Haheitalai gwauraia.
15 Australia ai ia noho taihu ta ladana Tessie mani oi laloa. Ia ida ia stadi taihu ia gwau: “Tessie be ia hekwarahi lasi Baibel ena hereva momokani ia abia dae totona. To, ia be gau haida ia karaia lasi, hegeregere, Keristani heboudia dekenai ia lao lasi! Mai guriguri ida unai lau lalohadailaia murinai egu lalona lau hadaia iena stadi lau hadokoa totona. Bena hoa gauna ta ia vara. Emai stadi dokona ai, Tessie ese lau dekenai iena lalohekwarahi ia gwauraia. Ia gwau ia mamia ia be sibona ia koia bamona, badina kasi gadara ia moalelaia. To hari, ena lalona ia hadaia unai gadara do ia rakatania.”
16 Daudau lasi murinai, Tessie be Keristani heboudia ia lao henia matamaia bona Keristani karadia ia hahedinaraia, ena be koikoi turadia ese ia idia hevasehalaia. Taihu ia gwau: “Daudau lasi, Tessie be bapatiso ia abia bona gabeai regula painia gaukara ia hamatamaia, ena be iena natudia be do maragi.” Oibe, Dirava hamoalea totona Baibel stadi taudia ese edia mauri idia hanamoa neganai, ia be idia kahirakahira do ia lao bona idia be uro hairaina ai do ia halaoa.
17. (a) Iehova be Uro Karaia Tauna Badana dainai, emu hemami be edena bamona? (b) Stadi gabena ai dahaka do ita herevalaia?
17 Hari danu, uro haida be imana amo idia karaia, uro karaia tauna be unai ia karaia namonamo. Unai hegeregerena, Uro Karaia Tauna Badana be ita ida ia gaukara namonamo, ia henia sisiba amo ita ia hamaoromaoroa bona iseda kara ia itaia. (Salamo 32:8 duahia.) Oi abia dae Iehova ese oi ia laloa bada, a? Iehova ese oi ia hamaoromaoroa dalana oi itaia, a? Bema oibe, edena kara ma haida ese oi do ia durua, unai amo Iehova vairanai oi be raro manokana bamona? Edena bamona kara do oi dadaraia, unai amo oi be raro aukana ai do oi lao lasi? Bona edena dala ai tama sina be Iehova ida edia natudia idia hamaoromaoroa diba? Stadi gabena ese unai do ia herevalaia.