Idia ese idaunegai Ierusalema hanuana idia hadikaia bona Aramagedono ai Satani ena tanobada dikana do idia hadikaia ore anerudia idia laulaulaia. Dahaka dainai unai diba matamatana be mai anina bada?

Lagani 607 B.C.E. ai, Ierusalema idia do hadikaia lasi neganai, Esekiela ese unai hanua lalonai idia vara kara dikadia ia itaia. Danu, ia ese matahanai ta amo unai hanua dekenai do ia vara gauna ia itaia. Ia ese tatau 6 ia itaia, edia imana dekenai tuari kaia idia dogoatao. Danu, edia huanai tau ta ia itaia, “ia be dabua aukana ia karaia, bona mai ena torea peni” ta danu. (Ese. 8:6-12; 9:2, 3) Unai tauna be inai oda ia abia: “Ierusalema hanua do oi raka hanaia bona kara dika rohoroho ibounai, hanua lalonai idia karaia noho, dainai idia taitai noho, bona idia lalohisihisi noho taudia edia bagudia dekenai maka do oi atoa.” Bena, tuari kaia idia dogoatao tatau 6 be oda idia abia hanua lalonai maka idia abia lasi taudia ibounai idia alaia mase totona. (Ese. 9:4-7) Unai matahanai amo dahaka ita dibaia, bona torea peni ia dogoatao tauna be daika?

Unai peroveta herevana be lagani 612 B.C.E. ai idia torea, bona unai peroveta herevana ia guguru negana ginigunana be Babulonia ena ami taudia ese Ierusalema idia hadikaia ore​—unai be lagani 5 murinai. Ena be kaivakuku idia tomadiho henia Babulonia taudia ese Ierusalema idia hadikaia, to Iehova be idia ia gaukaralaia. (Ier. 25:9, 15-18) Oibe, Iehova ese idia ia gaukaralaia ia idia gwau edeede henia taudia ia panisia totona. To do ia vara dika lalonai taunimanima do idia hamasea kava lasi. Kara maoromaoro taudia be kara dika taudia ida do idia hamasedia lasi. Iehova ese lalokau dalanai unai taoni ai idia noho kara dika idia inai henia Iuda taudia ia hamauria totona.

Esekiela be makaia eiava hadikaia gaukarana lalonai ia noho lasi. To, aneru ese unai gaukara do idia karaia. Esekiela ena peroveta herevana dainai, guba ai do ia vara gauna ita itaia diba. Iehova ese aneru dekenai kara dika taudia hadikaia gaukarana sibona ia henia lasi, to kara maoromaoro taudia hamauria totona hapararaia gaukarana ia henia danu. *

Guna ita gwau Esekiela ena mata hanai, hari do ia guguru gauna lalonai, torea peni ia dogoatao tauna be orena taudia ia laulaulaia. Bona ita laloa taunimanima be sivarai namona idia kamonai neganai, anina be hahemauri ena maka idia abia unai. To vanegai laganidia ai ita laloparara, unai lalohadai ita haidaua be namo. Mataio 25:31-33 ese ia hahedinaraia, Iesu be taunimanima kota henia gaukarana ia karaia. Hisihisi badana lalonai, kota ginigabena do ia karaia, mauri do idia abia mamoe bamona taudia, be do idia mase nanigosi bamona taudia amo do ia hapararaia.

Inai diba matamatana ita lalopararalaia neganai, Esekiela ena matahanai amo dahaka ita dibaia? Dala 5 ai ita ia hadibaia.

1. Ierusalema idia do hadikaia lasi neganai, Esekiela be Ieremia danu gima gaukarana idia karaia, guna Isaia ia karaia bamona. Hari, Iehova ese horoa orea maragi taudia ia gaukaralaia ena taunimanima do idia ubua totona bona hisihisi badana ia do mai lasi lalonai taunimanima idia hadibaia. Bona Keriso ena hesiai taudia be unai hadibaia gaukara idia durua danu.​—Mat. 24:45-47.

2. Esekiela be hahemauri totona makaia gaukarana ia karaia lasi, hari Dirava ena hesiai taudia  danu be unai bamona. To aneru edia henari henunai, idia ese Iehova ena hadibaia herevana be taunimanima dekenai idia harorolaia.​—Apok. 14:6.

3. Esekiela ena nega lalonai, taunimanima be edia baguna dekenai maka korikori idia abia lasi. To hari danu be unai bamona. Taunimanima be hahemauri ena maka idia abia totona, dahaka idia karaia be namo? Namona be sivarai namona harorolaia gaukara idia abia dae, Keristani kara namodia idia hahedinaraia, Iehova dekenai edia mauri idia gwauhamatalaia bona Keriso ena tadikaka idia durua. (Mat. 25:35-40) Unai hakaua hereva idia badinaia taudia be hisihisi badana lalonai, hahemauri ena maka do idia abia.

4. Hari inai negai, torea peni ia dogoatao tauna be Iesu Keriso ia laulaulaia, ia ese hahemauri do idia abia taudia makaia gaukarana do ia karaia. Hisihisi badana lalonai mamoe bamona hutuma bada taudia be edia maka do idia abia. Unai ese idia do ia hakaua vareai tanobada ai mauri hanaihanai do idia abia totona.​—Mat. 25:34, 46.

5. Tuari kaia idia dogoatao tatau 6 hegeregerena, Iesu bona ena guba tuari oreana ida be tanobada besedia bona kara dika ibounai do idia hadikaia ore.​—Ese. 9:2, 6, 7; Apok. 19:11-21.

Unai mai anina bada gauna ita lalopararalaia karana ese ia hahedinaraia, ita abia dae momokani Iehova ese kara maoromaoro taudia be kara maoromaoro lasi taudia ida do ia hadikaia lasi. (2 Pet. 2:9; 3:9) Danu Baibel ese hanaihanai ita ia hadibaia, hari ita karaia haroro gaukarana ita laloa bada be namo. Dokona ia do ginidae lasi lalonai, taunimanima ibounai ese unai hadibaia herevana idia kamonaia be namo!​—Mat. 24:14.