Namo Lasi Ma Haida Edia Kerere ese Oi ia Hahekwakwanaia
“Mai kudouna ibounai ida do umui gwauatao heheni.”—KOL. 3:13.
ANE: 121 [53], 75 [28]
1, 2. Edena dala ai Baibel ese ia hahedinaraia Iehova ena taunimanima be idia tubu daekau noho?
IEHOVA ena abidadama hesiai taudia tanobada ai, Witnes taudia unai, be ia ese ia abia dae oreana lalonai idia noho. Momokani, idia be goevadae lasi taudia. To, Dirava ena lauma helaga ese tanobada hegegemadai kongrigeisen ibounai ia hakaua noho dainai ia tubu bona ia goada. Iehova bona ena goevadae lasi hesiai taudia ese idia karaia gaudia haida mani ita laloa.
2 Lagani 1914 ai, inai nega dokona ena oremana ia matamaia neganai, Dirava ena taunimanima be momo lasi. To, Iehova ese edia haroro gaukara ia hanamoa. Lagani handred lalonai, kamonai taudia milioni momo ese Baibel ena hereva momokani idia dibaia bona Iehova ena Witnes taudia ai idia lao. Iehova ese unai nega ia herevalaia, ia gwau: “Ladana maragi momokani tauna mai ena famili, be bese badana mai goadana danu do idia lao. Oibe, negana korikori ia ginidae neganai, lau ese inai kara do lau havaraia haraga. Lau inai Lohiabada!” (Isa. 60:22) Inai dina gabedia ai, unai peroveta herevana be ia guguru noho. Unai dainai, tanobada ai Dirava ena taunimanima edia namba ese bese momo edia popiuleisen ia hanaia.
3. Dirava ena hesiai taudia be edena dala ai lalokau idia hahedinaraia?
1 Ioa. 4:8) Iesu be Dirava ena lalokau ia tohotohoa, bona iena murinai idia raka taudia ia hamaoroa: “Umui dekenai taravatu matamata lau henia inai, do umui lalokau heheni . . . . Unai amo taunimanima ibounai do idia diba umui be egu hahediba taudia, bema umui huanai lalokau ia noho.” (Ioa. 13:34, 35) Unai kara be mai anina bada, badina Tanobada besedia edia tuari lalonai dika bada idia vara. Hegeregere, Tanobada Tuari Iharuana ai, taunimanima milioni 55 bamona be ai idia mase. To, Iehova ena Witnes taudia be unai tuari lalonai idia vareai lasi. (Mika 4:1, 3 duahia.) Unai dainai, “taunimanima ibounai edia rara amo [idia] goeva.”—Kara 20:26.
3 Hari danu, Iehova ese ena taunimanima ia durua ena kara badana, lalokau, idia hahedinaraia totona. (4. Dahaka dainai Iehova ena taunimanima idia hutuma idia lao noho be gau namona?
4 Inai tanobada dikana lalonai, Dirava ena taunimanima edia namba ia tubu daekau noho, herevana “inai nega oromana ena dirava,” Satani, ese tanobada ia lohia. (2 Kor. 4:4) Ia ese nius halasia oreadia ia hakaua kerere hegeregerena, inai tanobada ena gavamani danu ia hakaua kerere. To, sivarai namona harorolaia gaukarana do ia koua lasi. Danu, ia diba ena nega be kwadogi dainai, ia hekwarahi tomadiho momokani amo taunimanima ia hakaua siri, bona dala idauidau ia gaukaralaia unai ia karaia totona.—Apok. 12:12.
IEHOVA BADINAIA KARANA IA TOHOA GAUNA
5. Dahaka dainai ma haida ese iseda lalona idia hahisia diba? (Laulau ginigunana herevalaia.)
5 Keristani kongrigeisen ese Dirava bona ma haida lalokau henia karana ia herevalaia. Iesu ia ese hahedinaraia unai do ia vara. Taravatu hereadaena idia henanadailaia neganai, Iesu ia gwau: “‘Namona be Iehova emu Dirava oi lalokau henia mai emu kudouna ibounai, mai emu mauri ibounai, bona mai emu darana ibounai ida.’ Unai taravatu be hereadae bona ia be ginigunana. Iharuana be inai: ‘Namona be emu dekena tauna oi lalokau henia, oi sibona oi lalokau henia hegeregerena.’” (Mat. 22:35-39) Danu, Baibel ese ia hahedinaraia Adamu ena kara dika dainai, ita ibounai ita vara neganai ita be goevadae lasi. (Roma 5:12, 19 duahia.) Unai dainai nega haida kongrigeisen taudia haida edia hereva o kara ese emu lalona ia hahisia diba. Unai ese iseda lalokau Iehova bona ena taunimanima dekenai ia tohoa diba. Unai ia vara neganai, dahaka do ita karaia? Idaunegai, Dirava ena abidadama hesiai taudia danu ese edia hereva bona kara amo ma haida edia lalona idia hahisia, bona edia sivarai Baibel lalonai ese ita ia durua diba.
