Gima Kohorona matamatadia oi duahia neganai oi moalelaidia, a? Henunai idia noho henanadai mani oi haerelaidia:

Dahaka dainai guna Iehova ese Israela taudia edia tuari karana ia koua lasi?

Iehova be lalokau Diravana. To, ia ese tuari ia havaraia diba, bema ena taunimanima idia kara dika bona haida ese idia dagedage henidia. Tuari ena nega bona daika ese unai tuari do ia karaia be Dirava sibona ese abia hidi ia karaia.​—w15-E 11/1, rau 4-5.

Tama sina ese dahaka mai anina bada gaudia idia karaia diba unai amo edia natuna idia hadibaia Iehova idia hesiai henia totona?

Tama sina ese edia natuna idia lalokau henia bona manau karana idia hahedinaraia be namo. Danu gau badana be tama sina ese laloa kehoa idia hahedinaraia bona edia natudia edia hemami idia lalopararalaia.​—w15 11/15, rau 9-11.

Dahaka dainai do ita gwau lasi pope be Petero ena gabu ia abia?

Mataio 16:17, 18 ese ia hahedinaraia lasi aposetolo Petero ese Keristani kongrigeisen do ia gunalaia. To Baibel ia gwau Petero ese Iesu ia hereaia lasi, badina Iesu be kongrigeisen ena kona nadi badana. (1 Pet. 2:4-8)​—w15 12/1, rau 12-14.

Ita do hereva lasi neganai, dahaka ita laloa guna?

Iseda malana ita gaukaralaia namonamo totona, namona be inai ita laloa (1) edena nega ai do ita hereva (Had. 3:7), (2) dahaka do ita hereva (Aon. 12:18), bona (3) edena dala ai do ita hereva (Aon. 25:15).​—w15 12/15, rau 19-22.

Keristani taudia ese dahaka koikoi karadia idia dadaraia be namo?

Keristani taudia momokanidia ese koikoi karadia bona ma haida edia ladana hadikaia karadia idia dadaraia. Idia be koikoi herevadia amo ma haida idia hadikaia lasi bona dala kererena ai moni idia abia lasi.​—wp16.1, rau 5.

Baibel ai idia gwauraia “hahelaga taudia badadia” be daidia?

Inai hereva “hahelaga taudia badadia” be dubu ai hahelaga gaukara idia karaia taudia ia herevalaia, bona guna hahelaga gaukara idia karaia bona idia kokidia taudia danu ia herevalaia.​—wp16.1, rau 10.

Memorial paraoa bona wain ia abia tauna be edena bamona do oi kara henia?

Keristani taudia ese unai bamona taudia edia ladana do idia abia isi lasi. Horoa taudia momokanidia idia ura lasi edia ladana do ita abia isi; bona taunimanima vairanai sibona idia gwauraia hedinarai lasi. (Mat. 23:8-12)​—w16.01, rau 23-24.

Aberahamo be Dirava ena turana ai ia lao karana amo dahaka ita dibaia?

Aberahamo be reana Sema amo Dirava ia dibaia. Bona Dirava ese ia bona ruma bese ia kara henia dalana amo diba ia abia. Ita danu ese unai ita karaia diba.​—w16.02, rau 9-10.

Baibel edia karoa bona siri ena namba be edena bamona ia matamaia?

Lagani 1200 gunanai ia noho tauna Stephen Langton ese Baibel be edia karoa ta ta ai ia atoa. Iuda ena torea hanai tauna ese Baibel ena siri be Heberu Baibel ai ia torea hanai bona lagani 1000 murinai diba bada tauna, Robert Estienne ese Keristani Greek Toretore ai danu ia torea hanai.​—wp16.2, pp. 14-15.

Satani ese Iesu ia dibagania neganai, dubu helaga korikorina dekenai ia hakaua lao, a?

Ita diba momokani lasi. Mataio 4:5 bona Luka 4:9 ese reana ia hahedinaraia Iesu be ena matahanai lalonai dubu helaga dekenai ia hakaua lao o reana dubu ena atai herea gabuna ta dekenai ia gini.​—w16.03, rau 31-32.

Edena dala idauidau ai emu haroro gaukara be hanuaboi ena paripari bamona?

Hanuaboi ena paripari be hodahoda paraka ese ia havaraia. Hanuaboi ena paripari be Dirava ena harihari gauna. (Deu. 33:13) Dirava ena taunimanima edia gaukara hebou karana be unai bamona.​—w16.04, rau 4.