Bema Eli bona ena natudia edia nega ai oi noho, dahaka do oi karaia? (Paragraf 6 itaia)
6. Edena dala ai ita diba Eli ese ena natudia ia matahakani henia lasi?
6 Hegeregere, Hahelaga Tauna Badana Eli ena natudia be rua ese Iehova ena taravatu idia badinaia lasi. Baibel ia gwau: “Eli ena natuna taudia be lebulebu taudia, bona idia ese Lohiabada idia matauraia lasi.” (1 Sam. 2:12) Ena be edia tamana ese tomadiho momokani abia isi karana ia durua, to iena natudia rua ese kara dika badadia idia karaia. Eli be ia diba bona idia ia sisiba henia be namo, to unai ia karaia lasi. Unai dainai, Dirava ese Eli ena bese taudia ia hahemaoro henidia. (1 Sam. 3:10-14) Gabeai, iena bese taudia be hahelaga gaukarana idia karaia lasi. Bema Eli ena nega ai oi noho, Eli ese ena natudia edia kara dika ia koua lasi dainai dahaka do oi karaia? Unai ese oi do ia hahekwakwanaia bona Dirava hesiai henia karana do oi rakatania, a?
7. Edena dala ai Davida be kara dika badana ia karaia, bona Dirava be dahaka ia karaia?
7 Iehova ese Davida ia lalokau henia bona “ia ura henia.” (1 Sam. 13:13, 14; Kara 13:22) To gabeai Davida be Bataseba ida ia heudahanai, bona ia rogorogo. Iena adavana, Uria, be ia tuari noho lalonai unai ia vara. Ia lou mai neganai, Davida ese dala ia karaia toho ia be Bataseba ida ia mahuta hebou totona, unai amo taunimanima do idia laloa unai natuna ena tamana be Uria. King ese ia gwauraia gauna be Uria ese ia karaia lasi, unai dainai Davida ese dala ia karaia bena Uria be tuari ai idia hamasea. Davida ese ia karaia karana dainai dika ia davaria. Oibe, ia bona ena bese taudia ese dika idauidau idia davaria. (2 Sam. 12:9-12) To, Dirava ese ia hebogahisi henia, badina Iehova vairanai “mai maoromaoro bona momokani” ida ia raka. (1 Kin. 9:4) Bema unai nega ai oi be Dirava ena taunimanima ida oi noho, dahaka do oi karaia? Davida ena kara kererena ese oi do ia hahekwakwanaia, a?
8. (a) Edena dala ai aposetolo Petero ese ena hereva ia badinaia lasi? (b) Petero ia kerere murinai, dahaka dainai Iehova ese ia gaukaralaia noho?
8 Baibel lalonai haheitalai ma ta be aposetolo Petero ena sivarai. Iesu ese Petero ia abia hidi ena aposetolo tauna ai do ia lao, to nega haida Petero be ena hereva o kara dainai ia lalohisihisi. Hegeregere, nega ta aposetolo taudia ese Iesu idia rakatania. Petero be guna ia gwau, bema haida be unai idia karaia, ia be do ia karaia lasi. (Mar. 14:27-31, 50) To, Iesu idia dogoatao neganai, aposetolo taudia ibounai—Petero danu—ese ia idia rakatania. Petero ese danu nega toi Iesu ia gorea. (Mar. 14:53, 54, 66-72) To, gabeai Petero be ena kara dainai ia lalohisihisi bada, bona Iehova ese ia gaukaralaia noho. Bema unai nega ai oi be hahediba tauna ta, Petero ena kara ese emu Iehova badinaia karana do ia hadikaia, a?
9. Dahaka dainai oi abia dae momokani Dirava ena kara be maoromaoro?
9 Ita be haheitalai haida sibona ita herevalaia, idia ese edia kara amo ma haida edia lalona idia hahisia. Guna bona hari danu momo edia sivarai ita herevalaia diba, idia haida be Iehova idia hesiai henia lalonai kara dika idia karaia bona ma haida edia lalona idia hahisia. Gau badana be inai. Oi be dahaka do oi karaia? Edia kerere ese oi do ia hahekwakwanaia, bena Iehova
bona ena taunimanima, kongrigeisen taudia danu, do oi rakatania, a? Eiava do oi laloa Iehova ese nega do ia henia kerere tauna ia helalo-kerehai, ena kerere ia hamaoromaoroa, bona kara maorona ia karaia totona, a? Ma danu, nega haida kara dika idia karaia taudia ese Iehova ena hebogahisi karana idia dadaraia bona idia helalo-kerehai lasi. Unai ia vara neganai, oi abia dae momokani Iehova ese nega korikorina ai unai kerere tauna do ia hahemaoro henia, bona reana orea amo do idia atoa siri, a?DIRAVA OI BADINAIA NOHO
10. Iesu ese Iuda Iskariote bona Petero edia kerere amo dahaka ia dibaia?
10 Baibel lalonai, Dirava ena hesiai taudia haida edia sivarai ese ia hahedinaraia idia be Iehova bona ena taunimanima idia badinaia noho, ena be ma haida ese edia lalona idia hahisia. Hegeregere, Iesu be hanuaboi ibounai ena Tamana ia guriguri henia murinai, ia ese aposetolo 12 ia abia hidi. Idia ta be Iuda Iskariote. Gabeai, Iuda ese Iesu ia samania neganai, unai ese Keriso ena hetura karana, iena Tamana Iehova ida, ia hadikaia lasi. Petero ese ia gorea negana ai danu be unai bamona. (Luka 6:12-16; 22:2-6, 31, 32) Iesu ia diba unai be Iehova eiava ena taunimanima edia kerere dainai ia vara lasi. Iesu ese ena gaukara namona ia karaia noho, ena be ena murinai idia raka taudia haida ese ena lalona idia hahisia. Iehova ese ia hanamoa bona mase amo ia hatorea isi, unai amo dala ia kehoa Iesu be guba Basileiana ena King ai ia lao totona.—Mat. 28:7, 18-20.
11. Baibel ese Iehova ena taunimanima be edena bamona ia herevalaia?
11 Iesu ese Iehova bona ena taunimanima ia abidadama henia momokani. Oibe, inai dina gabediai Iehova ese ena hesiai taudia amo ia hagugurua gaudia ita laloa neganai, ia be moale gauna, ani? Tanobada hegegemadai, taunimanima ma haida be hereva momokani idia harorolaia lasi, badina Iehova ese idia ia hakaua lasi, hari ena lalotamona kongrigeisen taudia ia hakaua hegeregerena. Isaia 65:14 ese Dirava ena taunimanima huanai ia noho maurina be inai bamona ia herevalaia: “Kamonai! Egu hesiai taudia ese ane do idia abia, edia moale be bada.”
12. Ma haida edia kerere be edena bamona do ita laloa?
12 Iehova ena hesiai taudia be idia karaia gau namodia dainai idia moale, badina idia be Iehova ese ia hakaua. To, Satani ese ia biagua tanobada ia dika ia lao lalonai, taunimanima be idia taitai noho. Unai dainai Dirava ena hesiai taudia haida edia kerere dainai Iehova o iena kongrigeisen ita badu henia be aonega karana lasi. Namona be Iehova bona ena dala ita badinaia noho bona ma haida edia kerere ita laloa dalana ita dibaia.
KERERE LALOA DALANA
13, 14. Dahaka dainai ma ta ena kara ita haheaukalaia be namo? (b) Dahaka gwauhamata ita laloatao be namo?
13 Bema Dirava ena hesiai tauna ta ena hereva o kara amo iseda lalona ia hahisia, dahaka do ita karaia? Baibel ena hakaua hereva namona be inai: “Do oi badu haraga lasi. Bona bema badu be emu lalona dekenai oi dogoatao noho, inai be kavakava taudia edia kara.” (Had. 7:9) Lagani 6,000 gunanai, Eden ai goevadae taudia rua idia noho, to idia kara dika dainai hari ita be goevadae lasi. Ita goevadae lasi dainai kerere ita karaia diba. Unai dainai, namo lasi ita laloa iseda tadikaka taihu be gau ibounai idia karaia neganai do idia kerere lasi. Bona edia kara ese Dirava ena taunimanima huanai ita davaria moalena ia hadikaia lasi be namo. Danu, bema ma haida edia kerere ita laloa momo unai ese ita do ia hahekwakwanaia bona Iehova ena orea ita rakatania diba. Bema unai ia vara, ita ese Iehova ena ura ita karaia ena hahenamo do ita haboioa sibona lasi, to Dirava ena tanobada matamata ena helaro ita haboioa diba danu.
14 Iseda moale bona helaro ita dogoatao noho totona, namona be Iehova ena gwauhamata ita laloa, ia gwau: “Lau ese tanobada matamata bona guba matamata lau karaia noho, bona kara gunadia be do idia laloa lou lasi, do idia laloaboio momokani.” (Isa. 65:17; 2 Pet. 3:13) Namo lasi ma ta ena kerere oi laloa momo dainai unai hahenamo namodia oi reaia.
15. Ma haida be kerere idia karaia neganai, Iesu ia gwau dahaka do ita karaia?
15 To, ita be tanobada matamata dekenai ita do noho lasi dainai, haida ese edia hereva o kara amo iseda lalona idia hahisia neganai, Dirava ena lalohadai unai kara dekenai ita laloa be namo. Hegeregere, ita laloatao diba hakaua herevana ta be Iesu ena hereva, ia gwau: “Bema taunimanima edia dika umui gwauatao, emui guba Tamana ese emui kerere danu do ia gwauatao, to bema taunimanima edia dika umui gwauatao lasi, emui guba Tamana ese emui dika danu do ia gwauatao lasi.” Laloatao, Petero ia henanadai bema “nega 7” ta do ita gwauatao neganai, Iesu ia gwau: “Oi lau hamaoroa, nega 7 lasi to nega 77.” Unai ese ia hahedinaraia, Iesu ena hereva ena anina be hanaihanai ta ena kerere ita gwauatao be namo. Unai be iseda tahua gauna ginigunana bona badana.—Mat. 6:14, 15; 18:21, 22.
16. Iosepa be dahaka haheitalai namona ia hahedinaraia?
16 Kerere hamaoromaoroa dalana namona be Iosepa ese ia hahedinaraia, ia be Iakobo bona Rahela edia natuna ginigunana. Iosepa ena kakadia 10 be ia dekenai idia mama, badina edia tamana ese ia ia ura henia bada. Bena Iosepa be igui hesiai tauna bamona idia hoihoilaia. Lagani momo idia hanaia murinai, Iosepa ese Aigupito ai gaukara namona ia karaia dainai, ia be unai tano ena lohia ena sisiba henia tauna ai ia lao. Israela ai doe ia vara neganai, Iosepa ena tadikakadia be Aigupito dekenai idia mai aniani idia hoia totona, to idia diba lasi unai be Iosepa. Iosepa ese ena siahu ia gaukaralaia diba ena tadikaka ia panisidia totona, badina idia ese guna ia idia kara auka henia. To, ia ese ena tadikakadia ia tohoa, badina ia ura diba bema idia ese edia kara idia haidaua. Ia itaia ena tadikaka ese edia kara idia haidaua momokani neganai, Iosepa be idia dekenai sibona ia gwauraia hedinarai. Gabeai ia gwau: “Umui gari lasi. Dohore lau naria umui, bona umui emui natuna danu dohore lau naridia.” Baibel ma ia gwau: “Hereva namo dekenai edia gari ia kokia, bona edia lalodia be maino idia abia.”—Gen. 50:21.
17. Ma haida idia kerere neganai, dahaka do oi karaia?
17 Danu, aonega karana be ita laloatao, ita ibounai be mai eda kerere danu, reana ita ese ma haida edia lalona ita hahisia noho. Bema ita laloparara ita be unai ita karaia noho, Baibel ia gwau namona be ita hahisia tauna dekenai ita lao bona kerere ita hamaoromaoroa. (Mataio 5:23, 24 duahia.) Ma haida be iseda kerere idia laloa lasi neganai, ita moale, unai dainai ma haida dekenai unai ita karaia danu be namo. Kolose 3:13 ia gwau: “Bema ta be badina ta dainai ma ta dekenai ia maumau, ta ta emui kara do umui haheaukalaia noho bona mai kudouna ibounai ida do umui gwauatao heheni. Iehova ese mai kudouna ibounai ida umui ia gwauatao hegeregerena, namona be umui danu be unai bamona do umui karaia.” Korinto Ginigunana 13:5 ia gwau, Keristani lalokauna be “ta ena kerere ia laloatao noho lasi.” Bema ma haida edia kerere ita gwauatao, Iehova ese iseda kerere do ia gwauatao. Oibe, Keristani dalana be ita kerere neganai iseda hebogahisi Tamana ese ita kara henia dalana ita tohotohoa.—Salamo 103:12-14 duahia.